Scuybꞌanil Ebꞌ Chi Spoꞌole Sbꞌa Yetoj Yetbꞌi
10
Jix el Jesús bꞌey Capernaúm tuꞌ xin,
catuꞌ jix toi,
jix ecꞌ yul-laj yet Judea.
Jix apni bꞌey jun lugar bꞌey skꞌaxepal jaꞌ Jordán.
Jix syambꞌa pax sbꞌa ebꞌ ánima tituꞌ junelxa yin Naj.
Catuꞌ jix cuywa Naj tet ebꞌ,
jaxca cꞌaltaꞌ sbꞌeybꞌal.
2 Ey wan ebꞌ Fariseo jix apni scꞌatan,
yutol chi yoche ebꞌ chi jul yakꞌle yijbꞌan Naj ebꞌ yin spenail.
Yuxan jix skꞌanle ebꞌ tet Naj ta ey sleyal chi spoꞌole sbꞌa junoj winaj yetoj yistil.
3 Catuꞌ jix yalon Naj tet ebꞌ tuꞌ jaxca tiꞌ:
—¿Tzet ẍi chejbꞌanile ey can yu Moisés yul An Juun Tzꞌibꞌebꞌilcanoj?
* ẍi Naj tet ebꞌ.
4 Catuꞌ jix yalon ebꞌ:
—Jaꞌ Moisés tuꞌ,
albꞌilcan yu,
tol chi skeꞌ yakꞌon yuunal poꞌolebꞌail junoj winaj tet yistil,
catuꞌ chi spoꞌolen sbꞌa ebꞌ,
ẍi ebꞌ tet Naj.a
5 Catuꞌ jix yalon Jesús tuꞌ tet ebꞌ jaxca tiꞌ:
—Yu caw caw je naꞌbꞌal,
yuxan yalnaj can Moisés tuꞌ jun chejbꞌanil tuꞌ.
6 Jaꞌ yet tax cꞌal jix waꞌnele yul yibꞌankꞌinal tiꞌ yu Dios,
jix swaꞌnen pax jun winaj yetoj jun ix.b
7 Catuꞌ jix yalon can jaxca tiꞌ:
“Yu jun tuꞌ,
jaꞌ ebꞌ winaj oj el ebꞌ yintaj smam cꞌal xutx,
catuꞌ oj sjunbꞌanen sbꞌa ebꞌ yetoj yistil.
8 Catuꞌ jaxca tol junxane animail chi yun can el ebꞌ scawanil,”
ẍi Dios.c
Yuxan manxa cawanoj sbꞌey ebꞌ,
tol junxane chi yun can el ebꞌ.
9 Yuxan jaꞌ ebꞌ junbꞌanebꞌil yu Dios,
cam ojabꞌ chi poꞌole ey snan ebꞌ yu ánima,
ẍi Jesús tet ebꞌ.
10 Catuꞌ jix octoj Jesús yul na yetoj ebꞌ scuywom xin,
jix skꞌanlen el ebꞌ tet Naj tzet chi yal yeloc apnoj jun tzet jix yal tuꞌ.
11 Catuꞌ jix yalon Naj tet ebꞌ jaxca tiꞌ:
—Yal cꞌal mac chi spoꞌole sbꞌa yetoj yistil,
catuꞌ chi yiꞌon junojxa ix,
mul chi yunne,
catuꞌ lalan yaon oc smul yul skꞌabꞌ ix.
12 Yetoj pax oj,
yal cꞌal mac ixal chi spoꞌole sbꞌa yetoj yichamil catuꞌ chi yiꞌon junojxa winaj,
mul pax chi yunne,
ẍi Jesús tet ebꞌ.
Jix Yal Watxꞌ Kꞌane Jesús Yibꞌan Ebꞌ Unin
13 Ey wan unin jix iꞌletej scꞌatan Jesús yu ebꞌ ánima,
yu yaontoj skꞌabꞌ Naj yibꞌan sjolom ebꞌ.
