9
Jix yalon pax Jesús tet ebꞌ jaxca tiꞌ:
—Caw yel chi wal ey jex an,
ey jaywan je xol mac jex ey jex ecꞌ tiꞌ oj to je yil yoc can Dios yin Yaawil yetoj yipal yet cꞌamto chex cami,
ẍi Jesús tet ebꞌ.
Jix Qꞌuexmo Yili Jesús
2 Jobꞌix jix too yalon Jesús wan tuꞌ,
jix yiꞌontoj Pedro,
yetoj Jacobo cꞌal Juan bꞌey jun miman wonan.
Asan ebꞌ jix too yetoj Naj.
Jix qꞌuexmo yili Naj tituꞌ sattaj ebꞌ.
3 Jix tzejeji a spichil.
Saj xacꞌal wejinaj jaxca sajbꞌat.
Cꞌam junoj txꞌawom yul yibꞌankꞌinal tiꞌ chi apni sajbꞌanen pichile jaxca yet tuꞌ.
4 Catuꞌ jix yilontoj ebꞌ oxwan tuꞌ,
eyecꞌ naj Elías yetoj Moisés.
Lalan skꞌanabꞌ ebꞌ yetoj Jesús tuꞌ.
5 Yuxan jix yal naj Pedro tet Jesús jaxca tiꞌ:
—Jaach Cuywam,
caw watxꞌ ket yutol ey jon ecꞌ titiꞌ.
Tejan watxꞌ chi cu waꞌne oxebꞌoj pat,
junoj ja wet,
junoj yet Moisés,
yetoj junoj yet Elías,
ẍi naj tet Jesús.
6 Caw jix xiwa ebꞌ scuywom Jesús tuꞌ,
yuxan man yotaj oj Pedro tzet jix yalaꞌ.
7 Jix lawi tuꞌ xin,
catuꞌ jix ey jotna jun asun yibꞌan ebꞌ.
Catuꞌ jix eltej jayebꞌ kꞌane xol jun asun tuꞌ,
jix yal jaxca tiꞌ:
—Jaꞌton jin Cꞌaal bꞌey miman chi camel jin cꞌul tiꞌ an.
Akꞌwej je txiquin yin tzet chi yalaꞌ,
ẍi.
8 Catuꞌ jix yilontej ebꞌ,
cꞌamxa mac eyecꞌoj.
Asanxane Jesús eyecꞌoj.
9 Jaꞌ yet lalan spaxeytej bꞌey jun wonan tuꞌ,
jix yalon Naj tet ebꞌ jaxca tiꞌ:
—Cꞌam junoj mac bꞌey che yalel jun tzet jix je yil tiꞌ.
Jato yet oj jin pitzcꞌu a xol ebꞌ camnaj,
jain Akꞌbꞌil Wopiso yu Dios xol ebꞌ ket animail tiꞌ,
jaꞌ yet tuꞌ oj je yalon eloj,
ẍi Naj tet ebꞌ.
10 Yu jun tuꞌ,
yuxan cꞌubꞌabꞌil ey jun kꞌane tiꞌ yul scꞌul ebꞌ.
Cꞌam bꞌey jix yal ebꞌ.
Jaꞌ yet jix yalon tol oj pitzcꞌu a xol ebꞌ camnaj tuꞌ,
jix cꞌoli snaꞌoꞌtanen ebꞌ,
tzet chi yal yeloc apnoj jun kꞌane tuꞌ.
11 Catuꞌ jix skꞌanlen el ebꞌ jun tiꞌ tet Naj:
—Jaꞌ ebꞌ cuywam yin sley Moisés chi yal ebꞌ jaxca tiꞌ:
“Jaꞌ Elías,
sowalil oj bꞌabꞌoj juloj,”
ẍi ebꞌ.
¿Tzet yuxan chi yal ebꞌ jaxca tuꞌ?
ẍi ebꞌ tet Naj.
