Cꞌam Chi Skeꞌ Kaon Oc Sley Moisés Yipoj Cu Cꞌul
3
Jex a Galacia,
caw cꞌam niꞌoj je naꞌbꞌal.
Tejan ey junoj mactxequel jix akꞌon etex el je naꞌbꞌal jaxca chi yun yetnele el naꞌbꞌale yu ebꞌ atxum.
Yu jun tuꞌ,
yuxan manxa jijemoj jex tet jun cuybꞌanile caw yel.
Jaꞌ yet jix cu ecꞌ bꞌey ey jex tuꞌ,
jix kal can ey jex,
tzet utbꞌil tol camnaj Jesucristo yin teꞌ culus.
Jaxca tol caw yel jix je yil scami.
2 Chi woche che yal ey jin,
¿tumi yu jix je jije sley Moisés,
yuxan jix je chaꞌ Naj Santo Espíritu?
Cꞌamaj.
Jato yet jix je yaon oc yin je cꞌul jun skꞌaneal yet colbꞌanile jix al-le ey jex,
catuꞌ jix je chaꞌon Naj.
3 ¿Tumi junelne cꞌam niꞌoj je naꞌbꞌal xin?
Jaꞌ yet jix jex oc yin creyenteal,
jaꞌ Naj Espíritu jix oc je yetoj.
Jaꞌ tinaniꞌ,
¿tumi che yoche che tzꞌajtze wan tzet che yun je txꞌojli?
4 Miman syaꞌilal je yilnaj yu cꞌal Cristo,
ian wal pax tol naꞌbꞌacꞌal.
Tol oj wal man naꞌbꞌa oj jix je yil syaꞌilal tuꞌ.
5 Jix yakꞌ Naj Santo Espíritu Dios ey jon.
Jix xꞌoxon pax milagro* cu xol.
¿Tzet yuxan jix yun wan tuꞌ,
che naꞌ?
Man yu oj cu jijen sley Moisés,
yuxan jix yunne,
yu cꞌal chi kaon oc cu cꞌul yin jun skꞌaneal yet colbꞌanile jix al-le ey jon.
6 Jaꞌ naj Abraham,
“jix yaoc scꞌul naj yin Dios.
Asan yu jun tuꞌ,
yuxan jix oc naj yin watxꞌil yul sat Dios.”a
7 Yu jun tuꞌ xin,
naꞌcha ojabꞌ el je yu,
tol jaꞌ mac chi yaoc scꞌul yin Dios,
jaꞌton ebꞌ tuꞌ,
caw yel yicꞌaal naj Abraham ebꞌ.
8 Yin eyojto jix al-le can yul An Juun Tzꞌibꞌebꞌilcanoj,
tzet utbꞌil tol jaex man jex Israeloj,
jaex oj jex oc watxꞌil yul sat Dios,
asan yu che yaoc je cꞌul yin.
Yet tax peyxa albꞌilcan jun watxꞌ kꞌane tet naj Abraham,
chi yal jaxca tiꞌ:
“Jaꞌ ja win,
jaach tiꞌ,
oj jin txꞌox jin watxꞌcꞌulal tet junjun nación,”
ẍi Dios yul An Juun tuꞌ.b
9 Yu jun tuꞌ,
ta chi kaoc cu cꞌul yin Dios,
laan chi kute cu chaꞌon swatxꞌcꞌulal tuꞌ jaxca jix yun ẍaꞌon naj Abraham tuꞌ,
yutol yanaj oc yin scꞌul.
10 Jaꞌ ebꞌ chi yaoc yipoj scꞌul,
tol chi sjije sley Moisés,
oj ale cantoj ebꞌ bꞌey syaꞌilal yin junelne.
Yutol chi yal yul An Juun jaxca tiꞌ:
“Yal cꞌal mactxequel cꞌam chi jijen masanil tzet tzꞌibꞌebꞌilcan yul ley tobꞌalkꞌinal,
oj ale cantoj ebꞌ bꞌey syaꞌtajilal yin junelne,”
ẍi yul An Juun tuꞌ.c
11 Caw miman txequel pax oj,
tol cꞌam junoj mac watxꞌ yul sat Dios,
yu cꞌal chi sjije sley Moisés ebꞌ tuꞌ.
