Jix Yal Jesús Yin Eyojto, Tol Oj Lawoj Ey Stemplo Dios
13
Jaꞌ yet lalan yeltej Jesús yul stemplo Dios,
jix yalon jun scuywom tet Naj jaxca tiꞌ:
—Jaach Cuywam,
ilaꞌ junjun wan chꞌen tiꞌ,
cꞌal wan na sakꞌal yili tiꞌ,
ẍi naj tet Jesús.
2 Catuꞌ jix yalon Jesús tet jaxca tiꞌ:
—Jaꞌ wan na yel xacꞌal sakꞌal yili tiꞌ,
chi wal ey jaach an,
tol cꞌamxa junoj wan chꞌen latzꞌbꞌil a tiꞌ,
oj can yibꞌan yet chꞌenal.
Pilan oj ecꞌ bꞌulnaoj,
ẍi Jesús tet naj.
Wan Yechel Oj Txꞌoxonoj Tol Tuxa Oj Jul Slawubꞌ Cꞌual
3 Jix lawi tuꞌ xin,
catuꞌ jix too ebꞌ bꞌey wonan Olivo,
jaꞌ spaqꞌuil tuꞌ,
jatuꞌ ey stemplo Dios.
Jix ey chotan Jesús bꞌey wonan tuꞌ xin,
catuꞌ jaꞌ naj Pedro yetoj Jacobo,
Juan cꞌal Andrés,
jix skꞌanle el ebꞌ tet Naj yet eyecꞌ ebꞌ xꞌojli yetoj,
jix yal ebꞌ tet Naj jaxca tiꞌ:
4 —Chi koche cha wal ey jon,
¿bꞌakꞌin oj jul jun jix ja wal ey jon tuꞌ?
¿Tzet echele oj xꞌox Dios,
yet tuxa oj yun wan tuꞌ?
ẍi ebꞌ tet Jesús.
5 Catuꞌ jix yalon Jesús tet ebꞌ tuꞌ jaxca tiꞌ:
—Listo cꞌal che yute je bꞌa,
yet watxꞌ cꞌam junoj mactxequel oj iꞌon eytej je sat.
6 Yutol ecꞌal mac oj sbꞌonoc sbꞌa yin jin bꞌi,
“Jain ton Cristo jin an,”
ẍi ebꞌ oj tzꞌaj yalon ebꞌ.
Ecꞌal ánima oj yiꞌeytej sat ebꞌ.
7 Oj je yabꞌ yoc mimej jowal.
Oj je yabꞌen skꞌumal wanxa ian chi oqui.
Man to slawubꞌ oj yul yibꞌankꞌinal tiꞌ yet tuꞌ.
8 Yutol ey wan mimej conobꞌ oj yakꞌle jowal yetoj yet mimej conobꞌal.
Oj yakꞌle a jowal ebꞌ yaaw yetoj yet yaawil.
Caw ey bꞌey oj ecꞌ quixcabꞌ.
Oj jul mimej wail yibꞌan ánima.
/Oj a somna ebꞌ.
/ Jaꞌ wan tuꞌ,
yichbꞌanil syaꞌtajilal jix tocꞌal yei.
Ey wanxa oj juloj.
9 Jaex tiꞌ xin,
tecꞌan cꞌal che yute je bꞌa,
yutol oj jex ale oc yul skꞌabꞌ ebꞌ yaaw.
Oj jex smakꞌ ebꞌ yul snail bꞌey chi syambꞌa sbꞌa ebꞌ yin culto.
Oj jex yiꞌtoj ebꞌ sattaj ebꞌ yaaw,
cꞌal sattaj ebꞌ rey,
yutol jix je yaoc je cꞌul win an.
Queytuꞌ oj yun sjul je yibꞌan xin,
yet watxꞌ oj skeꞌ je yalon can el jin kꞌaneal tet ebꞌ.
10 Sowalil bꞌabꞌel oj alcha can el skꞌaneal yet colbꞌanile bꞌey junjun conobꞌ,
catuꞌ oj jul slawubꞌ cꞌual tuꞌ.
11 Jaꞌ yet oj jex iꞌletoj sattaj ebꞌ yaaw tuꞌ,
manche je naꞌ yin eyojto yu tzet oj je yalaꞌ.