12 Catuꞌ jix yalon tet ebꞌ tuꞌ jaxca tiꞌ:
—Yel toni,
sowalil oj bꞌabꞌoj jul naj Elías tuꞌ,
yet watxꞌ chi snaꞌ sbꞌa ebꞌ ánima yin spenail.
¿Tzet chi yal An Juun Tzꞌibꞌebꞌilcan win jain Akꞌbꞌil Wopiso yu Dios xol ebꞌ ket animail tiꞌ?
Chi yal yul An tol oj wil syaꞌilal,
catuꞌ oj jin intajnele can el yu ánima.
13 Chi wal ey jex an,
tol jaꞌ Elías tuꞌ,
julnajxa ecꞌoj.
Ey ebꞌ jix yakꞌ snaꞌbꞌal oj yetnen jaxca chi yoche scꞌul ebꞌ.
Jaxca jix al-le can yin naj yul An Juun Tzꞌibꞌebꞌilcanoj,
queyton tuꞌ jix yute ebꞌ,
ẍi Naj tet ebꞌ scuywom tuꞌ.
Jix Waꞌxi Can Scꞌul Naj Unin Eyoc Pena Espíritu Yin
14 Jaꞌ yet lalan yapni ebꞌ bꞌey eyecꞌ wanxa ebꞌ cuywom,
jix yilontoj Jesús,
tol ecꞌal ánima eyecꞌ yetoj ebꞌ.
Jaꞌ ebꞌ cuywam yin sley Moisés,
lalan steelen sbꞌa ebꞌ yetoj ebꞌ scuywom Jesús tuꞌ.
Muchacho con el espíritu impuro (Marcos 9.14-29)
15 Jaꞌ yet jix yilontoj masanil ebꞌ eyxa ecꞌ tuꞌ,
tol chi apni Jesús,
caw jix qꞌueya scꞌul ebꞌ.
Yuxan jix yakꞌ ani ebꞌ stoo ẍaꞌoni.
16 Jaꞌ yet jix apni ebꞌ scꞌatan,
jix skꞌanlen el Naj tet ebꞌ jaxca tiꞌ:
—¿Tzet yinal che teele je bꞌa yetoj ebꞌ?
ẍi Naj tet ebꞌ.
17 Ey jun naj jix takꞌwi a xol ebꞌ ánima tuꞌ:
—Mamin,
jaach Cuywam,
jix wiꞌtej jun jin cꞌaal ey jaach an.
Eyoc pena espíritu yin,
yuxan cꞌam chi skeꞌ skꞌanabꞌi.
18 Yal cꞌal bꞌey eyecꞌ naj catuꞌ chi tita,
chi telcꞌo naj yu.
Chi eltej som stiꞌ naj yu,
catuꞌ chi natxꞌatxꞌi yee naj.
Caw lalan sbꞌajbꞌitoj naj yu.
Jix wal-le tet ebꞌ chi ecꞌ cꞌal cuywoj ja wintaj an,
tol chi yiꞌcan el ebꞌ yin naj,
ma pax skeꞌ yu ebꞌ,
ẍi naj tet Jesús.
19 Catuꞌ jix yalon Jesús tet ebꞌ tuꞌ jaxca tiꞌ:
—Jaex tiꞌ,
caw cꞌam che yaoc je cꞌul yin Dios.
Mimanxa tiempo cꞌal weecꞌ je yetoj an,
¿bꞌakꞌin tocꞌal oj naꞌcha el je yu xin?
Chi yabꞌ syaꞌil jin cꞌul je yu.
Asiꞌ iꞌwejtej jun unin tuꞌ ey jin an,
ẍi Jesús tet ebꞌ.
20 Jix bꞌet yiꞌontej naj.
Jaꞌ yet jix yilon oc jun pena espíritu tuꞌ,
tol jaꞌ Jesús,
jix yiꞌ sjowal yin jun unin tuꞌ.
Jix telcꞌotoj naj unin tuꞌ,
catuꞌ jix cꞌoli yecꞌ pitxpon naj yu.
Jix elol som stiꞌ naj.
