5
Man sowalil oj chi waltoj scꞌual yet oj jul Naj Kaawil tuꞌ je yabꞌ an,
jex wuẍtaj,
jex wanabꞌ,
2 yutol je yotaj xa sicꞌlebꞌil,
jaxca junoj elkꞌom chi oc elkꞌan yet akꞌbꞌalil bꞌey junoj na,
cꞌam mac otajneni jantaj hora chi juli,
queytuꞌ oj yun sjul scꞌual yet oj jul Naj Kaawil tuꞌ.
3 Jaꞌ yet jun tiempoal tuꞌ,
oj tzꞌaj yal ebꞌ ánima jaxca tiꞌ:
“Jaon tiꞌ caw watxꞌ ket,
cꞌam tzet chi cu naꞌ,”
ẍi ebꞌ oj yalon ebꞌ.
Jaꞌton yet tuꞌ eyman oj akꞌle qꞌueyel ebꞌ.
Jaxca chi yun sjul stiempoal syaꞌil unin yin junoj ix ix,
cꞌam mac chi skeꞌ smitxꞌon oc tucan syaꞌil jun unin tuꞌ,
queytuꞌ oj yun sjul stiempoal syaꞌtajil yibꞌan ebꞌ.
Tutun cꞌam junoj ebꞌ oj colcha can el bꞌey jun syaꞌilal tuꞌ.
4 Jal jex,
jex wuẍtaj,
jex wanabꞌ,
man xol oj kꞌejkꞌinal ey jon ecꞌoj,
yutol chi naꞌcha el wan tiꞌ ku.
Yuxan caxcꞌal jaxca junoj elkꞌom oj yun sjul Naj Kaawil yet jun cꞌual tuꞌ,
caw listo xacꞌal kei.
5 Jaon tiꞌ,
sajkꞌinal xa ey cu pixan,
yet jon xa cꞌualil.
Caw yel,
man kꞌejkꞌinal oj ey cu pixan,
manxa yet jon akꞌbꞌalil.
6 Yuxan ma skeꞌ tol laan oj kute cu bꞌa jaxca wanojxa ánima.
Jaxca tol weynaj el ebꞌ.
Sowalil iquis jon cꞌal yet chi kechbꞌaneni,
catuꞌ tecꞌan chi kute cu naꞌbꞌal.
7 Yutol jaꞌ ebꞌ chi weyi,
yet akꞌbꞌalil chi wey ebꞌ,
Jaꞌ ebꞌ tol uqꞌuem an,
yet akꞌbꞌalil chi ucꞌwi an ebꞌ.
8 Jal jon jaon tiꞌ,
yet jon xa cꞌualil.
Yuxan tecꞌan ojabꞌ chi kute cu bꞌa.
Yetoj pax oj,
ey ojabꞌ cu camcꞌulal.
Ta chi kute jaxca tuꞌ,
laan jon jaxca ebꞌ soldado chi scol sbꞌa yetoj chꞌen pichile chi sjenbꞌa oc xaamscꞌul.
Sowalil chi kaoc yipoj cu cꞌul,
tol colchanaj jon xa.
Ta chi kaoc yipoj cu cꞌul,
laan jon jaxca ebꞌ soldado eyoc chꞌen kꞌoxkꞌome yu.
Quey ojabꞌ tuꞌ chi kute cu colon cu bꞌa.
9 Jaꞌ Dios,
man yu oj yaon oc syaꞌtajil kibꞌan,
yuxan jix cu sicꞌle el yu.
Tol jix cu sicꞌle eloj,
yu cu chaꞌon cu colbꞌanil tet Naj Kaawil Jesucristo.
10 Jaꞌ Naj jix cam cu qꞌuexeloj.
Yuxan caxcꞌal iquis jon to,
ma camnaj jon xa yet chi juli,
junxane oj kun can yetoj cu masanil.
