Wan Tzet Chi Akꞌon Etex El Cu Naꞌbꞌal
7
Ey wan ebꞌ Fariseo cꞌal wan ebꞌ cuywam yin sley Moisés jix tit bꞌey Jerusalén,
jix syambꞌa oc bꞌulan sbꞌa ebꞌ yin Jesús.
2 Jix yil ebꞌ,
tol ey jaywan ebꞌ scuywom Jesús cꞌam chi sajbꞌane skꞌabꞌ* ebꞌ yet chi low ebꞌ jaxca yalon sleyalil ebꞌ,
yuxan pena jix can ebꞌ yul sat ebꞌ,
yu ma sajbꞌane skꞌabꞌ ebꞌ.
Yu jun tuꞌ xin,
jix al-le ebꞌ penail yu ebꞌ.
3 Jaꞌ ebꞌ Fariseo tuꞌ,
cꞌal masanil ebꞌ Israel,
bꞌeybꞌalnebꞌil cꞌal sbꞌeybꞌal yichmam ebꞌ yu,
yuxan ta cꞌam chi cam sajbꞌane skꞌabꞌ ebꞌ jaxca yalon sbꞌeybꞌal ebꞌ tuꞌ,
tutun cꞌam chi low ebꞌ.
4 Jaꞌ yet chi jul ebꞌ yet chi bꞌet ebꞌ txombꞌal,
masantaꞌcꞌal chi cam sajbꞌane skꞌabꞌ ebꞌ catuꞌ chi low ebꞌ,
jaxca yalon scuybꞌanil ebꞌ tuꞌ.
Eyto cꞌal wanxa tzetyetal chi sbꞌeybꞌalne ebꞌ,
jaxca sajbꞌanilal svaso ebꞌ,
cꞌal ẍalu,
cꞌal masanil smitxꞌkꞌabꞌ ebꞌ yet loꞌbꞌe,
/cꞌal sweyubꞌ ebꞌ./
5 Yuxan jix yal ebꞌ Fariseo tuꞌ cꞌal ebꞌ cuywam yin sley Moisés tet Jesús jaxca tiꞌ:
—¿Tzet yuxan cꞌam chi sbꞌeybꞌalne ebꞌ ja cuywom wan sbꞌeybꞌal ebꞌ kichmam?
Pena chi can ebꞌ,
yutol cꞌam chi xꞌaꞌ skꞌabꞌ ebꞌ catuꞌ chi low ebꞌ,
ẍi ebꞌ.
6 Catuꞌ jix yalon Jesús tet ebꞌ jaxca tiꞌ:
—Jaex tiꞌ caw caabꞌ sat jex.
Yel ton taꞌ tzet albꞌilcan yu Isaías je yin,
yet jix stzꞌibꞌen can jaxca tiꞌ yul An Juun Tzꞌibꞌebꞌilcanoj:*
Jaꞌ wan ánima tiꞌ,
yin cꞌal chꞌan stiꞌ ebꞌ eyoc swatxꞌ kꞌane chi yal ey jin an.
Jal pax snaꞌbꞌal ebꞌ naat eel win an.
7 Naꞌbꞌacꞌal chi tzꞌaj yiꞌey sbꞌa ebꞌ ey jin an.
Asan wan ẍejbꞌanil ánima chi yakꞌ cuyle ebꞌ.
Jaxca wal tol jin chejbꞌanil chi yute oc ebꞌ,
ẍi Dios yul An Juun tuꞌ.a
8 Jaex tiꞌ,
jix je bꞌejcan ẍejbꞌanil Dios,
jaꞌ scuybꞌanil je yichmam che bꞌeybꞌalne.
/Jaxca xꞌaꞌbꞌanil ẍalu tuꞌ,
cꞌal vaso tuꞌ.
Eyto cꞌal wanxa che bꞌeybꞌalne jaxca wan tiꞌ./
9 Yu cꞌal je bꞌeybꞌalnen wan sbꞌeybꞌal je yichmam,
yuxan che bꞌejon can je bꞌeybꞌalnen ẍejbꞌanil Dios.
10 Jix yal can Moisés jaxca tiꞌ:
“Ey ojabꞌ yeloc apnoj je mam cꞌal je txutx yul je sat.b
Jaꞌ mac chi bꞌawa yin smam ma xutx,
cam ojabꞌi,”
ẍi.
11 Jal pax je yalon jaex tiꞌ,
tol man sowalil oj chi colwa junoj mactxequel tet smam ma tet xutx.
Ilaꞌ ta ey junoj mac chi alon tet smam ma tet xutx jaxca tiꞌ:
“Cꞌam chi skeꞌ jin colwa ey jex,
yutol masanil tzet ey,
ey jin an,
yet xa Dios yei,”
ta ẍi.
