Jaꞌ Tzet Chi Yun Swaꞌxi Oc Cu Naꞌbꞌal
3
Jaꞌ tinaniꞌ,
jex wuẍtaj,
jex wanabꞌ,
akꞌwej tzala je cꞌul yin Naj Kaawil.
Ey wanxa tzet oj waltoj ey jex,
man penaoj chi wabꞌe yutol jacꞌalaꞌ oj waltoj ey jex junelxa,
yutol sowalil che yotajne eloj.
2 Caw che yil cꞌal je bꞌa tet wan ebꞌ caw pena snaꞌbꞌal,
jaxca junoj noꞌ txꞌiꞌ.
Caw cꞌam swatxꞌil chi yute sbꞌa ebꞌ,
yutol chi yoche ebꞌ chi poꞌole el niꞌoj stzꞌuumal je mimanil.
3 Jal jon jaon tiꞌ,
akꞌbꞌil jon xa circuncidar* yin yel yul sat Dios,
yutol chi kiꞌey cu bꞌa tet Dios yin Yespíritu.
Asan yin Cristo Jesús bꞌey chi cu tzalai.
Jaꞌ jun yechel chi oc yin mimanile tuꞌ,
cꞌam niꞌoj chi kaoc yipoj cu cꞌul.
4 Jain tiꞌ,
jaꞌ jix wute jin naꞌoni,
tol smoo chi waoc wan tiꞌ yipoj jin cꞌul,
yutol caw jijem wutenaj jin bꞌa yin wan tiꞌ.
Tejan ey ebꞌ chi naꞌoni,
tol smoo chi colcha ebꞌ yu wan chi el yunen ebꞌ tuꞌ.
Jal jin jain tiꞌ,
ecꞌbꞌan jijem wutenaj jin bꞌa yin wan tuꞌ.
5 Jun semana wali,
catuꞌ jix jin akꞌle circuncidar,
yutol Israel jin.
Yicꞌaal jin to naj Benjamín.a
Hebreo jin,
yutol Hebreo jin mam cꞌal jin txutx.
Caw jijem jin yin masanil sley Moisés,
yutol Fariseo jin.
6 Jaꞌ yet tuꞌ,
caw chi waoc jin naꞌbꞌal yin jin cuybꞌanil.
Yu jun tuꞌ,
yuxan,
etnebꞌil ebꞌ yet xa Cristo wu an.
Jix cꞌal jin jije masanil tzet chi yal sley Moisés,
cꞌam niꞌoj tzet bꞌey smoo jin tzulei.
7 Masanil wan jix wal tiꞌ,
watxꞌ cꞌal masanil jin naꞌoni.
Jal pax tinaniꞌ,
jaꞌ chi wute jin naꞌoni,
cꞌam niꞌoj yeloc apnoj wan tuꞌ,
yutol asan yin Cristo chi waoc jin naꞌbꞌal tinaniꞌ.
8 Masanil wan tzet jix waoc yipoj jin cꞌul tuꞌ,
cꞌam niꞌoj yeloc apnoj yul jin sat tinaniꞌ.
Yutol ey junxa tzet caw yel watxꞌ chi el wunen tinaniꞌ,
tol chi wotajne el Cristo Jesús,
Naj Kaawil.
Yu Cristo tiꞌ,
jix qꞌueycan el masanil wan jix waoc yipoj jin cꞌul tuꞌ.
Jaxa tinaniꞌ,
jaxca xa kꞌalem,
queyxa tuꞌ yul jin sat,
yutol chi woche chi oc Cristo win junelne.
9 Junxane chi wun can el yetoj.
Jaꞌ tinaniꞌ,
chi yal Dios,
tol watxꞌ jin yul sat,
yutol chi waoc jin cꞌul yin Cristo,
man yu oj tol chin jije tzet chi yal sley Moisés.
Asan yu chi kaoc cu cꞌul yin Cristo,
yuxan chi cu oc watxꞌil yul sat Dios.
10 Chi woche caw chi wotajne el Cristo,
yet watxꞌ,
jaꞌ yipal jix akꞌon pitzcꞌu aoj,
jaꞌ chi yakꞌ ey jin an.
Chi woche laan chi wute wabꞌen syaꞌil yetoj.
Chi woche jaxca jix yun scami,
jaxca tuꞌ chi wun pax oj.
