Albꞌil Yu Jesús Tol Oj Lawoj Ey Stemplo Dios
24
Jix eltej Jesús yul stemplo Dios xin.
Lalanxa stoi,
catuꞌ jix sjitzon xacꞌaltoj sbꞌa ebꞌ cuywom scꞌatan Naj.
Jix cꞌoli xꞌoxon wan snail stemplo Dios ebꞌ tet Jesús.
2 Yuxan jix yal Naj tet ebꞌ jaxca tiꞌ:
—Ilaꞌla,
jaꞌ masanil wan tiꞌ,
caw yel chi wal ey jex an,
jaꞌ wan chꞌen chꞌen latzꞌbꞌil a tiꞌ,
cꞌamxa junoj oj cancan yibꞌan yet chꞌenal.
Masanil oj ecꞌ bꞌulnaoj,
ẍi Jesús tet ebꞌ.
Wan Yechel Oj Xꞌox Dios Yet Tuxa Chi Jul Slawubꞌal Yul Yibꞌankꞌinal Tiꞌ
3 Jix lawi tuꞌ xin,
catuꞌ jix too Naj bꞌey jun wonan chi yij Olivo.
Jaꞌ yet jix ey chotan tituꞌ,
jix apni ebꞌ scuywom scꞌatan.
Jix skꞌanlen ebꞌ jaxca tiꞌ:
—Chi koche cha wal ey jon,
¿bꞌakꞌin oj jul jun jix ja wal ey jon tuꞌ?
¿Tzet echele oj xꞌox Dios,
yet tuxa oj jaach juloj,
yetoj pax yet oj lawoj yul yibꞌankꞌinal tiꞌ?
ẍi ebꞌ tet Jesús.
4 Catuꞌ jix yalon Jesús tet ebꞌ tuꞌ jaxca tiꞌ:
—Caw listo che yute je bꞌa,
yet watxꞌ cꞌam junoj mactxequel oj iꞌon eytej je sat.
5 Yutol ecꞌal mac oj juloj,
oj tzꞌaj yaoc jin bꞌi yin.
Oj yalon ebꞌ jaxca tiꞌ:
“Jain ton Mesíasa jin an,”
ẍi ebꞌ oj slan yalon ebꞌ.
Ecꞌal ánima oj yiꞌeytej sat ebꞌ.
6 Oj je yabꞌ yoc mimej jowal.
Oj je yabꞌ skꞌumal wanxa ian chi oqui.
Asan xin,
manche jex xiwi,
yutol sowalil oj yun cꞌaltaꞌ wan tuꞌ.
Asan xin,
man to oj lawoj ecꞌ yul yibꞌankꞌinal tiꞌ yet tuꞌ.
7 Yutol ey wan mimej conobꞌ oj yakꞌle jowal yetoj yet mimej conobꞌal.
Oj yakꞌle jowal ebꞌ yaaw yetoj yet yaawil.
Ecꞌal bꞌey oj jul yaꞌbꞌil.
Oj jul mimej wail.
Ecꞌal bꞌey oj ecꞌ quixcabꞌ.
8 Jaꞌ masanil wan tuꞌ,
asan jix to yichbꞌanil syaꞌtajil,
eyto wanxa oj juloj.
9 Jaex tiꞌ,
oj jex iꞌletoj sattaj ebꞌ yaaw,
catuꞌ oj je yilon syaꞌilal yu ebꞌ.
Oj jex yakꞌ cam ebꞌ.
Masanil ánima oj chichon oc scꞌul je yin wu cꞌal an.
10 Jaꞌ yet jun tiempoal tuꞌ,
ecꞌal mactxequel oj meltzo pax yintaj junelxa.
Oj scajatne a sbꞌa ebꞌ.
Oj yakꞌle cam sbꞌa ebꞌ.
11 Ecꞌal mac oj yaloc sbꞌa ẍejabꞌoj Dios.
Ecꞌal mactxequel oj etnen ebꞌ ánima.
12 Oj a can ánima yin spenail,
yuxan,
ecꞌal ebꞌ oj sbꞌej scamcꞌulnen sbꞌa.
