3 —Abꞌwej wan oj wal tiꞌ.

Ey jun naj jix too txio tiriw.

4 Ey janicꞌ ixim jix apni can txilabꞌoj yul-laj bꞌe.

Jix ecꞌ sicꞌle a ixim yu noꞌ tzꞌiquin.

5 Ey ixim jix eyqꞌuey yibꞌan wan chꞌen,

bꞌey xaxo xꞌotxꞌal.

Jun txolan jix aoloj,

yutol xaxo xꞌotxꞌal.

6 Jaxa yet jix cꞌal aol cꞌu,

jix tajel ixim,

yutol man mimanoj xeꞌ ixim eytoj yul txꞌotxꞌ.

7 Ey pax ixim,

jix eyqꞌuey xol qꞌuix,

jix chꞌibꞌa teꞌ qꞌuix tuꞌ.

Catuꞌ jix mujle el yu teꞌ.

Yuxan ma can sjolom ixim.

8 Jal pax ixim jix eyqꞌuey bꞌey yaax sat txꞌotxꞌ,

jix chꞌibꞌa ixim,

jix can sjolom ixim.

Ey ixim jolome treinta sbꞌakꞌ jix yakꞌa,

ey ixim sesenta,

ey ixim xin,

cien jix yakꞌa.

9 Jaꞌ wan che yabꞌ tiꞌ,

naꞌoꞌtanewej sicꞌlebꞌil,

ẍi Jesús tet ebꞌ.

10 Jaꞌ yet manxa eyoj ecꞌ ebꞌ ánima tuꞌ scꞌatan Jesús,

jix skꞌanlen el ebꞌ scuywom slacawanil tet Naj,

cꞌal ebꞌ eyecꞌ scawilal:

—¿Tzet wal chi yal yeloc apnoj jun kꞌane jix ja wal tiꞌ?

ẍi ebꞌ tet Naj.

11 Catuꞌ jix yalon Naj tet ebꞌ:

—Asan ey jex chi xꞌox Dios wan tzetyetal tol cꞌamto mac otajneni,

yet watxꞌ chi naꞌcha el je yu tzet chi yun yoc Dios je Yaawiloj.

Jal pax tet ebꞌ comon ánima,

asan wan kꞌane txꞌoxom el cuybꞌanile chi wal tet,

12 yet watxꞌ cꞌam chi naꞌcha el yu ebꞌ.

Caxcꞌal chi yil junoj tzetyetal ebꞌ,

quey cꞌal tuꞌ chi yun scan ebꞌ,

jaxca tol cꞌam tzet chi yil ebꞌ.

Yetoj pax oj,

caxcꞌal chi yabꞌ ebꞌ,

cꞌam cꞌal niꞌoj chi naꞌcha el yu ebꞌ.

Yuxan,

cꞌam niꞌoj chi qꞌuexcha snaꞌbꞌal ebꞌ,

yuxan cꞌam pax chi akꞌle mimancꞌulal yin spenail ebꞌ yu Dios.^a

13 Ta cꞌam chi naꞌcha el je yu tzet chi yal yeloc apnoj jun skꞌaneal yet txꞌoxbꞌanile jix wal tiꞌ an,

¿tzet oj yun snaꞌcha el je yu wanxa kꞌane masanil?

14 Jaꞌ naj txiom tiriw tuꞌ,

yechel ebꞌ chi alon el skꞌane Dios.

15 Jaꞌ ixim jinat jix eyqꞌuey stiꞌ bꞌe,

yechel ebꞌ ánima chi cꞌal xew yabꞌen skꞌane Dios,

catuꞌ chi jul naj Satanás,

chi yakꞌon qꞌueytoj yul scꞌul ebꞌ.

16 Jaꞌ ixim jix eyqꞌuey yibꞌan chꞌen,

yechel ebꞌ ánima eyman chi ẍaꞌ yabꞌ skꞌane Dios yin tzalacꞌulal.

17 Man pax tecꞌan oj yeoc ebꞌ,

jaxca junoj teꞌ teꞌ man mimanoj xeꞌ eytoj yul txꞌotxꞌ.