Cꞌam pax chex oc il yu.
Jaꞌ tzet oj akꞌle je yal yu Dios yet jun txolan tuꞌ,
jaꞌ che yalaꞌ.
Yutol manaj jex oj jex kꞌanabꞌoj,
jaꞌ Santo Espíritu oj kꞌanabꞌoj.
12 Ey ebꞌ uẍtajeal,
oj yaoc yuẍtaj yul skꞌabꞌ camich.
Ey pax ebꞌ mame queytuꞌ oj yute sbꞌa yin scꞌaal.
Ey ebꞌ cꞌaale oj yakꞌle jowal yetoj smam,
catuꞌ oj yakꞌon cam ebꞌ.
13 Masanil xacꞌal ánima oj chichon oc scꞌul je yin,
yutol jix je yaoc je cꞌul win an.
Jaꞌ mac tecꞌan cꞌal yeocoj masantaꞌcꞌal chi cami,
jaꞌton ebꞌ tuꞌ oj colchaoj.
14 Jal pax jun yaabꞌil el yu Dios,
jaꞌ oj etnen el wan tzetyetal.
/Jaꞌ Daniel,
jun ẍejabꞌ Dios peyxa,
* jaꞌ jix alon can yu jun tiꞌ.
/a Jaꞌ mac chi ilon a jun kꞌane tiꞌ,
naꞌcha ojabꞌ el yu.
Jaꞌ yet oj je yiloni,
tol eyecꞌ jun tuꞌ bꞌey caw man smoo oj yeecꞌoj,
toj ojabꞌ ebꞌ eyecꞌ bꞌey Judea bꞌey wonanlaj.
15 Jaꞌ mac eyatoj yibꞌan ẍumuc spananil snab yet jun cꞌual tuꞌ,
manche xa eytej,
catuꞌ manche xa octoj yul sna tuꞌ yu yiꞌon eltej niꞌoj stzettaj yetal catuꞌ chi too eloj.
16 Yetoj ebꞌ eyecꞌ xol smulnail,
manche xa ojabꞌ meltzo yintaj stoo yiꞌon spichil.
17 Jaꞌ yet jun tiempoal tuꞌ,
okꞌbꞌalcꞌule ebꞌ ix mimejalxa,
yetoj ebꞌ eyto yuneꞌ chi yakꞌ txutxwoj.
18 Kꞌanwej tet Dios,
tol man ojabꞌ nabꞌilkꞌinal oj yet oj jex el tuꞌ.
19 Yutol jaꞌ jaxca jun miman syaꞌilal oj jul yet jun tiempoal tuꞌ,
cꞌamto bꞌey jix jul juneloj yechel yet tax cꞌal jix waꞌxi yul yibꞌankꞌinal tiꞌ yu Dios.
Asan chꞌan junel tuꞌ,
cꞌamxa bꞌakꞌin oj yun junelxa jaxca tuꞌ.
20 Ta cꞌam chi smitxꞌoc tucan jun syaꞌilal tuꞌ Dios yet jun tiempoal tuꞌ,
cꞌam junoj mac oj colcha can el yul skꞌabꞌ camich.
Yu cꞌal scamcꞌulal yin ebꞌ sicꞌbꞌilxa el yu,
yuxan oj smitxꞌoc tucanoj.
21 Ta ey mac oj alon ey jex jaxca tiꞌ:
“Asiꞌ toon abꞌwej,
ilaꞌ,
tol jaꞌ Naj Cristo eyecꞌ titiꞌ,”
ma “Ilwej toon abꞌi,
tol eyecꞌ tituꞌ,”
ta ẍi ebꞌ ey jex,
manche je chaꞌ je yabꞌe.
22 Yutol ey wan ebꞌ oj tzꞌaj yaloc sbꞌa Cristoal oj xꞌoxa sbꞌa,
cꞌal wan ebꞌ oj yaloc sbꞌa ẍejabꞌoj Dios.
Oj tzꞌaj xꞌox ebꞌ echele,
cꞌal milagro.
Queytuꞌ oj yun yiꞌle eytej sat ebꞌ ánima yu ebꞌ.