Jal pax ebꞌ scuywom Naj,
tol jix stenoc tucan ebꞌ ánima chi iꞌon jul ebꞌ unin tuꞌ.
14 Jaꞌ yet jix yilon Jesús jaxca tuꞌ,
jix tit sjowal yin ebꞌ.
Jix yalon Naj tet ebꞌ jaxca tiꞌ:
—Chaꞌwej jul ebꞌ unin ey jin an.
Man je tenoc tucan ebꞌ,
yutol asan ebꞌ laan snaꞌbꞌal jaxca ebꞌ unin tiꞌ,
asan ebꞌ ey yalon yet yoc Dios Yaawiloj.
Yutol sowalil che yaoc je cꞌul yin Dios jaxca chi yun yaon oc scꞌul ebꞌ unin yin smam xutx.
15 Caw yel chi wal ey jex an,
jaꞌ mac man oj chaꞌon Dios Yaawiloj jaxca chi yute ẍaꞌon junoj unin,
ma oc Dios Yaawiloj ebꞌ,
ẍi Jesús tet ebꞌ.
16 Catuꞌ jix cꞌoli slacon a ebꞌ unin tuꞌ.
Jix yaon atoj skꞌabꞌ yibꞌan sjolom ebꞌ,
catuꞌ jix skꞌanon swatxꞌcꞌulal Dios yibꞌan ebꞌ.
Skꞌaneal Jun Naj Achꞌe Bꞌeom
17 Lalanxa stoo Jesús yul bꞌe,
catuꞌ ey jun winaj caw ani ye jix apni scꞌatan.
Jix ey kaan sattaj Naj,
catuꞌ jix yaloni:
—Mamin,
jaach watxꞌ cuywam,
chin kꞌanle ey jaach an,
¿tzet sowalil chi wun an,
catuꞌ chin chaꞌon jin kꞌinal tol ey cꞌal yin tobꞌalkꞌinal?
ẍi naj tet Jesús.
18 —¿Tzet yuxan chin ja wal watxꞌil?
Jun chꞌan mactxequel watxꞌ,
asan Dios.
19 Ja wotaj wan ẍejbꞌanil Dios chi alon jaxca tiꞌ:
“Manche oc ja mul yul skꞌabꞌ ja wistil.
Manche jaach makꞌwi cam ánima.
Manche jaach elkꞌanwi.
Manche ja naꞌa kꞌane yin ja wet animail.
Manche ja wet kꞌanene ja wet animail.
Ey ojabꞌ yeloc apnoj ja mam cꞌal ja txutx yul ja sat,”
ẍi Jesús tet naj.d
20 —Mamin,
chi xa jin jije masanil wan chejbꞌanile tuꞌ yet jix jin titoc yin uninal,
ẍi naj tet Jesús.
21 Catuꞌ jix oc tꞌanan Naj yin jun bꞌeom tuꞌ,
catuꞌ jix cam scꞌul Naj yin,
catuꞌ jix yalon tet jaxca tiꞌ:
—Jun to ja tzꞌajloi.
Asiꞌ,
txon can el masanil tzetyetal ey,
ey jaach,
catuꞌ cha poꞌontoj stool tuꞌ tet ebꞌ mebꞌa,
catuꞌ oj ja chaꞌon ja bꞌeomal bꞌey satcan.
Chi lawi tuꞌ xin,
chach jul pax jin cꞌatan junelxa an,
catuꞌ chach ecꞌ cꞌal cuywoj wintaj an,
ẍi Jesús tet naj.
22 Jaꞌ yet jix yabꞌen jun bꞌeom jaxca tuꞌ,
jix cusa scꞌul naj sicꞌlebꞌil.
Cusiltaj xacꞌal scꞌul yet jix paxtoj,
yutol miman tzet ey tet.
23 Jix cꞌal paxtoj xin,
catuꞌ jix meltzotej tꞌanan Jesús yin ebꞌ scuywom tuꞌ.
Jix cꞌoli yalon jaxca tiꞌ:
—Jaꞌ ebꞌ bꞌeom tiꞌ,
caw yaꞌtaj yoc Dios Yaawiloj ebꞌ,
ẍi Jesús tet ebꞌ.
