2 Lalan yeltej Jesús yul barco,

catuꞌ jix apni jun winaj scꞌatan,

speto bꞌey mujan ebꞌ camom.

Jaꞌ jun winaj tuꞌ,

eyoc pena espíritu yin.

3 Asan bꞌey mujan ebꞌ camnaj caan naj.

Cꞌam mac chi tzaji spixon ey naj yetoj cadena.

4 Txꞌial el xacꞌal jix kꞌal-le ey naj yetoj cadena,

chi oc yin skꞌabꞌ cꞌal yin yajan.

Caw kocꞌ xacꞌal chi yuntoj chꞌen stujontoj.

Cꞌam junoj chi tzaji tet.

5 Tobꞌalkꞌinal,

cꞌualil cꞌal akꞌbꞌalil chi ecꞌabꞌ bꞌey wonanlaj cꞌal bꞌey mujan ebꞌ camom.

Chi el yaw.

Chi smakꞌon yasoj sbꞌa yetoj chꞌen.

6 Jaꞌ yet jix yilontej yin Jesús naat to ey naj,

jix yakꞌon yip naj stit scꞌatan.

Jix ey kaan naj sattaj Jesús yet jix apni.

7-8 Jix yalon Jesús tuꞌ tet jaxca tiꞌ:

—Jaach pena espíritu,

elan yin naj tiꞌ,

ẍi Jesús tet.

Catuꞌ jix a yaw yin ipal.

Jix yalon jaxca tiꞌ:

—¿Tzet ja walon ja wet win,

jaach Jesús?

Jaach tiꞌ Scꞌaal jaach Dios,

Naj yel xacꞌal miman yeloc apnoj.

Yuwal dios ey jaach jin kꞌan an,

manche jin ja wetne,

ẍi jun pena espíritu tuꞌ tet Jesús.

9 Catuꞌ jix skꞌanlen el Jesús tet naj tuꞌ:

—¿Tzet ja bꞌi?

ẍi Jesús tet naj.

—Legión cu bꞌi,

yutol caw ecꞌal jon,

ẍi wan pena espíritu tuꞌ yin naj.^a

10 Caw jix oc tean yin Jesús,

yet watxꞌ cꞌam chi chejle el ebꞌ pena espíritu bꞌey jun lugar caw naat tuꞌ yu naj.

11 Jaꞌ scawilal tuꞌ ey jun wonan.

Ey wan noꞌ txitam lalan slowi.

12 Jix oc tean ebꞌ pena espíritu tuꞌ yin Jesús.

Jix yalon ebꞌ:

—Chej jon cantoj xol noꞌ txitam tuꞌ,

yet watxꞌ jaxa yin noꞌ chi cu oc canoj,

ẍi ebꞌ tet Naj.

13 Catuꞌ jix chaꞌletoj ebꞌ yu Jesús tuꞌ yin noꞌ.

Catuꞌ jix el ebꞌ yin naj tuꞌ,

jaꞌ yin noꞌ txitam tuꞌ jix toocan ebꞌ.

Ey mi caabꞌoj mil noꞌ txitam tuꞌ.

Jix skꞌojon el sbꞌa noꞌ sat pacꞌan bꞌey chi low noꞌ tuꞌ.

Jix ey apnoj noꞌ xol jaꞌ mar.

Pilan jix jiꞌwi noꞌ tituꞌ.

14 Jaꞌ ebꞌ naj ilom txitam,

caw jix xiwa ebꞌ naj sicꞌlebꞌil.

Jix el jininoj ebꞌ.

Jix ecꞌ yalon can el ebꞌ yul conobꞌ,

cꞌal bꞌey naatlaj eloj,

yuxan ecꞌal ánima jix bꞌet ilon tzet jix yun tuꞌ.

15 Jix apni ebꞌ ánima bꞌey eyecꞌ Jesús tuꞌ xin,

jix yilon oc ebꞌ yin naj bꞌey jix el ebꞌ pena espíritu tuꞌ,

chotan ecꞌ naj tituꞌ.

Eyxa oc spichil naj,

watxꞌ xa scꞌul naj.

Yu jun tuꞌ,

caw jix xiwa ebꞌ ánima tuꞌ.