12 Ta ey mac chi yal jaxca tuꞌ,
manxa sowalil oj chi colwa tet smam cꞌal tet xutx je yaloni.
13 Jaxca cꞌal ton tuꞌ che yute je yintajnen el ẍejbꞌanil Dios,
jal pax sbꞌeybꞌal je yichmam che yakꞌ cuyle oj.
Catuꞌ ecꞌal tocꞌal wanxa che bꞌeybꞌalne jaxca wan tiꞌ,
ẍi Jesús tet ebꞌ.
14 Jix lawi tuꞌ xin,
jix awtele pax tej ebꞌ ánima yu Jesús junelxa.
Jix yalon tet ebꞌ jaxca tiꞌ:
—Abꞌwej je masanil tzet oj wal an.
Naꞌcha ojabꞌ el je yu.
15 Jaꞌ tzet chi octoj yul cu tiꞌ,
cꞌam chi cu tzꞌilbꞌitoj yu yul sat Dios.
Jaꞌ wan tzet chi tit yin cu naꞌbꞌal,
jaꞌ chi cu tzꞌilbꞌinentoj yul sat Dios.
16 Naꞌoꞌtanewej sicꞌlebꞌil wan tzet chi wal tiꞌ an,
ẍi Naj tet ebꞌ.
17 Catuꞌ jix el Jesús tuꞌ xol ebꞌ ánima tuꞌ,
catuꞌ jix octoj yul na yetoj ebꞌ scuywom tuꞌ.
Jix skꞌanlen el ebꞌ tet Naj:
—¿Tzet chi yal yeloc apnoj jun cuybꞌanile jix ja wal tiꞌ?
ẍi ebꞌ tet Naj.
18 Catuꞌ jix yalon tet ebꞌ jaxca tiꞌ:
—¿Tumi cꞌam chi naꞌcha pax el je yu,
jaex tiꞌ?
¿Tumi man je yotaj oj,
tol jaꞌ tzet chi octoj yul cu tiꞌ,
cꞌam chi cu tzꞌilbꞌitoj yul sat Dios yu?
19 Yutol manaj bꞌey cu naꞌbꞌal chi apni.
Jaꞌ yul cu cꞌul chi ey apnoj,
chi lawi tuꞌ xin,
chi eli,
ẍi Jesús tet ebꞌ.
Queytuꞌ jix yute yalon jaxca tuꞌ,
tzet utbꞌil tol jantaj cꞌal tzet chi loꞌle cꞌaltaꞌa,
cꞌam sleyal yu Dios.
20 Jix yalon pax junxa tiꞌ tet ebꞌ:
—Jaꞌ wan tzet chi tit yin cu naꞌbꞌal,
jaꞌ chi cu tzꞌilbꞌinentoj yul sat Dios.
21 Yutol jaꞌ yin snaꞌbꞌal ánima chi pitzcꞌu a wan pena naꞌbꞌale tiꞌ.
Ey mac eyxa yetbꞌi,
catuꞌ chi yunen mul yetoj junojxa mactxequel.
Ey ebꞌ man tocꞌal yetbꞌi oj sbꞌa,
catuꞌ chi yunen mul.
Ey ebꞌ chi smakꞌ cam yet animail.
22 Ey ebꞌ chi elkꞌanwi.
Ey ebꞌ chi ochen oc tzet ey bꞌey junojxa.
Ey ebꞌ cꞌam swatxꞌil chi yute sbꞌa.
Ey ebꞌ chi yakꞌ lekꞌtiꞌal.
Ey ebꞌ cꞌam chi qꞌuixwi yunen junoj tzetyetal yin comon cꞌal.
Ey ebꞌ chi chichon oc scꞌul yin junoj mactxequel yu tzet ey tet.
Ey ebꞌ comon cꞌal chi bꞌuchwai.
Ey ebꞌ chi smimanbꞌane sbꞌa.
Ey pax mac cꞌam snaꞌbꞌal.
23 Jaꞌ wan spenail tiꞌ,
jaꞌ yin snaꞌbꞌal ánima chi pitzcꞌu aoj.
Jaꞌ chi tzꞌilbꞌinen el ebꞌ yul sat Dios,
ẍi Jesús.
Jaꞌ Jun Ix Ix Man Israel Oj Jix Yaoc Scꞌul Yin Jesús
24 Catuꞌ jix too Jesús tuꞌ bꞌey jun lugar chi yij Tiro cꞌal Sidón.
Jix apni bꞌey jun na,
ma yoche jix abꞌcha aoj ta eyecꞌ Naj tituꞌ,
jix abꞌcha cꞌal pax aoj.
