Jaꞌ jun libro tiꞌ jix tzꞌibꞌelecan yet abꞌil 64 d.C. Jaꞌ naj Pablo jix tzꞌibꞌencan yet eyecꞌ naj bꞌey conobꞌ Macedonia cꞌal bꞌey Filipos.

Bꞌabꞌel Timoteo sbꞌi jun carta tiꞌ, jaꞌton jun bꞌabꞌel carta tiꞌ jix stzꞌibꞌetoj naj Pablo tet naj achꞌe Timoteo ocnaj yin creyenteal bꞌey yul yet Asia. Yicꞌaal Israel ix xutx naj, jal smam naj, Griego naj. Jaꞌ yet jix bꞌetecꞌ naj Pablo bꞌey Asia yet sbꞌabꞌelal, jaꞌ yet tuꞌ jix oc naj yin creyenteal, jaꞌjun naj jix ecꞌ yetoj naj Pablo bꞌey jix eqꞌui.

Jaꞌ jun bꞌabꞌel carta jix aletoj tet naj Timoteo tiꞌ, ey oxebꞌ tujan yeocoj: Bꞌabꞌel tujan, chi el yich bꞌey capítulo 1 masantaꞌ bꞌey capítulo 2, jatuꞌ chi yal yu wan cuybꞌanile chi yal wan ebꞌ comon cꞌal chi yaloc sbꞌa cuywawomal. Jaꞌ ebꞌ tuꞌ chi yal ebꞌ tol cꞌam chi cu chaꞌ cu colbꞌanil yu wan kꞌane miman yeocoj. Chi yalon pax ebꞌ tol ey wan tzet ey sowalil cu loꞌoni. Cꞌam pax chi skeꞌ yoc yetbꞌi ebꞌ ánima yalon ebꞌ.

Jaxa yet scaabꞌ tujan, chi ilcha bꞌey capítulo 3, chi yal tzet chi yun cu mulna bꞌey iglesia, jaxca yet chi oc xolilal culto. Chi yalon pax tzet sowalil chi sbꞌeybꞌalne ebꞌ anciano, ebꞌ diácono yetoj ebꞌ ix ix chi oc yin diaconisail.

Jaxa yet yox tujan, chi el yich bꞌey capítulo 4 masantaꞌ bꞌey capítulo 6, chi yalaꞌ tzet smoo chi sbꞌeybꞌalne naj Timoteo yet chi yakꞌon servil Jesucristo naj. Chi yalon pax oj tol sowalil watxꞌ chi yute sbꞌeybꞌal naj xol junjun tujan ánima bꞌey junjun iglesia.