6
Chi wal pax toj ey jaach yu ebꞌ creyente eyoc yakꞌomal servil.
Miman ojabꞌ yeloc apnoj syaawil ebꞌ tuꞌ yul sat,
yet watxꞌ cꞌam mac chi bꞌuchwa yin Dios yu sbꞌeybꞌal ebꞌ,
cꞌal yin cu cuybꞌanil bꞌey eyoc cu naꞌbꞌal.
2 Ta ey ebꞌ eyoc yakꞌomal servil yintaj ebꞌ yet creyenteal,
caxcꞌal creyente syaawil ebꞌ tuꞌ,
miman ojabꞌ cꞌaltaꞌ yeloc apnoj yul sat ebꞌ.
Yel ojabꞌ watxꞌ chi yute mulna sbꞌa ebꞌ tet,
yutol yet creyenteal sbꞌa ebꞌ yetoj syaawil tuꞌ,
catuꞌ chi camcꞌulnele ebꞌ yu ebꞌ yakꞌomal servil tuꞌ.
Chi cam ja walon wan chejbꞌanil tiꞌ tet ebꞌ tituꞌ,
cha cuyon ebꞌ yin.
Manche Kaoc Cu Naꞌbꞌal Yin Bꞌeomal
3 Jaꞌ scuybꞌanil Naj Kaawil Jesucristo caw yel.
Ey pax mac cꞌam chi yaoc scꞌul yin wan cuybꞌanile tiꞌ.
Txꞌoj cuybꞌanile chi el yalon ebꞌ.
Cꞌam chi yoche ebꞌ wan cuybꞌanile chi alon tzet chi kute kaon oc cu naꞌbꞌal yin Dios.
4 Jaꞌ mac jaxca tuꞌ chi yute sbꞌa,
cꞌam niꞌoj tzet yotaj ebꞌ,
tucꞌal chi smimanbꞌine sbꞌa ebꞌ.
Chi yoche ebꞌ comon chi yakꞌle jowal yetoj junojxa mactxequel.
Chi yoche pax ebꞌ chi steele a sbꞌa yin wan kꞌane.
Asan wan tiꞌ chi yil yun ebꞌ tobꞌalkꞌinal.
Yu ton wan tzet chi el yunen ebꞌ tuꞌ,
chi pitzcꞌu a chichoncꞌulal,
jowal,
bꞌuchwal,
pena naꞌbꞌaleal,
5 cꞌal cajlebꞌail.
Jaxca ton tiꞌ chi yute sbꞌa ebꞌ etexnaj el snaꞌbꞌal,
ebꞌ cꞌamxa chi yaoc snaꞌbꞌal yin cuybꞌanile jaꞌcaw yel.
Chi snaꞌ ebꞌ tol oj yakꞌ ganar tumin ebꞌ yin cu cuybꞌanil.
/Manche ja junbꞌane ey ja bꞌa yetoj ebꞌ./
6 Yel,
miman ton swatxꞌil chi kiꞌ yin cu cuybꞌanil,
ta chi kakꞌ tzalabꞌoj cu cꞌul yetoj tzet ey,
ey jon.
7 Jaꞌ yet chi cu ali,
cꞌam niꞌoj tzet iꞌbꞌil oc ku chi cu juli.
Jacꞌalaꞌ pax yet oj cu pax oj.
Cꞌam niꞌoj tzet oj skeꞌ kiꞌontoj yul yibꞌankꞌinal tiꞌ.
8 Yuxan,
ta ey tzet chi cu loꞌ catuꞌ ta ey cu pichil,
tzalajonwej.
9 Jal tinaniꞌ xin,
ey creyente asan sbꞌeomal chi yoche.
Yu ton tuꞌ,
yuxan cꞌuun yakꞌle etex el ebꞌ yu tzet cꞌam swatxꞌil.
Jaxca tol chi eyqꞌuey ebꞌ yul junoj yaal,
yutol ecꞌal wan tzet cꞌam yopiso chi yoche oc ebꞌ tuꞌ,
yuxan chi etex el snaꞌbꞌal ebꞌ yin junelne.
Yuxan,
queytuꞌ oj yun sqꞌueycan el ebꞌ.
10 Ta asan yin chꞌen tumin chi kaoc cu naꞌbꞌal,
chi pitzcꞌu a wanojxa tzet man watxꞌoj kin.
Ey ebꞌ asan tumin chi yoche ocoj.
Yu jun tuꞌ,
yuxan jix sbꞌejcan wan cuybꞌanile ebꞌ bꞌey chi tzꞌaj yale oc scꞌul ebꞌ.
Mimej cuscꞌulal jix yiꞌtej ebꞌ yibꞌan.
Tecꞌan Ojabꞌ Chi Kute Oc Cu Cꞌul Yin Jesucristo
11 Jaach Timoteo,
tol yet xa Dios ja wei.
Manche ja wun wan tzet cꞌam swatxꞌil xax waltoj tiꞌ an.
Jichan cꞌal cha wute ja bꞌeybꞌal.
Asan ojabꞌ yin Dios cha waoc ja cꞌul,
cꞌal ja naꞌbꞌal.
Ey ojabꞌ ja camcꞌulal.
Tecꞌbꞌa ja bꞌa ja wabꞌen syaꞌil.
Yeynajil cha wute ja bꞌa.
