3 Caw jin naꞌbꞌal chach cancan bꞌey conobꞌ Éfeso tuꞌ,

jaxca taꞌ jix wute jin kꞌanlen ey jaach yet jix jin too bꞌey Macedonia.

Yutol chi woche tol chi cam ja walon tet ebꞌ manaj jaꞌcaw cuybꞌanile chi yakꞌ cuyle oj,

tol chi sbꞌejcan ebꞌ yaloni.

4 Cha wal tet ebꞌ tol manche xa yaoc scꞌul ebꞌ yin comon kꞌane,

cꞌal yin xolilal skꞌaneal yichmam ebꞌ,

yutol ecꞌal kꞌane yotaj ebꞌ.

Comon cꞌal chi steele a sbꞌa ebꞌ yu yin naꞌbꞌacꞌal.

Jaꞌ wan kꞌane tuꞌ,

cꞌam yopiso cu scuyon yin tzet chi yoche scꞌul Dios chi kunne,

ma yin kaon oc cu cꞌul yin.

5 Chi waltoj jun chejbꞌanil tiꞌ ja wabꞌe,

yet watxꞌ oj pitzcꞌu a scamcꞌulal ebꞌ creyente tituꞌ.

Ta chi swaꞌne oc sbꞌa ebꞌ,

ta chi yakꞌ cuenta sbꞌa ebꞌ yetoj snaꞌbꞌal,

ta caw yel chi yaoc scꞌul ebꞌ yin Dios,

oj ton pitzcꞌu a scamcꞌulal ebꞌ tuꞌ.

6 Ey pax ebꞌ chi bꞌejon can wan watxꞌ bꞌeybꞌale chi waltej tiꞌ an.

Yuxan comon xacꞌal chi yaoc snaꞌbꞌal ebꞌ yin comon kꞌane cꞌam yeloc apnoj.

7 Chi yoche ebꞌ chi oc cuywam yin sley Moisés.

Cꞌam cꞌal niꞌoj chi naꞌcha el yu ebꞌ tzet chi yal ebꞌ.

Caxcꞌal chi tzꞌaj yecꞌbꞌane sbꞌa ebꞌ yaloni,

cꞌam cꞌal chi naꞌcha el yu ebꞌ tzet chi yal ebꞌ.

8 Kotaj tol ey yopiso sley Moisés tuꞌ ta chi cu jije tzet chi yalaꞌ.

9 Kotaj pax tol man yu oj ebꞌ watxꞌ sbꞌeybꞌal yuxan jix akꞌle can jun ley tuꞌ,

jaꞌton yu ebꞌ oj waltoj tiꞌ,

yuxan jix akꞌle canoj.

Yu ebꞌ pit chi yute sbꞌa tet Dios,

ebꞌ man jijemoj chi yute sbꞌa yin tzet chi yalaꞌ,

ebꞌ cꞌam chi bꞌeybꞌalnen jaxca chi yoche Dios,

ebꞌ pena sbꞌeybꞌal,

ebꞌ cꞌam yeloc apnoj Dios yul sat,

ebꞌ comon cꞌal chi bꞌuchwa yin junoj tzetyetal watxꞌ,

ebꞌ chi smakꞌ cam smam cꞌal xutx,

cꞌal ebꞌ chi makꞌwi cam ánima,

10 ebꞌ amul,

ebꞌ chi yun mul yetoj yet winajil,

ebꞌ elkꞌom ánima,

ebꞌ lekꞌtiꞌwom,

ebꞌ chi snaꞌa kꞌane yin yet animail.

Yetoj pax ebꞌ chi yakꞌ penacꞌulalil yin cuybꞌanile caw yel,

yu pax ebꞌ,

yuxan jix akꞌle can jun ley tuꞌ.

11 Jaꞌ jun cuybꞌanile caw yel tiꞌ,

jaꞌton skꞌaneal yet colbꞌanile tiꞌ jix yakꞌ can Dios ey jin yu walon eloj.

Jaꞌ jun tiꞌ,

miman yeloc apnoj,

catuꞌ miman pax swatxꞌilal.

