—¿Bꞌeytuꞌ jix scuy jun winaj tiꞌ wan tiꞌ?

¿Bꞌeytuꞌ jix yiꞌ sjelanil tuꞌ?

¿Tzet chi yun skeꞌon milagro tuꞌ yu?

3 Yutol jaꞌ jun tiꞌ,

jaꞌton jun josom teꞌ,

yuneꞌ ix María.

Yuẍtaj sbꞌa yetoj Jacobo,

José,

Judas,

yetoj Simón.

Eyecꞌ ebꞌ yanabꞌ Naj cu xol tiꞌ,

ẍi ebꞌ.

Yu jun tuꞌ,

yuxan tucꞌal jix qꞌueya scꞌul ebꞌ yin.

4 Catuꞌ jix yalon Jesús tet ebꞌ tuꞌ jaxca tiꞌ:

—Ey cꞌaltaꞌ yeloc apnoj ebꞌ ẍejabꞌ Dios yul sat ánima masanil.

Asan yul sat ebꞌ yet conobꞌ ebꞌ,

cꞌal yul sat ebꞌ yican ebꞌ,

cꞌal yul sat ebꞌ junne nail ye yetoj ebꞌ,

cꞌam yeloc apnoj ebꞌ,

ẍi Jesús.

5 Ma skeꞌ yunen junoj milagro tituꞌ.

Asan jaywan yaꞌey jix sbꞌatxbꞌa oc skꞌabꞌ yibꞌan,

catuꞌ jix waꞌxi can scꞌul ebꞌ.

6 Jix qꞌueya scꞌul Naj yutol ma yaoc scꞌul ebꞌ yin.

Jix lawi tuꞌ xin,

jix ecꞌ cuywa bꞌey wan aldealaj scawilal sconobꞌ tuꞌ.

7 Jix yawtentej ebꞌ lacawan scuywom Jesús scꞌatan.

Catuꞌ catajwan jix yute ẍejontoj ebꞌ.

Jix yakꞌon yopiso ebꞌ iꞌo el pena espíritu.

8 Jaꞌ yet cꞌamto chi too ebꞌ,

jix yalon tet ebꞌ jaxca tiꞌ:

—Jaꞌ yet chex toi,

cꞌam cꞌal yet je bꞌe che yiꞌ.

Manche je yiꞌ je pa,

je loꞌbꞌe,

cꞌal je tumin.

Asan je kꞌojoch che yiꞌ.

9 Asan je pichil eyoc tiꞌ che yiꞌtoj,

yetoj je xanabꞌ.

10 Yal cꞌal tzet nail bꞌey chex apni,

jacꞌal tituꞌ che yakꞌ je posada masantaꞌcꞌal chex too bꞌey junojxa lugar.

11 Ta ey bꞌey cꞌam chex chaꞌle yu ánima,

catuꞌ cꞌam chi yal scꞌul ebꞌ chi yabꞌe,

cꞌam chex can bꞌey jun lugar tuꞌ,

che tzic can el spojojal je yajan,

yu je txꞌoxon can eloj,

tol cꞌamxa je yalon je yet yin ebꞌ.

/Caw yel chi wal ey jex an,

jaꞌ yet oj jul jun cꞌual chi naꞌle oc yin ánima,

yel miman syaꞌtajilal oj ẍaꞌ ebꞌ mac ebꞌ ma jex chaꞌon tuꞌ yintaj ebꞌ a Sodoma cꞌal ebꞌ a Gomorra,

/ ẍi Jesús tet ebꞌ.

12 Jix too ebꞌ scuywom tuꞌ xin.

Jix ecꞌ yalon el ebꞌ,

tol sowalil chi snaꞌ sbꞌa ebꞌ ánima yin spenail.

13 Caw ey pena espíritu jix yiꞌcan el yin ebꞌ ánima.

Caw ey ebꞌ yaꞌey jix ecꞌ ya can oc aceite olivo yin ebꞌ,

catuꞌ jix waꞌxi can scꞌul ebꞌ.

14 Jix yabꞌ naj rey Herodes wan tzet chi el yunen Jesús yet jun tiempoal tuꞌ,

yutol jix sajlemtoj skꞌaneal xol masanil ánima.

Yu jun tuꞌ,

yuxan ey ebꞌ jix alon jaxca tiꞌ:

—Jaꞌ jun tuꞌ,

jaꞌ naj Juan Bautista jix pitzcꞌu a xol ebꞌ camnaj.

Yu jun tuꞌ,

yuxan ey yipal yunen wan tuꞌ,

ẍi ebꞌ.

