5
Jaꞌ cu mimanil tiꞌ,
laan jaxca junoj pat,
eyman chi etextoj.
Kotaj pax oj,
jaꞌ yet oj lawoj jun cu mimanil tiꞌ,
ey junxa oj yakꞌ Dios ey jon bꞌey satcan.
Jaꞌ junxa tuꞌ,
cꞌam bꞌakꞌin oj lawoj.
Laan jaxca junoj na caw watxꞌ scawxi,
yutol man ánima oj jix waꞌneni.
2 Yel toni,
jaꞌ yet ey jon ecꞌ yin cu mimanil tiꞌ,
chi el kaw yetoj,
yutol chi koche chi cu ecꞌtoj bꞌey junxa cu mimanil,
jaꞌton jun oj cu kꞌan bꞌey satcan,
jun jaxca na tuꞌ.
3 Oj ale oc jun tuꞌ kin jaxca junoj pichile,
yet watxꞌ man tꞌiranoj jon eloj.
4 Jaꞌ yet ey jon ecꞌ yin mimanile tiꞌ,
chi el kaw yet chi kilon syaꞌilal.
Man tol oj chi koche chi iꞌle ecꞌ jun cu mimanil tiꞌ,
tol chi koche chi akꞌle junojxa cu mimanil,
yet watxꞌ chi qꞌueyel jun cambꞌeal ye tiꞌ,
yet oj cu chaꞌon cu kꞌinal tol ey cꞌal yin tobꞌalkꞌinal.
5 Yu jun tiꞌ,
yuxan jix cu swaꞌne Dios.
Jix yakꞌon pax Yespíritu ey jon,
yet watxꞌ chi kotajne eloj,
tol caw yel oj cu chaꞌ wan tiꞌ tet.
6 Yu jun tuꞌ,
tobꞌalkꞌinal chi kaoc Dios yipoj cu cꞌul.
Kotaj,
tol yajbꞌan ey jon ecꞌ yin mimanileal tiꞌ,
cꞌam jon to ecꞌ bꞌey eyecꞌ Naj Kaawil.
7 Jaꞌ yet chi cu ecꞌ yul yibꞌankꞌinal tiꞌ,
asan Dios chi kaoc yipoj cu cꞌul.
Manaj tzet chi kil yetoj cu sat bꞌey chi kaoc cu cꞌul.
8 Yu jun tuꞌ,
caw eyoc Dios yipoj cu cꞌul.
Tol chi koche chi cu bꞌejcan cu mimanil tiꞌ,
yet watxꞌ chi skeꞌ cu too bꞌey eyecꞌ Naj Kaawil.
9 Yu jun tuꞌ,
tobꞌalkꞌinal chi cu sey tzet watxꞌ chi kute cu bꞌa,
yet watxꞌ chi tzalabꞌi Naj Kaawil ketoj,
caxcꞌal ey jon ecꞌ yin mimanileal tiꞌ,
caxcꞌal cꞌamaj.
10 Yutol sowalil oj cu ecꞌtoj sattaj sdespacho bꞌey chi naꞌle oc kin yu Cristo,
yet watxꞌ junjun jon,
oj cu chaꞌ spaj tzet jix el kunen yet ey jon ecꞌ yin mimanileal.
Jatacꞌalaꞌ,
ta watxꞌ jix el kuneni,
ma pena.
Ey Watxꞌcꞌulal Kin Yetoj Dios Yu Cristo
11 Jaon tiꞌ,
jaꞌ tet Naj Kaawil ey cu xiwcꞌulalil.
Yu jun tuꞌ,
yuxan chi kakꞌ cꞌal kip cu jejon snaꞌ ebꞌ ánima.
Yotaj xa Dios cu naꞌbꞌal.
Chi woche che yotajne pax el cu naꞌbꞌal tuꞌ.
12 Man lalan oj kalon cu bꞌa watxꞌil ey jex junelxa.
Tol chi koche tol man chex qꞌuixwi ey jon,
yet watxꞌ chi skeꞌ je pajtzen je bꞌa tet ebꞌ chi smimanbꞌane sbꞌa yu wan tzet chi kil yin yetoj cu sat.
