Jix Apni Jesús Bꞌey Conobꞌ Jerusalén
11
Jaꞌ yet lalanxa yapni Jesús yetoj ebꞌ scuywom scawilal conobꞌ Jerusalén,
jaꞌ bꞌey conobꞌ Betfagé yetoj Betania,
bꞌey yich wonan Olivo,
jix ẍej bꞌabꞌoj cawan ebꞌ scuywom Jesús.
2 Jix yalon tet ebꞌ jaxca tiꞌ:
—Bꞌabꞌanwejtoj bꞌey jun aldea cu sattajto tiꞌ.
Jaꞌ yet oj jex apnoj ocoj,
ey jun noꞌ achꞌe bꞌuru txuan oj ilcha je yu.
Cꞌamto junoj mac chi a juneloj yibꞌan noꞌ.
Che tiel noꞌ catuꞌ che yiꞌontej.
3 Ta ey mac chi alon jaxca tiꞌ ey jex:
“¿Tzet yuxan che tiel noꞌ?”
ta ẍi,
quey tiꞌ che yute je yaloni,
“Tol oj oc yopiso noꞌ yu Naj Kaawil.
Eyman oj jul kakꞌ can noꞌ jon,”
je chi,
ẍi Naj tet ebꞌ.
4 Catuꞌ jix bꞌabꞌi ebꞌ,
jix ilcha noꞌ achꞌe bꞌuru tuꞌ yu ebꞌ.
Txuan oc noꞌ stiꞌ jun na yul bꞌe.
Catuꞌ jix stion el ebꞌ.
5 Ey mac eyecꞌ tituꞌ,
jix skꞌanlen el ebꞌ tet ebꞌ scuywom tuꞌ jaxca tiꞌ:
—¿Tzet che yunne?
¿Tzet yuxan che tiel noꞌ bꞌuru tiꞌ?
ẍi ebꞌ.
6 Catuꞌ jix yalon ebꞌ jaxca jix yun scuyle ebꞌ yu Jesús tuꞌ.
Catuꞌ jix aletej noꞌ tet ebꞌ.
7 Catuꞌ jix yiꞌontej noꞌ ebꞌ bꞌey eyecꞌ Naj tuꞌ.
Jix yaon atoj spichil ebꞌ skꞌaanoj yichin noꞌ,
catuꞌ jix atoj Jesús yibꞌan noꞌ.
8 Jaꞌ yet lalan sbꞌeyi,
caw ecꞌal ánima chi slitxꞌbꞌa ey spichil sattaj Naj yul bꞌe tuꞌ.a
Ey mac xin,
skꞌabꞌlaj teꞌ chi bꞌet stzokꞌeloj,
catuꞌ chi yaon ey yul bꞌe tuꞌ.
9 Jaꞌ ebꞌ bꞌabꞌel sattaj cꞌal ebꞌ tzajan oc yintaj,
chi a yaw ebꞌ yu tzalacꞌulal yin ipal,
chi yalon ebꞌ jaxca tiꞌ:
—Yuwal dios.
Kalwej watxꞌ kꞌane yin jun chejbꞌiltej yu Naj Kaawil tiꞌ:b
10 Kalwej watxꞌ kꞌane yin Naj oj oc cu yaawiloj tiꞌ,
jaxca jix yun yoc naj kichmam David yaawil peyxa.
Kalwej yu diosal tet Dios,
ẍi ebꞌ.
11 Jaꞌ yet jix apni Jesús yul conobꞌ Jerusalén,
jix octoj yul stemplo Dios.
Jix oc tꞌanan yin masanil tzettaj yetal ey yul tuꞌ.
Caw lalanxa pax yeycꞌu,
yuxan jix too Naj bꞌey conobꞌ Betania yetoj ebꞌ scuywom slacawanil.
Jaꞌ Tzet Jix Yal Jesús Yin Teꞌ Higo
12 Jaꞌ yet jix kꞌinibꞌi a yet junxa cꞌual speto ebꞌ bꞌey Betania,
jix tit swail Jesús yul-laj bꞌe,
13 catuꞌ jix yilontoj naat,
ey jun teꞌ higo,
* ey xaj teꞌ.c
Jix too yiloni.
Caw cꞌam cꞌal junoj sat teꞌ eyatoj.
Asan cꞌal xaj teꞌ ey,
yutol man stiempoal oj yakꞌon sat teꞌ.
14 Yu jun tuꞌ,
yuxan jix yal Naj tet teꞌ higo tuꞌ jaxca tiꞌ:
—Cꞌamxa mactxequel oj loꞌon ja sat,
ẍi Jesús tet teꞌ.
Jix yabꞌ ebꞌ scuywom yalon jaxca tuꞌ.
Ebꞌ Ujtebꞌil Eltej Yu Jesús Yul Templo
15 Catuꞌ jix apni ebꞌ bꞌey Jerusalén.
Catuꞌ jix octoj Jesús yul stemplo Dios tuꞌ.
Jix cꞌoli yujten eltej jantaj ebꞌ chi txonwi yul tuꞌ,
cꞌal ebꞌ chi manwi.
Jix stenon a pacꞌlabꞌoj smeẍa ebꞌ qꞌuexom tumin,
cꞌal ẍila ebꞌ txonom uch.d
16 Ma xa chaꞌle ecꞌ junoj mactxequel yetoj tzettaj yetal yul templo tuꞌ.
17 Catuꞌ jix cꞌoli scuywa snan xol ebꞌ tuꞌ jaxca tiꞌ:
—Yalnaj can Dios jaxca tiꞌ yul An Juun Tzꞌibꞌebꞌilcanoj.