Yutol chi yal pax yul An Juun tuꞌ jaxca tiꞌ:
“Jaꞌ ebꞌ chi yaoc scꞌul yin Dios,
watxꞌ ebꞌ yul sat.
Yu jun tuꞌ,
yuxan ey skꞌinal ebꞌ,”
ẍi An.d
12 Jaꞌ jun ley tuꞌ,
cꞌam tzet chi yalaꞌ,
ta sowalil chi kaoc cu cꞌul yin Dios.
Tol chi yal jaxca tiꞌ:
“Jaꞌ ebꞌ chi jijen masanil wan chejbꞌanil tiꞌ,
oj ẍaꞌ skꞌinal ebꞌ yu,”
ẍi ley tuꞌ.e
13 Eytontej sjowal scꞌul Dios kibꞌan yu jun ley tuꞌ,
jal pax Cristo xin,
tol jix cu scoleltej yalan jun sjowal scꞌul Dios tuꞌ.
Yutol jix ẍaꞌoc sjowal scꞌul Dios tuꞌ yibꞌan cu qꞌuexeloj.
Yutol chi yal yul An Juun jaxca tiꞌ:
“Yal cꞌal mactxequel junoj chi tꞌunbꞌale a yin teꞌ teꞌ,
yaabꞌil el ebꞌ yul sat Dios,”
ẍi.f
14 Queytuꞌ jix utele Cristo Jesús,
yu xꞌoxon el swatxꞌcꞌulal Dios ey jex,
jaex man Israeloj jex tiꞌ ketoj,
jaxca yutenaj xꞌoxon swatxꞌcꞌulal tet naj Abraham yet peyxa.
Jacꞌalaꞌ yu Cristo tiꞌ,
yuxan chabꞌil Naj Santo Espíritu ku cu masanil,
yutol jix kaoc Dios yin cu cꞌul,
jaxca jix yun yalon canoj.
Sley Moisés Yetoj Jun Bꞌey Jix Yakꞌ Stiꞌ Dios
15 Jex wuẍtaj,
jex wanabꞌ,
chi woche chi waltoj ey jex yu cu bꞌeybꞌal jaon ánima jon tiꞌ.
Jaꞌ yet chi cu waꞌnen junoj cu wa kꞌane yetoj junoj ánima,
chi cu waꞌne can yuunal,
catuꞌ chi kaon can ey cu kꞌabꞌ yin jun juun tuꞌ.
Yu jun tuꞌ,
cꞌam junoj mactxequel chi skeꞌ yetnentoj,
catuꞌ cꞌam pax mac chi skeꞌ yaon oc stzꞌajil.
16 Jaꞌ Dios jix yakꞌ can stiꞌ tet Abraham,
cꞌal tet yicꞌaal naj Abraham tuꞌ:
“Jaꞌ ebꞌ ja wicꞌaal” man ẍi oj yul An Juun Tzꞌibꞌebꞌilcanoj.
Yutol man ecꞌaloj ebꞌ yicꞌaal naj bꞌey jix al-le canoj.
Caw tol jix al-le can jaxca tiꞌ:
“Tet ja wicꞌaal,”
ẍi.g
Yutol junne yicꞌaal naj Abraham tuꞌ bꞌey jix yalcanoj,
tol jaꞌton Cristo.
17 Jaꞌton jun tiꞌ chi woche chi waltoj ey jex,
tol jaꞌ Dios,
yakꞌnaj swa kꞌane yetoj Abraham yet jix xꞌoxon can eloj,
tol sowalil oj yunne.
430 abꞌil xa yakꞌon swa kꞌane tuꞌ,
catuꞌ jix akꞌle sley Moisés.
Ma cꞌal etex el jun wa kꞌane tuꞌ yu jun ley tuꞌ.
Jaꞌ jun albꞌilcan yu Dios tuꞌ yet jix yakꞌon can stiꞌ tuꞌ,
ma ecꞌtoj yu jun ley tuꞌ.
18 Kꞌinaloj ta yu chi sjije jun ley tuꞌ naj Abraham,
yuxan chi yakꞌ jun tzet jix yalte Dios,
man mi yu oj tol yakꞌnaj can stiꞌ,
yuxan chi yakꞌ jun tzet jix yalte Dios tuꞌ,
chi yal tuꞌ.
Jaꞌton yu yakꞌnaj can stiꞌ Dios tet Abraham,
tzet utbꞌil tol tucꞌal oj el yin scꞌul oj yakꞌa.