15 Ey wanxa xin,

jix yal ebꞌ jaxca tiꞌ:

—Jaꞌ jun tuꞌ,

jaꞌ naj Elías,

ẍi ebꞌ.

Ey wanxa jix aloni:

—Jaꞌ junoj ebꞌ ẍejabꞌ Dios,

jaxca ebꞌ yet peyxa,

ẍi ebꞌ.

16 Jaꞌ yet jix yabꞌen naj Herodes wan tiꞌ,

jix yaloni:

—Jaꞌ jun chi yal ebꞌ tuꞌ,

jaꞌ naj Juan,

jun jix wakꞌ iꞌle el sjolom.

Jaꞌton jix pitzcꞌu a xol ebꞌ camnaj,

ẍi naj.

17-19 Tol yu jun tiꞌ,

yuxan jix cam naj Juan tuꞌ yu naj Herodes.

Ey jun yuẍtaj naj Herodes tuꞌ chi yij Felipe.

Herodías sbꞌi yistil.

Montebꞌil el yistil naj Felipe tuꞌ yu naj Herodes tuꞌ.

Jaꞌ naj Juan jix alon tet Herodes tuꞌ jaxca tiꞌ:

—Caw cꞌam sleyal cha monte el yistil naj ja wuẍtaj,

ẍi naj tet.

Yu jun tuꞌ,

jix tit sjowal ix Herodías tuꞌ.

Jix cꞌoli yakꞌle scꞌul naj Herodes yu ix.

Yuxan jix yakꞌ mitxꞌle naj Juan,

jix yaoc preso catuꞌ jix pixle ey naj yetoj cadena.

Jaꞌ ix Herodías tuꞌ,

caw chi chichon oc scꞌul ix yin naj.

Chi yoche ix chi yakꞌ cam naj,

cꞌam cꞌal chi skeꞌ pax yu ix.

20 Yutol yotaj Herodes tuꞌ,

tol jaꞌ naj Juan,

caw watxꞌ sbꞌeybꞌal,

catuꞌ tol yet Dios yei.

Yu jun tuꞌ,

jix xiwa yu.

Jix yaon oc steynemal tuꞌ,

yet watxꞌ manche akꞌle cam yu ix Herodías tuꞌ.

Ey bꞌey chi yaltej skꞌane Dios naj Juan tuꞌ tet Herodes tuꞌ.

Caxcꞌal cꞌam chi naꞌcha el yu sicꞌlebꞌil,

caw chi tzala cꞌal naj yabꞌeni.

21 Jaꞌ yet jix ẍaꞌon skꞌinal yabꞌilal Herodes,

jix seyon ix tzet utbꞌil chi yute cam naj Juan tuꞌ.

Ey jun miman loꞌo jix oc yu Herodes tuꞌ.

Jix yakꞌ low ebꞌ yet yaawilal,

yetoj ebꞌ syaawil ebꞌ soldado,

cꞌal ebꞌ mimej winaj yul yet Galilea tuꞌ.

22 Ey jun yuneꞌ ix Herodías tuꞌ,

Jix octoj ix xol bꞌey lalan yoc loꞌo tuꞌ,

catuꞌ jix canalwi ix.

Watxꞌ xacꞌal yecꞌ ix jix yil Herodes yetoj ebꞌ eyecꞌ low yetoj tuꞌ.

Yu jun tuꞌ,

yuxan jix yal Herodes tuꞌ tet ix jaxca tiꞌ:

—Kꞌan tzet chi yoche ja cꞌul ey jin an,

oj wakꞌ ey jaach an,

ẍi naj tet ix.

23 Jix sloctej sbꞌi Dios,

catuꞌ jix yakꞌon stiꞌ tet ix,

jix yaloni:

—Yal cꞌal tzetyetal junoj cha kꞌan ey jin an,

oj wakꞌ ey jaach.

Caxcꞌal snan oj bꞌey ey jin oc yaawilal tiꞌ,

oj wakꞌ an,

ẍi naj.

24 Jaꞌ yet jix eltej ix xin,

jix skꞌanlen ix tet xutx jaxca tiꞌ:

—¿Tzet cha woche chin kꞌan an?

ẍi ix tet xutx tuꞌ.

Catuꞌ jix takꞌwi ix txutxe tuꞌ:

—Jaꞌ sjolom naj Juan Bautista cha kꞌanaꞌ,

ẍi ix.

25 Jix octoj ix scꞌatan naj rey tuꞌ,

catuꞌ jix yalon ix tet jaxca tiꞌ:

—Chi woche jaꞌ sjolom Juan Bautista cha wakꞌ ey jin tinaniꞌ an.

Jaꞌ yul junoj plato chi woche cha wakꞌ ey jin an,

ẍi ix.

