Sbꞌeybꞌal Ebꞌ Anciano
3
Jaꞌ junxa kꞌane oj waltoj ey jaach tiꞌ an,
caw yel.
Ta ey mac chi yoche chi oc yilomal ebꞌ yet creyenteal,
watxꞌ jun mulnail chi yoche ebꞌ chi yun tuꞌ.
2 Oj waltoj tzet sowalil chi el sbꞌeybꞌalne ebꞌ chi oc yin jun opiso tuꞌ.
Cꞌam ojabꞌ bꞌey chi el yunen junoj tzetyetal man watxꞌoj ebꞌ,
yet watxꞌ cꞌam tzet chi skeꞌ yakꞌle queja yin ebꞌ.
Sowalil junne ojabꞌ yistil ebꞌ.
Tecꞌan ojabꞌ cꞌal chi yute snaꞌbꞌal ebꞌ,
yakꞌ ojabꞌ cꞌal cuenta sbꞌa ebꞌ.
Sowalil ojabꞌ watxꞌ cꞌal chi yute sbꞌeybꞌal ebꞌ sattaj yet animail,
akꞌom posada ojabꞌ ebꞌ.
Watxꞌ ojabꞌ chi yute scuyon ebꞌ yet creyenteal.
3 Man ojabꞌ uqꞌuem an oj ebꞌ.
Man ojabꞌ makꞌwawom oj ebꞌ.
Manche akꞌwi ganar tumin ebꞌ yin tzet man watxꞌoj.
Watxꞌ ojabꞌ scꞌul ebꞌ.
Man ojabꞌ akꞌom jowal oj ebꞌ.
Man ojabꞌ asanne oj yin akꞌo ganar tumin eyoc snaꞌbꞌal ebꞌ.
4 Watxꞌ ojabꞌ yakꞌon cuenta sbꞌa ebꞌ yul sna,
yet watxꞌ jijem ojabꞌ cꞌal yuninal ebꞌ tet,
cꞌal yet watxꞌ ey ojabꞌ yeloc apnoj ebꞌ yul sat yuninal tuꞌ.
5 Jaꞌ mac man yotaj oj tzet chi yute yakꞌon cuenta sbꞌa ebꞌ yul sna,
¿tumi chi skeꞌ yakꞌon pax cuenta yiglesia Dios ebꞌ?
6 Jaꞌ ebꞌ unin creyente to,
cꞌamto chi skeꞌ yale oc yopiso ebꞌ,
yutol ey smey chi yiꞌa can sbꞌa ebꞌ.
Ta chi yiꞌa can sbꞌa ebꞌ,
ey smey chi ale oc scastigo ebꞌ,
jaxca jix utele naj diablo.
7 Jaꞌ ebꞌ eyoc yopiso,
sowalil ojabꞌ watxꞌ chi yute sbꞌeybꞌal ebꞌ sattaj ebꞌ man creyenteoj,
yet watxꞌ cꞌam chi bꞌuchle ebꞌ,
cꞌal yet watxꞌ,
cꞌam chi eyqꞌuey ebꞌ yul syaal naj diablo.
Sbꞌeybꞌal Ebꞌ Diácono
8 Tol chi wal pax toj ey jaach tzet sowalil chi el sbꞌeybꞌalnen ebꞌ diácono.
Sowalil watxꞌ ojabꞌ chi yute sbꞌeybꞌal sattaj ebꞌ yet animail.
Man ojabꞌ caabꞌoj snaꞌbꞌal ebꞌ.
Man ojabꞌ uqꞌuem an oj ebꞌ.
Manche akꞌwi ganar tumin ebꞌ yin tzet man watxꞌoj.
9 Sowalil caw chi yaoc snaꞌbꞌal ebꞌ yin wan cuybꞌanil akꞌbꞌil ey jon yu Dios,
wan bꞌey chi kaoc cu cꞌul.
Yetoj pax oj,
sowalil ojabꞌ chi yakꞌ cuenta sbꞌa ebꞌ yetoj snaꞌbꞌal.
10 Ilwej sbꞌeybꞌal ebꞌ chi oc diaconoal tuꞌ bꞌabꞌel,
ta cꞌam spenail ebꞌ chi ilchai,
chi skeꞌ yale oc yopiso ebꞌ.
11 Jacꞌalaꞌ pax ebꞌ ix ix chi oc yopiso,
sowalil watxꞌ ojabꞌ chi yute sbꞌeybꞌal ebꞌ ix sattaj yet animail.
Man ojabꞌ alom kꞌumale oj ebꞌ.
Sowalil tecꞌan ojabꞌ chi yute snaꞌbꞌal ebꞌ.
Yetoj pax oj,
jijem ojabꞌ cꞌal chi yute sbꞌa ebꞌ ix yin masanil tzetyetal.
12 Jaꞌ ebꞌ diácono,
junne ojabꞌ yistil junjun ebꞌ.
Watxꞌ ojabꞌ yakꞌon cuenta sbꞌa tet ebꞌ yuninal,
cꞌal wanxa ebꞌ yul sna.
13 Ta watxꞌ yakꞌon ebꞌ diácono tuꞌ yin yopiso,
miman yeloc apnoj ebꞌ yul sat ebꞌ yet creyenteal.
Catuꞌ cꞌam chi xiw ebꞌ yaloni tol eyoc scꞌul ebꞌ yin Cristo Jesús.
Akꞌbꞌil Kotajne Eloj Tzet Utbꞌil Yeoc Cu Cuybꞌanil
14 Chin too ey jaach tuꞌ yet jayebꞌ cꞌu,
yajbꞌan chin too an,
chin tzꞌibꞌetoj wan chejbꞌanil tiꞌ ey jaach an.
15 Tala cꞌuxan cꞌam chin apni yin eyman,
yuxan chin tzꞌibꞌe jun jin carta tiꞌ ey jaach an,
yet watxꞌ oj ja wotajne eloj tzet chi el cu bꞌeybꞌalnen jaon yuninal jon xa Dios tiꞌ,
yutol jaon tiꞌ,
yiglesia jon xa Dios iquis.
Ey kopiso kalon el caw yel.
Catuꞌ ey jon oc yipoj.
16 Akꞌbꞌil kotajne el yu Dios tzet utbꞌil yeoc cu cuybꞌanil.
Caw yel,
caw miman yeloc apnoj wan tzet akꞌbꞌil kotajne el yu tuꞌ.
Chi yal jaxca tiꞌ:
Jix jul Dios yin mimanile jaxca yet ánima.
Jaꞌ Naj Espíritu jix alon eloj,
tzet utbꞌil tol caw jichan snaꞌbꞌal.
Ilbꞌil yu ebꞌ ángel,
albꞌil el skꞌaneal tet wanxa nacionlaj.
Ey ebꞌ yul yibꞌankꞌinal tiꞌ jix yaoc scꞌul yin.
Yetoj pax oj,
jix iꞌle pax a satcan,
ẍi yul jun cu cuybꞌanil tiꞌ.