Jaꞌ Yopiso Jesús
20
Ey jun cꞌual jix cuywa Jesús xol ebꞌ ánima yul stemplo Dios.
Jix cꞌoli yalon el watxꞌ kꞌane yet colbꞌanile tet ebꞌ.
Jaꞌ ebꞌ yaaw yakꞌomal xaambꞌal ebꞌ Israel tet Dios,
yetoj ebꞌ cuywam yin sley Moisés,
cꞌal ebꞌ ichamtaj winaj ey yopiso,
jix apni ebꞌ scꞌatan Jesús.
2 Jix yalon ebꞌ jaxca tiꞌ:
—Al ey jon tzet ja wopiso,
yu cha wun wan tiꞌ.
¿Mactxequel jix akꞌon ja wopiso tuꞌ?
ẍi ebꞌ tet Jesús.
3 —Jain tiꞌ,
oj jin kꞌanle pax junoj tzetyetal ey jex.
Alwej ey jin an.
4 ¿Mac jix akꞌon yopiso naj Juan,
yuxan jix yakꞌ bautizar ánima?
¿Dios mi,
ma ánima?
ẍi Jesús tet ebꞌ.
5 Jix cꞌoli yal-len ebꞌ yabꞌe xol ebꞌ yu tzet jix yal tuꞌ.
Jix yalon ebꞌ jaxca tiꞌ:
—¿Tzet chi kute kalonwej tet?
Ta chi kalwej,
tol jaꞌ Dios jix akꞌon yopiso naj Juan tuꞌ,
oj mi skꞌanle ey jon jaxca tiꞌ:
“¿Tzet yuxan cꞌam che ya pax oc yin je cꞌul xin?”
ẍi mi.
6 Ta chi kal pax oj,
tol jaꞌ ánima jix akꞌon yopiso tuꞌ,
oj tit sjowal masanil ánima kin,
catuꞌ oj cu skꞌojchꞌene cam ebꞌ.
Yutol jaꞌ naj Juan tuꞌ,
ẍejabꞌ Dios yeoc yul sat ebꞌ masanil,
ẍi ebꞌ.
7 Yuxan,
jix yal ebꞌ tet Jesús tol man yotaj oj ebꞌ mactxequel jix akꞌon yopiso naj Juan tuꞌ.
8 Jix yalon pax Jesús tet ebꞌ jaxca tiꞌ:
—Ta queytuꞌ xin,
man pax oj wal ey jex mac jix akꞌon wopiso wunen wan tiꞌ an,
ẍi Jesús.
Anás cuestiona la autoridad de Jesús
Skꞌaneal Wan Ebꞌ Mulnawom Pena Snaꞌbꞌal
9 Catuꞌ jix yalontej Jesús jun skꞌaneal tiꞌ tet ebꞌ ánima yaman ecꞌ tituꞌ,
jix yalon jaxca tiꞌ:
—Ey jun winaj jix awon wan uva sat xꞌotxꞌ.a
Jaꞌ yet jix lawi yawon canoj,
jix yaon cantoj xꞌotxꞌ tuꞌ maanil yetoj cꞌal tzet awbꞌil yu tuꞌ tet wan ebꞌ mulnawom ánima.
Jix el bꞌey jun lugar tuꞌ.
Naatil jix bꞌetecꞌ caan tituꞌ.
10 Jaꞌ yet jix aapnoj stiempoal syambꞌale a an,
jix ẍejontoj jun ẍejabꞌ naj a txꞌotxꞌ tuꞌ.
Jix bꞌet skꞌanon yucꞌaꞌ tzet awbꞌil tuꞌ.
Tucꞌal jix bꞌet yetne sbꞌa.
Jix smakꞌon ebꞌ.
Jix ujtele meltzo naj yu ebꞌ.
Cꞌam niꞌoj yucꞌaꞌ txꞌotxꞌ jix yiꞌ naj.
11 Yuxan jix ẍejtoj junxa ẍejabꞌ naj a txꞌotxꞌ tuꞌ.
Tucꞌal pax jix bꞌet yetne sbꞌa.
Jix makꞌle naj yu ebꞌ catuꞌ jix yujten pax ebꞌ.
Jacꞌalaꞌ cꞌam niꞌoj tzet jix akꞌle tet naj.
12 Jix lawi tuꞌ xin,
jix ẍejontoj junxa.
Jix apni cꞌal junxa tuꞌ scꞌatan ebꞌ,
jix smakꞌon ebꞌ,
jix yasi,
catuꞌ jix skꞌojon can el ebꞌ.
