Wanxa Ebꞌ Ẍejabꞌ Cristo Chi Tzala Scꞌul Yetoj Naj Pablo
2
Canlajonebꞌxa abꞌil wecꞌ can bꞌey Jerusalén,
catuꞌ jix jin too yetoj Bernabé junelxa.
Jix wiꞌontoj naj Tito wetoj an.
2 Jix jin too tituꞌ,
yutol yalnaj Dios ey jin an,
tol sowalil chin too ecꞌoj.
Jaꞌ yet jix jin apni,
jaꞌ ebꞌ tol otajbꞌil tol ey yopiso xol ebꞌ creyente,
jix syambꞌa oc sbꞌa ebꞌ xꞌojli wetoj an.
Jix wal can tet ebꞌ,
tzet yeoc jun skꞌaneal yet colbꞌanile chi walel snan xol ebꞌ man Israeloj.
Jix wute jin bꞌa jaxca tuꞌ,
yutol chi woche man ojabꞌ tucꞌal oj chi wetne jin bꞌa jin mulna xol ebꞌ man Israeloj.
Jix woche tol chi ojabꞌ yal ebꞌ tol ey wopiso,
tol watxꞌ tzet chi wun an.
3 Jacꞌal jun naj Tito wetoj,
caxcꞌal Griego* naj,
ma pax yakꞌ circuncidar* sbꞌa naj.
4 Yel toni,
ey wan ebꞌ chi yaloc sbꞌa creyenteal,
jix yoche ebꞌ,
tol jix akꞌle circuncidar naj Tito tuꞌ.
Jal ebꞌ tuꞌ,
tol yin ewantajil jix oc ebꞌ cu xol,
yu yilon ebꞌ,
tzet chi yun cu colcha el yul skꞌabꞌ sley Moisés yu Cristo Jesús.
Yutol chi yoche ebꞌ tol chi cu meltzo yul skꞌabꞌ jun ley tuꞌ junelxa.
5 Ma cꞌal cu jije niꞌoj tzet chi yal ebꞌ.
Yutol chi koche asan yin jun jaꞌcaw skꞌaneal yet colbꞌanile che yaoc je naꞌbꞌal.
6 Jaꞌ ebꞌ txequel yei,
tol ey yopiso xol ebꞌ tuꞌ,
cꞌam chin naꞌ ta tol ey yopiso ebꞌ,
yutol jaꞌ yul sat Dios,
laan jon cꞌal el cu masanil.
Jaꞌ ebꞌ tuꞌ,
cꞌam junojxa chejbꞌanil jix yakꞌ ebꞌ ey jin an.
7 Cꞌamxa tzet jix yal ebꞌ,
yutol jix naꞌcha el yu ebꞌ,
tol jaꞌ Dios jix akꞌon wopiso walon el skꞌaneal yet colbꞌanile snan xol ebꞌ man Israeloj.
Jal pax naj Pedro xin,
akꞌbꞌil yopiso yalon el skꞌaneal yet colbꞌanile snan xol ebꞌ wet Israelal.
8 Jaꞌ yipal Dios jix akꞌon yopiso naj Pedro tuꞌ yoc ẍejabꞌoj Cristo snan xol ebꞌ Israel.
Jacꞌalaꞌ jin pax oj,
jaꞌ Dios jix akꞌon wopiso woc ẍejabꞌoj Cristo snan xol ebꞌ man Israeloj.
9 Yuxan,
jaꞌ naj Jacobo yetoj Pedro,
cꞌal Juan,
miman yeloc apnoj ebꞌ yul sat ebꞌ creyente tituꞌ,
jix naꞌcha el yu ebꞌ,
tzet utbꞌil,
tol jaꞌ Dios jix akꞌon jun wopiso tiꞌ yu swatxꞌcꞌulal.
Yu jun tuꞌ,
yuxan jix cu mitxꞌle cu kꞌabꞌ yetoj ebꞌ yetoj naj Bernabé,
yutol laan ẍaꞌon sbꞌa snaꞌbꞌal ebꞌ ketoj.
Jix xꞌoxon el ebꞌ yet jix cu mitxꞌlen cu kꞌabꞌ tuꞌ,
tol chi ẍaꞌ scꞌul ebꞌ cu too xol ebꞌ man Israeloj.
Catuꞌ chi skeꞌ pax smulna ebꞌ xol ebꞌ ket Israelal.
10 Asan jun tiꞌ yalnaj ebꞌ ey jon,
tol chi cu naꞌcꞌaltej tol chi cu colwa tet ebꞌ mebꞌa.
Jaꞌ jun tiꞌ eyxa oc yin jin cꞌul wunen an.
Skꞌaneal Yet Jix Steele Sbꞌa Naj Pablo Yetoj Naj Pedro Bꞌey Conobꞌ Antioquía
11 Jaꞌ yet eyecꞌ naj Pedro bꞌey conobꞌ Antioquía,
jix jin teele jin bꞌa yetoj,
yutol man watxꞌoj jix yute sbꞌa naj tituꞌ.