19 ¿Tzet pax yopiso jun ley tuꞌ,
che naꞌ?
Akꞌbꞌil jun ley tuꞌ,
yet watxꞌ chi txeclo eltej spenail junjun ánima.
Txequelne yeoc jantaj tiempo tꞌinan yoc yopiso jun ley tuꞌ,
masantaꞌcꞌal yet jix jul jun yicꞌaal naj Abraham,
jun mac tet yakꞌnaj can stiꞌ Dios.
Jaꞌ ebꞌ ángel alnen can jun ley tuꞌ.
Jaꞌ naj Moisés jix oc can yin a tiꞌal snan xol Dios yetoj ebꞌ conobꞌ.
20 Jal pax tinaniꞌ xin,
manxa sowalil oj ey junoj mac chi oc a tiꞌal,
yutol junne mac jix yakꞌ swa kꞌane yetoj naj Abraham,
jaꞌton Dios.
Yopiso Sley Moisés
21 Jal pax sley Moisés tuꞌ,
man yacꞌul oj sbꞌa yetoj wan tzet albꞌilcan yu Dios tuꞌ yet jix yakꞌon can stiꞌ.
Kꞌinaloj ta akꞌbꞌil junoj ley bꞌey chi skeꞌ kiꞌon cu kꞌinal tol ey cꞌal yin tobꞌalkꞌinal.
Kꞌinaloj ta jaxca tuꞌ,
¿chim yal Dios tol watxꞌ jon yul sat,
yu cꞌal chi cu jije jun ley tuꞌ?
22 Chi yal pax yul An Juun,
tzet utbꞌil tol masanil ánima eyecꞌ xol spenail.
Queytuꞌ yaloni,
yet watxꞌ jaꞌ jaon jix kaoc cu cꞌul yin Jesucristo tiꞌ,
chi cu chaꞌ jun jix yal can Dios yet jix yakꞌon stiꞌ tuꞌ.
Asan yu chi kaoc yin cu cꞌul,
yuxan chi cu chaꞌ cu kꞌinal tol ey cꞌal yin tobꞌalkꞌinal,
catuꞌ watxꞌ jon yul sat Dios tinaniꞌ.
23 Jaꞌ yet cꞌamto chi jul jun mactxequel bꞌey chi kaoc cu cꞌul tuꞌ,
ey jon to oc yul skꞌabꞌ jun ley tuꞌ.
Jaxca tol mitxꞌbꞌil jon ey yu,
masantaꞌcꞌal jix txeclo a jun bꞌey chi kaoc cu cꞌul tuꞌ.
24 Yutol jaꞌ jun ley tuꞌ,
jaꞌ yopiso,
tol chi cu yakꞌ cuenta.
Masantaꞌcꞌal jix jul Cristo.
Jaꞌ tinaniꞌ,
watxꞌ jon yul sat Dios,
yutol jaꞌ yin Cristo chi kaoc cu cꞌul.
25 Manxa eyoj jon oc yul skꞌabꞌ jun chi cu akꞌon cuenta tuꞌ,
yutol eyxa oc cu cꞌul yin Cristo tinaniꞌ.
26 Yutol chi kaoc Naj yin cu cꞌul,
yu jun tuꞌ,
yuninal jon xa Dios,
junxane keoc yetoj Cristo Jesús cu masanil.
27 Jaꞌ yet chi cu akꞌle bautizar,
junxane chi kun can el yetoj Cristo.
Jantaj jon cꞌal chi cu akꞌle bautizar,
jaxca tol chi oc Cristo tuꞌ cu pichiloj.
28 Cꞌamxa yeloc apnoj ta Israel jon,
ma man Israeloj jon.
Caxcꞌal yakꞌomal jon servil yin junelne jon,
caxcꞌal ket cu bꞌa,
caxcꞌal winaj,
caxcꞌal ix,
cꞌam yeloc apnoj,
yutol junxane keoc cu masanil yetoj Cristo Jesús,
jaxca tol junxane animail keoc cu masanil.
29 Yutol yet jon xa Cristo xin,
yuxan yicꞌaal jex xa Abraham ketoj.
Yuxan,
jaꞌ jun tzet jix yal can Dios,
yet jix yakꞌon can stiꞌ,
oj cu chaꞌ.