13 Jix yalon naj a txꞌotxꞌ tuꞌ jaxca tiꞌ:
“¿Tzet la watxꞌ chi wute an?
Oj jin chejtoj jun jin cꞌaal,
jun caw camcꞌulnebꞌil wu an.
Tejan oj xiw ebꞌ tet,”
ẍi naj.
14 Jaxa yet jix il-le yapni naj cꞌaale tuꞌ,
jix swa alnen ebꞌ jaxca tiꞌ:
“Ilaꞌla,
tol jaꞌ naj cꞌaale tuꞌ chi juli.
Kꞌinaloj ta chi cam smam naj tinaniꞌ,
tucꞌaltaꞌ jaꞌ naj chi iꞌon can oc txꞌotxꞌ tiꞌ.
Kakꞌwej camoj,
yet watxꞌ jaon xa chi kiꞌwej can txꞌotxꞌ tiꞌ,”
ẍi ebꞌ.
15 Yuxan jix cꞌal apni naj scꞌatan ebꞌ,
jix sacꞌontej ebꞌ.
Jix yiꞌontoj ebꞌ stiꞌel txꞌotxꞌ txꞌotxꞌ tuꞌ.
Jatuꞌ jix bꞌet smakꞌ cam naj ebꞌ.
Yuxan chin kꞌanle ey jex,
¿tzet pax oj utele ebꞌ mulnawom tuꞌ yu naj mame che naꞌ?
16 Jaꞌ naj mame tuꞌ oj toj catuꞌ oj akꞌle lawoj ebꞌ yu naj.
Catuꞌ oj yaon cantoj xꞌotxꞌ tuꞌ maanil tet wanojxa mactxequel,
ẍi Jesús.
Jix lawi yabꞌen ebꞌ wan tuꞌ,
catuꞌ jix yalon ebꞌ jaxca tiꞌ:
—¡Tol oj wal man jaxca oj tuꞌ chi yute!
ẍi ebꞌ.
17 Jix oc tꞌanan Jesús yin ebꞌ.
Jix yalon jaxca tiꞌ:
—¿Tzet pax chi yal yeloc apnoj wan tzꞌibꞌebꞌilcan yul An Juun Tzꞌibꞌebꞌilcan che naꞌ?
bꞌey chi yal jaxca tiꞌ:
Ey jun chꞌen chꞌen ma oc yopiso yu ebꞌ waꞌnem na.
Jaꞌton jun tuꞌ yel miman yopiso jix oqui,
ẍi yul An Juun tuꞌ.b
18 Yal cꞌal mac chi smakꞌey sbꞌa yibꞌan jun chꞌen tuꞌ,
kocꞌ xacꞌal chi yun skꞌatoj.
Jal mactxequel chi eyqꞌuey jun chꞌen tuꞌ yibꞌan,
kocꞌ xacꞌal chi yuntoj,
ẍi Jesús tet ebꞌ.
Wan Chꞌen Tumin Chi Kꞌanle El Yin Ánima Yu Ebꞌ Yaaw
19 Jaꞌ ebꞌ yaaw yakꞌomal xaambꞌal ebꞌ Israel tet Dios,
yetoj ebꞌ cuywam yin sley Moisés,
jix yoche ebꞌ tol chi smitxꞌ Jesús yin eymanil,
yutol jix naꞌcha el yu ebꞌ,
tol jaꞌ tet ebꞌ jix al-le jun skꞌaneal tuꞌ.
Caw chi xiw cꞌal pax ebꞌ tet ebꞌ ánima tuꞌ.
Parábola de los Viñedos y los Arrendatarios
20 Yuxan jix ẍejtoj ebꞌ jaywan ẍejabꞌ stoo smajon yilaꞌ,
ta ey bꞌey oj oc spenail Jesús.
Jaꞌ yet jix apni ebꞌ tuꞌ,
watxꞌ xacꞌal chi slan yute sbꞌa ebꞌ yet watxꞌ chi eyqꞌuey Jesús yin junoj kꞌanlebꞌal yu ebꞌ,
yutol chi yoche ebꞌ tol yin cꞌal tzet chi el yalon naj,
jatuꞌ chi eyqꞌuey naj,
yet watxꞌ chi iꞌletoj naj yu ebꞌ sattaj yaaw.
21 Jix slan yalon ebꞌ tet Jesús jaxca tiꞌ:
—Jaach Cuywam,
kotaj sicꞌlebꞌil tol tool cꞌal cha wute ja walon junoj tzetyetal,
watxꞌ pax ja cuywai.