21 Catuꞌ jix skꞌanlen Jesús tet smam jun unin tuꞌ:
—¿Jantajxa stiempoal smichꞌcha yu?
ẍi Jesús tet naj.
Catuꞌ jix yalon naj mame tuꞌ jaxca tiꞌ:
—Yin tax syaliẍal eyxa oc yin.
22 Ecꞌalxa el chi too yibꞌan kꞌakꞌ yu,
cꞌal xol jaꞌ,
chi yoche chi yakꞌ camoj.
¿Ta chi skeꞌ ja wu,
catuꞌ ta chi okꞌ ja cꞌul kin,
colwaan,
ja wiꞌon el yin jin kꞌanaꞌ?
ẍi naj tet Jesús.
23 —Chi skeꞌ ta cha waoc Dios yin ja cꞌul.
Jaꞌ masanil ebꞌ chi yaoc scꞌul yin Dios,
masanil cꞌal tzetyetal chi skeꞌ yu ebꞌ,
ẍi Jesús tet naj.
24 Catuꞌ jix a yaw smam naj unin tuꞌ yin ipal:
—Chi waoc yin jin cꞌul an.
Ocan wetoj catuꞌ chi a cꞌal can waon oc yin jin cꞌul,
ẍi naj.
25 Jaꞌ yet jix yilon Jesús tol ecꞌal ánima chi syambꞌa sbꞌa yin,
catuꞌ jix stzuon jun pena espíritu tuꞌ:
—Jaach pena espíritu akꞌom chacanbꞌoj ánima cꞌal jaach akꞌom umisbꞌoj ánima,
chi wal ey jaach an,
elan yin jun unin tiꞌ.
Cꞌamxa chach oc yin junelxa,
ẍi Jesús.
26 Catuꞌ jix el yaw jun pena espíritu tuꞌ.
Jix jowbꞌi yin jun unin tuꞌ junelxa.
Catuꞌ jix el yin,
jix ey can jilan yu.
Yu jun tuꞌ,
yuxan ecꞌal ebꞌ jix aloni tol jix cam xacꞌal naj.
27 Jal pax Jesús xin,
jix oc mitxꞌan yin skꞌabꞌ naj,
jix squetzon a waan.
Catuꞌ jix a waan Naj unin tuꞌ.
28 Jix lawi tuꞌ xin,
catuꞌ jix octoj xꞌojli yetoj ebꞌ scuywom yul jun na tuꞌ.
Jix skꞌanlen el ebꞌ tet jaxca tiꞌ:
—¿Tzet yuxan ma skeꞌ cu kiꞌon el jun pena espíritu tuꞌ?
ẍi ebꞌ tet Naj.
29 Catuꞌ jix yalon Naj tet ebꞌ:
—Jaꞌ jun tujan pena espíritu tuꞌ,
man comonoj chi eli.
Asan ta chex txali,
catuꞌ che yijle nocha je bꞌa chi skeꞌ je yiꞌon eloj,
ẍi Jesús tet ebꞌ.
Jix Yal Jesús Yu Scamichal Yin Eyojto
30 Jaꞌ yet jix el ebꞌ tituꞌ,
catuꞌ jix too ebꞌ,
jix ecꞌ ebꞌ yul-laj yet Galilea.
Jix yoche Jesús tol cꞌam mac jix abꞌen yapni,
31 yutol lalan scuywa tet ebꞌ scuywom.
Yuxan jix yal tet ebꞌ jaxca tiꞌ:
—Jain tiꞌ,
caxcꞌal Akꞌbꞌil Wopiso xol ebꞌ ket animail yu Dios tiꞌ,
oj jin ale oc yul skꞌabꞌ wan winaj.
Oj jin yakꞌ cam ebꞌ.
Jaxa pax yet yox cꞌual,
oj jin pitzcꞌu aoj,
ẍi Jesús tet ebꞌ.
32 Jal ebꞌ xin,
ma naꞌcha el yu ebꞌ tzet chi yalaꞌ.