13 Jaꞌ mac tecꞌan oj yute sbꞌa masantaꞌcꞌal slawubꞌal,
jaꞌton ebꞌ tuꞌ oj colchaoj.
14 Jaꞌ jun watxꞌ kꞌane chi alon tzet chi yun yoc Naj a Satcan Yaawiloj ebꞌ ánima,
jaꞌ sowalil oj al-le can el bꞌey masanil yul yibꞌankꞌinal tiꞌ,
yet watxꞌ chi yabꞌ bꞌey junjun conobꞌ.
Catuꞌ jaꞌ yet tuꞌ oj jul slawubꞌal.
15 Ey pax jun mactxequel yaabꞌil el yu Dios,
jaꞌ oj etnen el wan tzetyetal.
Jaꞌ naj Daniel,
ẍejabꞌ Dios yet peyxa,
jaꞌ jix alon yin jun tiꞌ.b
(Jaꞌ mac chi ilon jun skꞌaneal tiꞌ,
naꞌcha ojabꞌ el yu.)
Jaꞌ yet oj je yilon jun mactxequel tuꞌ yul stemplo Dios,
16 jaꞌ mac eyecꞌ bꞌey Judea,
toj ojabꞌ ebꞌ bꞌey wonanlaj.
17 Jaꞌ mac eyatoj ẍumuc spananil sna,c
yet oj jul jun tuꞌ,
manche xa eytej yu yiꞌon eltoj niꞌoj tzetyetal yul na.
18 Yetoj ebꞌ eyecꞌ xol smulnail,
manche xa ojabꞌ meltzo ebꞌ yintaj too yiꞌon spichil.
19 Jaꞌ yet jun tiempoal tuꞌ,
okꞌbꞌalcꞌule ebꞌ ix mimejalxa,
yetoj ebꞌ eyto yuneꞌ chi txutxwi.
20 Kꞌanwej tet Dios tol man ojabꞌ nabꞌilkꞌinal oj yet oj jex el tuꞌ,
manaj scꞌual xewilal* pax oj.
21 Yutol jaꞌ jun miman syaꞌtajil oj jul yet jun tiempoal tuꞌ,
cꞌamto bꞌey jix ecꞌ juneloj jaxca tuꞌ yet tax cꞌal jix waꞌxi yul yibꞌankꞌinal tiꞌ yu Dios.
Cꞌam pax bꞌey oj ecꞌ junojxa jaxca tuꞌ.
22 Ta cꞌam chi smitxꞌoc tucan jun syaꞌtajilal tuꞌ,
cꞌam junoj mactxequel oj colcha can el yul skꞌabꞌ camich.
Yutol ey pax scamcꞌulal Dios yin ebꞌ sicꞌbꞌilxa el yu,
yuxan oj smitxꞌoc tucanoj txenne oj yun can yajan jun tiempoal tuꞌ.
23 Ta ey mac chi alon ey jex jaxca tiꞌ:
“Ilaꞌ titiꞌ jaꞌton Naj Mesías eyecꞌ titiꞌ,”
ma “Ilaꞌ tituꞌ,
eyecꞌ Mesías tituꞌ,”
ta ẍi ebꞌ jaxca tuꞌ manche je chaꞌ je yabꞌe.
24 Yutol ey wan ebꞌ oj tzꞌaj yaloc sbꞌa Cristoal oj xꞌoxa sbꞌa,
cꞌal wan ebꞌ oj tzꞌaj yaloc sbꞌa ẍejabꞌoj Dios.
Oj tzꞌaj xꞌox echele cꞌal milagro ebꞌ yet chi yiꞌon eytej sat ánima ebꞌ.
Oj yakꞌle pax ebꞌ yiꞌon eytej sat ebꞌ sicꞌbꞌilxa el yu Dios,
ta chi skeꞌ yu ebꞌ.
25 Yin eyojto,
catuꞌ chi walon can wan tiꞌ ey jex an.