Yuxan jaxa yet chi jul jun syaꞌilal,

ma yet chi cajle a ebꞌ yu cꞌal skꞌane Dios,

jun txolan catuꞌ chi somcha el scꞌul ebꞌ.

18 Jaꞌ ixim jix eyqꞌuey xol qꞌuix,

yechel pax junxa bꞌulan ebꞌ chi abꞌen skꞌane Dios.

19 Tol asanne tzetyetal ey yul yibꞌankꞌinal tiꞌ chi yoche ebꞌ.

Chi etex el snaꞌbꞌal ebꞌ yu chi yoche ebꞌ chi oc bꞌeomal.

Asan yin tzetyetal chi yoche oc ebꞌ,

caw chi yaoc snaꞌbꞌal ebꞌ yin.

Yu jun tuꞌ,

yuxan tucꞌal chi yetne el sbꞌa skꞌane Dios yin ebꞌ.

Laan ebꞌ jaxca ixim tiriw cꞌam swatxꞌil sjolom chi yakꞌa.

20 Jal ixim jix eyqꞌuey bꞌey yaax txꞌotxꞌ tuꞌ xin,

yechel pax ebꞌ chi abꞌen skꞌane Dios,

catuꞌ chi yaon oc yin scꞌul.

Jaꞌton ebꞌ tuꞌ laan jaxca ixim treinta sbꞌakꞌ chi yakꞌa.

Ey pax ebꞌ laan jaxca ixim sesenta sbꞌakꞌ chi yakꞌa,

cꞌal yin cien chi yakꞌa,

ẍi Jesús.

21 Jix yal pax tej Jesús jaxca tiꞌ:

—Jaꞌ yet chi kaon oc cu tzejtebꞌal,

toj wal chi kaoctoj yalan junoj caanteꞌ.

Cꞌam pax chi kaoc yalan junoj txꞌat.

Jaꞌ yibꞌan junoj tzetyetal naat bꞌatxan aoj,

jatuꞌ chi kaatoj,

yet watxꞌ chi tzejtanele masanil yul na tuꞌ.

22 Jantaj tzet ewan cꞌuan ye tinaniꞌ,

oj txeclo cꞌaltaꞌ aoj yetoj jantaj tzet cꞌubꞌabꞌil el tinaniꞌ,

oj akꞌle otajnele eloj.

23 Naꞌoꞌtanewej wan che yabꞌ tiꞌ sicꞌlebꞌil.

24 Akꞌwej je txiquin yin tzet che yabꞌe,

yutol jaxca che yute je yakꞌon je txiquin tuꞌ,

jaxca tuꞌ oj yute yakꞌon Dios naꞌcha el je yu.

Catuꞌ yel xacꞌal oj yakꞌ naꞌcha el je yu.

25 Yutol jaꞌ mac chi yoche chi naꞌcha el yu,

yel xacꞌal oj akꞌle naꞌcha el yu ebꞌ.

Jal ebꞌ cꞌam chi yoche chi naꞌcha el yu xin,

jaꞌ niꞌoj tzet ian chi naꞌcha el yu ebꞌ,

oj iꞌle ecꞌ tet ebꞌ,

ẍi Jesús.

26 Jix yal pax tej Jesús jaxca tiꞌ tet ebꞌ:

—Oj waltej ey jex tzet oj yun yeloc ebꞌ chi oc Dios Yaawiloj.

Kꞌinaloj junoj winaj chi txion jinat sat xꞌotxꞌ.

27 Chi lawi tuꞌ chi wey jun akꞌbꞌal,

catuꞌ chi a waan junjun skꞌinibꞌalil.

Yajbꞌan chi ecꞌ tiempo,

chi aol yawo naj tuꞌ,

catuꞌ chi chꞌibꞌi.

Man pax yotaj oj naj tzet chi yun ẍꞌibꞌi,

28 yutol asan yu syaaxil txꞌotxꞌ chi chꞌibꞌi.

Yin sbꞌabꞌelal,

xaj jix tocꞌal.