24 Jix qꞌueya scꞌul ebꞌ cuywom tuꞌ yet jix yabꞌen ebꞌ jaxca tuꞌ.
Catuꞌ jix yalon Naj junelxa tet ebꞌ jaxca tiꞌ:
—Jex jin cuywom an,
/jaꞌ ebꞌ chi yaoc sbꞌeomal yipoj scꞌul,
/ ta oj oc Dios Yaawiloj ebꞌ.
25 Kꞌinaloj junoj noꞌ camello tinaniꞌ,
¿tumi taꞌ chi ecꞌ el noꞌ yul yixal junoj acuẍa?
Queytuꞌ ebꞌ bꞌeom tuꞌ,
ta oj oc ebꞌ bꞌey oj yakꞌ Dios Yaawil,
caw yaꞌtaj yoctoj ebꞌ,
ẍi Jesús tet ebꞌ.
26 Jaꞌ yet jix yabꞌen ebꞌ jun tuꞌ,
tol jix qꞌueya scꞌul ebꞌ sicꞌlebꞌil.
Catuꞌ jix yalon ebꞌ xol tuꞌ:
—Ta queytuꞌ jaxca tuꞌ,
¿mac wal txequel oj skeꞌ scolchai?
ẍi ebꞌ.
27 Catuꞌ jix oc tꞌanan Jesús yin ebꞌ,
catuꞌ jix yalon jaxca tiꞌ:
—Jaꞌ jun tiꞌ,
cꞌam junoj ánima chi skeꞌ yu.
Jal pax Dios xin,
chi skeꞌ yu,
yutol masanil tzetyetal chi cꞌal skeꞌ yu,
ẍi Jesús.
28 Catuꞌ jix yalon Pedro tuꞌ tet Naj:
—Jaon tiꞌ,
jix cu bꞌejcan masanil cu tzettaj yetal,
catuꞌ jix cu ecꞌ cꞌal cuywoj ja wintaj,
ẍi naj tet Jesús.
29 Caw yel chi wal ey jex an,
yal cꞌal mac chi sbꞌejcan sna jin yaꞌiloj an,
ma yuẍtaj,
ma yanabꞌ,
ma smam xutx,
ma yuninal,
ma xin,
xꞌotxꞌ chi sbꞌejcan jin yaꞌiloj an,
cꞌal yu jun skꞌaneal yet colbꞌanile,
jaꞌton jun Evangelio tiꞌ,
caw mimanxa oj yute ẍaꞌon spaj yet jun tiempoal tiꞌ yul yibꞌankꞌinal tiꞌ.
30 Oj ẍaꞌ cien oj sqꞌuexel sna tuꞌ,
yuẍtaj,
cꞌal yanabꞌ,
smam cꞌal xutx,
yuninal,
cꞌal xꞌotxꞌ tuꞌ.
Oj yabꞌton syaꞌil ebꞌ yu ebꞌ ánima,
jal pax yet jun tiempoal oj jul yet yatoj tuꞌ,
oj ẍaꞌ skꞌinal ebꞌ tol ey cꞌal yin tobꞌalkꞌinal.
31 Ey ebꞌ miman yeloc apnoj cu xol tinaniꞌ.
Jaxa pax yet chi wal tuꞌ an,
ecꞌal ebꞌ cꞌamxa niꞌoj yeloc apnoj.
Ey pax ebꞌ xin,
cꞌam niꞌoj yeloc apnoj cu xol tinaniꞌ.
Jaxa pax yet tuꞌ,
caw mimanxa oj yun yeloc apnoj ebꞌ,
ẍi Jesús tet ebꞌ.
Chi Yaltej Jesús Yu Scamichal Yin Eyojto Junelxa
32 Bꞌabꞌel stoo Jesús sattaj ebꞌ scuywom yet lalan yatoj ebꞌ yul jun bꞌe chi aapnoj bꞌey Jerusalén.
Jaꞌ ebꞌ scuywom tuꞌ,
tucꞌal chi qꞌueya scꞌul ebꞌ.
