2
Yu jun tuꞌ,
yuxan jix jin naꞌ,
tol man oj jin toj junelxa ey jex tuꞌ yin cuscꞌulalil.
2 Yutol ta chex too jin txꞌem cusoj,
¿mac pax oj skeꞌ yakꞌon smimanil jin cꞌul?
Yutol ta ey je cuscꞌulal cꞌam chi skeꞌ je yakꞌon smimanil jin cꞌul.
Yu jun tuꞌ,
yuxan ma yal jin cꞌul chex too jin txꞌem cusoj,
yutol asan jex oj skeꞌ je yakꞌon smimanil jin cꞌul.
3 Yu jun tuꞌ,
yuxan jaxca jix wute walontoj ey jex yul junxa jin carta tiꞌ,
man oj jin toj jex jin txꞌem cusoj.
Yutol jaex je moo je yakꞌon tzalabꞌoj jin cꞌul.
Chi waoc yipoj jin cꞌul,
tol chin tzala a,
jain tiꞌ,
chex tzala pax a je masanil wetoj an.
4 Jaꞌ yet jix jin tzꞌibꞌentoj jun jin carta tiꞌ ey jex,
caw chin oc il je yu.
Caw chi yabꞌ syaꞌil jin pixan je yu,
tol chin okꞌ je yu.
Man pax yu oj jex jin txꞌemon cusoj,
yuxan jix jin tzꞌibꞌetoj ey jex.
Jix jin tzꞌibꞌetoj ey jex,
yet watxꞌ che yotajne eloj,
tol ey jin camcꞌulal je yin sicꞌlebꞌil.
Mimancꞌulal Yin Jun Naj Jix Oc Spenail
5 Ey ton jun mac je xol jix txꞌemon cus cu cꞌul.
Man asanne oj jin jix cus jin cꞌul yu.
Je masanil jex jix txꞌemle cus je cꞌul janicꞌoj yu.
“Janicꞌoj” jin chi,
yutol cꞌam chi woche tol chi cꞌal a can yibꞌan naj.
6 Jaꞌ scastigo naj jix je yaoc yibꞌan yet jix je yambꞌan oc je bꞌa,
kꞌojbꞌil ojabꞌi.
7 Jal tinaniꞌ xin,
yel watxꞌ che yakꞌ mimancꞌulal yibꞌan naj.
Catuꞌ che mimancꞌulnen naj,
yet watxꞌ cꞌam chi somcha el snaꞌbꞌal naj yu cuscꞌulal.
8 Yu jun tuꞌ,
chin oc tean ey jex,
tol che txꞌox je camcꞌulal tet naj junelxa.
9 Yu jun tiꞌ,
yuxan jix jin tzꞌibꞌetoj jun jin carta ey jex yet yalantoj,
yu jex wakꞌon porobꞌal.
Yutol chi woche chi wotajne eloj,
ta che jije tzet chi wal an.
10 Jal tinaniꞌ,
jaꞌ mac che yakꞌ mimancꞌulal yin yu junoj tzetyetal pena jix el yuneni,
oj wakꞌ pax mimancꞌulal yin.
Caxcꞌal manaj ey jin chi oc smul,
je yu cꞌal pax oj,
yuxan oj wakꞌ mimancꞌulal yin yul sat Cristo.
11 Queytuꞌ chi wute,
yet watxꞌ cꞌam chi cu yakꞌ ganar naj Satanás,
yutol kotajxa tzet snaꞌbꞌal naj kin.
Sbꞌiscꞌulal Naj Pablo Bꞌey Conobꞌ Tróade
12 Jaꞌ yet jix jin apni bꞌey conobꞌ Tróade yu walon el skꞌaneal Cristo an,
caw jajan cꞌal jin mulnail yin yet Naj Kaawil tituꞌ.
Caw jix yaoc xiquin ebꞌ yabꞌeni.
13 Asan xin,
jix oc niꞌoj jin bꞌiscꞌulal,
yutol ma ilcha kuẍtaj Tito wu tituꞌ.
Yu jun tuꞌ,
jix jin taꞌkꞌele can jin bꞌa yetoj ebꞌ,
catuꞌ jix jin el tituꞌ.
Catuꞌ jix jin jul bꞌey Macedonia tiꞌ.
Jaꞌ Cristo Chi Oc Ketoj, Yuxan Chi Kakꞌ Ganar
14 Yuxan kalwej yu diosalil tet Dios,
yutol tobꞌalkꞌinal chi cꞌal skeꞌ cu xꞌoxon eloj,
tol caw miman yeloc apnoj Cristo Jesús,
yutol jix yakꞌ ganar.
Chi cu skꞌanbꞌalne,
yet watxꞌ chi sajlemtoj skꞌaneal bꞌey junjun conobꞌ,
jaxca chi yun yecꞌ sabꞌ junoj tzetyetal sukꞌukꞌi xacꞌal yecꞌ sabꞌ.
15 Jaxca yecꞌ sabꞌ junoj xaambꞌal chi yakꞌ Cristo tet Dios,
caw sukꞌukꞌi sabꞌ,
quey jon tuꞌ yet lalan kecꞌ kalon el skꞌaneal tet ebꞌ lalan scolchai,
cꞌal tet ebꞌ lalanto sqꞌueyecꞌoj.
16 Jaꞌ yet chi kalon tet ebꞌ chi qꞌueyecꞌoj,
laan yecꞌ sabꞌ jaxca junoj tzetyetal chi cu cam yu chi yabꞌ ebꞌ,
yutol oj cam ebꞌ junelne.
Jal yet chi kalon tet ebꞌ chi colchai,
laan yabꞌen jaxca junoj tzet caw sukꞌukꞌi yecꞌ sabꞌ chi yabꞌ ebꞌ,
yutol lalan ẍaꞌon skꞌinal ebꞌ tol ey cꞌal yin tobꞌalkꞌinal yu.
Yu jun tuꞌ,
¿mac wal junoj mactxequel oj techa yalon el jun kꞌane tiꞌ yul yet?
17 Jaon tiꞌ,
man yu oj kakꞌon ganar yin skꞌane Dios,
yuxan chi ecꞌ kaleloj,
jaxca chi yute wanxa ebꞌ.
Miman oj cꞌal chi ecꞌ yal ebꞌ,
calan cꞌal chi yute yalon ebꞌ.
Jal jon jaon tiꞌ,
yin masanil cu cꞌul chi cu ecꞌ kaleloj,
yutol akꞌbꞌil kopiso yu Dios kalon eloj.
Sattaj Dios chi cu ecꞌ kaleloj,
yutol yet jon xa Cristo je yetoj.