4
Chi woche chi wal pax toj junxa tiꞌ ey jex.
Kꞌinaloj ey junoj unin tinaniꞌ,
oj yiꞌcan masanil tzet ey bꞌey smam.
Watxꞌ ton oj yiꞌcan masanil,
asan xin,
jaꞌ yet yaliẍ to,
laan cꞌal jaxca junoj yakꞌomal servil,
2 yutol ey mac chi akꞌon cuenta.
Akꞌbꞌil tocꞌal cuenta masantaꞌcꞌal chi jul jun cꞌual jaxca yalon smam,
tol oj yiꞌcan tzet ey bꞌey smam tuꞌ.
3 Jaꞌ yet yalantoj,
jaxca tol unin jon,
yutol jaꞌ sbꞌeybꞌal jun yul yibꞌankꞌinal tiꞌ chi cu akꞌon mandar.
4 Jal yet jix aapnoj stiempoal xin,
jix yaontej Scꞌaal Dios.
Jix jul aloj yin jun ix ix jaxca chi yun kali jaon ánima jon tiꞌ.
Jix jul yute sbꞌa Israelal.
Akꞌbꞌil mandar yu sley Moisés.
5 Queytuꞌ jix yun sjulecꞌoj,
yet jix cu jul scolon el yul skꞌabꞌ jun ley tuꞌ,
catuꞌ chi cu yiꞌon oc yuninal oj Dios.
6 Jaꞌ Dios,
jix yatej Naj Yespíritu Scꞌaal yin cu pixan junjun jon,
yet watxꞌ chi txeclo eloj,
tol yuninal jon xa.
Jaꞌ Naj Espíritu tuꞌ,
jaꞌ yet chi a yaw Naj kin:
“Mamin,
Mamin,”
ẍi Naj tet Dios.
7 Yu jun tuꞌ,
manxa yakꞌomaloj servil keoc tinaniꞌ,
yutol yuninal jon xa Dios.
Yu Cristo,
yuxan eyxa kalon ket cu chaꞌon cu majul yin stzetyetal Dios.
Scuscꞌulal Pablo Yu Ebꞌ Creyente
8 Jaꞌ yet yalantoj,
man to je yotaj oj Dios.
Jix je yakꞌ servil wan chi al-le oc diosalil,
man pax Dios oj ebꞌ.
9 Jal tinaniꞌ xin,
je yotaj xa Dios.
Yel watxꞌ ta chi kalaꞌ,
tol otajbꞌil jon xa yu Dios.
Yu jun tuꞌ,
¿tzet yuxan chex meltzo pax bꞌey jun cuybꞌanil cꞌam yeloc apnoj,
tol cꞌam tzet chi oqui?
¿Tzet yuxan chi to je yoche che yakꞌ servil,
catuꞌ chex oc pax je yakꞌon servil tet junelxa?
10 Ilaꞌ,
tol eyto cꞌal wan cꞌu caw miman yeloc apnoj yul je sat,
yet chi ecꞌ junjun xꞌaaw.
Eyto cꞌal tiempo caw miman yeloc apnoj yul je sat,
cꞌal abꞌil.
11 Caw chin xiw an,
tala naꞌbꞌacꞌal jix jin ecꞌ mulna je nan je xol tituꞌ.
12 Jex wuẍtaj,
jex wanabꞌ,
chin oc tean je yin,
tol laan ojabꞌ che yute je naꞌbꞌal wetoj an.
Yutol jain tiꞌ,
laan jix wute jin naꞌbꞌal je yetoj yet jix jin ecꞌ ey jex tuꞌ.
Watxꞌ cꞌal jix je yute je bꞌa ey jin an.
13 Je yotaj,
tol jaꞌ yet jix jin ecꞌ ey jex tuꞌ yet sbꞌabꞌelal,
yu jun syaꞌilal eyoc win,
yuxan jix wal can el skꞌaneal yet colbꞌanile je nan je xol.
14 Jix jex akꞌle porobꞌal yu jun jin yaꞌilal tuꞌ,
ma pax jin je yintajne el yu.
Cꞌam tzet jix je yalaꞌ,
ta cꞌam weloc apnoj yul je sat.
Jaxca chi kute cu chaꞌon sjul junoj yángel Dios cꞌal Cristo Jesús chi juli,
jaxca tuꞌ jix jin je yute je chaꞌoni.
15 ¿Tzet la ye je tzalacꞌulal tuꞌ tinaniꞌ xin?
Caw yel chi waltoj ey jex an,
caw miman je tzalacꞌulal wetoj yet jix jin bꞌetecꞌ tituꞌ.
Ilaꞌbꞌi,
kꞌinaloj ta chi skeꞌ je yiꞌon eltej sbꞌakꞌ je sat,
catuꞌ che yakꞌon ey jin an,
ma cꞌaltaꞌ skeꞌ je yu.
16 Jaꞌ tinaniꞌ xin,
¿tumi chi cu cajatne a cu bꞌa je yetoj,
yutol chi waltoj wan kꞌane caw yel tiꞌ ey jex?
17 Ey ebꞌ chex tzꞌaj camcꞌulneni,
man pax yin oj masanil scꞌul ebꞌ.
Yutol tucꞌal chi yoche ebꞌ che yiꞌel je naꞌbꞌal kin,
catuꞌ che yaon oc je naꞌbꞌal yin ebꞌ.