Cꞌam junoj mac bꞌey chach xiwi,
yutol laan cꞌal yeloc apnoj junjun mactxequel yul ja sat.
Kotaj pax oj,
jaꞌ jun bꞌeybꞌale chi ẍaꞌ scꞌul Dios,
jaꞌ cha wakꞌ cuyle yin yel.
22 Yuxan chi cu kꞌanle ey jaach,
jaꞌ chꞌen tumin chi kꞌanle el kin yu naj yaaw a Roma,
¿ey mi sleyalil kakꞌon chꞌen,
ma cꞌamaj?
ẍi ebꞌ tet.
23 Yotaj xa pax Jesús tol man watxꞌoj tzet lalan snaꞌon oc ebꞌ yin Naj.
Yuxan jix yal tet ebꞌ jaxca tiꞌ:
—¿Tzet yuxan chin je yakꞌ porobꞌal?
24 Txꞌoxwej junoj chꞌen tumin tuꞌ wil an.
¿Mactxequel jun eyoc yechel sat yin chꞌen tiꞌ?
¿Mactxequel jun tzꞌibꞌebꞌil oc sbꞌi yin chꞌen tiꞌ?
ẍi Jesús tet ebꞌ.
—Yechel sat naj yaaw a Roma yetoj cꞌal sbꞌi naj,
ẍi ebꞌ.
25 Yu tuꞌ xin,
jaꞌ tzetyetal tol yet cꞌaltaꞌ naj yaaw tuꞌ yei,
akꞌwej tet naj.
Jal pax tzetyetal yet Dios,
akꞌwej pax tet,
ẍi Jesús tet ebꞌ.
26 Ma yakꞌ ganar ebꞌ yeyqꞌuey yin junoj skꞌane Naj sattaj ebꞌ ánima.
Yuxan jix qꞌueya scꞌul ebꞌ.
Cꞌamxa tzet jix yal ebꞌ.
Pagándole Impuestos a Cesar
Jaꞌ Ebꞌ Chi Alon Tol Man Oj Pitzcꞌu A Ebꞌ Camnaj
27 Ey wan ebꞌ Saduceo jix apni scꞌatan Jesús,
ebꞌ chi aloni,
tol man oj pitzcꞌu a ebꞌ camnaj.
Jix yalon ebꞌ tet Naj jaxca tiꞌ:
28 —Jaach Cuywam,
jaꞌ naj Moisés,
jix stzꞌibꞌe can jaxca tiꞌ:
“Kꞌinaloj ey junoj winaj chi cami,
catuꞌ chi can yistil,
ta cꞌam pax junoj yuninal chi elcanoj.
Sowalil jaꞌ junoj yuẍtaj naj chi iꞌon can ix ix tuꞌ,
yet watxꞌ chi el yuninal naj chi iꞌon can ix tuꞌ,
jaxca tol yuninal naj camom tuꞌ chi el yu yuẍtaj.”
Queytuꞌ jix yute yalon can Moisés.c
29 Jaꞌ junel,
ey jujwan winaj jix ecꞌ cu xol tiꞌ,
yuẍtaj cꞌal sbꞌa ebꞌ.
Jix oc yetbꞌi naj bꞌabꞌel winaj.
Jix camtoj naj,
cꞌam cꞌal junoj yuninal naj jix elcanoj.
30 Jaꞌ naj tzunan yintaj naj bꞌabꞌel tuꞌ jix iꞌon can ix.
Jix cam pax naj,
jacꞌalaꞌ cꞌam yuninal naj jix elcanoj.
31 Jix lawi tuꞌ xin,
jix yiꞌon can a ix ix naj yet yox tuꞌ.
Jacꞌalaꞌ cꞌal jix yun ebꞌ naj sjujwanil.
Jix cam cꞌaltoj ebꞌ naj,
cꞌam cꞌal junoj ebꞌ naj jix elcan junoj yuninal.
32 Jix lawi scamtoj ebꞌ naj xin,
catuꞌ jix cam pax ix ix tuꞌ.
33 Jaꞌ yet oj pitzcꞌu a ebꞌ camnaj tuꞌ,
¿mactxequel naj ey yistil ix sicꞌlebꞌil?
yutol jix iꞌle ix yu ebꞌ naj jujwan tuꞌ,
ẍi ebꞌ.
34 Jix yalon Jesús tuꞌ tet ebꞌ Saduceo tuꞌ jaxca tiꞌ:
—Jaꞌ yul yibꞌankꞌinal tiꞌ,
chi ton yiꞌle sbꞌa winaj yetoj ix.