11 Yuxan,
iptzewej je bꞌa junjun jex,
waꞌnewej oc je naꞌbꞌal cꞌal je bꞌeybꞌal,
jaxca cꞌaltaꞌ lalanxa je yunen tinaniꞌ.
Jix Yakꞌ Cuybꞌanile Naj Pablo Tet Ebꞌ Creyente
12 Jex wuẍtaj,
jex wanabꞌ,
ey ebꞌ chi mulna je nan je xol yu Naj Kaawil,
lalan jex yilon ebꞌ,
lalan swaꞌnen oc je naꞌbꞌal ebꞌ.
Chi cu kꞌan ey jex,
naꞌcha ojabꞌ el je yu,
tol akꞌbꞌil yopiso ebꞌ yu Dios.
13 Ey ojabꞌ yeloc apnoj ebꞌ yul je sat,
che camcꞌulne ebꞌ,
yutol yin yet Naj Kaawil chi mulna ebꞌ.
Cꞌam ojabꞌ jowal je nan je xol junjun jex.
14 Jex wuẍtaj,
jex wanabꞌ,
chi cam kalontoj ey jex,
tol che tenchane ebꞌ cꞌam chi yal scꞌul chi mulnai.
Che mimancꞌulne ebꞌ ey scuscꞌulal.
Che yakꞌ stecꞌanil snaꞌbꞌal ebꞌ cꞌamto yip.
Miman che yute je cꞌul yin ebꞌ masanil.
15 Che yil cꞌal tol manche je pajtze je bꞌa tet mac chi akꞌon penacꞌulal ey jex.
Watxꞌ cꞌal che yute je bꞌa junjun jex tobꞌalkꞌinal cꞌal tet masanil ánima.
16 Tzalajonwej tobꞌalkꞌinal.
17 Txalanwej cꞌal tobꞌalkꞌinal.
18 Alwej yu diosalil tet Dios yu yal cꞌal tzet chi tit je yibꞌan.
Jaꞌton jaxca tuꞌ chi yoche Dios,
tol chi kal yu diosalil tet,
yutol yet jon xa Cristo Jesús.
19 Man je tenoc tucan Yespíritu Dios eyoc je yin junjun jex.
20 Jaꞌ ebꞌ chi chejletoj too yalel skꞌane Dios ey jex,
manche je yintajne el tzet chi yal ebꞌ tuꞌ.
21 Jantaj cꞌal wan cuybꞌanile chi akꞌle ey jex,
chi cam je yabꞌeni,
catuꞌ chi cam je naꞌoni,
ta yel,
ma man yeloj.
Asan wan tzetyetal yel che yaoc yin je cꞌul,
22 catuꞌ poꞌowej el je bꞌa xol masanil spenail.
23 Chi koche tol jaꞌ Dios,
jaꞌ jun akꞌom watxꞌcꞌulal snan je xol,
chex waꞌxi oc yetoj sicꞌlebꞌil.
Chi koche pax oj,
jaꞌ chi akꞌon cuenta je pixan,
cꞌal je naꞌbꞌal,
yetoj cꞌal je mimanil,
yet watxꞌ cꞌam niꞌoj je penail yet oj jul Kaawil Jesucristo.
24 Jaꞌ Naj mac chex awten eloj,
chi cꞌal yun tzet chi yalaꞌ.
Oj yun cꞌal masanil wan tiꞌ yu Naj.
Chi Al-letoj Scawil Scꞌul Ebꞌ
25 Jex wuẍtaj,
jex wanabꞌ,
caw chex txali ku tituꞌ.
26 Jaꞌ yet che yil-len je bꞌa,
che yakꞌle scawil je cꞌul yin camcꞌulalil yutol yet jex xa Dios.
27 Yutol ẍejabꞌ jin Naj Kaawil,
yuxan chi waltoj ey jex,
tol che yawte jun jin carta tiꞌ xol ebꞌ creyente masanil tituꞌ.
28 Chi yoche cu cꞌul chi xꞌox Kaawil Jesucristo swatxꞌcꞌulal ey jex tituꞌ.