Ebꞌ Canebꞌ Mil Jix Low Yu Jesús
8
Jaꞌ yet jun tiempoal tuꞌ,
caw ecꞌal ánima jix yamcha oc scꞌatan Jesús,
cꞌam cꞌal niꞌoj sloꞌbꞌe ebꞌ.
Yu jun tuꞌ,
yuxan jix yawtetej ebꞌ scuywom scꞌatan,
catuꞌ jix yalon tet ebꞌ jaxca tiꞌ:
2 —Caw chi okꞌ jin cꞌul yin wan ánima tiꞌ,
yutol oxebꞌxa cꞌu ey cꞌal ecꞌ ebꞌ ketoj,
jaꞌ tinaniꞌ cꞌamxa tzet chi sloꞌ ebꞌ.
3 Ta cꞌam chi low ebꞌ catuꞌ chi cu chejon paxtoj ebꞌ bꞌey sna,
chim telcꞌo ebꞌ yul-laj bꞌe yu wail.
Yutol ey ebꞌ yel naat ey,
ẍi Jesús tet ebꞌ scuywom tuꞌ.
4 —Asan xin,
¿tzet wal oj kakꞌ sloꞌ ebꞌ bꞌey jun cusiltaj txꞌotxꞌ tiꞌ?
ẍi ebꞌ scuywom tuꞌ tet Naj.
5 —¿Jayebꞌ ixim pan je yetbꞌi?
ẍi Naj tet ebꞌ.
—Jujebꞌ ixim,
ẍi ebꞌ tet Naj.
6 Catuꞌ jix chejle ey chotan ebꞌ ánima yu Jesús tuꞌ sat txꞌotxꞌ.
Jix yiꞌon a ixim pan tuꞌ sjujebꞌal,
catuꞌ jix yalon yu diosalil yu ixim.
Jix spoꞌon ecꞌoj,
jix yakꞌon tet ebꞌ scuywom.
Jaꞌ ebꞌ jix poꞌontoj xol ánima tuꞌ.
7 Ey pax jaycꞌon noꞌ pescado yetbꞌi ebꞌ.
Jix yalon pax yu diosalil tet Dios,
catuꞌ jix yalon tet ebꞌ scuywom tuꞌ,
tol chi poꞌole ecꞌ noꞌ xol ebꞌ ánima tuꞌ.
8 Jix low ebꞌ masanil,
watxꞌ jix yun sno scꞌul ebꞌ.
Jaꞌ yet jix lawi slow ebꞌ tuꞌ,
jujebꞌ xuc jix no can yu sobrail ixim jix to cani.
9 Ey mi pax canebꞌoj mil ebꞌ jix lowi.
Jix lawi tuꞌ xin,
catuꞌ jix yalontoj sbꞌa Jesús tet ebꞌ.
10 Jix octoj Naj yul barco yetoj ebꞌ scuywom.
Jix too ebꞌ bꞌey yul-laj yet jun lugar chi yij Dalmanuta.
Ebꞌ Fariseo Jix Skꞌan Yil Junoj Milagro Tet Jesús
11 Ey wan ebꞌ Fariseo jix apni scꞌatan Jesús.
Jix cꞌoli steelen sbꞌa ebꞌ yetoj,
yu yakꞌon porobꞌal ebꞌ.
Yuxan jix skꞌan ebꞌ yil junoj milagro chi tit bꞌey Dios tet Jesús.
12 Jix a scꞌul Jesús,
catuꞌ jix yalon tet ebꞌ jaxca tiꞌ:
—¿Tzet yuxan chi skꞌan wan ánima tiꞌ yil junoj milagro ey jin an?
Caw yel chi wal ey jex an,
cꞌam junoj milagro oj txꞌoxle yil ebꞌ,
ẍi Jesús.
13 Catuꞌ jix el scꞌatan ebꞌ Fariseo tuꞌ,
catuꞌ jix octoj yul teꞌ barco junelxa yetoj ebꞌ scuywom.
Jix kꞌaxbꞌo ecꞌ ebꞌ bꞌey jun pacꞌxa jaꞌ mar tuꞌ.
Wan Scuybꞌanil Ebꞌ Fariseo Chi Yalaꞌ
14 Ma cꞌal snaꞌ ebꞌ scuywom Jesús tuꞌ yiꞌ span yul teꞌ barco.
Asan chꞌan jun jenan ixim jix yiꞌ ebꞌ.
15 Jix yalon Jesús tet ebꞌ tuꞌ jaxca tiꞌ:
—Abꞌwej.
Che yil cꞌal je bꞌa yu yich span ebꞌ Fariseo,
cꞌal yu yich span Herodes,
ey smey chex etex el yu,
ẍi Naj tet ebꞌ.
