Jaꞌ An Scarta Naj Pablo Tet Ebꞌ Creyente A
GÁLATAS
Yichbꞌanil Scarta Naj Pablo
1
Jaꞌ tinaniꞌ xin,
jain Pablo jin tiꞌ an,
ẍejabꞌ jin Naj Jesucristo.
Man ẍejabꞌoj ánima jin an.
Yetoj pax oj man ánima oj jix akꞌon wopiso tiꞌ.
Jaꞌcaw Jesucristo jix akꞌoni,
yetoj cu Mam Dios.
Jaꞌ jix pitzcꞌunen a Jesucristo xol ebꞌ camnaj.
2 Jain tiꞌ,
yetoj masanil ebꞌ kuẍtaj eyecꞌ wetoj titiꞌ,
chi cu tzꞌibꞌetoj jun carta tiꞌ tet junjun iglesia yul yet Galacia.
3 Chi woche chi yakꞌ swatxꞌcꞌulal cu Mam Dios cꞌal Naj Kaawil Jesucristo ey jex,
catuꞌ ey ojabꞌ watxꞌcꞌulal snan je xol tituꞌ.
4 Jaꞌ Jesucristo jix jul yakꞌ cam sbꞌa,
yu cꞌal yiꞌon can el cu penail.
Jaxca ton tiꞌ jix yun cu scolon el yul skꞌabꞌ tzet man watxꞌoj yul yibꞌankꞌinal tiꞌ,
yutol jaxca tiꞌ jix yun yel yin scꞌul cu Diosal,
jaꞌ cu Mam pax oj.
5 Yuxan,
kalwej watxꞌ kꞌane tet Dios yin tobꞌalkꞌinal.
Amén.
Cꞌam Junojxa Skꞌaneal Yet Colbꞌanile
6 Jaꞌ Dios jix cu awten yu swatxꞌcꞌulal Cristo.
Caw chi qꞌueya jin cꞌul je yu,
yutol eyman che bꞌejcan Dios.
Jaꞌ tinaniꞌ,
lalan je tzꞌaj je yaon oc je naꞌbꞌal yin junojxa skꞌaneal yet colbꞌanile tol txꞌoj chi yun yal-le ey jex.
7 Cꞌam pax junojxa skꞌaneal yet colbꞌanile caw yel.
Ey ebꞌ chi ochen chi qꞌuexontoj skꞌaneal Cristo,
tol tucꞌal chi somcha el je naꞌbꞌal yu ebꞌ.
8 Tuxa jix ecꞌ kal can el skꞌaneal yet colbꞌanile ey jex.
Jaꞌ tinaniꞌ,
ta ey junojxa mac chi ecꞌ alon el junojxa txꞌoj skꞌaneal ey jex,
caxcꞌal mi jain,
ma junoj ángel chi tit satcan jul yaloni,
tit ojabꞌ sjowal scꞌul Dios yibꞌan.
9 Jaxca tuꞌ wutenaj walon ey jex junel,
queytuꞌ chi wute walontoj ey jex tinaniꞌ,
ta ey junoj mactxequel chi ecꞌ alon el junojxa kꞌane man laan oj yetoj jun chabꞌilxa je yu,
tit ojabꞌ sjowal scꞌul Dios yibꞌan jun tuꞌ.
10 Jaꞌ yet chi walontoj wan tiꞌ ey jex,
¿tumi chi woche chi tzala junoj ánima wetoj,
che naꞌ?
Cꞌamaj,
asan Dios chi woche chi tzala wetoj an.
Cꞌam niꞌoj chin naꞌ ta chi tzala junoj ánima wetoj.
Kꞌinaloj ta chi woche chi tzala ebꞌ wetoj an,
ma jin yakꞌomaloj servil Cristo,
chi yal tuꞌ.
Tzet Jix Yun Yoc Naj Pablo Ẍejabꞌoj Cristo
11 Jex wuẍtaj,
jex wanabꞌ,
chi woche che yotajne el junxa oj waltoj tiꞌ.