26 Yuxan,
ta ey ebꞌ oj alon jaxca tiꞌ ey jex:
“Ilaꞌ,
eyecꞌ Mesías bꞌey cusiltaj txꞌotxꞌ,”
ta ẍi ebꞌ,
caw cꞌam chex too je yilaꞌ.
Ta ey ebꞌ chi alon pax jaxca tiꞌ:
“Ilaꞌ eyecꞌ naj bꞌey jun na,”
ta ẍi ebꞌ,
man je chaꞌ je yabꞌe.
27 Yutol jaxca yet chi a letzꞌna nabꞌ caw miman txequel,
chi txeclo bꞌey masanil yul yibꞌankꞌinal tiꞌ,
chi txeclo bꞌey chi aol cꞌu cꞌal bꞌey chi too can cꞌu,
queytuꞌ oj yun xeclo jin jul an,
jain Akꞌbꞌil Wopiso yu Dios xol ebꞌ ket animail tiꞌ an.
28 Yal cꞌal bꞌey telan can junoj mimanile camnajxa,
jatuꞌ chi syambꞌa sbꞌa noꞌ miij.
Queytuꞌ oj yun je yotajne eloj yet oj jin jul yet tuꞌ an.
Jaꞌ Tzet Oj Yun Sjul Jesús Yet Scaelal
29 Jaꞌ yet oj lawoj ecꞌ jun miman syaꞌilal tuꞌ,
oj kꞌejbꞌoj el cꞌu,
catuꞌ oj tan yajan xꞌaaw.
Jaꞌ weycan oj titqꞌuey satcan.
Yetoj wan tzet ey yipal bꞌey satcan,
oj tzicoꞌtanele ebꞌ.d
30 Catuꞌ oj txeclo a jun yechel bꞌey satcan,
tzet utbꞌil tol jain Akꞌbꞌil Wopiso yu Dios xol ebꞌ ket animail tiꞌ tol lalanxa jin jul an.
Jaꞌ ebꞌ ánima bꞌey junjun conobꞌ yul yibꞌankꞌinal tiꞌ,
oj okꞌ ebꞌ yet oj yilon ebꞌ jin jul xol asun yetoj miman wipal cꞌal miman jin tzejejial.
31 Oj xuꞌle chꞌen trompeta yin caw ipal.
Catuꞌ jain Akꞌbꞌil Wopiso yu Dios xol ebꞌ ket animail tiꞌ,
oj jin chejtej ebꞌ wángel,
catuꞌ oj ecꞌ syambꞌa a ebꞌ sicꞌbꞌil el wu bꞌey masanil yul yibꞌankꞌinal tiꞌ.
Oj ecꞌ iꞌle a ebꞌ masantaꞌcꞌal bꞌey chi lawi yul yibꞌankꞌinal tiꞌ.
32 Naꞌwej tzet utbꞌil chi yun yakꞌon xaj teꞌ higo.
Jaꞌ yet chi uninbꞌi skꞌabꞌlaj teꞌ,
yet lalanxa stit sat teꞌ,
je yotaj xa tol tuxa chi oc nabꞌilkꞌinal.e
33 Queyton tuꞌ oj yun snaꞌcha el je yu yet oj je yilon sjul wan tiꞌ,
naꞌcha ojabꞌ el je yu,
tol niꞌanxane catuꞌ chin jul an.
34 Caw yel chi wal ey jex,
cꞌam tocꞌal chi cam ánima eyecꞌ yet jun tiempoal tiꞌ,
catuꞌ oj yunen masanil wan jix wal tiꞌ an.
35 Jaꞌ satcan tiꞌ cꞌal yul yibꞌankꞌinal tiꞌ,
oj lawoj.
Jal pax jin kꞌane,
man oj ecꞌ tzet chi wal an.
36 Cꞌam mac otajnen tzet cꞌual cꞌal jantaj hora oj jin jul an.
Ebꞌ ángel bꞌey satcan,
man yotaj oj ebꞌ.
Jain tiꞌ Scꞌaal jin Dios,
tol man pax wotaj oj,
asan Dios Mame yotaj.