12 Jaxca junoj soldado caw tecꞌan chi yute sbꞌa,
quey ojabꞌ tuꞌ cha wute ja waon oc ja cꞌul yin Naj Kaawil.
Jaxca tiꞌ cha wute ja chaꞌon ja kꞌinal tol ey cꞌal yin tobꞌalkꞌinal.
Yu ja chaꞌon ja kꞌinal tuꞌ,
yuxan jix jaach yawte oc Dios yetoj.
Caw watxꞌ jix ja wute ja walon sattaj masanil ebꞌ jix abꞌen ja waloni,
tol Kaawil ton Jesucristo tuꞌ.
13 Yu Dios,
yuxan iquis jon ecꞌ cu masanil yul yibꞌankꞌinal tiꞌ,
cꞌal yetoj teꞌ teꞌ,
cꞌal yetoj noꞌ noꞌ pax oj.
Jaꞌ Jesucristo,
watxꞌ pax jix yute yakꞌon sbꞌa testigoal sattaj naj Poncio Pilato.
Jaꞌ sattaj Dios yetoj sattaj Jesucristo tuꞌ chi cam walontoj ey jaach an,
14 tol caw cha jije wan chejbꞌanile tiꞌ sicꞌlebꞌil.
Watxꞌ cꞌal cha wute ja bꞌeybꞌal,
masantaꞌcꞌal chi jul Naj Kaawil Jesucristo.
15 Jato yet oj jul jun tiempoal jaxca chi yoche Dios,
jaꞌ yet tuꞌ catuꞌ oj yunen el wan tiꞌ yu.
Yutol asan Dios Yaawil catuꞌ tzalacꞌulal cꞌal yei.
Jaꞌ Dios tuꞌ Sreyal ebꞌ rey,
catuꞌ Yaawil ebꞌ yaaw pax oj.
16 Asan Dios man cambꞌeal oj yei.
Xol sajkꞌinal ey Dios.
Cꞌam junoj mac chi skeꞌ yapni scꞌatan.
Cꞌamto junoj mac chi ilon yin Dios tuꞌ,
yutol cꞌam junoj mac chi skeꞌ yoc tꞌanan yin.
Miman ojabꞌ yeloc apnoj Dios yul cu sat.
Yakꞌ ojabꞌ Yaawil Dios yin tobꞌalkꞌinal.
Amén.
17 Al wan chejbꞌanile oj waltoj tiꞌ tet ebꞌ creyente bꞌeom yin tzettaj yetal yul yibꞌankꞌinal tiꞌ.
Chi cam ja walon yabꞌ ebꞌ tol manche smimanbꞌane sbꞌa ebꞌ.
Manche yaoc sbꞌeomal ebꞌ yipoj scꞌul,
yutol man tobꞌalkꞌinal oj ey.
Catuꞌ cha walon tet ebꞌ tol asan ojabꞌ Dios iquis chi yaoc ebꞌ yipoj scꞌul.
Yutol jaꞌcaw chi akꞌon masanil tzetyetal ey jon,
yu kakꞌon tzalabꞌoj cu cꞌul yin tzet chi yakꞌ Dios ey jon tuꞌ.
18 Cha wal tet ebꞌ,
tol watxꞌ chi yute sbꞌeybꞌal ebꞌ,
miman tzet watxꞌ chi skeꞌ el yunen ebꞌ.
Colwa ojabꞌ ebꞌ tet ebꞌ mebꞌa,
listo ojabꞌ chi yute sbꞌa saꞌon ebꞌ tet ebꞌ mebꞌa tuꞌ.
19 Ta chi sbꞌeybꞌalne ebꞌ jaxca chi wal tiꞌ an,
jaxca ton tiꞌ chi yute syambꞌan toj sbꞌeomal ebꞌ bꞌey satcan.
Catuꞌ jaꞌ yet oj aapnoj stiempoal,
sowalil oj ẍaꞌ spaj ebꞌ.
Jaxca ton tiꞌ oj yute ẍaꞌon skꞌinal ebꞌ tol ey cꞌal yin tobꞌalkꞌinal.
Slawubꞌal Ẍejbꞌanil Naj Timoteo Chi Yaltoj Naj Pablo
20 Jaach Timoteo,
teyne cꞌal tzet jix ja chaꞌoc yul ja kꞌabꞌ.
Ey ebꞌ comon cꞌal chi yal tzettaj yetal naꞌbꞌacꞌal.
Caw cꞌam niꞌoj yeloc apnoj tzet chi yal ebꞌ tuꞌ.
Chi yaloc sbꞌa ebꞌ jelanil.
Chi tzꞌaj skꞌanle ebꞌ jaxca tiꞌ:
“¿Tumi taꞌ yel jun tiꞌ?”
ẍi ebꞌ chi tzꞌaj skꞌanlen ebꞌ.
Manche jaach kꞌanabꞌ yetoj ebꞌ,
catuꞌ man ojabꞌ chach ecꞌ yetoj ebꞌ.
21 Yutol ey ebꞌ chi yaoc scꞌul yin wan lekꞌtiꞌal chi yal ebꞌ tuꞌ.
Yu jun tuꞌ,
yuxan chi sbꞌejcan cuybꞌanile jix yaoc ebꞌ yin scꞌul yin sbꞌabꞌelal.
Chi woche chi yakꞌ swatxꞌcꞌulal Dios ey jaach tituꞌ.