“Jaꞌ jin na,
snail txa oj yun can yu masanil conobꞌlaj,”
ẍi.e
Jal jex,
jaex tiꞌ,
jaxca xacꞌal junoj nachꞌen bꞌey chi scꞌubꞌa el sbꞌa ebꞌ elkꞌom queytuꞌ che yute,
ẍi Naj tet ebꞌ.f
18 Jaꞌ wan tzet jix yun Jesús tiꞌ,
jix yabꞌ ebꞌ yaawil yakꞌomal xaambꞌal ebꞌ Israel tet Dios,
cꞌal ebꞌ cuywam yin sley Moisés.
Jix xiwa ebꞌ yu,
yutol miman yeloc apnoj wan cuybꞌanile jix yakꞌ sattaj ánima.
Yuxan jix sey ebꞌ tzet utbꞌil chi yute yakꞌon cam Naj ebꞌ.
19 Jaꞌ yet jix kꞌejbꞌi can eyoj,
jix el yul conobꞌ tuꞌ yetoj ebꞌ scuywom.
Chi Tajel Teꞌ Higo
20 Jaꞌ yet jix ecꞌ ebꞌ yet yewial yet skꞌinibꞌalil scawilal teꞌ higo tuꞌ xin,
jix yil ebꞌ tol jix tajel teꞌ yetoj cꞌal xeꞌ.
21 Catuꞌ jix snaꞌontej Pedro tuꞌ,
catuꞌ jix yalon tet Jesús jaxca tiꞌ:
—Jaach cuywam,
ilaꞌ teꞌ higo jix ja tzuꞌ yet ewi,
jix tajel teꞌ,
ẍi naj tet Jesús.
22 Catuꞌ jix yalon Jesús tuꞌ jaxca tiꞌ:
—Awej oc je cꞌul yin Dios.
23 Kꞌinaloj ey junoj jex che yal tet jun wonan tiꞌ jaxca tiꞌ:
“Elan quey tiꞌ.
Kꞌojeytoj ja bꞌa yul jaꞌ mar,”
ta je chi.
Ta cꞌam che yakꞌ caabꞌcꞌulal,
ta che yaoc yin je cꞌul tol oj yun jaxca che yal tuꞌ,
caw yel oj yunne.
24 Yuxan chi wal ey jex an,
jaꞌ yet chex txali,
che yaoc yin je cꞌul,
tol oj je chaꞌ tzet che kꞌan tuꞌ.
Ta che yaoc yin je cꞌul,
oj akꞌle ey jex.
25 Ta ey mac chi oc spenail ey jex,
jaꞌ yet chex txali,
joꞌwej qꞌuey spenail tuꞌ yin je cꞌul.
Ta queytuꞌ che yute,
oj joꞌole pax qꞌuey je penail yu cu Mam Dios a satcan.
26 Ta cꞌam che joꞌqꞌuey xin,
man pax oj joꞌole qꞌuey je yet yu cu Mam Dios tuꞌ,
ẍi Jesús tet ebꞌ.
Yopiso Jesús
27 Catuꞌ jix apni pax ebꞌ bꞌey Jerusalén junelxa,
catuꞌ jix octoj Jesús yul stemplo Dios,
jix cꞌoli yecꞌabꞌ cꞌal yul.
Catuꞌ jix oc pax toj ebꞌ yaawil yakꞌomal xaambꞌal ebꞌ Israel tet Dios,
yetoj ebꞌ cuywam yin sley Moisés cꞌal ebꞌ ichamtaj winaj.
28 Catuꞌ jix skꞌanlen ebꞌ tet Jesús jaxca tiꞌ:
—¿Tzet ja wopiso,
yu jun tuꞌ,
yuxan jix ja wun wan tiꞌ ewi?
¿Mactxequel jix akꞌon ja wopiso tuꞌ?
ẍi ebꞌ tet naj.
29 Catuꞌ jix yalon Jesús tet ebꞌ jaxca tiꞌ:
—Ey pax jun tzetyetal oj jin kꞌanle el ey jex an.
Ta oj je pajtze ey jin an,
catuꞌ oj walon ey jex mac jix akꞌon wopiso wunen wan tiꞌ an.
30 ¿Mac jix akꞌon yopiso naj Juan,
yuxan jix akꞌwi bautizar ánima?
¿Dios mi,
ma ánima?
Alwej ey jin an,
ẍi Jesús tet ebꞌ.
31 Catuꞌ jix cꞌoli yalon ebꞌ xol tuꞌ,
catuꞌ jix yalon ebꞌ jaxca tiꞌ:
—¿Tzet wal chi kute kalon tet?
Ta chi kal tol jaꞌ Dios jix akꞌon yopiso naj,
jaꞌ xam yalon ey jon:
“¿Tzet yuxan ma je ya pax oc yin je cꞌul xin?”
ẍi mi.
32 Ma cꞌaltaꞌ skeꞌ kaloni,
tol ánima jix akꞌon yopiso naj,
ẍi ebꞌ.
Queytuꞌ chi yute yalon ebꞌ,
yutol chi xiw ebꞌ tet ebꞌ ánima,
yutol jaꞌ naj Juan tuꞌ,
caw ẍejabꞌ Dios yeoc naj yul sat ebꞌ ánima masanil.
33 Yuxan jix yal ebꞌ tet Jesús jaxca tiꞌ:
—Man kotajoj mac jix akꞌon yopiso naj Juan tuꞌ,
ẍi ebꞌ.
—Ta queytuꞌ xin,
man oj wal pax ey jex mac jix akꞌon wopiso wunen wan tiꞌ an,
ẍi Jesús tet ebꞌ.