Jaꞌ chi alontej skꞌaneal Dios,

smoo chi kal watxꞌ kꞌane tet.

12 Eyoc Naj Kaawil Jesucristo wetoj yin wopiso tiꞌ an.

Chi wal yu diosalil tet Naj,

yutol jijem jin yul sat Naj,

yalaꞌ.

Yu jun tuꞌ,

yuxan jix yakꞌ wopiso wakꞌon servil.

13 Jal yet yalantoj xin,

bꞌuchwawom jin yin Cristo.

Caw jix wakꞌ penacꞌulal yin,

masantaꞌ jix jin bꞌawa yin Naj.

Jix okꞌ pax scꞌul Dios win an.

Ma naꞌcha el wu tzet chi el wunen an,

yutol ma jin to creyenteoj yet tuꞌ an.

14 Caw miman swatxꞌcꞌulal Naj Kaawil jix xꞌox ey jin an.

Jix yakꞌ waoc jin cꞌul yin,

catuꞌ jix yakꞌon pax jin camcꞌulal,

jaxca cꞌal chi yute yakꞌon ey jon junjun jon,

yutol junxane keoc yetoj Cristo Jesús.

15 Ey jun tzetyetal caw yel oj wal an.

Smoo chi cu chaꞌ kabꞌe.

Julnaj ecꞌ Jesucristo yul yibꞌankꞌinal tiꞌ,

yu jul scolon el ebꞌ penawom.

Yel penawom jin xol ebꞌ penawom tuꞌ,

jain tiꞌ.

16 Jaxa jix yun xin,

caw jix okꞌ scꞌul Dios win an,

yet watxꞌ jaꞌ yet jix okꞌ scꞌul win tuꞌ,

jix txeclo eloj tol ey smimancꞌulal Jesucristo.

Yuxan,

txꞌoxbꞌanile weoc tet jantaj ebꞌ tol to oj yaoc scꞌul yin,

yet watxꞌ chi ẍaꞌ pax skꞌinal ebꞌ tol ey cꞌal yin tobꞌalkꞌinal,

caxcꞌal caw yel penawom jin yintaj masanil wanojxa.

17 Jaꞌ Dios,

yaaw yeoc yin tobꞌalkꞌinal.

Cꞌam bꞌakꞌin oj cam Naj.

Cꞌam junoj mac chi skeꞌ yilon oc yin Naj.

Asan jun Dios tiꞌ,

cꞌam junojxa.

Asan Naj otajnen masanil tzetyetal.

Miman ojabꞌ yeloc apnoj Naj yul cu sat.

Kalwej watxꞌ kꞌane tet Naj yin tobꞌalkꞌinal.

Amén.

18 Jaach Timoteo,

camcꞌulnebꞌil jaach wu an,

jaxca junoj jin cꞌaal,

queytuꞌ chi yun walontoj wan chejbꞌanile tiꞌ ey jaach an,

yet watxꞌ jaxca jix yun yakꞌle can ja win yu Dios yet peyxa,

queytuꞌ oj ja wute mulna ja bꞌa.

Yuxan,

jaxca junoj soldado caw watxꞌ chi yute sbꞌa yin yopiso,

queytuꞌ cha wute ja waon oc ja cꞌul yin.

Akꞌ cꞌal cuenta ja bꞌa yetoj ja naꞌbꞌal tobꞌalkꞌinal.

19 Ey ebꞌ cꞌamxa chi yakꞌ cuenta sbꞌa yetoj snaꞌbꞌal.

Yu jun tuꞌ,

yuxan jix etex el snaꞌbꞌal ebꞌ.

Cꞌamxa tzet chi yaoc ebꞌ yin scꞌul tinaniꞌ.

20 Jaꞌ naj Himeneo yetoj naj Alejandro,

queytuꞌ jix yute sbꞌa ebꞌ.

Yuxan jix waoc ebꞌ yul skꞌabꞌ Satanás,

yet watxꞌ chi yotajne el ebꞌ,

tol cꞌam chi skeꞌ comon cꞌal chi kal bꞌuchwal kꞌane yin Dios.