11 Yutol chi woche tol ey pax walon wet jin pitzcꞌu a xol ebꞌ camnaj.
Kakꞌwej Kip, yet Watxꞌ Oj Cu Chaꞌ Spaj Junjun Jon
12 Man lalan oj walon an,
tol jix wakꞌ ganar wan chi wal tiꞌ,
yutol man to caw tzꞌajanoj jin yin masanil.
Jacꞌalaꞌ pax wakꞌon wip tinaniꞌ,
yet watxꞌ chin tzꞌajna el yin masanil.
Yuxan jix jin sicꞌle el yu Cristo Jesús.
13 Jex wuẍtaj,
jex wanabꞌ,
man to tzꞌajanoj jin yin wan tiꞌ chi wute jin naꞌon tinaniꞌ.
Yuxan oj waltoj ey jex,
tzet chi el wunen an.
Jaꞌ tinaniꞌ,
cꞌamxa chin naꞌtej wan tzet jix wakꞌ ganar.
Asan wan cꞌamto chi wakꞌ ganar,
jaꞌ chin naꞌ.
Caw chi wakꞌ wip an,
14 yet watxꞌ chi wakꞌ ganar,
tol oj jin chaꞌ spaj bꞌey satcan.
Yu spaj tuꞌ,
yuxan chi cu yawte oc Dios yetoj,
yutol junxane chi kun can el yetoj Cristo Jesús.
15 Jaꞌ mac jon caw tecꞌan jon xa,
sowalil jaxca tuꞌ chi cu naꞌ junjun jon.
Ta jaex man jaxca oj tuꞌ je naꞌoni,
oj oc Dios je yetoj,
yet watxꞌ oj naꞌcha el wanxa tuꞌ je yu.
16 Ey pax jun tzetyetal sowalil chi kun cu masanil.
Sowalil chi cu bꞌeybꞌalne masanil tzet chi akꞌle naꞌcha el ku yu Dios.
17 Jex wuẍtaj,
jex wanabꞌ,
bꞌeybꞌalnewej jin bꞌeybꞌal tiꞌ.
Jaon tiꞌ,
txꞌoxbꞌil xa jun watxꞌ bꞌeybꞌale je yil ku.
Yuxan ilwej pax sbꞌeybꞌal ebꞌ laan sbꞌeybꞌal ketoj,
yet watxꞌ che bꞌeybꞌalne pax jaxca tuꞌ.
18 Ey jun ecꞌal el cꞌal albꞌilxa ey jex wu an.
Jaꞌ yet chi walontoj ey jex tinaniꞌ,
caw chin okꞌi,
yutol ecꞌal ebꞌ cꞌam swatxꞌil chi yute sbꞌeybꞌal.
Caxcꞌal jix cam Cristo sqꞌuexeloj ebꞌ yin culus.
Jaꞌ yu sbꞌeybꞌal ebꞌ tuꞌ caw scajat sbꞌa ebꞌ yetoj tinaniꞌ.
19 Jaꞌ ebꞌ tuꞌ,
sowalil oj qꞌueycan el ebꞌ yin junelne.
Asan tzet chi yoche oc smimanil ebꞌ,
asan yin wan tuꞌ eyoc snaꞌbꞌal ebꞌ,
jaxca tol sdiosal ebꞌ yeoc wan tuꞌ.
Ey wan tzet chi el yunen ebꞌ,
caw qꞌuixwiltaj.
Asan yin wan tuꞌ chi smeyne sbꞌa ebꞌ.
Asan wan yet yul yibꞌankꞌinal tiꞌ chi snaꞌ ebꞌ.
20 Jal jon,
jaon tiꞌ,
jaꞌ satcan tuꞌ eytoj cu naꞌbꞌal,
yutol jatuꞌ ey cu conobꞌal.
Lalan kechbꞌanen pax sjul cu Colomal bꞌey satcan tuꞌ,
jaꞌton Naj Kaawil Jesucristo.
21 Jaꞌ oj qꞌuexon cu mimanil cambꞌeal ye,
yet watxꞌ laan xa oj yun jaxca yet,
yutol jaꞌ smimanil tuꞌ,
caw watxꞌ sicꞌlebꞌil.
Jaxca tuꞌ oj cu yute yetoj yipal,
yuxan oj can masanil tzettaj yetal yalan yu Naj,
yutol oj oc can Naj yin Yaawil.