Cu Col-lewej Cu Bꞌa
6
Jex wuẍtaj,
jex wanabꞌ,
ta ey junoj mactxequel chi oc spenail che yilaꞌ,
jaꞌ mac jex jijem jex tet Yespíritu Dios,
jaex che yaoc snaꞌbꞌal yin watxꞌcꞌulalil,
yet watxꞌ chi waꞌxi oc snaꞌbꞌal.
Caw che yil cꞌal je bꞌa junjun jex,
yet watxꞌ cꞌam chex ijbꞌaletoj yin spenail yetoj,
catuꞌ cꞌam chex eyqꞌueyi.
2 Col-lewej je bꞌa,
yet watxꞌ chi techa syaꞌilal je yu je masanil.
Ta che col-le je bꞌa,
lalan je jijen sley Cristo masanil.
3 Ta ey mac miman yeloc apnoj snaꞌoni,
ta cꞌam pax niꞌoj yeloc apnoj,
jacꞌal oc chi yetne sbꞌa xꞌojli.
4 Sowalil chi cu naꞌoc yin cu bꞌeybꞌal yul ket junjun jon.
Ta chi kute jaxca tuꞌ,
oj skeꞌ ya can cu tzalacꞌulal yu cu bꞌeybꞌal junjun jon.
Man sowalil oj chi cu naꞌoc yin sbꞌeybꞌal junojxa mactxequel,
ta yel watxꞌ jon yintaj.
5 Yutol junjun jon,
sowalil oj kakꞌ cu cuenta tet Dios,
jatacꞌalaꞌ tzet abꞌil oc yul cu kꞌabꞌ yu Dios.
6 Jaꞌ ebꞌ chi cu cuyon yin skꞌane Dios,
sowalil chi cu colwa kakꞌon masanil tzet watxꞌ tet ebꞌ.
7 Manche je yetne je bꞌa je naꞌoni,
tol chi skeꞌ je yiꞌon eytej sat Dios.
Cꞌam junoj mac chi skeꞌ yakꞌon ganar yiꞌon eytej sat.
Yutol jaꞌ tzet chi kawaꞌ,
jaꞌ oj cu jatxꞌa.
8 Ta chi kun tzet chi yoche cu pena ochwanilal,
oj cu chaꞌ spaj yu cu pena ochwanilal tuꞌ,
jaꞌton camich.
Ta jaꞌ pax tzet chi yoche Yespíritu Dios chi kun xin,
oj cu chaꞌ spaj tet Naj Espíritu tuꞌ,
jaꞌton cu kꞌinal tol ey cꞌal yin tobꞌalkꞌinal.
9 Yu jun tuꞌ,
yuxan watxꞌ ojabꞌ cꞌal chi kute cu bꞌeybꞌal tobꞌalkꞌinal,
ma skeꞌ kisabꞌi aoj.
Ta cꞌam chi cu bꞌej cu bꞌeybꞌalnen cu watxꞌ bꞌeybꞌal tiꞌ,
oj cu chaꞌ spaj yet oj jul stiempoal spajtzelei.
10 Jaꞌ tinaniꞌ,
yajbꞌan chi skeꞌ cu colwa tet ebꞌ ket animail,
sowalil watxꞌ ojabꞌ chi kute cu naꞌbꞌal yin ebꞌ.
Jaꞌ tet ebꞌ ket creyenteal,
yel ojabꞌ watxꞌ chi kute cu cꞌul yin ebꞌ.
Cꞌamxa Yeloc Apnoj Circuncisión
11 Ilwej wan caw mimej letra chin tzꞌibꞌetoj yetoj jin kꞌabꞌ ey jex tiꞌ an.
12 Ey ebꞌ chi yoche che yakꞌ circuncidar je bꞌa.
Tol tucꞌal chi yoche ebꞌ watxꞌ chi can ebꞌ yul sat ánima.
Ey ebꞌ Israel chi etnen ebꞌ,
yutol eyoc snaꞌbꞌal ebꞌ yin scamichal Cristo yin teꞌ culus.
Asan tol chi yoche ebꞌ tol cꞌam mac chi etneni,
yu jun tuꞌ xin,
yuxan chi oc tean ebꞌ je yin,
tol che yakꞌ circuncidar je bꞌa.
13 Caxcꞌal chi akꞌle circuncidar ebꞌ,
cꞌam chi sjije ebꞌ masanil tzet chi yal sley Moisés tuꞌ.
Chi yoche ebꞌ che yakꞌ circuncidar je bꞌa,
yet watxꞌ chi smimanbꞌane sbꞌa ebꞌ je yin,
yu jix jex akꞌcha ganar spol-le oc jun echele tuꞌ yin je mimanil.
14 Jal jin,
jain tiꞌ,
cꞌam junoj tzet chi wiꞌa can jin bꞌa yin.
Asan scamichal Naj Kaawil Jesucristo yin teꞌ culus bꞌey chi wiꞌa can jin bꞌa.
Yu scamichal Naj tuꞌ,
cꞌamxa yalon yet yul yibꞌankꞌinal tiꞌ win,
jaxca tol camnajxa el yul jin sat.
Catuꞌ jaxca tol camnaj jin xa pax el tet yul yibꞌankꞌinal tiꞌ,
yutol cꞌamxa walon wet yin.
15 Jaꞌ yet chi cu junbꞌane cu bꞌa yetoj Cristo Jesús,
cꞌamxa yeloc apnoj ta akꞌbꞌil jon circuncidar ma cꞌamaj.
Ta qꞌuexchanajxa cu naꞌbꞌal,
jaꞌ jun tuꞌ,
yel miman yeloc apnoj.
16 Masanil cꞌal mac chi bꞌeybꞌalnen wan cuybꞌanile tiꞌ,
jaꞌton ebꞌ tuꞌ caw yel Israel ebꞌ yul sat Dios,
yutol sconobꞌ yeoc ebꞌ.
Chi woche tol ey watxꞌcꞌulal yin ebꞌ yu Dios,
catuꞌ chi okꞌ scꞌul Dios yin ebꞌ.
17 Jaꞌ tinaniꞌ,
chi woche cꞌamxa junoj mactxequel chi akꞌon jowal wetoj,
yutol jaꞌ wan wechel eyoc tiꞌ,
jaꞌ chi txꞌoxoni tol yel,
ey ebꞌ jix jin makꞌoni,
yutol yakꞌomal jin servil Naj Kaawil Jesús an.
18 Jex wuẍtaj,
jex wanabꞌ,
chi woche chi xꞌox swatxꞌcꞌulal Naj Kaawil Jesucristo ey jex je masanil tituꞌ.
Amén.