26 Caw jix cusa naj rey tuꞌ yet jix yabꞌen naj.

Caw ma xa skeꞌ sqꞌuexbꞌan naj,

yutol jix sloctej sbꞌi Dios naj,

catuꞌ jix yabꞌen pax ebꞌ eyecꞌ yetoj naj tuꞌ.

27 Catuꞌ jix chejletoj jun soldado yu naj,

catuꞌ jix bꞌet tit sjolom naj Juan tuꞌ.

28 Jix too jun soldado tuꞌ bꞌey preso xin,

catuꞌ jix bꞌet yiꞌon el sjolom Juan tuꞌ.

Jix yiꞌontej yul jun plato tuꞌ,

catuꞌ jix yakꞌon tet ix.

Catuꞌ jix yakꞌon ix tet xutx tuꞌ.

29 Jaꞌ yet jix yabꞌen ebꞌ scuywom naj Juan tuꞌ,

jix apni ebꞌ,

catuꞌ jix bꞌet mujle can smimanil naj yu ebꞌ.

30 Jix apni ebꞌ ẍejabꞌ Jesús tuꞌ scꞌatan Naj junelxa,

catuꞌ jix yalontej ebꞌ jantaj cꞌal tzet jix yun ebꞌ,

cꞌal tzet jix yakꞌ cuyle can ebꞌ.

31 Jix lawi tocꞌal yalontej ebꞌ,

catuꞌ jix yalon Jesús tuꞌ tet ebꞌ jaxca tiꞌ:

—Toonwej xew niꞌoj cu txꞌojli bꞌey cꞌam ánima,

ẍi Naj.

Jix yal Naj jaxca tuꞌ,

yutol caw cꞌam niꞌoj scolil ebꞌ yu ánima.

Ey chi juli,

ey chi toi.

Caw cꞌam stiempo ebꞌ slowi.

32 Catuꞌ jix octoj Jesús yul jun barco tuꞌ yetoj ebꞌ scuywom.

Catuꞌ jix too ebꞌ xꞌojli bꞌey cꞌam ánima.

33 Caw ecꞌal pax ánima jix ilon stoo ebꞌ.

Xax yotajne pax el Jesús ebꞌ.

Yu jun tuꞌ,

ecꞌal ebꞌ a conobꞌ bꞌey wan conobꞌlaj scawilal tuꞌ jix too yetoj yajan,

bꞌabꞌel jix apni ebꞌ sattaj ebꞌ.

34 Jix eltej Jesús yul barco tuꞌ,

jix yiloni,

tol ecꞌal ebꞌ ánima eyxa ecꞌoj.

Jix okꞌ scꞌul yin ebꞌ tuꞌ,

yutol laan ebꞌ jaxca wanoj noꞌ meꞌ cꞌam yilomal.

Catuꞌ jix cꞌoli scuyle ebꞌ yu.

35 Jaꞌ yet lalanxa stoo cꞌu,

jix apni ebꞌ scuywom scꞌatan,

catuꞌ jix yalon ebꞌ tet Naj jaxca tiꞌ:

—Lalanxa stoo cꞌu.

Jaꞌ bꞌey ey jon ecꞌ tiꞌ,

caw cusiltaj txꞌotxꞌ.

36 Yuxan tejan watxꞌ cha chejtoj ebꞌ ánima tiꞌ bꞌey ey ánima,

yetoj bꞌey wan aldea cawil-laj tiꞌ,

catuꞌ chi smanon low sbꞌa ebꞌ tituꞌ,

yutol cꞌam sloꞌbꞌe ebꞌ,

ẍi ebꞌ tet Jesús.

37 —Akꞌwej low ebꞌ jaex tiꞌ,

ẍi Jesús tet ebꞌ scuywom tuꞌ.

Catuꞌ jix yalon ebꞌ tet:

—¿Chi too cu man junoj caabꞌ mil quetzal,

chi yal tuꞌ,

catuꞌ chi kakꞌon low ebꞌ?

ẍi ebꞌ.^a

38 —¿Jayebꞌ ixim pan iꞌbꞌil oc je yu?

Seywej ilaꞌ,

ẍi Naj tet ebꞌ.

Jix yilon ebꞌ,

catuꞌ jix yalon ebꞌ tet Naj:

Asan joebꞌ ixim ketbꞌi,

yetoj cacꞌon noꞌ pescado,

ẍi ebꞌ tet Naj.

39 Catuꞌ jix yalon Jesús tol chi ey chotan ebꞌ ánima masanil yin bꞌulquiltaj chi yun yey ebꞌ bꞌey jun acꞌal tuꞌ.

40 Jix ey chotan ebꞌ tuꞌ,

ey junjun bꞌulan yin cincuentataj,

ey ebꞌ yin cien.

