3 Kalwej watxꞌ kꞌane tet Dios,

Smam Naj Kaawil Jesucristo.

Cu Mam pax oj.

Caw chi okꞌ scꞌul kin.

Jaꞌton Dios,

chi cu smimancꞌulne.

4 Jaꞌ yet chi jul syaꞌilal kibꞌan,

jaꞌ chi akꞌon smimanil cu cꞌul,

yet watxꞌ chi skeꞌ kakꞌon smimanil scꞌul ebꞌ chi jul syaꞌilal yibꞌan.

Jaꞌ yetoj smimanil scꞌul Dios tuꞌ,

quey ojabꞌ tuꞌ chi kute kakꞌon smimanil scꞌul ebꞌ.

5 Jaꞌ tinaniꞌ,

caw chi kabꞌ syaꞌil yetoj Cristo.

Jacꞌal oc chi akꞌon pax smimanil cu cꞌul.

Jaxca chi kute kabꞌen syaꞌil tuꞌ,

queytuꞌ chi yun yakꞌle pax smimanil cu cꞌul.

6 Yu jun tuꞌ,

yuxan jaꞌ yet chi kabꞌen syaꞌil,

chi kabꞌ syaꞌil yet watxꞌ chi skeꞌ jex cu mimancꞌulneni,

catuꞌ ey je colbꞌanil.

Yetoj pax oj,

jaꞌ yet chi yakꞌon smimanil cu cꞌul Dios tuꞌ,

chi yakꞌon pax smimanil je cꞌul,

yet watxꞌ kotaj tzet oj jex kute cu mimancꞌulneni catuꞌ ey je colbꞌanil.

Yu jun tuꞌ che tecꞌbꞌa je bꞌa je yakꞌon techa tzet oj jul je yibꞌan jaxca tzet chi jul kibꞌan.

7 Chi cꞌal kaoc Dios yipoj cu cꞌul yet chi kiloni,

tol jaex jun che yabꞌ syaꞌil ketoj.

Kotaj,

tol jaxca chi yun je yabꞌen syaꞌil tiꞌ,

queytuꞌ oj yun je mimancꞌulnele yu Dios ketoj.

8 Jex wuẍtaj,

jex wanabꞌ,

chi koche che yotajne eloj,

jantaj syaꞌilal ecꞌ kilnaj bꞌey yul yet Asia.

Yutol yel xacꞌal miman syaꞌilal ecꞌ kilnaj tituꞌ,

ian ma techa ku.

Jaꞌ cu naꞌoni,

tol manxa oj cu colcha el yul skꞌabꞌ.

9 Jaꞌ cu naꞌoni,

tol oj cu cam xacꞌal tituꞌ.

Jix ecꞌ el wan tuꞌ kibꞌan,

yet watxꞌ asan Dios chi kaoc yipoj cu cꞌul,

yutol jaꞌ chi akꞌon pitzcꞌu a ebꞌ camnaj.

Jal jon xin,

cꞌam chi kaoc yipoj cu cꞌul,

tol chi skeꞌ cu colon cu bꞌa yul ket.

10 Niꞌanxane man camnaj oj jon yu mimej syaꞌilal tuꞌ,

jaꞌ Dios jix cu colon eloj.

Lalan cꞌal cu col-le el yu tinaniꞌ.

Eyoc Naj yipoj cu cꞌul sicꞌlebꞌil,

tol oj cu scol cꞌal tet wan syaꞌilal tuꞌ.

11 Ta chex colwa yin txa ketoj,

catuꞌ ecꞌal jex oj jex txaloj ku,

jacꞌalaꞌ ecꞌal mac oj yal yu diosalil tet Dios yu swatxꞌcꞌulal oj yakꞌ ey jon,

chi yal tuꞌ.

12 Caw chi cu tzalai,

yutol yotaj cu cꞌul,

tol jichan cꞌal chi kute cu bꞌeybꞌal tet masanil ánima,

catuꞌ yel xacꞌal watxꞌ jix kute cu bꞌa ey jex.

Cꞌam tzet pena yin cu bꞌeybꞌal,

catuꞌ watxꞌ cꞌal jix yun kaon oc cu cꞌul yin,

yutol jix yakꞌ yipal Dios ey jon yu swatxꞌcꞌulal.

Man yu oj cu jelanil,

yuxan watxꞌ cu bꞌeybꞌal je sattaj,

asanne yu swatxꞌcꞌulal kibꞌan.

