Skꞌaneal Wan Ebꞌ Mulnawom Pena Snaꞌbꞌal
12
Catuꞌ jix yalontej Jesús tuꞌ jun skꞌaneal yet txꞌoxbꞌanile tiꞌ,
jix yal jaxca tiꞌ:
—Ey jun winaj jix yaw wan teꞌ uva* sat jun xꞌotxꞌ.
Jix yaoc colal yin.
Jix swaꞌnen jun jolan bꞌey oj stecꞌ el yal uva tuꞌ.
Jix stzaꞌjon pax a jun ilbꞌal uva xol tuꞌ.a
Jix lawi tuꞌ xin,
jix yaon cantoj xꞌotxꞌ tuꞌ maanil yetoj cꞌal yawoal tet wan mulnawom winaj.
Jix too ecꞌabꞌ bꞌey junxa lugar naat tuꞌ.
2 Jaꞌ yet jix aapnoj stiempoal syambꞌale el an uva tuꞌ xin,
jix ẍejontoj jun ẍejabꞌ bꞌey ebꞌ mulnawom tuꞌ,
yu stoo ẍaꞌon naj jantaj yet naj tꞌinan yiꞌoni.
3 Jix apni naj xin,
jix stzacꞌontej ebꞌ,
jix makꞌle naj yu ebꞌ.
Jix lawi cꞌal tuꞌ xin,
catuꞌ jix ẍejon pax tej ebꞌ,
cꞌam niꞌoj tzet jix yiꞌ naj.
4 Catuꞌ jix ẍejontoj junxa ẍejabꞌ naj a txꞌotxꞌ tuꞌ tet ebꞌ junelxa.
Tol xa jix kꞌojchꞌennele junxa naj tuꞌ yu ebꞌ yet jix apni.
Jix jolcha sjolom naj yu ebꞌ.
Caw pena jix yute sbꞌa ebꞌ yin.
5 Jix chejletoj junxa yu naj.
Jaꞌ junxa tuꞌ xin,
jix cam xacꞌal yu ebꞌ.
Ecꞌal tocꞌal wanxa ebꞌ jix chejletoj,
ey ebꞌ tucꞌal jix makꞌle yaso,
ey ebꞌ xin,
jix cam xacꞌal yu ebꞌ.
6 Ey jun qꞌuetxan scꞌaal naj a txꞌotxꞌ tuꞌ,
miman chi camel scꞌul naj yin.
Jix ẍej pax toj naj yin xacꞌal tzunanil.
“Oj xiw ebꞌ tet jun jin cꞌaal tiꞌ,”
ẍi naj yul scꞌul.
7 Jaꞌ yet lalan yapni naj,
jix swaꞌ al-lnen ebꞌ maanen txꞌotxꞌ txꞌotxꞌ tuꞌ jaxca tiꞌ:
“Jaꞌ jun cꞌaale tol chi juli,
jaꞌ yet oj cam smam naj,
jaꞌ oj iꞌon can xꞌotxꞌ tiꞌ sattaj oj.
Cu makꞌwej camoj,
jaon xa oj kiꞌcan oc jun txꞌotxꞌ tiꞌ,”
ẍi ebꞌ.
8 Yuxan jix cꞌal apni naj,
catuꞌ jix mitxꞌle naj yu ebꞌ,
jix makꞌle camoj,
catuꞌ jix kꞌojle el smimanil stiꞌel jun txꞌotxꞌ tuꞌ yu ebꞌ.
9 Chin kꞌanle ey jex an xin,
¿tzet oj utele ebꞌ maanen jun txꞌotxꞌ tuꞌ yu naj ey yet jun txꞌotxꞌ tuꞌ che naꞌ?
Oj makꞌle cam ebꞌ naj yet oj juloj.
Catuꞌ oj yaon cantoj xꞌotxꞌ tuꞌ maanil tet wanojxa mactxequel.