Yutol chi xiw ebꞌ skꞌanlen el tet Naj,
ma pax skꞌanle ebꞌ tzet chi yal yeloc apnoj wan tiꞌ.
¿Mactxequel Yel Miman Yeloc Apnoj?
33 Catuꞌ jix apni ebꞌ bꞌey conobꞌ Capernaúm.
Jaꞌ yet eyxa ecꞌ ebꞌ bꞌey sna jix skꞌanlen Naj tet ebꞌ jaxca tiꞌ:
—¿Tzet jix je yal yul-laj bꞌe?
ẍi Naj tet ebꞌ.
34 Tzꞌin xacꞌal ẍi ebꞌ,
yutol jaꞌ yet eyoc ebꞌ yul bꞌe tuꞌ,
chi cꞌoli yalon ebꞌ,
mactxequel junoj miman yeloc apnoj xol ebꞌ tuꞌ,
yutol junjun cꞌal ebꞌ,
miman yeloc apnoj ebꞌ snaꞌoni.
35 Yuxan jix ey chotan Jesús.
Jix yawtentej ebꞌ slacawanil scꞌatan,
catuꞌ jix yalon tet ebꞌ jaxca tiꞌ:
—Ta ey junoj chi yoche je xol tiꞌ,
tol miman chi yun yeloc apnoj,
sowalil chi oc je yakꞌomaloj servil je masanil,
ẍi Jesús tet ebꞌ.
36 Catuꞌ jix iꞌletej jun unin yu Jesús xol ebꞌ.
Jix slacon aoj,
catuꞌ jix yalon tet ebꞌ jaxca tiꞌ:
37 —Yal cꞌal mac chi chaꞌon apnoj junoj unin jaxca jun tiꞌ yin jin bꞌi,
jaxca tol jain chin ẍaꞌ apnoj,
man asanne oj jin chin ẍaꞌ apnoj ebꞌ,
chi ẍaꞌ pax apnoj mac jix jin chejontej,
ẍi Jesús tet ebꞌ.
Jaꞌ Mac Man Acꞌul Oj Oc Kin, Jaꞌ Ketoj Eyocoj
38 Catuꞌ jix yalon naj Juan tet Jesús jaxca tiꞌ:
—Jaach Cuywam,
ey jun winaj jix kilaꞌ,
lalan yiꞌon el pena espíritu yin ánima yin ja wipal.
Jix cu tenchane,
yutol man junne oj chi ecꞌ ketoj,
ẍi naj tet Jesús.
39 Catuꞌ jix yalon Jesús tuꞌ:
—Ma skeꞌ je tenon oc tucan yunen naj.
Yutol cꞌam junoj mactxequel chi xew yakꞌon junoj milagro yetoj wipal,
catuꞌ chi yalon pax jin kꞌumal.
40 Yutol jaꞌ ebꞌ man acꞌul oj oc kin,
jaꞌ ketoj eyoc ebꞌ.
41 Yal cꞌal mac chex colon eltej yalan,
yutol wet jex jain Cristo jin tiꞌ an,
yuxan caxcꞌal siiquil jaꞌ junoj vaso jaꞌ chi akꞌle ey jex,
sowalil oj ẍaꞌ ebꞌ spaj.
Caw Ey Smey Ta Chi Oc Cu Penail, Ma Ta Chi Kakꞌ Eyqꞌuey Junojxa Mactxequel
42 Ta ey mac chi akꞌon etex el snaꞌbꞌal junoj unin tol chi yaoc scꞌul win an,
caw okꞌbꞌalcꞌule.
Yel mi watxꞌ chi pixle oc tꞌunan junoj miman ẍꞌenal molino yin snukꞌ sbꞌabꞌelal catuꞌ chi kꞌojletoj xol jaꞌ mar,
yet watxꞌ cꞌam chi yakꞌ etex el snaꞌbꞌal jun mactxequel tuꞌ,a
catuꞌ cꞌam chi a can jun spenail tuꞌ yibꞌan jun chi yun jaxca tuꞌ yutol caw pena jun tiꞌ yul sat Dios.
