2 Ey jon cꞌal oc kalon yu diosalil tet Dios je yu je masanil.

Jaꞌ yet chi cu txali junjun el,

chex cu naꞌtej.

3 Chex cu naꞌtej sattaj cu Mam Dios tol caw chex mulna yin yet,

yutol caw che ya ton oc yin je cꞌul.

Chi cu naꞌtej,

tol caw che yakꞌ servil Naj,

yutol miman je camcꞌulal yin Naj.

Yetoj pax oj,

caw tecꞌan che yute je bꞌa,

yutol asan Naj Kaawil Jesucristo che yaoc yipoj je cꞌul.

4 Jex wuẍtaj,

jex wanabꞌ,

camcꞌulnebꞌil jex yu Dios.

Kotaj,

tol jaꞌ Dios jix jex sicꞌon can eloj.

5 Jaꞌ yet jix cu ecꞌ kalon el skꞌaneal yet colbꞌanile ey jex,

man naꞌbꞌa kꞌane oj jix ecꞌ kalel ey jex.

Yutol jaꞌ Yespíritu Dios eyoc ketoj.

Kotaj sicꞌlebꞌil,

tol caw yel jun kꞌane tuꞌ.

Je yotaj tzet bꞌeybꞌaleal jix ecꞌ cu bꞌeybꞌalne je xol,

yet watxꞌ,

watxꞌ chex elocoj.

6 Jaex tiꞌ,

jix je chaꞌel yich je bꞌeybꞌalne cu bꞌeybꞌal.

Jix je bꞌeybꞌalne pax sbꞌeybꞌal Naj Kaawil.

Caxcꞌal caw jix je yabꞌ syaꞌil yet jix je chaꞌon skꞌane Dios,

tol jix je chaꞌ cꞌal yin tzalacꞌulalil,

yutol jaꞌ Yespíritu Dios jix akꞌon je tzalacꞌulal tuꞌ.

7 Yuxan,

jaꞌ tinaniꞌ,

jix je txꞌox jun watxꞌ bꞌeybꞌale tet masanil ebꞌ ket creyenteal yul yet Macedonia,

cꞌal tet ebꞌ yul yet Acaya.

8 Yuxan,

jix je yakꞌ otajnele el skꞌaneal Naj Kaawil bꞌey junjun conobꞌ.

Tzꞌajan jix yabꞌ ebꞌ a Macedonia tuꞌ yetoj ebꞌ a Acaya,

tol che yaoc Dios yin je cꞌul.

Man asanne oj ebꞌ jix abꞌeni,

jix abꞌle pax bꞌey wanxa conobꞌ.

Yuxan,

manxa sowalil oj,

tol jaon,

oj kalel je kꞌaneal xol ánima.

9 Jaꞌ masanil ebꞌ jix abꞌeni,

lalan yalon ebꞌ je kꞌaneal,

tol watxꞌ jix yun je chaꞌon kapni,

yet jix cu bꞌetecꞌ je xol.

Lalan pax yalon ebꞌ tzet jix je yute je bꞌejon can wan tzetyetal jix je yaloc je diosaloj,

catuꞌ jix je chaꞌon el yich je yakꞌon servil Dios iquis,

jun jaꞌcaw Dios.

10 Chi yal pax ebꞌ tol lalan je yechbꞌanen yeyol Naj Scꞌaal Dios bꞌey satcan,

Naj Jesús.

Jaꞌ Dios jix akꞌon pitzcꞌu a Naj xol ebꞌ camnaj.

Jaꞌ Naj chi cu colon can el yul skꞌabꞌ jun miman syaꞌtajil oj jul yu sjowal scꞌul Dios.