35 Ey pax junxa lugar.
Jaꞌ ebꞌ oj pitzcꞌu a xol ebꞌ camnaj,
ebꞌ smoo yapni tituꞌ,
ma xa yiꞌle sbꞌa ebꞌ tituꞌ.
Ma xa akꞌle cutzꞌine yin alibꞌeal.
36 Yutol jaꞌ yet jun tiempoal tuꞌ,
cꞌamxa bꞌakꞌin oj cam ebꞌ.
Laan xa oj yun ebꞌ jaxca ebꞌ ángel.
Caw yuninal xa Dios ebꞌ,
yutol oj akꞌle pitzcꞌu a ebꞌ.
37 Jaꞌ naj Moisés,
jix yakꞌ can otajnele eloj,
tzet utbꞌil tol oj pitzcꞌu a ebꞌ camnaj,
yet jix stzꞌibꞌen skꞌaneal jun tiempoal yet jix yilon stzꞌaꞌ teꞌ qꞌuix.
Jaꞌ tax yet tuꞌ jix yalon can Dios jaxca tiꞌ:
“Jain ton tiꞌ,
sDiosal jin naj Abraham,
sDiosal jin naj Isaac,
sDiosal jin pax naj Jacob,”
ẍi Dios.d
38 Yuxan,
caxcꞌal camnajxa ebꞌ,
kotaj tol jaꞌ Dios man sDiosaloj ebꞌ camnaj,
tol sDiosal ebꞌ iquis.
Jaꞌ yul sat Dios,
iquis yeoc ebꞌ ánima masanil,
ẍi Jesús.
39 Yuxan,
jix yal wan ebꞌ cuywam yin sley Moisés tet Jesús jaxca tiꞌ:
—Yel ton cha wal Mamin,
ẍi ebꞌ.
40 Ma xa stecꞌbꞌa sbꞌa ebꞌ Saduceo skꞌanlen junojxa tzetyetal tet Jesús.
Jaꞌ Jesucristo Scꞌaal Ton Dios
41 Jix yalon Jesús tet ebꞌ eyecꞌ tituꞌ jaxca tiꞌ:
—¿Tzet yuxan ey ebꞌ chi alon jaxca tiꞌ?
“Cristo,
* yicꞌaal naj David,”
ẍi ebꞌ.
42 Jal naj David jix yal pax can yul an juun chi yij Salmo jaxca tiꞌ:
Jix yal Dios tet naj Waawil:
“Eyan chotan bꞌey jin watxꞌ kꞌabꞌ.
43 Masantaꞌ oj can ebꞌ chi jowi oc scꞌul ja win sbꞌatxlubꞌoj ja wajan,”
ẍi Dios tet naj Waawil,
ẍi David.e
44 Queytuꞌ jix yute yalon can David,
¿tzet utbꞌil tol jaꞌ Cristo,
eyoc Yaawiloj?
Yuxan,
¿tumi jaꞌ Cristo yicꞌaal cꞌal naj Davidf yeoc xin?
ẍi Jesús tet ebꞌ.
Spenail Ebꞌ Cuywam Yin Sley Moisés
45 Jaꞌ yet lalanto yabꞌen masanil ebꞌ ánima,
jix yalon tet ebꞌ scuywom jaxca tiꞌ:
46 —Che yil cꞌal je bꞌa,
yet watxꞌ cꞌam chex etex el yu sbꞌeybꞌal ebꞌ cuywam yin sley Moisés.
Yutol chi ẍaꞌ scꞌul ebꞌ yecꞌ yetoj wan an jojan pichile.
Chi yoche ebꞌ tol tuxa cꞌal chi yiꞌey sbꞌa ánima tet,
yet chi ecꞌ ebꞌ txombꞌal.
Chi yoche ebꞌ asan bꞌey chi ey chotan ebꞌ mimej winaj yul snail sculto,
jatuꞌ chi ey chotan ebꞌ.
Yetoj yet chi waꞌxi wan loꞌbꞌe caw watxꞌ,
asan bꞌey watxꞌ chi yoche ebꞌ chi ey chotanoj.
47 Chi iꞌle ecꞌ sna ebꞌ ix camnajxa yichamil yu ebꞌ.
Chi lawi jun tuꞌ,
catuꞌ miman chi yute yajan xa ebꞌ,
tzet utbꞌil oj chi snaꞌ ánima tol cꞌam spenail ebꞌ.
Jaꞌ ebꞌ tuꞌ caw miman syaꞌtajil oj jul yibꞌan ebꞌ,
ẍi Jesús.