Oj yakꞌle pax ebꞌ yiꞌon eytej sat ebꞌ sicꞌbꞌilxa el yu Dios ta chi skeꞌ yu ebꞌ.
23 Jal jex jaex tiꞌ,
tecꞌan cꞌal che yute je bꞌa.
Eyojto chi walon can masanil wan tiꞌ ey jex an.
Jaꞌ Tzet Oj Yun Sjul Pax Jesús Yet Scaelal
24 Jaꞌ yet jun tiempoal tuꞌ,
yet tuxa oj lawoj jun miman syaꞌilal tuꞌ,
oj kꞌej jolel cꞌu,
catuꞌ oj tan yajan xꞌaaw.
25 Catuꞌ oj titqꞌuey weycan satcan.
Yetoj wan tzetyetal ey yipal bꞌey satcan,
oj tzicoꞌtaneleoj.c
26 Oj lawoj tuꞌ xin,
catuꞌ oj yilon ebꞌ ánima tuꞌ weyol xol asun jain Akꞌbꞌil Wopiso xol ebꞌ ket animail yu Dios tiꞌ an,
* oj jin jul yetoj masanil wipal cꞌal jin tzejejial.
27 Oj jin chejtej ebꞌ wángel catuꞌ oj ecꞌ yambꞌale a ebꞌ sicꞌbꞌil el wu bꞌey masanil yul yibꞌankꞌinal tiꞌ.
Oj ecꞌ iꞌle a ebꞌ masantaꞌcꞌal bꞌey chi lawi yul yibꞌankꞌinal tiꞌ,
cꞌal ebꞌ bꞌey chi lawi apnoj satcan,
oj ecꞌ yambꞌaletej ebꞌ.
28 Abꞌwej jun kꞌane oj waltej yu teꞌ higo.
Jaꞌ yet chi uninbꞌi skꞌabꞌ teꞌ,
yet lalanxa stit xaj teꞌ,
je yotaj xa tol tuxa chi oc nabꞌilkꞌinal.d
29 Queyton tuꞌ oj yun snaꞌcha el je yu,
tol tuxa oj jin jul an.
30 Caw yel chi wal ey jex an,
ey ebꞌ eyecꞌ yet jun tiempoal tiꞌ cꞌam tocꞌal chi cami,
catuꞌ oj yunen masanil wan jix wal tiꞌ an.
31 Jaꞌ satcan cꞌal yul yibꞌankꞌinal tiꞌ oj lawoj,
jal jin kꞌane an xin,
man oj ecꞌ tzet chi wal an.
32 Asan xin,
cꞌam mac otajnen tzet cꞌual,
cꞌal jantaj hora oj jin jul an.
Ebꞌ ángel bꞌey satcan,
man yotaj oj ebꞌ.
Jain tiꞌ,
tol pax Scꞌaal jin Dios an,
man pax wotaj oj.
Asan Dios Mame yotaj.
33 Yu jun tuꞌ caw listo che yute je bꞌa,
majwanwej.
Txalanwej,
yutol man je yotaj oj bꞌakꞌin oj jul stiempoal jun tiꞌ.
34 Jaxca ton junoj winaj chi too ecꞌabꞌ naat,
chi can sna.
Chi yalon can tet ebꞌ yakꞌomal servil tzet chi yun can junjun ebꞌ.
Catuꞌ chi steyne puerta naj tuꞌ sicꞌlebꞌil.
35 Jal ebꞌ yakꞌomal servil tuꞌ xin,
man yotaj oj ebꞌ bꞌakꞌin chi jul naj ey sna tuꞌ junelxa,
ma tol skꞌejbꞌintajil,
ma chuman akꞌbꞌal,
ma yet lalanxa yokꞌ noꞌ caẍlan,
ma jaꞌ yet chi sajbꞌi el xin.
Man je yotaj oj bꞌakꞌin oj jin jul pax yet scaelal.
Yu jun tuꞌ,
caw listo che yute je bꞌa,
36 yet watxꞌ man ojabꞌ jaxca oj tol weynaj jex eloj catuꞌ oj jin jul tzacꞌnaoj.
37 Jaꞌ wan chi wal ey jex tiꞌ an,
chi wal ey jex je masanil.
Caw listo cꞌal che yute je bꞌa,
ẍi Jesús.