Jal tzet ey yin spixan ebꞌ,
cꞌam niꞌoj chi snaꞌ ebꞌ,
ta watxꞌ ma cꞌamaj.
13 Jaon tiꞌ,
caxcꞌal loco kil-le oc jon,
yu cꞌal kakꞌon servil Dios,
yuxan queytuꞌ kil-le ocoj.
Caxcꞌal watxꞌ cu jolom,
yu cꞌal jex kakꞌon servil yetoj Dios,
yuxan queytuꞌ kili.
14 Yutol,
jaꞌ scamcꞌulal Cristo chi akꞌon kunne.
Yutol kotaj,
tol ey jun jix cam cu qꞌuexeloj cu masanil.
Yu jun tuꞌ,
yuxan jaxca tol camnaj jon yetoj cu masanil.
15 Jaꞌ Cristo jix cam cu qꞌuexeloj cu masanil,
yet watxꞌ,
jaꞌ jaon eyxa cu kꞌinal yu tuꞌ,
cꞌamxa chi cu bꞌeybꞌalne jaxca chi koche junjun jon.
Tol chi cu bꞌeybꞌalne jaxca chi yoche Naj jix cam cu qꞌuexeloj,
catuꞌ jix pitzcꞌu pax a yu cu watxꞌiloj.
16 Yu jun tuꞌ,
jaon tiꞌ,
cꞌamxa chi cu naꞌoc yin junoj mactxequel,
yu tzet utbꞌil yili.
Jaꞌ yet yalantoj,
caxcꞌal jix naꞌle oc yin Cristo ku yu tzet utbꞌil yili,
manche xa cu naꞌ pax tinaniꞌ yu jaxca tuꞌ jix kute cu bꞌa.
17 Jaꞌ mactxequel junxane yeoc yetoj Jesucristo acꞌ ánima xa,
jaꞌ sbꞌeybꞌal yet peyxa,
chi lawi can eloj,
jaꞌ sbꞌeybꞌal tinaniꞌ,
acꞌ xa.
18 Masanil wan chi wal tiꞌ,
jaꞌ wan watxꞌcꞌulal tiꞌ,
jaꞌ Dios chi akꞌon ey jon.
Asan yu Cristo,
yuxan jix yakꞌ mimancꞌulal Dios kin,
catuꞌ ey watxꞌcꞌulal kin yetoj Dios.
Catuꞌ jix yakꞌon kopiso kakꞌon watxꞌcꞌulal xol ebꞌ ánima yetoj Dios.
19 Chi yal yeloc apnoj jun tiꞌ,
tol eyoc Dios yin Cristo yet jix julecꞌoj,
yet watxꞌ ey watxꞌcꞌulal yin ebꞌ ánima masanil yetoj Dios.
Ma xa yatoj spenail ebꞌ yibꞌan.
Jaꞌ jix aon can oc jun kꞌane tiꞌ yul cu kꞌabꞌ yu cu ecꞌ kalon eloj tzet utbꞌil chi yun yoc ánima yin watxꞌcꞌulal yetoj Dios.
20 Yu jun tuꞌ,
ẍejabꞌ Cristo kei.
Jaxca tol jaꞌcaw Dios lalan yoc tean je yin yet lalan kalon ey jex tuꞌ.
Yu jun tuꞌ,
jaon ton tiꞌ,
ey jon oc sqꞌuexeloj Cristo,
yet chi cu oc tean ey jex,
yet watxꞌ chex oc yin watxꞌcꞌulal yetoj Dios.
21 Jaꞌ Cristo,
cꞌam niꞌoj spenail jix el yuneni.
Tol jix ale can oc masanil cu penail yibꞌan Naj yu Dios.
Yu jun tuꞌ,
yuxan jaꞌ tinaniꞌ,
yin Cristo watxꞌ jon xa yul sat Dios.