13 Jaꞌ yet chi cu tzꞌibꞌentoj cu carta ey jex,

asan wan tzet chi skeꞌ je yawten aoj,

catuꞌ chi skeꞌ snaꞌcha el je yu,

asan chi cu tzꞌibꞌetoj ey jex.

Yelcꞌulal ojabꞌ chi naꞌcha el je yu sicꞌlebꞌil xin.

14 Chi waoc yipoj jin cꞌul,

tol oj naꞌcha el je yu sicꞌlebꞌil,

tzet utbꞌil tol jaꞌ yet oj jul Naj Kaawil Jesús,

oj jex tzala a ku,

catuꞌ chi cu tzala pax a je yu.

15 Eyoc jun tiꞌ yipoj jin cꞌul,

yu jun tuꞌ jix jin naꞌbꞌalne el jex ecꞌ wilon yin sbꞌabꞌelal,

yet watxꞌ cael chin ecꞌ eyman ey jex tuꞌ,

catuꞌ che chaꞌ can swatxꞌcꞌulal Dios.

16 Jix jin naꞌbꞌalne el jex ecꞌ wiloni,

catuꞌ chin jul bꞌey Macedonia tiꞌ,

Jaxa yet chin meltzo pax toj titiꞌ,

catuꞌ chex ecꞌ wilon pax junelxa jin naꞌoni.

Ta jaxca tuꞌ,

oj skeꞌ je colwa ey jin yet chin kꞌanbꞌalne yet oj jin toj bꞌey Judea.

17 Jaꞌ yet jix jin naꞌbꞌalnen el jaxca tiꞌ,

¿comon cꞌal mi jix jin naꞌ,

je naꞌoni?

¿Chim je naꞌ,

tol tucꞌal chin naꞌ wan tiꞌ jaxca chi yun snaꞌbꞌalne el ebꞌ comon ánima junoj tzetyetal?

¿Chim je naꞌ tol “ye” jin chi junoj txolan,

“cꞌamaj” jin chi pax yet junojxa txolan?

18 Yotaj Dios,

tol cꞌam juneloj chi kal ey jex jaxca tiꞌ:

“Ye” cu chinai,

tejan chi yal pax yeloc apnoj,

“cꞌamaj”.

Cꞌam juneloj chi kalaꞌ.

19 Jaꞌ Cristo Jesús,

Scꞌaal Dios,

jaꞌ ecꞌ kalnaj skꞌaneal je nan je xol.

Ecꞌ yalnaj pax Silvano yetoj Timoteo.

Jaꞌ Cristo tuꞌ,

cꞌam juneloj jix yal jaxca tiꞌ:

“Ye” ẍi junoj txolan,

jal junojxa txolan xin,

chi qꞌuexon stiꞌ catuꞌ chi yaloni,

“cꞌamajxa” pax oj.

Yutol asan tzetyetal yel,

jix el yaloni.

20 Jaꞌ chi akꞌon yun masanil tzet chi yal Dios oj yun ey jon.

Yu jun tuꞌ,

yuxan jaꞌ yet chi kalon cu watxꞌ kꞌane tet Dios,

“yel toni” cu chi,

yutol kotaj,

tol oj yun yu Cristo Jesús.

21 Jaꞌ Dios chi akꞌon stecꞌanil je naꞌbꞌal ketoj,

yutol ey jon oc yul skꞌabꞌ Cristo.

Jaꞌ Dios tuꞌ,

jix cu iꞌon oc yetoj.

22 Jaꞌ Naj jix aon oc cu selloal,

jaꞌton Yespíritu jix yaoc yin cu pixan junjun jon.

Jaꞌ Yespíritu tuꞌ chi txꞌoxon el ey jon,

tol yel oj cu chaꞌ masanil wan tzet jix yakꞌ stiꞌ yakꞌon ey jon.

23 Chi woche tol cꞌam chex wakꞌ cusoj,

yuxan,

cꞌamto chin too bꞌey Corinto tuꞌ.

Caw yel chi wal an,

jin testigo Dios,

yutol yotaj Dios sicꞌlebꞌil tzet ey yin jin pixan.

Ta man yeloj chi wal an,

smoo chin cami.

24 Cꞌam chi koche tol jaon xacꞌal chi kalon tzet che yute je yaon oc je cꞌul yin Dios.

Yutol tecꞌan jex xa yin je creyenteal.

Yuxan chi koche tol chex cu col cu jejon je naꞌ,

yet watxꞌ chi cꞌal a can je tzalacꞌulal.