12 Yutol jaꞌ yet jix apni naj,
eyman cꞌal jix low yetoj ebꞌ creyente man Israeloj.
Jal yet jix apni wan ebꞌ ẍejabꞌ naj Jacobo bꞌey Antioquía tuꞌ,
jix yiꞌon el sbꞌa naj,
ma xa low naj yetoj ebꞌ.
Yutol chi xiw tet wan ebꞌ ey cꞌal oc snaꞌbꞌal yin sley Moisés.
13 Jaꞌ wanxa ebꞌ Israel creyente xa xin,
jix sbꞌeybꞌalne sbꞌeybꞌal Pedro ebꞌ.
Caabꞌ sat yutenaj sbꞌa ebꞌ yetoj naj.
Jacꞌalaꞌ pax Bernabé,
caabꞌ sat jix yute sbꞌa yetoj ebꞌ.
14 Jaꞌ yet jix wilon jain tiꞌ,
tol man tooloj chi yute sbꞌa ebꞌ jaxca yalon skꞌaneal yet colbꞌanile caw yel,
catuꞌ jix walon tet Pedro sattaj masanil ebꞌ creyente jaxca tiꞌ:
“Jaach tiꞌ,
Israel jaach,
ilaꞌ tol laan pax ja bꞌeybꞌal jaxca ebꞌ man Israeloj.
Man lalan oj ja bꞌeybꞌalnen sbꞌeybꞌal ebꞌ ket Israelal.
Yuxan,
¿tzet yuxan cha woche,
jaꞌ ebꞌ man Israeloj chi bꞌeybꞌalnen sbꞌeybꞌal ebꞌ ket Israelal?”
jin chi tet naj.
Chi Colcha Ánima Asan Yu Cristo
15 Jaon tiꞌ,
yicꞌaal jon Israel,
yuxan,
man laan oj jon jaxca ebꞌ man Israeloj,
yutol cꞌam yeloc apnoj sley Moisés yul sat ebꞌ.
16 Kotaj tol asan mac chi yaoc scꞌul yin Jesucristo,
asanne ebꞌ watxꞌ sattaj Dios,
man yu oj sjijen sley Moisés ebꞌ man Israeloj,
yuxan watxꞌ ebꞌ sattaj Dios.
Chi ka pax oc cu cꞌul yin Jesucristo jaon Israel jon tiꞌ,
yet watxꞌ,
watxꞌ jon yul sat Dios,
man yu oj cu jijen sley Moisés,
yuxan watxꞌ jon.
Yutol cꞌam junoj mactxequel watxꞌ yul sat Dios,
yu cꞌal tol chi sjije jun ley tuꞌ.
17 Chi koche,
tol yu Cristo,
chi cu al-le watxꞌil yu Dios.
Yu jun tuꞌ chi txeclo eloj,
tol cu masanil,
jaon Israel jon tiꞌ,
penawom jon pax yetoj ebꞌ man Israeloj.
¿Jam Cristo tuꞌ,
chi cu aontoj yin spenail,
che naꞌ?
¡Caw cꞌamaj!
18 Xax wal an,
tol cꞌamxa yopiso wan icham cuybꞌanile.
Kꞌinaloj ta chi wal an,
tol chi tocꞌal cu kꞌanbꞌalne pax junelxa,
chi txeclo eloj,
tol penawom jin tet ley,
chi yal tuꞌ.
19 Jaꞌ tinaniꞌ,
jaxca tol camnaj jon el yin sley Moisés,
catuꞌ cꞌamxa yalon yet jun ley tuꞌ kin,
yet watxꞌ chi kun tzet chi yoche Dios.
20 Jaꞌ yul sat Dios tinaniꞌ,
tꞌunan jon a yin teꞌ culus yetoj Cristo,
yu jun tuꞌ,
yuxan manxa iquis oj jon tinaniꞌ.
Jaxa Cristo iquis oc kin.
Asanxane sbꞌeybꞌal Cristo chi cu bꞌeybꞌalne tinaniꞌ,
yutol chi kaoc cu cꞌul yin Naj Scꞌaal Dios.
Caw xꞌoxnaj scamcꞌulal Naj kin,
yutol yakꞌnaj sbꞌa Naj cam cu yaꞌiloj.
21 Cꞌam chi skeꞌ kaloni,
tol naꞌbꞌacꞌal jix xꞌox swatxꞌcꞌulal Dios ey jon.
Kꞌinaloj ta yu cꞌal cu jijen sley Moisés,
yuxan chi yal Dios tol watxꞌ jon yul sat,
naꞌbꞌacꞌal mi jix cam Cristo cu yaꞌiloj,
chi yal tuꞌ.