Jal wanxa ánima yaman yetoj ebꞌ xin,
caw chi xiw ebꞌ.
Catuꞌ jix awtele eltej ebꞌ scuywom tuꞌ slacawanil yu Naj xol ebꞌ ánima tuꞌ.
Jix cꞌoli yalontej tet ebꞌ masanil tzet oj jul yibꞌan.
33 —Ilaꞌla,
lalan kawejtoj bꞌey Jerusalén tiꞌ.
Jain tiꞌ,
caxcꞌal Akꞌbꞌil Wopiso xol ebꞌ ket animail yu Dios tiꞌ,
oj jin ale oc yul skꞌabꞌ ebꞌ yaawil yakꞌomal xaambꞌal tet Dios,
cꞌal yul skꞌabꞌ ebꞌ cuywam yin sley Moisés.
Catuꞌ oj yaon oc camich ebꞌ wibꞌan an,
oj jin yaon oc ebꞌ yul skꞌabꞌ ebꞌ man Israeloj.
34 Oj bꞌuchwa ebꞌ win.
Oj jin smakꞌ ebꞌ.
Oj tzubꞌloj oc ebꞌ win an.
Catuꞌ oj jin yakꞌon cam ebꞌ.
Jaxa pax yet yox cꞌual tuꞌ,
oj jin pitzcꞌu aoj,
ẍi Jesús tet ebꞌ.
Jaꞌ Tzet Jix Skꞌan Jacobo Yetoj Juan Tet Jesús
35 Jix apni ebꞌ scꞌaal naj Zebedeo tuꞌ scꞌatan Jesús,
jaꞌton Jacobo yetoj Juan,
catuꞌ jix yalon ebꞌ tet Naj jaxca tiꞌ:
—Jaach cuywam,
jaꞌ tzet oj cu kꞌan ey jaach,
chi koche cha wakꞌ ey jon,
ẍi ebꞌ tet Naj.
36 —¿Tzet chi yoche je cꞌul chi wakꞌ ey jex?
ẍi Jesús tet ebꞌ.
37 —Jaꞌ yet oj jaach oc Yaawiloj,
chioj wal jon ja chaꞌey chotan ja cꞌatan,
junoj jon bꞌey ja watxꞌ kꞌabꞌ,
junoj jon bꞌey ja qꞌuexan kꞌabꞌ,
ẍi ebꞌ tet Jesús.
38 —Jaex tiꞌ,
cꞌam chi naꞌcha el je yu tzet che kꞌan ey jin an.
¿Oj mi techa je yu je yakꞌle porobꞌal jaxca oj jin utele an?
Jaꞌ tzet oj jul wibꞌan jaxca tol oj jin akꞌle bautizar yu.
¿Tumi taꞌ oj techa je yu?
ẍi Naj tet ebꞌ.
39 —Oj techaoj,
ẍi ebꞌ.
—Yel toni,
oj jex akꞌle porobꞌal jaxca oj yun wakꞌle porobꞌal.
Jaxca syaꞌilal oj ecꞌ el wibꞌan an,
queytuꞌ oj ecꞌ el je yibꞌan.
40 Jal jin,
jain tiꞌ,
cꞌam walon wet jex jin chotbꞌan ey bꞌey jin watxꞌ kꞌabꞌ ma bꞌey jin qꞌuexan kꞌabꞌ.
Yutol watxꞌ xa ye yu cu Mam Dios yu mac ebꞌ oj ey chotan tituꞌ,
ẍi Jesús tet ebꞌ.
41 Jaꞌ yet jix yabꞌen laonwanxa ebꞌ scuywom jun kꞌane tuꞌ,
jix tit sjowal ebꞌ yin Jacobo cꞌal yin Juan tuꞌ.
