Ket Xa Cu Bꞌa Yetoj Cristo Tinaniꞌ
5
Jaꞌ Cristo jix cu colon el yul skꞌabꞌ sley Moisés,
yet watxꞌ ket xa cu bꞌa yetoj.
Yu jun tuꞌ xin,
caw tecꞌan che yute je bꞌa.
Jaꞌ jun ley bꞌey colbꞌil jon xa el tuꞌ,
laan jaxca junoj ijatz caw al.
Manche xa je chaꞌoc je yibꞌan yu je yakꞌle cuenta.
2 Abꞌwej tzet oj wal an.
Tol chi waltoj,
jain Pablo jin tiꞌ,
junxa tiꞌ ey jex.
Ta che chaꞌoc jun echele chi yij circuncisión yin je mimanil,
cꞌam niꞌoj tzet oj je chaꞌ tet Cristo.
3 Tol ey junxa oj waltoj tiꞌ ey jex.
Yal cꞌal mac chi akꞌle circuncidar,
sowalil chi sjije masanil tzet chi yal sley Moisés.
4 Jaꞌ jex mac jex txequel che naꞌ tol watxꞌ jex sattaj Dios yutol che jije tzet chi yal jun ley tuꞌ,
cꞌamxa niꞌoj je yalon je yet yin Cristo.
Cꞌamxa swatxꞌcꞌulal Dios oj je chaꞌ.
5 Jal jon jaon tiꞌ xin,
yu Naj Yespíritu Dios,
yuxan chi kaoc yipoj cu cꞌul,
tol oj cu yal Dios watxꞌil.
Jaꞌton jun tiꞌ lalan kechbꞌanen tinaniꞌ,
yutol chi kaoc cu cꞌul yin.
6 Ta chi cu junbꞌane ey cu bꞌa yetoj Cristo Jesús,
cꞌamxa yeloc apnoj ta akꞌbꞌil jon circuncidar ma cꞌamaj.
Asanne jun tiꞌ caw ey yeloc apnoj,
ta jix kaoc cu cꞌul yin Naj sicꞌlebꞌil.
Chi cu txꞌoxeloj tol eyoc cu cꞌul yin Naj ta ey cu camcꞌulal.
7 Caw watxꞌ jix je yute je bꞌeybꞌal yet sbꞌabꞌelal.
¿Mac pax txequel jix akꞌon je cꞌul,
yuxan manxa jijem jex tet jun cuybꞌanile jaꞌcaw yel?
8 Jaꞌ Cristo mac jix jex awten oc yetoj,
manaj naj jix akꞌon je yunne.
9 Naꞌwejtej,
jaꞌ niꞌoj yich pan,
pilan chi calcha ecꞌ xol ixim jarina.
10 Jaꞌ Naj Kaawil chi waoc yipoj jin cꞌul je yu,
tol man oj je yatoj je naꞌbꞌal yin junojxa txꞌoj cuybꞌanile.
Yuxan,
yal cꞌal mac chi akꞌon je cꞌul tuꞌ,
jaꞌ Dios oj akꞌon syaꞌilal ebꞌ.
11 Jal jin,
jex wuẍtaj,
jex wanabꞌ,
kꞌinaloj ta jacꞌalaꞌ to waloni,
tol sowalil chi akꞌle circuncidar junoj mactxequel.
Ma jin cꞌaltaꞌ yujte ecꞌ ebꞌ wet Israelal,
kꞌinaloj ta queytuꞌ chi wute cuywa jin bꞌa jaxca tuꞌ,
cꞌam mi chi chichon oc scꞌul ebꞌ yin skꞌaneal Cristo yin teꞌ culus.
12 Jaꞌ ebꞌ chi ecꞌ akꞌon je cꞌul,
tzet utbꞌil tol che yakꞌ circuncidar je bꞌa tuꞌ,
tol oj wal chi spoꞌole sbꞌa ebꞌ yetoj iglesia.
13 Jex wuẍtaj,
jex wanabꞌ,
awtebꞌil jex yu Dios,
yet watxꞌ tol je yet xa je bꞌa je masanil ketoj.
Caxcꞌal mi cu masanil ket cu bꞌa,
man yu oj tuꞌ,
oj skeꞌ kakꞌbꞌalnen cu pena ochwanilal.
Yel watxꞌ chi kakꞌle servil cu bꞌa yu cu camcꞌulal.
14 Masanil cꞌal tzet ey yul sley Moisés,
chi txeclo el yin jun chejbꞌanil oj waltej tiꞌ:
“Camcꞌulnewej je yet animail jaxca che yute je camcꞌulnen je bꞌa junjun jex,”
ẍi.a
15 Ta jacꞌal pax jowal naꞌan je yu je nan je xol,
caw ey smey oj je yakꞌle qꞌueyel je bꞌa.