18 Watxꞌ toni ta ey mac chi cu camcꞌulneni,
asan xin,
yin ojabꞌ masanil cu cꞌul.
Tol oj wal queytuꞌ che yute je bꞌa ey jin tobꞌalkꞌinal,
catuꞌ man ojabꞌ jacꞌalne yet ey jin ecꞌ je yetoj tituꞌ.
19 Jex jaxca tol wuninal je yei.
Jaxca tol lalan wabꞌen syaꞌil je yu,
jaxca yabꞌen syaꞌil junoj ix ix yet chi ali yuneꞌ,
masantaꞌcꞌal oj waꞌxoj oc je naꞌbꞌal jaxca yet Cristo.
20 Toloj wal ey jin ecꞌ je yetoj tinaniꞌ,
yet watxꞌ man jaxca oj tiꞌ chi wute walontoj ey jex,
yutol caw chin oc il je yu.
Ix Agar Yetoj Ix Sara
21 Che yoche jaex tiꞌ,
tol jaꞌ sley Moisés chex akꞌon mandar,
¿tumi cꞌam che naꞌtej xin,
tzet chi yal jun ley tuꞌ?
22 Yutol jaꞌ chi alontej yu naj Abraham,
tzet utbꞌil tol ey cawan scꞌaal.
Ey jun jix ali tet ix criadaeal,
ix chi yij Agar.
Ey junxa jix ali tet ix yistil.
Jaꞌ ix jaꞌcaw yistil Abraham tuꞌ,
cꞌam mac bꞌey eyoc ix scriadaeal.
23 Jaꞌ naj alinaj tet ix criadaeal tuꞌ,
jaxca cꞌal yali ánima jix yun yali.
Jal jun chi yij Isaac,
alinaj yin ix yistil yetoj yichamil tuꞌ.
Yu yipal Dios yuxan alinaj,
yutol albꞌilcan yu Dios yin eyojto.a
24 Jaꞌ jun skꞌaneal ebꞌ tiꞌ,
txꞌoxbꞌanile yei.
Jaꞌ cawan ix chi bꞌinatej tiꞌ,
jaꞌ caabꞌ swa kꞌane Dios chi xꞌoxtej ebꞌ yin yechel.
Jaꞌ ix Agar,
yechel jun swa kꞌane Dios chabꞌil can bꞌey wonan Sinaí.
Jaxca tol yuneꞌ ix ebꞌ ey yet jun wa kꞌane tuꞌ,
yutol eyoc ebꞌ tuꞌ yin yakꞌomal servil.
25 Jaꞌ ix Agar tuꞌ,
yechel jun wonan Sinaí ey bꞌey yul yet Arabia yeoc ix.
Jaꞌ tinaniꞌ,
jaꞌ ebꞌ a Jerusalén,
jaxca tol yet to wonan Sinaí yei,
yutol jaꞌ ebꞌ a conobꞌ tituꞌ,
yakꞌomal to servil ley yeoc ebꞌ.
26 Jal junxa Jerusalén ey bꞌey satcan,
jaꞌ ey jon yet.
Yu jun tuꞌ,
ket cꞌal cu bꞌa cu txꞌojli,
cꞌamxa chi cu akꞌle mandar yu jun ley tuꞌ.
27 Chi yal An Juun Tzꞌibꞌebꞌilcan jaxca tiꞌ:
Jaach ix,
caxcꞌal man jaach uneꞌwom ix oj,
tzalaan.
Man ja wotaj oj tzet utbꞌil yoc syaꞌil yali unin,
el ojabꞌ ja waw yu tzalacꞌulal.
Yutol jaꞌ ix jix can xꞌojli,
yel ecꞌal yuneꞌ oj aloj yintaj pax ix ey yichamil,
ẍi yul An Juun tuꞌ.b
28 Jex wuẍtaj,
jex wanabꞌ,
laan jon jaxca naj Isaac.
Yutol yakꞌnaj can stiꞌ Dios,
tol oj aloj naj,
catuꞌ jix yuneni,c
jacꞌalaꞌ yakꞌnaj can stiꞌ Dios tol oj cu oc can yuninal oj,
catuꞌ jix yuneni.
29 Jal pax yet peyxa tuꞌ,
jaꞌ naj tucꞌal alinaj yu ix Agar jaxca cꞌal yali ánima,
yakꞌnaj naj acꞌulal yin naj Isaac,
naj alinaj yu yipal Naj Santo Espíritu.
Jaxca ton jix utele naj tuꞌ,
queytuꞌ chi cu yute ebꞌ chi akꞌle mandar yu ley tinaniꞌ.
30 Jaꞌ yul An Juun Tzꞌibꞌebꞌilcan jaxca tiꞌ,
jix yal ix Sara tet naj Abraham:
“Ujtetoj ix wakꞌomal servil tiꞌ yetoj yuneꞌ tuꞌ.
Yutol jaꞌ naj yuneꞌ ix tuꞌ,
cꞌam niꞌoj yalon yet naj yetoj naj yuneꞌ ix tol yetbꞌi yetoj yichamil.
Tutun cꞌam niꞌoj tzet oj akꞌle tet naj,”
ẍi yul An Juun tuꞌ.d
31 Yu jun tuꞌ,
jex wuẍtaj,
jex wanabꞌ,
man laan oj jon jaxca naj yuneꞌ ix criadaeal tuꞌ.
Caw tol laan jon jaxca naj yuneꞌ ix yetbꞌi yetoj yichamil tuꞌ.