4
Yu jun tuꞌ,
cꞌam chi caabꞌcon a cu cꞌul,
yutol jix okꞌ scꞌul Dios kin,
catuꞌ jix yakꞌon jun kopiso tiꞌ.
2 Ey wan tzet chi el yunen ánima yin ewantajil,
yutol qꞌuixwiltaj.
Jal jaon tiꞌ xin,
bꞌejbꞌil xa can wan tuꞌ ku yin junelne.
Cꞌam junoj comon kꞌane chi etnen ánima chi katoj xol skꞌane Dios.
Yutol asan tzetyetal yel,
asan chi kalaꞌ.
Jaxca ton tiꞌ chi kute cu txꞌoxon can el kopiso tet junjun mactxequel yul sat Dios,
yet watxꞌ chi naꞌcha el yu ebꞌ tzet keloc apnoj.
3 Jaꞌ yet chi cu ecꞌ kalon el skꞌaneal yet colbꞌanile,
ey ton mac cꞌam chi naꞌcha el yu,
jaꞌton ebꞌ lalan sqꞌueyecꞌoj.
4 Jaꞌ ebꞌ tuꞌ,
cꞌam chi yaoc ebꞌ yin scꞌul.
Yu jun tuꞌ,
chi akꞌle xacꞌal etex el snaꞌbꞌal ebꞌ yu naj sdiosal jun yul yibꞌankꞌinal tiꞌ.
Jaxca tol jaꞌ naj chi akꞌon qꞌueyel sat ebꞌ,
yet watxꞌ cꞌam chi yil jun sajkꞌinal chi tit yin skꞌaneal Cristo.
Jaꞌton Cristo caw miman yeloc apnoj,
caw laan yetoj Dios.
5 Jaꞌ yet chi cu ecꞌ kalon eloj,
manaj cu kꞌaneal chi cu ecꞌ kaleloj.
Tol asanne yu chi ecꞌ kaleloj,
tzet utbꞌil tol jaꞌ Jesucristo,
Kaawil.
Chi kalontej,
tol je yakꞌomal servil kei,
yutol ey cu camcꞌulal yin Jesús.
6 Chi kun jaxca tuꞌ,
yutol yalnaj can Dios jaxca tiꞌ:
“Jaꞌ xol kꞌejkꞌinal tiꞌ,
txeclo ojabꞌ a sajkꞌinal,”
ẍi.
Jaꞌcaw Dios tuꞌ jix aontej sajkꞌinal yin cu pixan,
yet watxꞌ jaꞌ jun sajkꞌinal tuꞌ chi akꞌon kotajne eloj,
tzet utbꞌil tol caw miman swatxꞌil Dios.
Jaꞌ yin Jesucristo,
jatuꞌ chi txeclo el swatxꞌil Dios tuꞌ.
Asan Dios Chi Kaoc Yipoj Cu Cꞌul
7 Ey ton jun tzetyetal caw watxꞌ ey,
ey jon,
jal jon jaon tiꞌ,
laan jon jaxca junoj txꞌotxꞌ cꞌuanbꞌal,
yutol cꞌam niꞌoj keloc apnoj.
Yu jun tuꞌ chi txeclo eloj,
tol jaꞌ jun miman yipal tuꞌ,
man ketoj,
asan Dios ey yet.
8 Jaxca tol joyan oc syaꞌilal kin,
cꞌam cꞌal chi cu can yalan yu.
Ey jon oc yin somcꞌulalil,
cꞌam cꞌal chi kakꞌ cꞌal somcha el cu cꞌul.
9 Caw chi cu etnele bꞌey chi cu eqꞌui,
cꞌam cꞌal chi cu bꞌejlecan cu txꞌojli.
Chi cu makꞌle ecꞌ telnaoj,
cꞌam cꞌal chi cu lawi el yin junelne.
10 Yal cꞌal bꞌey chi cu eqꞌui,
chi kabꞌ syaꞌil yetoj cu mimanil,
jaxca jix yun yabꞌen syaꞌilal camich Naj Cristo.
Chi ecꞌ el wan tiꞌ kibꞌan,
yu xeclo eloj,
tol eyoc skꞌinal Jesús kin.
11 Yajbꞌan iquis jon,
ey cꞌaltej camich kibꞌan tobꞌalkꞌinal yu cꞌal Jesús.
Chi kun jaxca tuꞌ,
yet watxꞌ lalan xeclo el skꞌinal Jesús yin cu mimanil cambꞌeal ye tiꞌ.
12 Yu jun tuꞌ,
jaon tiꞌ,
eyxa oc camich kibꞌan.
Jal jex xin,
eyxa je kꞌinal tol ey cꞌal yin tobꞌalkꞌinal.
13 Jaꞌ yul An Juun Tzꞌibꞌebꞌilcanoj,
ey jun mactxequel jix alon can jaxca tiꞌ:
“Jix walel skꞌane,
yutol jix waoc jin cꞌul yin,
tzet utbꞌil tol yel,”
ẍi yul An Juun tuꞌ.a
Jaon tiꞌ,
laan chi kute kaon oc cu cꞌul yin yetoj.
Chi kalon pax eloj,
yutol chi ka pax oc yin cu cꞌul.
14 Kotaj,
tol jaꞌ Naj mac jix akꞌon pitzcꞌu a Naj Kaawil Jesús xol ebꞌ camnaj,
jaꞌ oj cu akꞌon pax pitzcꞌu a yu Jesús.
Oj jex pitzcꞌu pax a ketoj,
catuꞌ oj cu yiꞌontoj bꞌey eyecꞌ tuꞌ.
15 Masanil wan jix wil tiꞌ an,
je yu yuxan chi jul kibꞌan.
Jaxca ton tiꞌ chi elol kibꞌan,
yet watxꞌ ecꞌal mac chi chaꞌon swatxꞌcꞌulal Dios.
Yetoj pax oj,
ecꞌal mac chi yal yu diosalil tet Dios yu.
Jaxca ton tiꞌ oj yun xeclo eloj,
tol miman swatxꞌil Dios.
16 Yu jun tuꞌ,
caw cꞌam bꞌey chi caabꞌcon a cu cꞌul.
Caxcꞌal lalan yichambꞌi cu mimanil tiꞌ,
jal pax cu pixan,
tol chi acꞌbꞌi junjun cꞌu.
17 Jaꞌ tzet chi jul kibꞌan,
niꞌanxane yeloc apnoj yul cu sat,
eyman cꞌal chi ecꞌ eloj.
Yu jun tuꞌ xin,
tol oj cu chaꞌ jun tzet caw miman yeloc apnoj.
Jaꞌ jun tzetyetal tuꞌ,
miman swatxꞌil ey cꞌal ecꞌ yin tobꞌalkꞌinal.
18 Cꞌam chi kaoc cu naꞌbꞌal yin tzet chi kil yetoj cu sat,
yutol jaꞌ tzet chi kil tuꞌ,
eyman cꞌal chi lawi.
Jaꞌ tzet cꞌam chi kilaꞌ,
jaꞌ ojabꞌ tuꞌ chi kaoc cu naꞌbꞌal,
yutol jaꞌ wan tzet cꞌam chi kiloc tuꞌ,
ey cꞌal yin tobꞌalkꞌinal.