Jaꞌ tinaniꞌ,

chi bꞌabꞌi walontoj jun tiꞌ ey jaach.

Sowalil chi cu kꞌan tet Dios,

chi cu txali yu masanil ánima.

Sowalil chi cu kꞌan tet Dios,

catuꞌ chi kalon pax yu diosalil yu ebꞌ ánima tuꞌ.

2 Sowalil chi cu txali yu ebꞌ mimej yaaw,

cꞌal yu ebꞌ yaaw masanil,

yet watxꞌ yin ojabꞌ watxꞌcꞌulal ey jon ecꞌ yetoj ebꞌ,

catuꞌ cꞌam ojabꞌ jowal cu xol yetoj ebꞌ.

Ta jaxca tuꞌ oj skeꞌ kunen tzet chi ẍaꞌ scꞌul Dios.

Oj skeꞌ cu waꞌnen oc cu bꞌeybꞌal.

3 Ta jaxca tuꞌ chi kute cu bꞌa,

watxꞌ yul sat Dios cu Colomal,

catuꞌ caw chi tzala Naj ketoj.

4 Yutol chi yoche Naj chi colcha el masanil ánima.

Chi yoche Naj chi yotajne el jun cuybꞌanile jaꞌcaw yel ebꞌ.

5 Asan jun Dios ey.

Catuꞌ asan pax jun yalomal oc cu tiꞌ tet,

jaꞌton Naj Jesucristo,

jaꞌton Naj jix oc yin animail.

6 Jix jul yakꞌ cam sbꞌa Naj,

yet watxꞌ chi skeꞌ scolcha can masanil ánima yu.

Jaꞌ yet jix jul stiempoal yu chi al-le eloj,

jix al-le el skꞌaneal.

7 Jix akꞌle wopiso walon el jun skꞌaneal tiꞌ jain tiꞌ.

Jix jin ale oc ẍejabꞌoj Jesucristo an.

Yu jun tuꞌ,

yuxan jix akꞌle pax wopiso jin cuyon ebꞌ man Israeloj yin jun cuybꞌanile caw yel,

yet watxꞌ chi yaoc scꞌul ebꞌ yin Cristo.

Caw yel chi wal an,

tol eyoc jin cꞌul yin Cristo.

Man tucꞌal oj chi wal an.

8 Yuxan,

chi woche chi txali ebꞌ winaj bꞌey junjun conobꞌ.

Jaꞌ ebꞌ chi yiꞌa can skꞌabꞌ catuꞌ chi txali,

sowalil ojabꞌ watxꞌ sbꞌeybꞌal ebꞌ yul sat Dios.^a

Cꞌam ojabꞌ ẍichoncꞌulal ebꞌ.

Man ojabꞌ akꞌom jowal oj ebꞌ.

9 Jaꞌ ebꞌ ix ix,

bꞌey cꞌal ian ojabꞌ chi yute spichon sbꞌa ebꞌ ix,

tool ojabꞌ chi yute yaon oc spichil ebꞌ ix.

Man ojabꞌ eyxa smey oj chi yute xil yaꞌ ebꞌ.

Manche smeyne sbꞌa ebꞌ yaon oc chꞌen oro chi tzejeji yili,

cꞌal chꞌen chꞌen yel xacꞌal miman stool.

Manche smeyne sbꞌa ebꞌ yetoj pichile yel xacꞌal miman stool.

10 Jaꞌ tiꞌ yet ebꞌ,

jaꞌ ojabꞌ watxꞌ bꞌeybꞌale chi xꞌoxel ebꞌ.

Smoo watxꞌ chi yute sbꞌa ebꞌ,

yutol yet xa Dios yeoc ebꞌ.

11 Yiꞌ ojabꞌ ey sbꞌa ix ix yabꞌen scuybꞌanil,

catuꞌ tzꞌin ojabꞌ cꞌal ẍi ebꞌ ix yet chi yabꞌen scuybꞌanil.

12 Jain chi wal an,

tol cꞌam chi skeꞌ scuywa ebꞌ ix xol winaj.

Ma skeꞌ tol jaꞌ ebꞌ ix oj akꞌon mandar winaj.

Yabꞌ ojabꞌ ebꞌ ix,

cꞌam ojabꞌ chi yaltoj yet ebꞌ ix.

13 Yutol bꞌabꞌel waꞌnebꞌil naj Adán yu Dios.

Tzunan to jix waꞌnele ix Eva.

14 Manaj naj Adán jix iꞌle eytej sat yu naj diablo,

tol jaꞌ ix Eva,

yuxan jaꞌ ix jix eyqꞌuey yin spenail tet Dios.

15 Jaꞌ ilo chꞌibꞌ unin yopiso ebꞌ ix.

Oj colcha ebꞌ ix,

yutol chi yaoc Dios ebꞌ yin scꞌul.

Ta ey scamcꞌulal ebꞌ ix,

ta watxꞌ sbꞌeybꞌal ebꞌ yul sat Dios,

ta chi yakꞌ cuenta sbꞌa ebꞌ ix.