Smulnail Naj Pablo Yin Yet Dios Bꞌey Conobꞌ Tesalónica
2
Jex wuẍtaj,
jex wanabꞌ,
je yotaj tol man naꞌbꞌa oj ecꞌnaj jex kilaꞌ.
2 Bꞌabꞌel ecꞌnaj jon bꞌey conobꞌ Filipos.
Je yotaj tol jix ecꞌ kil syaꞌilal tituꞌ.
Jix cu yetne ebꞌ sicꞌlebꞌil.
Jacꞌalaꞌ yet jix cu apni pax bꞌey je conobꞌ tuꞌ jix kil pax syaꞌilal.
Jix oc cꞌal pax cu Diosal ketoj.
Yuxan,
cꞌam niꞌoj jix cu xiw kalon el skꞌaneal yet colbꞌanile je xol.
Watxꞌ cꞌal tzet jix kalel ey jex.
Jaꞌ masanil tzetyetal jix ecꞌ kaleloj,
tol jichan.
3 Ma kalel ey jex yu jex ketneni.
Man yu oj junoj tzetyetal pena chi koche oc je yin,
yuxan jix cu ecꞌ ey jex tuꞌ.
4 Jaꞌ jun tiꞌ ket,
jaxca tol chi yoche scꞌul Dios,
jaxca tuꞌ jix kute ecꞌ kalon eloj.
Jix yil Dios tol cu moo yaon oc kopiso yin alo el skꞌaneal yet colbꞌanile.
Man yu oj kakꞌon tzalabꞌoj scꞌul ánima,
yuxan chi ecꞌ kal can eloj,
tol yu kakꞌon tzala scꞌul Dios,
yutol jaꞌ chi ilon cu pixan junjun jon,
ta watxꞌ ma pena.
5 Je yotaj,
man tucꞌal oj jix jex ecꞌ kal watxꞌil.
Man yu oj kakꞌon tumin,
yuxan jix ecꞌ kal can el ey jex.
Chi yil Dios,
caw yel chi kalaꞌ.
6 Jix skeꞌ kalon oc cu bꞌa yaawil ey jex yutol ẍejabꞌ jon Cristo.
Ma pax kiꞌa can cu bꞌa ey jex.
Yetoj pax oj,
cꞌam cꞌaltaꞌ mac tet chi kiꞌa can cu bꞌa.
7 Yeynajil ánima jix kute cu bꞌa je xol.
Jaxca junoj ix ix chi syaꞌilne chꞌibꞌ yuneꞌ,
queytuꞌ kutenaj cu bꞌa ey jex.
8 Caw ey cu camcꞌulal je yin.
Yuxan man asanne oj tol jix kalel skꞌaneal yet colbꞌanile yet Dios,
je yabꞌe,
yu cꞌal jix cu naꞌ,
tejan sowalil oj cu cam je yu,
yu cꞌal ton cu camcꞌulal je yin.
9 Jex wuẍtaj,
jex wanabꞌ,
tejan che naꞌtej,
tzet jix kute mulna cu bꞌa je xol.
Caw jix kakꞌ kip cu mulnai.
Jaꞌ yet jix ecꞌ kalel skꞌaneal yet colbꞌanile yet Dios ey jex,
cꞌualil cꞌal akꞌbꞌalil jix cu mulna yu cu gasto.
Yutol chi yoche cu cꞌul cꞌam mac chi yetne scꞌul yakꞌon cu gasto.
10 Je yotaj xa,
tol jaꞌ yet jix cu ecꞌ je yetoj tuꞌ,
watxꞌ cꞌal cu bꞌeybꞌal.
Jichan cꞌal jix kute cu bꞌeybꞌal je xol.
Cꞌam niꞌoj tzetyetal pena jix ecꞌ cu seyaꞌ.
Je yotaj tol queytuꞌ jix ecꞌ kute cu bꞌa.
Yotaj pax Dios tol queytuꞌ jix kute.
11 Je yotaj pax oj,
tol jaxca chi yute yiptzen junoj mame yuninal cꞌal smimancꞌulneni,
queytuꞌ jix jex kute kiptzen canoj,
cꞌal jex cu mimancꞌulnen canoj.
12 Catuꞌ jix kalon can ey jex,
tol caw watxꞌ cꞌal che yute je bꞌeybꞌal,
jaxca chi yoche scꞌul Dios,
jaꞌ jix jex awten yu chi oc je Yaawiloj,
yet watxꞌ che chaꞌ swatxꞌil yetoj.
13 Jaꞌ yet jix kalon el skꞌane Dios je xol,
eyman jix je yaoc yin je cꞌul tol yet Dios,
man yet oj ánima.
Yuxan caw chi wal yu diosalil tet Dios je yu.
Caw yel skꞌane Dios jun kꞌane tuꞌ.
Chi waꞌxi oc cu naꞌbꞌal jaon creyente jon tiꞌ yu.
14 Jex wuẍtaj,
jex wanabꞌ,
laan jix jex utele jaxca jix utele ebꞌ creyente bꞌey junjun yiglesia* Dios yul yet Judea,
ebꞌ tol yet pax Cristo Jesús.
Caw jix etnele ebꞌ yu ebꞌ yet Israelal.
Quey jex pax tuꞌ,
jix jex etnele yu pax ebꞌ je yet conobꞌ.
15 Jaꞌ ebꞌ Israel jix akꞌon cam ebꞌ yet conobꞌ eyoc ẍejabꞌoj Dios yet peyxa.
Jix akꞌle pax cam Naj Kaawil Jesús yu ebꞌ.
Jix cu yetnen pax ebꞌ jaon tiꞌ.
Caw pena ebꞌ yul sat Dios.
Acꞌul ebꞌ yin masanil ánima.
16 Jaꞌ yet chi koche chi kalel skꞌaneal yet colbꞌanile tet ebꞌ man Israeloj,
yet watxꞌ chi colcha ebꞌ,
cꞌam chi ẍaꞌ ebꞌ Israel kaleloj,
yuxan yel xacꞌal chi mimanbꞌi spenail ebꞌ yul sat Dios,
jaxca junoj miman ijatz.
Yuxan,
jaꞌ tinaniꞌ xax ale oc jun miman syaꞌtajil yibꞌan ebꞌ yu Dios yin junelne yu sjowal scꞌul.
Chi Yoche Naj Pablo Chi Too Yil Ebꞌ Creyente A Tesalónica Junelxa
17 Jex wuẍtaj,
jex wanabꞌ,
eyxa tiempo je can je txꞌojli ku.
Caxcꞌal cꞌam chi kil-le oc kin,
caw chex cu naꞌcꞌaltej.
Caw chi koche chex too kilaꞌ.
18 Jix kakꞌle too jex kiloni.
Ilaꞌ,
jain Pablo jin tiꞌ,
ecꞌal el jix wakꞌle jin toi.
Jal pax Satanás xin,
ma cu chaꞌletoj yu.
19 Jaꞌ yet oj jul Naj Kaawil Jesucristo catuꞌ oj cu caey ecꞌ satcan,
chi kaoc yipoj cu cꞌul tol je yu yuxan oj cu chaꞌ cu paj.
Je yu oj cu tzalabꞌoj.
Oj cu chaꞌ spaj cu mulnail jix kun je xol.
20 Je yu cꞌal,
yuxan caw watxꞌ ket,
caw chi cu tzala je yu.