Jix Waꞌxi Can Naj Sicbꞌinaj El Skꞌabꞌ
3
Jaꞌ yet junelxa,
jix oc Jesús yul jun snail sculto ebꞌ Israel.
Ey jun naj sicbꞌinaj el jun skꞌabꞌ eyecꞌ tituꞌ.
2 Ey ebꞌ jix smaj yilaꞌ,
ta chi waꞌxi can skꞌabꞌ naj sicbꞌinaj el skꞌabꞌ tuꞌ yu Jesús yet scꞌual xewilal tuꞌ,
catuꞌ chi bꞌuchwa ebꞌ.
3 Catuꞌ jix yalon Jesús tet naj sicbꞌinaj el skꞌabꞌ tuꞌ jaxca tiꞌ:
—¿Bꞌeytet junoj ey sleyal kunen yet scꞌual xewilal che naꞌ?
¿Jam tzet watxꞌ chi skeꞌ el kuneni,
ma jaꞌ tzet pena?
¿Chim skeꞌ kakꞌon can waꞌxoj scꞌul junoj yaꞌey,
ma jaꞌ cu bꞌejon camoj chi skeꞌ?
ẍi Naj tet ebꞌ.
Tzꞌin xacꞌal ẍi ebꞌ.
5 Catuꞌ jix ecꞌ tꞌananoj Naj xol ebꞌ tuꞌ,
jix tit sjowal Naj.
Jix cus scꞌul yutol caw snaꞌbꞌal ebꞌ.
Catuꞌ jix yalon tet naj tuꞌ:
—Bꞌieltoj ja kꞌabꞌ,
ẍi Jesús tet naj.
Jix sbꞌion eltoj skꞌabꞌ naj.
Catuꞌ jix waꞌxi canoj.
6 Catuꞌ jix eltej ebꞌ Fariseo tuꞌ stiꞌ na,
jix slatiꞌne el sbꞌa ebꞌ yetoj ebꞌ spartido naj Herodes,
yu tzet chi yute yakꞌon cam Jesús ebꞌ.
Jun Bꞌulan Ánima Jix Bꞌetecꞌ Stiꞌ Jaꞌ Mar
7 Jal pax Naj Jesús xin,
jix too stiꞌ jaꞌ mar Galilea yetoj ebꞌ scuywom.
Caw ecꞌal ánima a Galilea jix too yetoj ebꞌ.
8 Yutol jix yabꞌ skꞌumal ebꞌ tol caw ey milagro* jix yun Jesús,
yuxan ecꞌal ebꞌ jix apni scꞌatan.
Ey ebꞌ a Judea,
cꞌal ebꞌ a Jerusalén,
yetoj ebꞌ a Idumea cꞌal ebꞌ a skꞌaxepal ecꞌtoj jaꞌ Jordán.
Ey ebꞌ jix tit scawilal conobꞌ Tiro cꞌal conobꞌ Sidón.
9 Yu jun tuꞌ,
yuxan jix yal Jesús tet ebꞌ scuywom,
tol listo cꞌal ye junoj barco yu ebꞌ,
yet watxꞌ cꞌam chi switzꞌoc sbꞌa ánima yin Naj,
yutol ecꞌal ebꞌ.
10 Yutol ecꞌal ebꞌ jix waꞌxi scꞌul yu Naj.
Yuxan ecꞌal tocꞌal ebꞌ yaꞌey jix bꞌet yiꞌey sbꞌa tet.
11 Jal ebꞌ pena espíritu xin,
jaꞌ yet jix yilon ebꞌ yin Naj,
jix ey kaan ebꞌ sattaj,
catuꞌ chi yalon ebꞌ yin ipal jaxca tiꞌ:
—Jaach tiꞌ,
Scꞌaal jaach Dios,
ẍi ebꞌ.
12 Jix yakꞌ sowalil Jesús tet ebꞌ,
yet watxꞌ manche yal ebꞌ mactxequel Jesús tuꞌ.
Jaꞌ Yet Jix Sicꞌ El Lacawan Scuywom Jesús
13 Catuꞌ jix too Jesús bꞌey jun wonan.
Jix yawten ebꞌ jix ẍaꞌ scꞌul yawteni,
catuꞌ jix apni ebꞌ tituꞌ.
14 Lacawan ebꞌ jix yaoc yopiso,
yet watxꞌ chi ecꞌ ebꞌ yetoj,
cꞌal yu ẍejontoj ebꞌ,
too yalon el skꞌaneal yet colbꞌanile ebꞌ.
15 Jix yakꞌon yopiso ebꞌ yakꞌon waꞌxoj scꞌul ebꞌ yaꞌey,
cꞌal yiꞌon can el pena espíritu ebꞌ yin ánima.