16 Catuꞌ jix yalon ebꞌ cuywom tuꞌ yu tzet jix yal tuꞌ:
—¿Jam yu cꞌam cu pan iꞌbꞌil,
yuxan queytuꞌ chi yalaꞌ?
ẍi ebꞌ.
17 Catuꞌ cꞌam chi naꞌcha yu ebꞌ tol chi yal yu scuybꞌanil ebꞌ Fariseo yet chi yal yin yich span ebꞌ.
Yotaj Jesús tzet chi yal ebꞌ.
Yu jun tuꞌ,
yuxan jix yal tet ebꞌ jaxca tiꞌ:
—¿Tzet yuxan caw che yalaꞌ,
tol cꞌam je pan iꞌbꞌil je yaloni?
¿Tumi cꞌamto chi naꞌcha el je yu?
¿Tumi man to je yotaj oj,
tzet chi yal yeloc apnoj jun tiꞌ?
Cꞌam tocꞌal chi jul je naꞌbꞌal.
18 ¿Tumi cꞌam che yil xin,
tumi cꞌam che yabꞌ skꞌumal?
¿Tumi cꞌamxa che naꞌtej?
19 Jaꞌ yet jix jin poꞌon ecꞌ ixim joebꞌ pan xol ánima,
¿jayebꞌto xuc jix no can yu sobra?
ẍi Naj tet ebꞌ.
—Lacawebꞌ to xuc,
ẍi ebꞌ.
20 —Jal pax yet jix jin poꞌon ecꞌ ixim jujebꞌ pan xol ebꞌ canebꞌ mil ánima,
¿jayebꞌto xuc jix no can yu sobra ixim?
ẍi Naj tet ebꞌ.
—Jujebꞌ to xuc,
ẍi ebꞌ.
21 —¿Tzet yuxan cꞌam tocꞌal chi naꞌcha el niꞌoj je yu xin yet chi wal yin yich span ebꞌ Fariseo?
ẍi Jesús tet ebꞌ.
Jun Winaj Jix Jajcha Sat Yu Jesús
22 Jix lawi jun tuꞌ,
jix apni ebꞌ bꞌey conobꞌ Betsaida.
Catuꞌ jix iꞌletej jun winaj cꞌam chi skeꞌ yilwi scꞌatan Jesús tuꞌ yu ánima.
Jix skꞌanon ebꞌ tet Naj tol chi yaoc skꞌabꞌ yibꞌan naj.
23 Catuꞌ jix oc mitxꞌan Naj yin skꞌabꞌ naj tuꞌ.
Jix quetzle el naj stiꞌ conobꞌ yu Jesús.
Jix yaon oc niꞌoj stzubꞌ Naj yin sat naj tuꞌ.
Jix yaon oc skꞌabꞌ Naj yibꞌan naj,
catuꞌ jix skꞌanlen Naj tet,
ta chi xa skeꞌ yilon niꞌoj.
24 Jix yakꞌlen naj yiloni,
jix yalon naj tet Jesús jaxca tiꞌ:
—Chi xa wil yecꞌabꞌ ánima,
asan tol jaxca teꞌ teꞌ chi wil an,
ẍi naj.
25 Yuxan jix yaoc skꞌabꞌ Jesús yibꞌan sat naj junelxa.
Catuꞌ jix waꞌxi xacꞌal yilwi naj sicꞌlebꞌil.
26 Catuꞌ jix chejle pax naj yu Jesús bꞌey sna.
Jix yalon tet naj jaxca tiꞌ:
—Manche jaach ecꞌ yul conobꞌ tiꞌ.
Cꞌam pax cha wal jun tiꞌ tet junoj mactxequel tituꞌ,
ẍi Jesús tet naj.
Albꞌil Yu Naj Pedro Tol Jaꞌ Jesús, Jaꞌton Naj Cristo
27 Jix lawi jun tuꞌ,
jix ecꞌ Jesús yetoj ebꞌ scuywom bꞌey wan aldealaj bꞌey conobꞌ Cesarea yet Filipo.
Jix skꞌanlen Naj yul-laj bꞌe tet ebꞌ:
—¿Mac jin txequel yalon ebꞌ ánima che yabꞌe?
ẍi Jesús tet ebꞌ.
28 —Ey ebꞌ chi aloni tol abꞌ Juan Bautista jaach,
yal ebꞌ.
Ey ebꞌ xin,
tol abꞌ Elías jaach,
yalon ebꞌ.