16 Jaꞌ ebꞌ jix ilon wan tzetyetal jix el yunen Jesús tuꞌ,

jaꞌ ebꞌ jix alon yabꞌ wanxa ebꞌ ánima tuꞌ.

Jix yal ebꞌ masanil tzet jix yun yin naj bꞌey jix el ebꞌ pena espíritu tuꞌ,

cꞌal tzet jix yuntoj noꞌ txitam tuꞌ.

17 Yu cꞌal tuꞌ,

jix oc tean ebꞌ ánima yin Jesús,

tol chi el Jesús yul xꞌotxꞌal ebꞌ tuꞌ.

18 Jaꞌ yet jix octoj Jesús yul barco,

jaꞌ naj bꞌey jix el ebꞌ pena espíritu tuꞌ,

jix oc tean tet Naj,

tol chi too naj yetoj.

19 Ma pax chaꞌletoj naj yu Jesús yetoj,

jix yalon tet naj jaxca tiꞌ:

—Paxan bꞌey ja na,

catuꞌ cha walon tet ja mam cꞌal tet ebꞌ ja wican jaxca tiꞌ:

“Tumi jantajxa tzet jix el yunen Dios win an,

jix okꞌ scꞌul Naj win an,”

ja chi,

ẍi Jesús tet naj.

20 Jix too naj tuꞌ,

jix ecꞌ yalon el naj bꞌey wan conobꞌ yul yet Decápolis.^b

Jix yalel naj jantaj tzet jix el yunen Jesús yin naj,

yuxan tuxa cꞌal jix qꞌueya scꞌul ánima masanil.

21 Jix lawi jun tuꞌ xin,

catuꞌ jix pax ecꞌ Jesús bꞌey junxa skꞌaxepal jaꞌ mar bꞌey speto taꞌa.

Jaꞌ yet jix ecꞌ apnoj tituꞌ,

ecꞌal ánima jix syambꞌa pax sbꞌa junelxa.

22 Jix apni jun yaawil snail sculto ebꞌ Israel chi yij Jairo.

Jix cꞌal yil yin Jesús,

jix sbꞌejon ey kaan sbꞌa sattaj.

23 Jix cꞌoli yoc tean yin Jesús,

jix yalon tet jaxca tiꞌ:

—Caw tuxa chi cam jun jin cutzꞌin an.

Toon wetoj an,

catuꞌ chi too ja bꞌatxbꞌan oc ja kꞌabꞌ yibꞌan ix,

yet watxꞌ chi waꞌxi can scꞌul ix catuꞌ cꞌam chi cam ix,

ẍi naj tet Jesús.

24 Catuꞌ jix too Jesús yetoj naj.

Ecꞌal ánima jix too yintaj,

tuxa cꞌal chi witzꞌle xacꞌal oc sbꞌa ebꞌ yin.

25 Jaꞌ xol ánima tuꞌ,

ey jun ix ix caw yaꞌey sicꞌlebꞌil,

lacawebꞌxa abꞌil cꞌal cꞌoli yey stzꞌilal ix.

26 Ecꞌal ebꞌ anwam bꞌey jix bꞌet yetne sbꞌa ix.

Pilan jix lawi can el tzetyetal ey tet ix.

Cꞌam cꞌal niꞌoj jix waꞌxi scꞌul ix yu ebꞌ,

jaꞌ tiꞌ yet,

tol chi cꞌal a can.

27 Yuxan jaꞌ yet jix yabꞌen ix tol eyecꞌ Jesús.

Jix sjitzontoj sbꞌa ix yintaj Naj xol ánima tuꞌ.

Jix mitxꞌle stiꞌ spichil Naj yu ix.

28 Yutol jix snaꞌ ix:

“Asanne cꞌal jin mitxꞌon niꞌoj stiꞌ spichil Naj,

oj waꞌxoj can jin cꞌul,”

ẍi ix.

29 Jaꞌ yet jun txolan tuꞌ jix oc tucan yey stzꞌilal ix.

Jix yabꞌ swaꞌxi can syaꞌilal ix tuꞌ.