Jaꞌ jun skꞌaneal yet colbꞌanile chi ecꞌ waleloj,
man yet oj ánima.
12 Man ánima oj jun bꞌey chabꞌil jun kꞌane tiꞌ wu an.
Man ánima oj bꞌey cuybꞌil wu,
yutol asan Jesucristo jix akꞌon wotajne eloj.
13 Je yabꞌnaj xa,
tzet jix el wuten jin bꞌa yet yalantoj,
yet eyoc jin naꞌbꞌal yin scuybꞌanil ebꞌ wet Israelal.
Caw okꞌbꞌalcꞌule jix wute wetnen yiglesia Dios.
Jix wakꞌle wakꞌon lawoj el ebꞌ masanil.
14 Jaꞌ yin scuybꞌanil ebꞌ wet conobꞌ,
yel jelan jin yintaj ebꞌ wet chꞌibꞌomal.
Yutol yelcꞌulal tol jix waoc jin cꞌul yin sbꞌeybꞌal ebꞌ kichmam.
15 Jaꞌ yet tax cꞌal cꞌamto chin ali,
jix jin sicꞌle el yu Dios.
Yu cꞌal scamcꞌulal,
yuxan jix jin yawte oc yetoj.
Jaxa yet jix jul stiempoal jaxca chi yoche Dios win,
16 jix yakꞌon wotajne el Scꞌaal,
yet watxꞌ chi ecꞌ walel skꞌaneal yet colbꞌanile je nan je xol,
jaex man Israeloj jex tiꞌ.
Jaꞌ yet jix xew wotajnen el tuꞌ,
cꞌam junoj ánima jix jin cuyoni.
17 Ma jin bꞌet kꞌanabꞌ yetoj ebꞌ bꞌabꞌel ocnaj ẍejabꞌoj Cristo jin sattaj eyecꞌ bꞌey Jerusalén.
Tol caw eyman jix jin too bꞌey jun lugar chi yij Arabia.
Jix lawi tuꞌ,
jix jin paxtoj bꞌey conobꞌ Damasco.
18 Ma jin toj yin eymanil bꞌey Jerusalén.
Oxebꞌxa abꞌil tuꞌ,
catuꞌ jix jin too an,
yu chi wil yin naj Pedro.
Jato yet tuꞌ jix bꞌabꞌi jin kꞌanabꞌ yetoj naj.
Asan jolajonebꞌ cꞌu jix jin eecꞌ yetoj.
19 Cꞌam junojxa ebꞌ ẍejabꞌ Cristo jix jin kꞌanabꞌ yetoj,
tol asan Jacobo,
yuẍtaj Naj Kaawil,
jix jin kꞌanabꞌ yetoj.
20 Sattaj Dios chi waltoj ey jex,
caw yel jun chi wal tiꞌ an.
21 Jix lawi wecꞌ bꞌey Jerusalén tuꞌ,
jix jin ecꞌ pax bꞌey yul yet Siria yetoj bꞌey yul yet Cilicia.
22 Jaꞌ ebꞌ bꞌey wan yiglesia Cristo bꞌey yul yet Judea,
man to otajbꞌiloj jin yu ebꞌ yet tuꞌ.
23 Jacꞌal jin kꞌaneal chi xa yabꞌ ebꞌ,
yutol ey ebꞌ jix yal win jaxca tiꞌ:
“Jaꞌ jun winaj jix cu etnen yet yalantoj,
yutol jix yoche tol cꞌam chi kaoc cu cꞌul yin Cristo,
jaꞌ tinaniꞌ,
jaꞌ chi ecꞌ alon el skꞌaneal yet colbꞌanile,”
ẍi ebꞌ win an.
24 Yu jun tuꞌ,
jix yal watxꞌ kꞌane ebꞌ tet Dios wu an.