4
Jex wuẍtaj,
jex wanabꞌ,
je yotaj xa yutol albꞌil ku ey jex,
tol watxꞌ che yute je bꞌeybꞌal,
yet watxꞌ chi tzala Dios je yetoj.
Kotaj tol jaxca tuꞌ lalan je yuneni,
yutol ẍejabꞌ jon Naj Kaawil Jesucristo,
yuxan chi cam kalontoj ey jex,
tol che jije wan ẍejbꞌanil tiꞌ sicꞌlebꞌil.
2 Je yotaj xa wan ẍejbꞌanil Naj Kaawil Jesús jix ecꞌ kal can ey jex.
3 Jaꞌ tzet oj waltoj ey jex,
jaꞌton chi yoche Dios tol chi cu jije.
Sowalil tol asan yin Dios chi kaoc cu naꞌbꞌal.
Catuꞌ cꞌam chi skeꞌ cu too yin amulal.
4 Junjun jex,
jex wuẍtaj,
watxꞌ ta che yiꞌ je yistil yin swatxꞌilal,
catuꞌ ey ojabꞌ yeloc apnoj je yistil yul je sat junjun jex.
5 Cꞌam chi skeꞌ kochen oc spenail yet cu mimanil,
jaxca ebꞌ man otajnenoj Dios.
6 Caw manche ketnewej junoj ket creyenteal yu wan tiꞌ.
Xax kal jun tiꞌ ey jex junel,
ta ey mac chi unen wan spenail tiꞌ,
oj oc syaꞌtajil ebꞌ sicꞌlebꞌil yu Dios.
7 Jix cu yawten Dios yu koc yetoj,
yet watxꞌ,
watxꞌ chi kute cu bꞌeybꞌal.
Man yu oj kunen spenail yuxan jix cu yawte.
8 Ta ey mac cꞌam yeloc apnoj wan ẍejbꞌanil tiꞌ yul sat,
manaj ẍejbꞌanil junoj ánima cꞌam yeloc apnoj yul sat,
jaꞌ ẍejbꞌanil Dios cꞌam yeloc apnoj yul sat.
Jaꞌ Dios jix aon oc Yespíritu kin.
9 Man sowalil oj tol chi waltoj ey jex,
tol che camcꞌulnen ebꞌ ket creyenteal,
yutol jaꞌ Dios chi akꞌon naꞌcha el je yu,
tzet utbꞌil che yute je camcꞌulnen je bꞌa.
10 Ilaꞌ,
lalan je camcꞌulnen ebꞌ ket creyenteal yul yet Macedonia.
Yuxan,
jex wuẍtaj,
jex wanabꞌ,
chi cu kꞌanle ey jex,
tol chi cꞌal a can je camcꞌulal tuꞌ niꞌojxa.
11 Akꞌwej je yip je yecꞌ yin watxꞌcꞌulal yetoj masanil ánima.
Man je bꞌejcan je yilon je mulnail junjun jex.
Mulnaanwej yetoj je kꞌabꞌ jaxca jix kute kalon can ey jex,
12 yet watxꞌ,
ey je yeloc apnoj yul sat ebꞌ man creyenteoj.
Yetoj pax oj,
yet watxꞌ cꞌam sowalil che kꞌan je tzettaj yetal tet wanojxa.
Skꞌaneal Yet Oj Jul Naj Kaawil
13 Jex wuẍtaj,
jex wanabꞌ,
chi koche tol caw che yotajne eloj tzet utbꞌil yeoc ebꞌ creyente camnajxa.
Yet watxꞌ cꞌam chi cus je cꞌul yu ebꞌ.
Jaxca chi yun scus scꞌul ebꞌ cꞌam niꞌoj tzet chi yaoc yipoj scꞌul.
14 Jaonwej tiꞌ,
chi kaoc yin cu cꞌul tol jaꞌ Naj Jesús,
jix cami,
jix cꞌal pitzcꞌu a junelxa.
Queytuꞌ oj yun pax ebꞌ creyente camnajxa tuꞌ.
Jaꞌ Dios oj aontej ebꞌ yetoj Jesús yet oj juloj.
15 Jaꞌ wan lalan kalontej ey jex tiꞌ,
cu cuybꞌanil yeoc yu Naj Kaawil.
Jaꞌ yet oj jul Naj,
jaꞌ jaon iquis jon to tiꞌ,
man bꞌabꞌel oj cu toj sattaj ebꞌ creyente camnajxa tuꞌ.
16 Yutol oj oc jun aw yet oj akꞌle jun chejbꞌanil.
Jaꞌ jun bꞌabꞌel ángel oj a yaw tuꞌ,
catuꞌ oj xuꞌle chꞌen strompeta Dios.
Jaxa yeyol Naj Kaawil tuꞌ bꞌey satcan,
catuꞌ oj pitzcꞌu a ebꞌ creyente camnajxa tuꞌ.
Yutol jaꞌ ebꞌ bꞌabꞌel oj pitzcꞌu aoj.
17 Jaxa jaon mac iquis jon to tiꞌ,
junne oj yun kiꞌle atoj yetoj ebꞌ.
Catuꞌ oj cu toj xol asun,
oj cu aapnoj snan satcan,
jaxa cu chaꞌon yeyol Naj Kaawil tuꞌ.
Oj cu ecꞌ yetoj Naj Kaawil junelne tituꞌ.
18 Yuxan cu mimancꞌulnewej cu bꞌa yu wan cuybꞌanile tiꞌ.