Jaꞌ Naj Santo Espíritu Yetoj Cu Pena Ochwanil
16 Chi wal pax toj junxa tiꞌ ey jex an.
Cu bꞌeybꞌalnewej tzet chi yoche scꞌul Naj Yespíritu Dios.
Ta chi cu bꞌeybꞌalne jaxca tuꞌ,
man oj cu bꞌeybꞌalne tzet chi yoche cu pena ochwanilal.
17 Yutol jaꞌ jun cu pena ochwanil tiꞌ,
yacꞌul sbꞌa yetoj Naj Yespíritu Dios.
Jal Naj Espíritu tuꞌ,
acꞌul pax oc yin cu pena ochwanil,
yuxan caw yacꞌul sbꞌa wan caabꞌ tuꞌ.
Yu jun tuꞌ,
ian wal cꞌam chi skeꞌ watxꞌ chi kute cu bꞌeybꞌal jaxca chi koche.
18 Yuxan,
ta lalan cu bꞌeybꞌalnen jaxca chi cu yute yijbꞌan Naj Yespíritu Dios,
cꞌamxa yalon yet sley Moisés kin.
19 Jaꞌ ebꞌ chi bꞌeybꞌalne spena yochwanilal,
caw miman txequel tzet chi el yunen ebꞌ.
Chi sey yix ebꞌ yul skꞌabꞌ yistil,
ma chi sey spenail yul skꞌabꞌ yichamil,
yetoj wan tzet cꞌam swatxꞌil chi el yunen yetoj smimanil ebꞌ.
Asan cꞌal tzet qꞌuixwiltaj chi el yunen ebꞌ.
20 Chi yal sbꞌa ebꞌ tet wan tzet chi yaloc sdiosaloj ebꞌ.
Chi sbꞌalne junojxa mactxequel ebꞌ.
Chi scajatne a sbꞌa ebꞌ,
jowal cꞌal chi yun ebꞌ.
Chi chichon scꞌul ebꞌ yin junojxa mactxequel.
Cꞌuun stit sjowal ebꞌ.
Chi yoche ebꞌ tol asanne ebꞌ ey yeloc apnoj.
Chi poꞌochatoj ebꞌ,
txꞌoj txꞌoj xacꞌal chi ey bꞌulan ebꞌ.
21 Chi yoche oc ebꞌ stzetyetal junojxa mactxequel.
Chi scamtze el sbꞌa ebꞌ yetoj an.
Chi wejeji ebꞌ,
catuꞌ chi el yunen wanojxa spenail ebꞌ jaxca ton wan pena tiꞌ.
Caxcꞌal jix wal jun tiꞌ ey jex yet yalontoj,
tol chi wal pax toj ey jex junelxa.
Jaꞌ ebꞌ chi el sbꞌeybꞌalnen wan chi waltej tiꞌ,
tutun cꞌam niꞌoj yalon yet ebꞌ yoc yul skꞌabꞌ Dios.
22 Jal pax Naj Yespíritu Dios xin,
jaꞌ chi akꞌon cu camcꞌulal,
cu tzalacꞌulal,
catuꞌ chi yakꞌon pax oj,
tol ey watxꞌcꞌulal snan cu xol.
Chi yakꞌon pax kakꞌ techa yal cꞌal tzet chi jul kibꞌan.
Yu Yespíritu tuꞌ,
yuxan ey cu watxꞌcꞌulal tet ebꞌ ket animail,
watxꞌ chi kute cu naꞌbꞌal yin ebꞌ.
Yu pax oj,
yuxan jijem jon.
23 Yeynajil chi kute cu bꞌa.
Yu Naj Espíritu tuꞌ,
yuxan chi skeꞌ cu mitxꞌon oc tucan cu bꞌa yin tzet man watxꞌoj.
Jaꞌ wan watxꞌ bꞌeybꞌale tiꞌ,
cꞌam junoj ley chi aloni,
tol cꞌam chi skeꞌ kuneni.
24 Jaꞌ mac jon txequel yet jon xa Cristo,
cꞌamxa yeloc apnoj cu pena ochwanil yul cu sat,
yetoj wan tzet man watxꞌoj chi koche ocoj.
Jaxca tol culusnebꞌil xa ku.
25 Jaꞌ Naj Yespíritu Dios chi akꞌon cu kꞌinal tol ey cꞌal yin tobꞌalkꞌinal.
Yu jun tuꞌ,
yuxan sowalil chi cu bꞌeybꞌalne jaxca chi yoche Naj Espíritu.
26 Manche cu mimanbꞌine cu bꞌa,
yet watxꞌ cꞌam chi cu txꞌemlewej cus cu bꞌa.
Manche kochewej oc stzettaj yetal junojxa ket creyenteal.