10 ¿Tumi cꞌamto bꞌey che yil yul An Juun Tzꞌibꞌebꞌilcanoj bꞌey chi yal jaxca tiꞌ:
Ey jun chꞌen chꞌen jix yintajne el ebꞌ waꞌnem na.
Jaꞌton jun tuꞌ yel jix oc yopiso.
11 Jaꞌ Naj Kaawil jix uten jun tuꞌ,
yu jun tuꞌ,
yuxan jaꞌ yet chi kiloni,
caw chi qꞌueya cu cꞌul yu,
ẍi yul An Juun Tzꞌibꞌebꞌilcan tuꞌ?b
ẍi Jesús tet ebꞌ.
12 Catuꞌ jix yakꞌle ebꞌ smitxꞌon Jesús,
yutol jix naꞌcha el yu ebꞌ,
tol jaꞌ ebꞌ chi al-le yu jun kꞌaneal tuꞌ.
Caw chi xiw pax ebꞌ tet ánima,
yuxan ma mitxꞌle Jesús yu ebꞌ tuꞌ.
Catuꞌ jix paxtoj ebꞌ.
Chꞌen Tumin Chi Kꞌanle Yu Yaaw
13 Jix lawi jun tuꞌ xin,
catuꞌ jix chejletej jaywan ebꞌ Fariseo yetoj ebꞌ spartido Herodesc scꞌatan Jesús yu yakꞌlen yijbꞌan Naj ebꞌ yin spenail yu junoj tzetyetal chi yalaꞌ,
catuꞌ chi snaꞌon a ebꞌ junoj tzetyetal yaloni.
14 Jix cꞌal apni ebꞌ xin,
jix yalon ebꞌ tet Naj jaxca tiꞌ:
—Jaach cuywam,
kotaj tol yel tzet cha walaꞌ.
Kotaj pax oj,
tol jun laan cꞌal cha wute ja cꞌul yin masanil ánima,
yutol laan cꞌal yeloc apnoj ebꞌ yul ja sat.
Catuꞌ chach cuywa yin yel yin jun bꞌeybꞌale chi ẍaꞌ scꞌul Dios.
¿Tzet ja chi jaach tiꞌ?
Jaꞌ chꞌen tumin chi kꞌanle el ey jon yu naj yaaw bꞌey Roma,
¿ey mi sleyal chi kakꞌa,
ma cꞌamaj?
¿Watxꞌ mi chi kakꞌ chꞌen,
ma cꞌamaj cha naꞌ?
ẍi ebꞌ tet Jesús.
15 Yotaj xa pax Jesús,
tol caabꞌ satil chi yun ebꞌ,
yuxan jix yal tet ebꞌ jaxca tiꞌ:
—¿Tzet yuxan che yakꞌle jin je yijbꞌan yin spenail?
Asiꞌ,
iꞌwejtej junoj chꞌen tumin tuꞌ wil an,
ẍi Naj tet ebꞌ.
16 Catuꞌ jix bꞌet yiꞌon jun tumin tuꞌ ebꞌ,
catuꞌ jix skꞌanlen Jesús tet ebꞌ jaxca tiꞌ:
—¿Mactxequel jun eyoc yechel sat yin jun tumin tiꞌ?
¿Mactxequel jun eyoc sbꞌi yin chꞌen tiꞌ?
ẍi Naj tet ebꞌ.
—Yechel sat naj yaaw bꞌey Roma yetoj cꞌal sbꞌi naj,
ẍi ebꞌ tet Jesús.
17 —Akꞌwej tzetyetal yet cꞌaltaꞌ naj yaaw tuꞌ tet xin.
Catuꞌ jaꞌ tzetyetal yet cꞌaltaꞌ Dios,
akꞌwej pax tet,
ẍi Jesús tet ebꞌ.
Jaꞌ yet jix yabꞌen wan tuꞌ ebꞌ,
tucꞌal jix qꞌueya scꞌul ebꞌ.
