Ey Ebꞌ Creyente Oj Yiꞌcan El Sbꞌa Yin Screyenteal
4
Caw watxꞌ chi yute yalon Naj Yespíritu Dios,
tol jaꞌ yet lalanxa sjul slawubꞌ tiempoal,
ey ebꞌ oj yiꞌcan el sbꞌa yin screyenteal.
Catuꞌ jaꞌ yin cuybꞌanile man yeloj oj yaoc snaꞌbꞌal ebꞌ.
Jaꞌ wan cuybꞌanile tuꞌ,
scuybꞌanil pena espíritu.
2 Oj yakꞌ xiquin ebꞌ yabꞌen tzet chi yal ánima lekꞌtiꞌ.
Caabꞌ sat ebꞌ ánima tuꞌ.
Junelne tol etexnaj el snaꞌbꞌal ebꞌ sicꞌlebꞌil.
3 Oj tzꞌaj yal ebꞌ jaxca tiꞌ:
“Ey sleyal tol cꞌam chi oc ketbꞌi.
Ey wan tzetyetal ey sleyal tol cꞌam chi skeꞌ cu loꞌoni,”
ẍi ebꞌ,
oj tzꞌaj yalon ebꞌ lekꞌtiꞌ tuꞌ.
Jal pax Dios xin,
jix swaꞌne wan tzettaj yetal tuꞌ yu cu loꞌon jaon creyente jon tiꞌ.
Yuxan,
jaꞌ yet chi cu loꞌoni,
chi kal yu diosalil tet Dios yu,
yutol kotajxa jun cuybꞌanile caw yel.
4-5 Masanil tzet waꞌnebꞌil yu Dios,
watxꞌ cꞌal eloj.
Yuxan,
cꞌam chi skeꞌ kaloni,
tol ey tzet man watxꞌoj yul sat.
Chi skeꞌ cu loꞌon masanil tzettaj yetal,
asan tol chi kal yu diosalil yu tzet chi cu loꞌ tuꞌ,
watxꞌ masanil tzet chi cu loꞌ tuꞌ,
yutol queytuꞌ yalon skꞌane Dios.
Sbꞌeybꞌal Ebꞌ Ẍejabꞌ Jesucristo
6 Ta oj ja wakꞌ wan cuybꞌanile tiꞌ scuy ebꞌ creyente tuꞌ tituꞌ,
watxꞌ ẍejabꞌ Jesucristo jaach,
chi yal tuꞌ.
Oj chꞌibꞌ ja wip,
yet cha cuyon ja bꞌa ja walon can kꞌane chi kaoc yin cu cꞌul,
cꞌal wanxa cuybꞌanile caw watxꞌ bꞌey eyoc cu naꞌbꞌal.
7 Manche ja chaꞌ ja wabꞌ wan comon kꞌane cꞌam yeloc apnoj.
A cꞌal oc ja naꞌbꞌal tobꞌalkꞌinal yin Dios.
8 Ta chi cu cuy cu mimanil yet watxꞌ ey yip,
watxꞌ toni.
Yel xacꞌal pax ecꞌbꞌan swatxꞌil ta chi cu cuy cu naꞌbꞌal yin yet Dios.
Ta queytuꞌ chi kute cu bꞌa,
ey swatxꞌil oj cu chaꞌ yul yibꞌankꞌinal tiꞌ,
cꞌal bꞌey satcan.
9 Jaꞌ jun cuybꞌanile tiꞌ,
caw yel.
Smoo chi cu chaꞌ kabꞌ yin masanil cu cꞌul.
10 Yu cꞌal ton jun tiꞌ,
yuxan chi kiꞌatej cu cꞌul kakꞌon kip cu mulna yin yet Dios,
catuꞌ chi kilon pax syaꞌilal yu.
Yutol jaꞌ Dios iquis chi kaoc yipoj cu cꞌul.
Jaꞌ Dios tuꞌ,
Scolomal masanil ánima yei.
Jaꞌ ebꞌ chi yaoc scꞌul yin,
oj colcha ebꞌ yu.
11 Jaꞌ wan tzet chi waltoj ey jaach tiꞌ an,
caw chi cam ja walon tet ebꞌ creyente tituꞌ,
catuꞌ cha cuyon ebꞌ yin.
12 Watxꞌ cꞌal cha wute ja bꞌa,
yet watxꞌ cꞌam mac chach alon uninal.
Watxꞌ cha txꞌox ja watxꞌ bꞌeybꞌale tet ebꞌ creyente masanil.
Watxꞌ cha wute kꞌanabꞌ ja bꞌa tet ebꞌ.
Watxꞌ cha wute ja bꞌa sattaj ebꞌ.
Watxꞌ cha wute ja camcꞌulnen ebꞌ.
Watxꞌ cha wute ja naꞌbꞌal yil ebꞌ.
Asanne ojabꞌ Naj Kaawil cha waoc yin ja cꞌul.
Jichan cꞌal cha wute ja naꞌbꞌal yil ebꞌ.
Yet watxꞌ jaxca tiꞌ cha wute ja txꞌoxon ja watxꞌ bꞌeybꞌal yil ebꞌ tituꞌ.
13 Yajbꞌan chin apni,
akꞌ ja wip ja wawten An Juun Tzꞌibꞌebꞌilcan tet ebꞌ.
Ja jejon oc snaꞌbꞌal ebꞌ,
cꞌal ja cuyon ebꞌ.
14 Manche ja bꞌejcan ja wopiso akꞌbꞌil yu Dios yet jix sbꞌatxbꞌan atoj skꞌabꞌ ebꞌ anciano yibꞌan ja jolom.
Jaꞌ Dios jix akꞌon naꞌcha el yu ebꞌ,
tol oj jaach skꞌanbꞌalne,
yuxan jix akꞌle pax yotajne el ebꞌ tzet utbꞌil oj yun ja wakꞌon servil Dios.
15 Caw cha waoc wan chi waltoj ey jaach tiꞌ yin ja cꞌul,
yet watxꞌ oj yil ebꞌ masanil tituꞌ,
tol quey cꞌal tiꞌ chi chꞌibꞌ ja wip junjun cꞌu.
16 Teyne ja bꞌa,
catuꞌ chi cam ja walon tzet cuybꞌanile cha wakꞌ scuy ebꞌ.
Tecꞌan cꞌal cha wute ja bꞌa tobꞌalkꞌinal,
yet watxꞌ oj ja col ja bꞌa.
Cꞌal ebꞌ chi abꞌen tzet cha walaꞌ,
oj colcha pax ebꞌ.