Catuꞌ chi can sjolom,

catuꞌ chi yakꞌon sat.

29 Jaꞌ yet chi tajeloj,

chi cꞌuple aoj,

yutol chi aapnoj stiempoal.

30 ¿Tzet chi yun ya can sbꞌisil ebꞌ ánima chi oc Dios Yaawiloj,

che naꞌ?

Oj waltej jun kꞌane je yabꞌe,

tzet chi yun ẍꞌibꞌ sbꞌisil ebꞌ.

31 Laan ebꞌ jaxca junoj sbꞌakꞌ mostaza chi awle bꞌey junoj txꞌotxꞌ.

Jaꞌ jun jinat tuꞌ,

caw yaliẍ chꞌan an yintaj masanil wanojxa jinat bꞌey yul yibꞌankꞌinal tiꞌ.

32 Tol asanne yawchai,

chi chꞌibꞌi,

yel miman chi yun yintaj masanil wanxa ita.

Mimej chi yun skꞌabꞌlaj,

yuxan masantaꞌ noꞌ tzꞌiquin chi oc ewan noꞌ yalan yenel,

ẍi Jesús tet ebꞌ.

33 Jaꞌ yet jix yalon el skꞌane Dios Jesús tet ebꞌ ánima,

ecꞌal wan skꞌaneal jaxca wan tiꞌ jix yaltej.

Asan wan chi naꞌcha el yu ebꞌ jix yaltej.

34 Asan cꞌal wan kꞌane tiꞌ jix yakꞌbꞌalne,

yet jix kꞌanabꞌ xol ebꞌ.

Jal tet ebꞌ scuywom xin,

chi swa alne eloj.

35 Jaꞌ yet jun cꞌual tuꞌ,

yet yeycꞌualil,

jix yalon Jesús tet ebꞌ scuywom jaxca tiꞌ:

—Toonwej bꞌey junxa skꞌaxepal jaꞌ,

ẍi Naj.

36 Yu jun tuꞌ xin,

jix bꞌejcan ebꞌ ánima eyecꞌ stiꞌ jaꞌ tuꞌ.

Catuꞌ jix octoj ebꞌ yul teꞌ barco bꞌey eyoc Jesús tuꞌ,

catuꞌ jix too ebꞌ.

Ey wanxa barco jix too pax yetoj ebꞌ.

37 Ey pax jun miman kaꞌeꞌ caw jow jix apni yibꞌan jaꞌ.

Tol tax jix octoj jaꞌ yul teꞌ yu jun kaꞌeꞌ tuꞌ.

Ian jix noel teꞌ yu jaꞌ.

38 Jal Jesús xin,

tol chi wey Naj ẍopeltoj teꞌ barco tuꞌ,

eyoc skꞌan.

Catuꞌ jix stenle el sweyan Naj yu ebꞌ tuꞌ:

—Jaach cuywam,

¿tumi cꞌam chach oc il niꞌoj?

Ilaꞌ lalan cu lawi eloj,

ẍi ebꞌ tet Naj.

39 Catuꞌ jix a waan Jesús tuꞌ,

jix stenon oc tucan jun kaꞌeꞌ tuꞌ.

Jix yalon pax tet jaꞌ mar:

—¡Ocan tucanoj!

¡Tzꞌin cꞌal ja chi!

ẍi Naj tet jaꞌ.

Jaxca tuꞌ xin,

jix oc tucan jun kaꞌeꞌ tuꞌ,

jix numi ey masanil.

40 Catuꞌ jix yalon tet ebꞌ scuywom:

—¿Tzet yuxan caw chex xiwi?

¿Tzet yuxan cꞌam che yaoc je cꞌul win an?

ẍi Naj tet ebꞌ.

41 Tucꞌal jix qꞌueya scꞌul ebꞌ yu sicꞌlebꞌil.

Catuꞌ jix yalon ebꞌ:

—¿Tzet la ye jun winaj tiꞌ?

Ilaꞌ chi sjije kaꞌeꞌ cꞌal jaꞌ mar tzet chi yalaꞌ,

ẍi ebꞌ.