Ebꞌ Chi Aloni, Tol Ma Pitzcꞌu A Ebꞌ Camnaj
18 Jaꞌ junel ey wan ebꞌ Saduceo* jix apni scꞌatan Jesús.
Ebꞌ chi aloni,
tol cꞌam chi pitzcꞌu a ebꞌ camnaj.
Jix yalon ebꞌ tet Naj jaxca tiꞌ:
19 —Jaach cuywam,
jaꞌ Moisés jix stzꞌibꞌe can jaxca tiꞌ:
“Kꞌinaloj ey junoj mac chi cami,
catuꞌ chi can yistil,
ta cꞌam pax junoj yuninal jix elcanoj.
Jaꞌ junoj uẍtajeal sowalil chi iꞌon ix,
yet watxꞌ ta chi el yuninal junxa tuꞌ,
jaxca tol yuninal naj jix cam tuꞌ chi yun can ocoj.”
Queytuꞌ jix yute yalon can Moisés.d
20 Jaꞌ junel,
ey jujwan winaj yuẍtaj cꞌal sbꞌa.
Jix oc yistil naj bꞌabꞌel winaj.
Jix camtoj naj,
cꞌam cꞌal yuninal naj jix elcanoj.
21 Jaꞌ junxa naj uẍtajeal jix iꞌon can ix.
Jix cam pax toj junxa naj tuꞌ,
jacꞌalaꞌ,
cꞌam yuninal jix el pax canoj.
Jacꞌalaꞌ jix yun naj yet yox uẍtajeal.
22 Sjujwanil ebꞌ naj,
jix yiꞌle cꞌal ix ebꞌ naj.
Cꞌam cꞌal ebꞌ jix elcan junoj yuninal.
Jix lawi scamtoj ebꞌ naj sjujwanil xin,
catuꞌ jix cam pax ix.
23 Jaꞌ yet oj pitzcꞌu a ebꞌ camnaj tuꞌ xin,
¿mac wal junoj yel ey yalon yet yin jun ix tuꞌ?
Yutol jix cꞌal yiꞌle ix ebꞌ naj sjujwanil,
ẍi ebꞌ Saduceo tuꞌ.
24 Catuꞌ jix yalon Jesús tet ebꞌ jaxca tiꞌ:
—Caw che yakꞌ qꞌueytoj je bꞌa,
yutol man je yotaj oj tzet chi yal yul An Juun Tzꞌibꞌebꞌilcanoj.
Man je yotaj oj pax jantaj yipal Dios.
25 Jaꞌ yet oj pitzcꞌu a ebꞌ camnaj tuꞌ,
manxa oj to yiꞌle sbꞌa ebꞌ ánima.
Yutol jaxca xa ebꞌ ángel bꞌey satcan oj yun can el ebꞌ.
26 Jal jex xin,
cꞌam chi naꞌcha el je yu ta oj pitzcꞌu a ebꞌ camnaj.
¿Tumi cꞌam bꞌey che yil tzet tzꞌibꞌebꞌilcan yu Moisés* yul An Juun Tzꞌibꞌebꞌilcan xin,
yu tzet jix yal Dios tet yet jix kꞌanabꞌ eltej xol kꞌakꞌ kꞌakꞌ yin teꞌ qꞌuix?
Jix yal Dios jaxca tiꞌ:
“Jain ton tiꞌ sDiosal jin Abraham,
sDiosal jin Isaac,
sDiosal jin Jacob,”
ẍi yul An Juun tuꞌ.e
27 Yu jun tuꞌ,
yuxan caxcꞌal camnajxa ebꞌ,
kotaj tol man junelne oj jix qꞌueyel ebꞌ,
yutol kotaj,
tol jaꞌ Dios,
man sDiosaloj ebꞌ camnaj,
tol sDiosal ebꞌ iquis.
Yu jun tuꞌ xin,
caw che yakꞌ qꞌueytoj je bꞌa,
ẍi Jesús tet ebꞌ.