37 Jaxca tzet jix yun yet jun tiempoal yet ecꞌnaj naj Noé,
queytuꞌ oj yun yet jun tiempoal yet oj jin jul an,
jain Akꞌbꞌil Wopiso yu Dios xol ebꞌ ket animail tiꞌ.*
38 Yutol jaꞌ yet cꞌamto chi jul jun miman yaax nabꞌ tuꞌ,
toj ey tzet chi snaꞌ ánima,
tol chi low ebꞌ,
tol chi yucꞌ jaꞌ ebꞌ.
Chi yiꞌle sbꞌa ebꞌ.
Cꞌal yaontoj scutzꞌin ebꞌ alibꞌeal,
masantaꞌcꞌal yet jun cꞌu yet jix octoj naj Noé yul teꞌ arca.f
39 Ma naꞌcha el niꞌoj yu ebꞌ,
masantaꞌcꞌal jix jul jun yaax nabꞌ tuꞌ,
catuꞌ jix cam ebꞌ masanil.
Jaxca cꞌal jix yun ebꞌ yet jun tiempoal tuꞌ,
queytuꞌ oj yun ánima yet oj jin jul an jain Akꞌbꞌil Wopiso yu Dios xol ebꞌ ket animail tiꞌ.
40 Kꞌinaloj ta ey cawanoj winaj junne chi mulnai.
Ey jun oj iꞌletoj,
ey jun oj canoj.
41 Kꞌinaloj ey pax cawanoj ix lalan scawni,
jun oj iꞌletoj,
jun oj canoj.
42 Yuxan,
caw listo che yute je bꞌa,
yutol man je yotaj oj jantaj hora oj jin jul an,
jain je Yaawil jin tiꞌ an.
43 Kꞌinaloj junoj naj yaaw na tinaniꞌ.
Ta yotaj jantaj akꞌbꞌal chi jul junoj elkꞌom,
caw listo chi yute sbꞌa,
catuꞌ cꞌam chi ẍaꞌoc elkꞌom yin sna.
44 Yuxan,
listo cꞌal pax che yute je bꞌa.
Yutol jaꞌ yet man naꞌanoj el jin julbꞌal je yu,
jaꞌ yet tuꞌ oj jin jul yin eymanil,
jain Akꞌbꞌil Wopiso yu Dios xol ebꞌ ket animail tiꞌ.
Ebꞌ Yakꞌomal Servil Jijem, cꞌal Ebꞌ Penawom
45 Kꞌinaloj jaꞌ junoj patrón yetoj yakꞌomal servil.
Jaꞌ junoj jijem,
jun ey snaꞌbꞌal,
jaꞌton jun tuꞌ oj yaoc yopiso yin yakꞌon cuenta sna yetoj masanil tzet ey ebꞌ.
¿Mactxequel jun jijem tuꞌ che naꞌ?
46 Jaꞌton jun lalan smulna jaxca chi yoche naj patrón tuꞌ yet oj jul junelxa.
Caw watxꞌ yet jun tuꞌ.
47 Caw yel chi wal ey jex,
oj yaoc naj yin yaawil yibꞌan masanil tzetyetal ey tet naj patrón tuꞌ.
48 Ta jaꞌ jun mooso tuꞌ,
pena snaꞌbꞌal.
Chi snaꞌ tol man oj jul naj patrón tuꞌ yin eymanil.
49 Yuxan chi cꞌoli smakꞌon yet mulnawomal.
Chi ecꞌ low yetoj ebꞌ uqꞌuem an.
Chi ucꞌwi pax an yetoj ebꞌ.
50 Jaꞌ yet man naꞌanoj el sjul naj patrón tuꞌ yu naj,
jaꞌton yet tuꞌ oj juloj.
51 Catuꞌ oj oc miman syaꞌtajilal yibꞌan naj tuꞌ.
Oj ale cantoj naj yetoj ebꞌ yet caabꞌ satil tuꞌ.
Jaꞌ tituꞌ oj okꞌoj,
cꞌal oj natxꞌatxꞌoj yee yu syaꞌil.