Yutol cꞌamxa chi techa cu naꞌoni,

yuxan jix cu naꞌ,

tol oj cu can cu txꞌojli bꞌey conobꞌ Atenas tiꞌ.

2 Catuꞌ oj cu chejontoj naj Timoteo tiꞌ ey jex tuꞌ,

yutol ẍejabꞌ Dios naj.

Chi yalel skꞌaneal yet colbꞌanile yu Cristo ketoj.

Jaꞌ naj jix too akꞌon je tecꞌanil.

Jix too yu yaon oc je naꞌbꞌal,

yet watxꞌ che yaoc Cristo yin je cꞌul sicꞌlebꞌil.

3 Cꞌal yu yalon je yabꞌe,

yet watxꞌ,

cꞌam jex chi somcha el je naꞌbꞌal yu tzet bꞌey lalan je yabꞌen syaꞌil.

Je yotaj xa tol sowalil chi jul wan syaꞌilal tiꞌ kibꞌan.

4 Jaꞌ yet jix cu ecꞌ ey jex tuꞌ,

jix kalon can ey jex,

tol sowalil chi kabꞌ syaꞌil,

yuxan je yotaj xa,

tol jix yun jaxca jix kute kalon can tuꞌ.

5 Yu cꞌal jun tuꞌ,

ma jex techa jin naꞌoni,

yuxan jix jin chejtoj naj Timoteo,

too yabꞌentej ta ey cꞌal oc je cꞌul yin Cristo.

Tala cꞌuxan chi akꞌle somcha el je cꞌul yu naj diablo.

Catuꞌ naꞌbꞌacꞌal mi jix ketne cu bꞌa cu mulna je nan je xol.

6 Jal tinaniꞌ xin,

jix bꞌetecꞌ naj Timoteo ey jex tuꞌ.

Jix yalaꞌ,

tol jacꞌalaꞌ ey cꞌal oc je cꞌul yin Cristo,

catuꞌ ey cꞌal je camcꞌulal yin.

Jix yalon pax oj,

tol naꞌan jon cꞌal je yu tobꞌalkꞌinal,

catuꞌ chon je camcꞌulnen cꞌal.

Catuꞌ tol che yoche che yil kin.

Quey jon pax tuꞌ,

caw chi koche chi kil je yin.

7 Jaon tiꞌ,

jex wuẍtaj,

jex wanabꞌ,

caw miman tzetyetal chi jul kibꞌan,

lalan kilon syaꞌilal titiꞌ.

Jal pax yet jix kabꞌeni,

tol ey cꞌal oc je cꞌul yin Cristo,

jix jul cu tzalacꞌulal je yu.

8 Jaꞌ yet jix kabꞌeni,

tol tecꞌan cꞌal yeoc je naꞌbꞌal yin Naj Kaawil,

jaxca tol jix kiꞌ cu kꞌinal je yu.

9 Yuxan,

caw chi kal yu diosalil tet Dios je yu,

yutol caw chi cu tzala sattaj Dios je yu.

10 Cꞌualil cꞌal akꞌbꞌalil chi kakꞌ kip cu txali,

yu cu kꞌanontoj cu bꞌa jex too kiloni.

Catuꞌ chi cu tzꞌajtzen can je tecꞌanil tuꞌ.

11 Chi koche chi oc cu Mam Dios,

cꞌal Naj Kaawil Jesucristo ketoj,

yet watxꞌ jaꞌ Dios oj waꞌne tzetyetal,

yet watxꞌ chi skeꞌ cu too ey jex tuꞌ.

12 Chi koche chi yakꞌ mimanbꞌoj je camcꞌulal Naj Kaawil,

yet watxꞌ che camcꞌulnele je bꞌa sicꞌlebꞌil.

Catuꞌ oj skeꞌ je camcꞌulnen masanil ánima jaxca chex kute cu camcꞌulneni,

13 yet watxꞌ tol jaꞌ Naj chi akꞌon tecꞌanbꞌoj je naꞌbꞌal,

yet watxꞌ,

watxꞌ cꞌal je bꞌeybꞌal,

catuꞌ cꞌam niꞌoj je penail yul sat cu Mam Dios yet oj jul Naj Kaawil Jesucristo yetoj masanil ebꞌ yet.