Jun Chejbꞌanile Yel Xacꞌal Miman Yeloc Apnoj
28 Ey pax jun cuywam yin sley Moisés jix apni scꞌatan Naj,
jix yabꞌ steelen sbꞌa ebꞌ Saduceo tuꞌ yetoj Jesús.
Jix yabꞌe,
tol watxꞌ jix yute spajtzen skꞌanlebꞌal ebꞌ tet Jesús,
yuxan jix yakꞌ pax jun skꞌanlebꞌal tet Naj jaxca tiꞌ:
—¿Bꞌeytet junoj chejbꞌanile yel miman yeloc apnoj yintaj masanil?
ẍi naj tet Jesús.
29 Catuꞌ jix yalon Jesús tuꞌ jaxca tiꞌ:
—Jaꞌton jun chejbꞌanile tol ecꞌbꞌan yintaj masanil tiꞌ,
chi yal jaxca tiꞌ:
“Abꞌwej xin jex Israel,
jaꞌ Naj Kaawil cu Diosal,
junne ton Naj.
30 Camcꞌulnewej Naj Kaawil cu Diosal yin masanil je cꞌul,
cꞌal yin masanil je pixan,
cꞌal yin masanil je naꞌbꞌal,
cꞌal yin masanil je yip,”
ẍi.f
/Jaꞌton jun chejbꞌanile tiꞌ,
ecꞌbꞌan yeloc apnoj yintaj masanil./
31 Jacꞌalaꞌ junxa oj wal tiꞌ,
txenxa man laan oj yetoj jun bꞌabꞌel tuꞌ,
chi yal jaxca tiꞌ:
“Camcꞌulnewej je yet animail jaxca che yute je camcꞌulnen je bꞌa junjun jex,”
ẍi.g
Cꞌam junojxa chejbꞌanile yel miman yeloc apnoj yintaj caabꞌ tiꞌ,
ẍi Jesús tet naj.
32 Catuꞌ jix yalon naj cuywam yin ley tuꞌ tet naj jaxca tiꞌ:
—Watxꞌ ton Mamin,
yel ton cha walaꞌ.
Junne cu Dios,
cꞌam junojxa.
33 Sowalil ton chi cu camcꞌulne Dios yin masanil cu cꞌul,
yin masanil cu naꞌbꞌal,
yin masanil cu pixan,
cꞌal yin masanil kip.
Yetoj pax oj,
sowalil ton chi cu camcꞌulne ebꞌ ket animail jaxca chi kute cu camcꞌulnen cu bꞌa junjun jon tiꞌ.
Jaꞌ caabꞌ tiꞌ,
ecꞌbꞌan yeloc apnoj yintaj masanil xaambꞌal,
ecꞌbꞌan yeloc apnoj yintaj saꞌbꞌeal chi tzꞌaꞌ sattaj Dios,
ẍi naj tet Jesús.
34 Jaꞌ yet jix yabꞌen Jesús tol watxꞌ jix yute takꞌwoj sbꞌa naj tet,
jix yalon tet naj jaxca tiꞌ:
—Niꞌanxane oj oc Dios ja Waawiloj,
ẍi Jesús tet naj.
Jix lawi tuꞌ xin,
cꞌam junojxa mac jix stecꞌbꞌa sbꞌa skꞌanlen junojxa tzetyetal tet naj.
Jaꞌ Cristo, Jaꞌton Naj Scꞌaal Dios
35 Jaꞌ yet jix cuywa Jesús yul stemplo Dios junel,
jix yal Naj jaxca tiꞌ:
—¿Tzet yuxan chi yal ebꞌ cuywam yin sley Moisés jaxca tiꞌ:
“Jaꞌ Cristo yicꞌaal David yei?”
ẍi ebꞌ.