42 Catuꞌ jix awteletej ebꞌ slacawanil yu Jesús tuꞌ scꞌatan.
Jix yalon tet ebꞌ jaxca tiꞌ:
—Tol je yotaj xa,
jaꞌ ebꞌ eyoc yaawil bꞌey junjun mimej conobꞌ,
yelcꞌulal chi yakꞌon mandar ebꞌ.
Quey pax tuꞌ ebꞌ mimej winaj xol conobꞌ,
yaaw xacꞌal chi yute sbꞌa ebꞌ yibꞌan ánima.
43 Jal pax je xol jaex tiꞌ,
man jaxca oj tuꞌ oj yunne.
Ta ey mac chi yoche caw miman yopiso je xol,
sowalil chi oc yakꞌomaloj servil ebꞌ yet cuywomal,
catuꞌ miman ton yopiso.
44 Yetoj pax oj,
ta ey mac je xol chi yoche tol miman yeloc apnoj,
sowalil chi oc moosoal tet ebꞌ yet cuywomal.
45 Yutol jain tiꞌ,
caxcꞌal Akꞌbꞌil Wopiso xol ebꞌ ket animail yu Dios tiꞌ,
man yu oj wakꞌle servil yuxan jix jin jul an,
yu ton wakꞌwi servil.
Jix jin jul yu wakꞌon cam jin bꞌa an,
yet watxꞌ ecꞌal mactxequel chi colcha can el wu an,
ẍi Jesús tet ebꞌ.
Jix Jajcha Can Sat Naj Bartimeo Yu Jesús
46 Jix apni Jesús bꞌey conobꞌ Jericó yetoj ebꞌ scuywom.
Jaꞌ yet jix el ebꞌ tituꞌ,
catuꞌ jix too ebꞌ,
caw ecꞌal ánima jix too yetoj ebꞌ.
Jaꞌ stiꞌ bꞌe tuꞌ,
ey jun winaj chotan eyoj,
Bartimeo sbꞌi,
scꞌaal naj Timeo.
Jaꞌ jun winaj tuꞌ,
cꞌam chi skeꞌ yilwi,
yuxan chi kꞌanwi saꞌbꞌeal tet ánima.
47 Jaꞌ yet jix yabꞌeni,
tol jaꞌ Jesús a Nazaret chi juli,
jix a yaw yin ipal jix yalon jaxca tiꞌ:
—Jesús,
jaach yicꞌaal naj David,e
¿cꞌam mi chi okꞌ ja cꞌul win an?
ẍi naj tet Jesús.
48 Ecꞌal mac jix tenchanen naj Bartimeo tuꞌ,
yet watxꞌ chi tzꞌini ey naj.
Caw tol jix a pax cꞌal can yaon yel yaw naj:
—Jaach yicꞌaal David,
* cꞌam mi chi okꞌ ja cꞌul win an,
ẍi naj tet Jesús.
49 Catuꞌ jix oc tucan Jesús tuꞌ,
jix yaloni:
—Awtewejtej naj ey jin an,
ẍi Naj tet ebꞌ tzajan oc yintaj.
Catuꞌ jix awteletej naj tuꞌ:
—Tzalaan,
aan waanoj.
Titan,
ẍi Jesús,
ẍi ebꞌ tet.
50 Jix skꞌojcan el spichil naj eyocoj,
jix a jucnaoj,
catuꞌ jix too yin eymanil scꞌatan Jesús tuꞌ.
51 Jix skꞌanlen el Jesús tet jaxca tiꞌ:
—¿Tzet chi yoche ja cꞌul?
ẍi Jesús tet naj.
—Jaach cuywam,
chi woche cha waꞌne can jin sat tiꞌ an,
ẍi naj tet Jesús.
52 —Oj jin waꞌne ja sat tiꞌ an,
yutol jix ja waoc ja cꞌul yin Dios.
Chi xa skeꞌ ja paxi,
ẍi Jesús tet naj.
Yet xacꞌal jun txolan tuꞌ,
jix waꞌxi sat naj tuꞌ yu Naj.
Catuꞌ jix tzajlo naj yintaj Jesús tuꞌ bꞌey lalan stoi.