30 Jix yotajnen el Jesús tol ey mac jix waꞌxi can yu yipal Naj.

Yuxan jix meltzotoj tꞌanan yintaj yilon xol ánima tuꞌ,

jix skꞌanlen tet ebꞌ jaxca tiꞌ:

—¿Mactxequel jun jix mitxꞌon jin pichil tiꞌ?

ẍi Naj tet ebꞌ.

31 Catuꞌ jix yalon ebꞌ scuywom tuꞌ tet Naj jaxca tiꞌ:

—Tol cha wilaꞌ chi switzꞌoc sbꞌa ánima ja win,

catuꞌ chi to wal ja kꞌanlen pax oj mac jix mitxꞌon ja pichil,

ẍi ebꞌ tet Naj.

32 Jal Jesús xin,

jix ecꞌ cꞌal tꞌananoj xol ebꞌ seyoni,

mac jun jix mitxꞌon spichil tuꞌ.

33 Jal ix ix tuꞌ xin,

caw chi bꞌilwi a ix yu xiwcꞌulal.

Yotaj ix,

tol jix waꞌxi can scꞌul ix yu,

yuxan jix too ix scꞌatan Jesús,

jix ey kaan ix sattaj.

Jix yalon ix masanil tet Naj.

34 Catuꞌ jix yalon Naj tet ix jaxca tiꞌ:

Txo ix,

jix waꞌxi can ja cꞌul yutol jix ja waoc ja cꞌul win an.

Paxan yin tzalacꞌulal.

Tol jix waꞌxi ja cꞌul yin jun ja yaꞌilal tiꞌ,

ẍi Jesús tet ix.

35 Lalanto yalon Jesús,

catuꞌ jix apni wan ebꞌ jix bꞌet bꞌey sna naj yaawil snail sculto ebꞌ Israel tuꞌ.

Jix yalon ebꞌ tet naj:

—Jaꞌ ix ja cutzꞌin maꞌial jix cam ix.

Naꞌbꞌa xacꞌal mi chi too yetne sbꞌa Naj Cuywam tiꞌ too yiloni,

ẍi ebꞌ tet naj.

36 Jaxa yet jix yabꞌen Jesús tzet jix yal ebꞌ tuꞌ,

jix yalon tet naj yaawil snail sculto tuꞌ jaxca tiꞌ:

—Manche jaach oc il.

Asan tol cha waoc Dios yin ja cꞌul,

ẍi Jesús tet naj.

37 Jix lawi tuꞌ,

cꞌam mac jix ẍaꞌtoj yintaj.

Asan Pedro yetoj Jacobo,

yetoj Juan yuẍtaj Jacobo tuꞌ,

asanne ebꞌ jix ẍaꞌtoj yetoj.

38 Jix apni bꞌey sna naj yaaw tuꞌ xin,

catuꞌ jix yiloni caw chi okꞌ ebꞌ ánima.

Caw chi wekꞌekꞌi yel yaw ebꞌ.

39 Catuꞌ jix octoj yul na tuꞌ,

jix yalon tet ebꞌ jaxca tiꞌ:

—¿Tzet yuxan caw chex okꞌi?

Jaꞌ ix unin tiꞌ,

man camnaj oj ix,

tucꞌal chi wey ix,

ẍi Naj tet ebꞌ.

40 Caw tucꞌal jix tzeele Naj yu ebꞌ.

Catuꞌ jix ujtele eltej ebꞌ stiꞌ na yu,

catuꞌ jix yiꞌon octoj smam cꞌal xutx ix unin tuꞌ.

41 Jix oc mitxꞌan yin skꞌabꞌ ix,

catuꞌ jix yalon tet ix jaxca tiꞌ:

—Talita cumi,

ẍi.

Chi yal yeloc apnoj:

“Jaach unin,

jain chi wal ey jaach an,

aan waanoj.”^c

42 Jix a xacꞌal waan ix yet jun txolan tuꞌ,

catuꞌ jix ecꞌabꞌ ix.

Lacawebꞌ abꞌil xa skꞌinal ix.

Jaꞌ jantaj ebꞌ eyecꞌ tituꞌ,

caw jix qꞌueya scꞌul ebꞌ.

43 Jix cam scꞌul Jesús yalon tet ebꞌ,

tol manche yalel jun tiꞌ ebꞌ.

Catuꞌ jix chejle akꞌle low ix unin tuꞌ.