36 Yutol jaꞌ naj David tuꞌ,
akꞌbꞌil yal yu Santo Espíritu junel jaxca tiꞌ:
Jix yal Dios Kaawil tet naj Waawil jaxca tiꞌ:
“Eyan chotan bꞌey jin watxꞌ kꞌabꞌh masantaꞌcꞌal oj wa can oc ebꞌ chi chichon oc scꞌul ja win,
ja walan wu an,”
ẍi Dios tet naj Waawil,
ẍi David.i
37 Queytuꞌ jix yute yalon David tuꞌ,
tzet utbꞌil tol jaꞌ Cristo,
yaawil yei.
Yu jun tuꞌ,
man asanne oj tol yicꞌaal David yei,
ẍi Jesús tet ebꞌ.
Ecꞌal ánima jix abꞌen jun kꞌane tiꞌ.
Jix tzala xacꞌal a ebꞌ yabꞌeni.
Jix Al-letej Spenail Ebꞌ Cuywam Yin Sley Moisés yu Jesús
38 Jaꞌ yet lalan scuywa Jesús xol ánima tuꞌ,
jix yal tet ebꞌ jaxca tiꞌ:
—Che yil cꞌal je bꞌa,
yutol jaꞌ ebꞌ cuywam yin sley Moisés,
caw ey smey sbꞌeybꞌal ebꞌ.
Chi ẍaꞌ scꞌul ebꞌ yecꞌ tokꞌokꞌoj yetoj jojan pichile chi yaocoj.j
Jaꞌ yet chi yiꞌon ey sbꞌa ebꞌ ánima tet ebꞌ yul-laj calle,
watxꞌ xacꞌal chi yabꞌ ebꞌ.
39 Jaꞌ bꞌey snail syambꞌabꞌail ebꞌ yin culto,
asan bꞌey chi ey chotan ebꞌ mimej winaj chi yoche ebꞌ chi ey chotanoj.
Yetoj cꞌal yet chi oc mimej loꞌo,
asan bꞌey chi ey ebꞌ mimej winaj chi ey ebꞌ.
40 Chi yiꞌon ecꞌ sna ebꞌ ix camnajxa yichamil ebꞌ.
Chi lawi jun tuꞌ,
naat chi yute yajan xa,
yet watxꞌ cꞌam chi txeclo el sattaj ánima ta ey spenail ebꞌ.
Yu jun tuꞌ,
yel miman syaꞌtajilal oj ẍaꞌ ebꞌ,
ẍi Jesús.
Chꞌen Yofrenda Ix Ix Camnajxa Yichamil
41 Chotan ey Jesús yul templo junel,
bꞌey scawilal chabꞌal ofrenda.
Jix yilon cꞌal yaon eytoj yofrenda ánima.
Ecꞌal ebꞌ bꞌeom jix yaeytoj yet,
mimantaj chi yute yaon eytoj ebꞌ.
La ofrenda de la viuda (Marcos 12.41-44)
42 Lalantocꞌal wal tuꞌ,
jix apni jun ix ix camnajxa yichamil,
mebꞌa chꞌan ix.
Jix yaon eytoj caabꞌ centavo yet ix,
caw niꞌan chꞌan yet ix tuꞌ.
43 Catuꞌ jix yawtentej ebꞌ scuywom Jesús tuꞌ,
jix yalon tet ebꞌ jaxca tiꞌ:
—Caw yel chi wal ey jex an,
jaꞌ jun ix mebꞌa ix camnajxa yichamil tiꞌ,
ecꞌbꞌan yofrenda ix jix ecꞌ yaeytoj yintaj cꞌal masanil ebꞌ jix ecꞌ yaeytoj yet yul chabꞌal ofrenda tiꞌ.
44 Yutol junjun cꞌal mactxequel,
sobra xacꞌal stumin ebꞌ jix ecꞌ yaeytoj.
Jal jun ix tiꞌ xin,
caw mebꞌa ton ix,
caw tzꞌajan cꞌal jix yaeytoj stumin ix yin ofrendail,
ẍi Jesús tet ebꞌ.