43 Yetoj pax oj,
ta ey junoj je kꞌabꞌ chi akꞌon etex el je naꞌbꞌal,
yel watxꞌ che tzokꞌel jun je kꞌabꞌ tuꞌ,
yet watxꞌ cꞌam chi etex el je naꞌbꞌal junelne.
Yutol caxcꞌal junxane je kꞌabꞌ,
ta oj je chaꞌ je kꞌinal tol ey cꞌal yin tobꞌalkꞌinal,
watxꞌ je yet.
Ta oj jex toj pax can bꞌey syaꞌtajilal xin,
bꞌey cꞌam chi tan kꞌakꞌ kꞌakꞌ,
caxcꞌal tzꞌajan masanil yetbꞌi je mimanil,
pena cꞌaltaꞌ je yet.
44 /Jaꞌ jun kꞌakꞌ tuꞌ cꞌam bꞌakꞌin oj tanoj.
Yuxan cꞌam pax bꞌakꞌin oj lawoj yabꞌen syaꞌil ánima tituꞌ./
45 Ta jaꞌ junoj je yajan chi akꞌon etex el je naꞌbꞌal,
yel watxꞌ che tzokꞌel jun je yajan tuꞌ,
yet watxꞌ cꞌam chi etex el je naꞌbꞌal yu jun tuꞌ yin junelne.
Yutol caxcꞌal junxane je yajan,
ta tol oj je chaꞌ pax je kꞌinal tol ey cꞌal yin tobꞌalkꞌinal,
watxꞌ je yet.
Ta tol oj jex toj pax can bꞌey syaꞌtajilal xin,
bꞌey cꞌam chi tan kꞌakꞌ kꞌakꞌ,
caxcꞌal tzꞌajan masanil yetbꞌi je mimanil,
pena cꞌaltaꞌ je yet.
46 /Jaꞌ jun kꞌakꞌ kꞌakꞌ tuꞌ,
cꞌam bꞌakꞌin oj tan kꞌakꞌ.
Yuxan cꞌam pax bꞌakꞌin oj lawoj syaꞌil ánima tituꞌ./
47 Ta jaꞌ junoj sbꞌakꞌ je sat chi akꞌon etex el je naꞌbꞌal,
yel watxꞌ che yiꞌeltej,
yet watxꞌ cꞌam chi etex el je naꞌbꞌal yu jun tuꞌ yin junelne.
Yutol caxcꞌal junxane sbꞌakꞌ je sat,
ta oj je chaꞌ je kꞌinal tol ey cꞌal yin tobꞌalkꞌinal,
watxꞌ je yet.
Ta oj jex toj pax can bꞌey syaꞌtajilal xin,
bꞌey cꞌam chi tan kꞌakꞌ,
caxcꞌal tzꞌajan sbꞌakꞌ je sat scaabꞌil,
pena cꞌaltaꞌ je yet.
48 Jaꞌ jun kꞌakꞌ tuꞌ,
cꞌam bꞌakꞌin oj tanoj.
Yuxan cꞌam pax bꞌakꞌin oj lawoj yabꞌen syaꞌil ánima tituꞌ.b
49 Jaxca chi yun yeytoj yatzꞌamil tzet chi cu loꞌ,
jaxca tuꞌ oj yun yale eytej kꞌakꞌ yibꞌan ebꞌ masanil.
/Yetoj pax oj,
quey pax tuꞌ masanil xaambꞌal,
chi ey yatzꞌamil./
50 Jaꞌ atzꞌam atzꞌam,
caw ey yopiso atzꞌam.
Kꞌinaloj ta ey pax niꞌoj atzꞌam chi qꞌueyel scꞌachiꞌal.
¿Tzet to wal oj yun cꞌachiꞌbꞌi a junelxa?
Jaxca ojabꞌ yoc yopiso atzꞌam atzꞌam tuꞌ xin,
quey ojabꞌ jex tuꞌ.
Ey ojabꞌ pax watxꞌcꞌulal je xol,
ẍi Jesús tet ebꞌ.