25 Ey jun ix ix ey jun yuneꞌ kꞌopo eyoc pena espíritu yin tituꞌ.
Jix yabꞌ skꞌumal ix txutxe tuꞌ tol jix apni Jesús tituꞌ.
Catuꞌ jix too ix scꞌatan Naj,
jix bꞌet ey kaan ix sattaj.
26 Jaꞌ jun ix ix tuꞌ,
man Israeloj ix,
a Sirofenicia ix.
Jix skꞌan ix tet Jesús tol chi yiꞌel jun pena espíritu yin ix kꞌopo tuꞌ.
27 Jix yalon pax Jesús tet ix jaxca tiꞌ:
—Low ojabꞌ ebꞌ uninale bꞌabꞌel.
Man watxꞌ oj ta chi tokꞌle ecꞌ sloꞌbꞌe ebꞌ,
catuꞌ chi akꞌle tet noꞌ txꞌiꞌ,
ẍi Jesús tet ix.c
28 Catuꞌ jix takꞌwi ix tet Naj jaxca tiꞌ:
—Yel ton Mamin,
Jal noꞌ txꞌiꞌ,
chi sicꞌa scꞌail sloꞌbꞌe ebꞌ uninale chi ey cꞌotna yalan meẍa,
ẍi ix tet Naj.
29 Yu jun tuꞌ,
yuxan jix yal Naj tet ix jaxca tiꞌ:
—Jaꞌ jun cha wal ey jin tiꞌ an,
caw watxꞌ.
Chi skeꞌ chach pax bꞌey ja na,
yutol jix el jun pena espíritu tuꞌ yin ix ja wuneꞌ tuꞌ,
ẍi Naj tet ix.
30 Jaꞌ yet jix apni ix bꞌey sna,
jix yilon ix,
telan atoj jun yuneꞌ ix tuꞌ sat txꞌat,
xax el jun pena espíritu tuꞌ yin ix.
Naj Cꞌam Chi Skeꞌ Yabꞌeni Jix Jajcha Can Xiquin Yu Jesús
31 Jix el Jesús bꞌey Tiro bꞌey eyecꞌ tuꞌ xin,
jix ecꞌ bꞌey conobꞌ Sidón,
cꞌal bꞌey wan conobꞌ yul yet Decápolis.d
Catuꞌ jix apni bꞌey stiꞌ jaꞌ mar Galilea.
32 Jaꞌ yet eyecꞌ tituꞌ,
jix iꞌletej jun winaj cꞌam chi yabꞌe yu wan ánima tet Naj.
Cꞌam chi skeꞌ pax skꞌanabꞌ jun winaj tuꞌ.
Jix skꞌanon ebꞌ tet Jesús yet watxꞌ chi yaoc skꞌabꞌ Jesús yibꞌan naj.
33 Catuꞌ jix yiꞌon el Naj xꞌojli xol ánima tuꞌ.
Jix yaon octoj jun yiximal skꞌabꞌ Naj yul junjun xiquin naj.
Jix lawi jun tuꞌ xin,
catuꞌ jix tzubꞌli oc Jesús yin skꞌabꞌ,
catuꞌ jix yaon oc yin yakꞌ naj.
34 Catuꞌ jix a tꞌanan Jesús satcan tuꞌ,
jix a scꞌul,
catuꞌ jix yalon jaxca tiꞌ:
—Efatá,
ẍi.
Chi yal yeloc apnoj,
jajchaan canoj.
35 Jaꞌ yet jun txolan tuꞌ,
jix jajcha can xiquin naj tuꞌ.
Jix waꞌxi pax can yakꞌ naj,
jix kꞌanabꞌ a naj tuꞌ.
36 Catuꞌ jix cam can yalon Jesús tet ebꞌ ánima tuꞌ jaxca tiꞌ:
—Cꞌam bꞌey che yal jun tiꞌ,
ẍi Naj tet ebꞌ.
Jaꞌ yet jix yalon tet ebꞌ jaxca tuꞌ,
caxcꞌal jix yalel ebꞌ tuꞌ ma sjije ebꞌ.
37 Caw jix qꞌueya scꞌul ebꞌ ánima tuꞌ.
Jix yalon ebꞌ jaxca tiꞌ:
—Caw watxꞌ chi yun swaꞌnen masanil tzetyetal.
Chi jajcha xiquin ebꞌ cꞌam chi yabꞌe yu,
catuꞌ chi kꞌanabꞌ can a ebꞌ cꞌam cꞌaltaꞌ chi skeꞌ skꞌanabꞌi,
ẍi ebꞌ.