Jaꞌ yet chi kalontoj wan tiꞌ ey jex,

¿chim je naꞌ tol lalan kalon oc cu bꞌa watxꞌil ey jex junelxa?

Man sowalil oj chi cu txꞌox cu carta chi cu abꞌenen oc ey jex,

jaxca chi yute sbꞌa wanxa ebꞌ.

Man pax sowalil oj chi cu kꞌan je carta chex abꞌenen oc ey jon jaxca chi yute sbꞌa wanxa ebꞌ.

2 Yutol jaex caw lalan je txꞌoxon eloj,

tol ey ton kopiso.

Laan jex jaxca junoj carta tzꞌibꞌebꞌil oc yin cu pixan,

yutol chi skeꞌ yilon masanil ánima tzet je yei.

3 Jaxca junoj carta tzꞌibꞌebꞌil yu Cristo,

jaon xa inen ocoj,

quey jex tuꞌ.

Jaꞌ jun jaxca carta tiꞌ,

man yetoj tinta jix stzꞌibꞌen canoj,

yutol jaꞌ Yespíritu Dios iquis cꞌal tobꞌalkꞌinal,

jaꞌ jix tzꞌibꞌencanoj.

Man yin oj chꞌen tzꞌibꞌebꞌilcan ocoj,

jaxca yunnaj yet peyxa,

yutol jaꞌ yin cu pixan tzꞌibꞌebꞌilcan ocoj.

4 Cꞌam chi cu xiw kalon jaxca tuꞌ,

yutol eyoc Dios yipoj cu cꞌul yin Cristo.

5 Cꞌam chi cu naꞌ,

tol chi skeꞌ ku yul ket cu txꞌojli.

Tol asan yu eyoc Dios ketoj,

yuxan chi skeꞌ ku junoj tzetyetal.

6 Jaꞌ jix akꞌon kopiso yin kalon can el skꞌaneal jun acꞌ swa kꞌane.

Jaꞌ jun wa kꞌane tiꞌ,

man yu oj cu jijen junoj tzetyetal tzꞌibꞌebꞌilcanoj catuꞌ chi yunen eloj.

Asanne yu Yespíritu Dios,

yuxan chi skeꞌ yunen can eloj.

Jaꞌ jun ley tzꞌibꞌebꞌilcan tuꞌ,

jaꞌ chi aon oc camich kibꞌan.

Jal pax Yespíritu Dios xin,

yopiso yakꞌon cu kꞌinal tol ey cꞌal yin tobꞌalkꞌinal.

7 Jaꞌ sley Moisés tzꞌibꞌebꞌilcan yin chꞌen chemteꞌ.

Jaꞌ yet jix akꞌle can jun ley tuꞌ,

jix jul kopna stzejejial Dios bꞌey jun lugar bꞌey jix akꞌle can tuꞌ.

Yuxan ma xa skeꞌ yoc tꞌanan ebꞌ Israel yin sat Moisés,

yutol chi tzejeji pax oj.

Cꞌuancꞌulal to jix ey tananoj stzejejial jun chi tzejeji tuꞌ.^a

Caxcꞌal chi ale oc camich kibꞌan yu jun ley tuꞌ,

yet jix juli,

8 jal tinaniꞌ xin,

cꞌamxa chi alcha jantaj yeoc swatxꞌcꞌulal Dios jix yiꞌ jul naj Yespíritu Dios ey jon,

yutol chi yal Dios tol watxꞌ jon yu sat tinaniꞌ.

9 Jaꞌ jun ley tuꞌ,

caxcꞌal chi yaoc camich yibꞌan ánima,

miman cꞌaltaꞌ yeloc apnoj.

Yel xa miman yeloc apnoj jun kꞌane chi aloni tol watxꞌ jon sattaj Dios.

10 Caxcꞌal ey yeloc apnoj jun ley tuꞌ,

cꞌamxa pax yeloc apnoj yul sat junxa tiꞌ,

yutol yel miman yeloc apnoj jun tiꞌ.

11 Ta miman yeloc apnoj jun tol txenne tiempoal eyecꞌoj,

manxa jantajoj yeloc apnoj jun tol ey cꞌal ecꞌ yin tobꞌalkꞌinal tiꞌ.

12 Yutol jix kaoc jun tiꞌ yipoj cu cꞌul,

yu jun tuꞌ,

yuxan cꞌam chi cu xiw kalon eloj.

13 Cꞌam sowalil chi kute cu bꞌa jaxca yutenaj sbꞌa Moisés.

Smajchenaj el sat yetoj jun kꞌap,

yet watxꞌ cꞌamxa chi yil ebꞌ Israel yet chi lawi ey skꞌakꞌal skopopial tuꞌ,

yutol man oj tan el jun ket jix akꞌle tiꞌ.^b

14 Ma cꞌaltaꞌ naꞌcha el yu ebꞌ tzet jix al-le tet ebꞌ yutol caw caw snaꞌbꞌal ebꞌ.

Jacꞌalaꞌ tinaniꞌ,

jaꞌ yet chi awtele An Juun bꞌey tzꞌibꞌ ye can jun sbꞌabꞌel swa kꞌane Dios yabꞌ ebꞌ Israel,

cꞌam chi naꞌcha el yu ebꞌ.

Yutol jaxca wal junoj kꞌap tuꞌ eyto oc smajsat oj ebꞌ.

Jaꞌ jun tzet jaxca kꞌap tuꞌ,

cꞌam chi eli,

yutol asan Cristo chi skeꞌ yiꞌon eloj.

15 Masantaꞌ tinaniꞌ,

jaꞌ yet chi yabꞌen ebꞌ yawtele an slibro Moisés,

jaxca tol ey cꞌal oc smajsat spixan ebꞌ tuꞌ.

16 Jal pax yet chi cu meltzo oc yintaj Naj Kaawil xin,

chi iꞌle el jun jaxca majsate tuꞌ yin cu pixan.

17 Jaꞌ Naj Kaawil,

jaꞌton Espíritu.

Jaꞌ mac eyoc Yespíritu Naj Kaawil yin,

jajan xa sat ebꞌ,

catuꞌ jajan xa yilon ebꞌ.

18 Yu jun tuꞌ,

yuxan cꞌamxa oc jun jaxca majsate tuꞌ yin cu sat cu masanil.

Jaꞌ tinaniꞌ,

laan jon xa jaxca jun chꞌen nen bꞌey chi kil cu sat,

yutol jaꞌ kin chi txeclo el swatxꞌil Naj Kaawil.

Yu jun tuꞌ,

yuxan lalanxa ẍꞌibꞌ cu naꞌbꞌal jaxca snaꞌbꞌal Cristo,

yutol lalanxa stzꞌajna el cu watxꞌil jaxca swatxꞌil.

Queytuꞌ lalan cu yuten Kaawil,

jaꞌton Espíritu.