Ey mac xin,
tol abꞌ ẍejabꞌ Dios jaach,
ecꞌnaj jaach abꞌ peyxa,
ẍi ebꞌ scuywom tuꞌ tet Jesús.
29 —Jal jex pax oj,
¿mac jin txequel je yaloni?
ẍi Naj tet ebꞌ.
Catuꞌ jix takꞌwi naj Pedro tet Naj jaxca tiꞌ:
—Jaach tiꞌ,
jaach ton Cristo,a
Akꞌbꞌil ja Wopiso Colwawomal jaach,
ẍi naj tet Jesús.
30 Catuꞌ jix yalon Jesús tet ebꞌ jaxca tiꞌ:
—Cꞌam bꞌey che yalel jun tiꞌ,
ẍi Naj tet ebꞌ.
Yet Jix Yalel Jesús Yu Scamichal Yin Eyojto
31 Catuꞌ jix cꞌoli yalon Naj tet ebꞌ scuywom tuꞌ,
tzettaj yetal oj jul yibꞌan.
Jix yalon Naj jaxca tiꞌ:
—Jain tiꞌ,
Akꞌbꞌil Wopiso xol ebꞌ ket animail yu Dios tiꞌ,
* caw sowalil miman syaꞌilal oj ecꞌ el wibꞌan an.
Jaꞌ ebꞌ ichamtaj winaj ey yopiso,
yetoj ebꞌ yaawil yakꞌomal xaambꞌal tet Dios,
cꞌal ebꞌ cuywam yin sley Moisés,
* oj jin yintajne el ebꞌ an.
Oj jin yakꞌ cam ebꞌ an.
Jaxa pax yet yox cꞌual tuꞌ,
oj jin pitzcꞌu aoj,
ẍi Naj tet ebꞌ.
32 Jichan cꞌal jix yute yalon Jesús tuꞌ wan tiꞌ tet ebꞌ.
Catuꞌ jix iꞌle el Naj xꞌojli yu Pedro tuꞌ,
jix yakꞌlen tenon oc tucan yaloni.
33 Catuꞌ jix too tꞌanan Jesús yin ebꞌ scuywom tuꞌ.
Jix tenchanele naj Pedro,
jix yalon tet jaxca tiꞌ:
—Jaach Satanás,
elan jin cꞌatan an,
yutol manaj tzet chi snaꞌ Dios cha naꞌ.
Asan yin yet ánima eyoc ja naꞌbꞌal,
ẍi Jesús tet naj.
34 Catuꞌ jix yawten ebꞌ scuywom cꞌal ebꞌ ánima.
Jix yalon tet ebꞌ:
—Ta ey mac chi yoche chi ecꞌ cꞌal cuywoj wintaj an,
sowalil ojabꞌ manxa yetoj sbꞌa yul yet.
Yabꞌ ojabꞌ ebꞌ syaꞌil wu an,
caxcꞌal chi ale oc ebꞌ yin culus.
Ta bꞌejan scꞌul ebꞌ jaxca tuꞌ,
ecꞌ ojabꞌ cꞌal ebꞌ cuywoj wintaj an.
35 Yutol jaꞌ ebꞌ cꞌam chi yoche chi cam bꞌey yul yibꞌankꞌinal tiꞌ,
chi sbꞌejel ebꞌ jun kꞌinale tol ey cꞌal yin tobꞌalkꞌinal.
Jal pax ebꞌ chi bꞌejcha scꞌul scam jin yaꞌiloj,
cꞌal yu skꞌaneal colbꞌanile,
jaꞌton ebꞌ tuꞌ oj ẍaꞌ skꞌinal tol ey cꞌal yin tobꞌalkꞌinal.
36 Kꞌinaloj ta chi kakꞌ ganar kiꞌon masanil tzet ey yul yibꞌankꞌinal tiꞌ,
ta cꞌam pax scolbꞌanil cu pixan,
¿tzet wal chi kiꞌ yin jaxca tuꞌ?
37 ¿Tzet wal oj kakꞌ stooloj scolbꞌaniloj cu pixan tuꞌ?
38 Jaꞌ ebꞌ ánima yet jun tiempoal tiꞌ,
manaj yin Dios chi yaoc snaꞌbꞌal ebꞌ,
caw pena ebꞌ.
Ta ey mac chi qꞌuixwi a wu sattaj ebꞌ,
catuꞌ chi qꞌuixwi pax a yu jin kꞌane,
oj jin qꞌuixwoj pax a yu ebꞌ,
jain Akꞌbꞌil Wopiso yu Dios xol ebꞌ ket animail tiꞌ* yet oj jin jul yetoj swatxꞌil cꞌal yipal jin Mam an,
cꞌal ebꞌ ángel asan Dios ey yet.