41 Catuꞌ jix yiꞌon a ixim joebꞌ pan tuꞌ yetoj cacꞌon noꞌ pescado tuꞌ Jesús.

Jix a tꞌanan satcan,

catuꞌ jix yalon yu diosalil yu.

Jix cꞌoli xꞌiontoj ixim,

catuꞌ jix yakꞌon tet ebꞌ scuywom yetoj cacꞌon noꞌ pescado,

catuꞌ jix spoꞌon ecꞌ ebꞌ xol ánima.

42 Masanil ánima watxꞌ jix yun slow ebꞌ sicꞌlebꞌil.

43 Jaꞌ yet jix lawi slow ebꞌ tuꞌ,

lacawebꞌ to xuc jix no yu sobra ixim,

cꞌal sobra noꞌ pescado jix yambꞌale a yu ebꞌ.

44 Jaꞌ ebꞌ winaj jix low tuꞌ,

joebꞌ mil ebꞌ.

45 Jix lawi jun tuꞌ xin,

jix yalon Jesús tet ebꞌ scuywom tol chi oc ebꞌ yul barco,

catuꞌ chi bꞌabꞌi kꞌaxbꞌo ecꞌ ebꞌ sattaj Naj,

chi ecꞌ apnoj ebꞌ bꞌey conobꞌ Betsaida.

Jal Jesús xin,

jix toocan yu yalon toj sbꞌa tet ebꞌ ánima.

46 Jix lawi yalon toj sbꞌa tet ebꞌ xin,

jix too bꞌey jun wonan txaloj.

47 Eyxa ecꞌ teꞌ barco tuꞌ snan jaꞌ yetoj ebꞌ scuywom yet jix kꞌejbꞌi.

Jal Jesús tuꞌ xin,

eyto can ecꞌ sat txꞌotxꞌ xꞌojli.

48 Catuꞌ jix yilontoj,

caw chi el yip ebꞌ smakꞌon jaꞌ,

yutol jow sjul kaꞌeꞌ sattaj ebꞌ.

Jaꞌ yet tuxa chi sajbꞌi,

jix bꞌeytoj Jesús yetoj yajan yibꞌan jaꞌ.

Chi yoche chi bꞌabꞌi sattaj ebꞌ.

49 Jaꞌ yet jix yilontoj ebꞌ tol chi bꞌey Naj yibꞌan jaꞌ,

jix snaꞌ ebꞌ tol labꞌ jun chi jul scꞌatan ebꞌ tuꞌ,

yuxan caw jix el yaw ebꞌ.

50 Jix xiwa ebꞌ masanil,

yutol masanil ebꞌ jix iloni.

Catuꞌ jix yalon Naj tet ebꞌ jaxca tiꞌ:

—Manche jex oc il.

Jain Jesús jin an.

Manche jex xiwi,

ẍi Naj tet ebꞌ.

51 Jix lawi tuꞌ,

jix atoj yetoj ebꞌ yul barco tuꞌ,

catuꞌ jix oc tucan jun kaꞌeꞌ tuꞌ.

Tuxa cꞌal jix qꞌueycan a scꞌul ebꞌ yu masanil.

52 Caxcꞌal xax yil smilagro Jesús ebꞌ yin ixim joebꞌ pan,

cꞌam tocꞌal chi naꞌcha el yopiso yu ebꞌ,

yutol cꞌamto chi jajcha snaꞌbꞌal ebꞌ.

53 Jix kꞌaxbꞌo ecꞌ ebꞌ xin,

jix ecꞌ apnoj ebꞌ bꞌey conobꞌ Genesaret.

Jix cancan sbarco ebꞌ bꞌey stiꞌ jaꞌ.

54 Jix cꞌal eltej ebꞌ yul barco tuꞌ,

jix yilon oc ebꞌ ánima tol jaꞌ Jesús jix juli.

55 Yuxan jix too ebꞌ sbꞌatxtej masanil ebꞌ yaꞌey bꞌey jun lugar tuꞌ,

jix iꞌletej ebꞌ scꞌatan Jesús.

56 Yal cꞌal bꞌey jix ecꞌ Naj,

yul-laj aldea ma yul-laj conobꞌ,

ma bꞌey caan ánima naatlaj eloj,

jix iꞌle eltej ebꞌ yaꞌey yul-laj calle.

Jix skꞌanon ebꞌ smitxꞌ niꞌoj stiꞌ spichil Naj.

Masanil ebꞌ jix mitxꞌon stiꞌ spichil Naj tuꞌ,

jix waꞌxi cꞌal can scꞌul ebꞌ.