16 Jaꞌ sbꞌi ebꞌ tiꞌ slacawanil:
Simón,
naj jix yij Pedro yu Jesús.
17 Yetoj Jacobo,
cꞌal jun yuẍtaj chi yij Juan.
Jaꞌ cawan ebꞌ tiꞌ,
scꞌaal Zebedeo ebꞌ.
Jix yij can a ebꞌ Boanerges yu Jesús.
Jaꞌ jun bꞌie tuꞌ,
chi yal yeloc apnoj,
ebꞌ cꞌuun stit sjowal.a
18 Ey wanxa jaꞌton:
Andrés,
Felipe,
Bartolomé,
Mateo,
Tomás,
Jacobo,
naj scꞌaal Alfeo,
cꞌal Tadeo,
Simón.
Jaꞌ junxa Simón tiꞌ,
eyoc yin spartido ebꞌ Cananeo yet yalantoj.b
19 Ey junxa xin,
jaꞌton Judas Iscariote.
Jaꞌton jun tiꞌ,
jix aon oc Jesús yul skꞌabꞌ camich.
Jix Yal Ebꞌ Tol Jaꞌ Diablo Eyoc Yin Jesús
Jix lawi jun tuꞌ,
catuꞌ jix too Jesús bꞌey jun na yetoj ebꞌ scuywom.
20 Ecꞌal ánima jix syambꞌa pax sbꞌa junelxa yin ebꞌ,
yuxan ma xa skeꞌ slow Naj yetoj ebꞌ scuywom tuꞌ.
21 Jaꞌ yet jix yabꞌen ebꞌ yuẍtaj Jesús cꞌal xutx Naj,
jix apni ebꞌ tituꞌ,
yet chi iꞌletoj Naj yu ebꞌ,
yutol jix tit sloco Naj,
yalon ebꞌ.
22 Ey wan ebꞌ cuywam yin sley Moisés jix tit bꞌey conobꞌ Jerusalén,
jix yalon jaxca tiꞌ:
—Jaꞌ Beelzebú yaawil ebꞌ pena espíritu eyoc yetoj Jesús tiꞌ.
Yu jun tuꞌ,
yuxan chi skeꞌ yiꞌon el pena espíritu tuꞌ Jesús,
ẍi ebꞌ.
23 Catuꞌ jix awteletej ebꞌ yu Jesús tuꞌ.
Catuꞌ jix yalontej wan kꞌane tet ebꞌ:
—Jaꞌ Satanás tuꞌ,
¿tumi oj yujte el ebꞌ pena espíritu tuꞌ?
24 Chi wal ey jex tzet yuxan man oj yun jaxca tuꞌ.
Kꞌinaloj chi yakꞌle a jowal ebꞌ ánima bꞌey junoj mimej conobꞌ.
Jaꞌ jun conobꞌ tuꞌ,
chi lawi eyoj.
25 Kꞌinaloj ta ey junoj nail ánima chi poꞌocha yu jowal.
Chi etex el jun nail ánima tuꞌ.
26 Quey pax ton tuꞌ Satanás xin.
Kꞌinaloj ta chi poꞌocha yetoj ebꞌ pena espíritu,
catuꞌ chi yakꞌlen jowal yetoj ebꞌ,
catuꞌ chi uchchatoj ebꞌ,
catuꞌ chi lawi ey yopiso.
27 Kꞌinaloj junoj winaj,
caw ey yip.
Cꞌam junoj mac comon cꞌal oj oc yul sna,
catuꞌ oj iꞌle eltoj stzettaj yetal.
Asan ta tol chi michꞌcha eyoj catuꞌ chi pixcha can ey naj sbꞌabꞌelal bꞌian,
Jam yet tuꞌ,
chi iꞌle eltoj stzettaj yetal naj tuꞌ.
28 Caw yel chi wal ey jex an,
yal cꞌal tzet spenail ánima chi oqui,
cꞌal jantaj spenail chi yun ebꞌ sattaj Dios,
oj akꞌle mimancꞌulal yu Dios.
29 Jal pax mac pena chi yal yin Santo Espíritu,
cꞌam mimancꞌulal yin.
Chi oc spenailoj yin junelne,
ẍi Jesús.
30 Queytuꞌ jix yute yalon jaxca tuꞌ,
yutol jix yal ebꞌ tol pena espíritu eyoc yin Naj.
Xutx Jesús Yetoj Ebꞌ Yuẍtaj
31 Jix apni xutx Jesús yetoj ebꞌ yuẍtaj.
Asan stiꞌ na jix oc linan ebꞌ.
Jix yakꞌon awtele eltej Jesús ebꞌ.
32 Catuꞌ jaꞌ ebꞌ chotan ey scawilal Jesús,
jix alon tet jaxca tiꞌ:
—Eyecꞌ ja txutx stiꞌ na yetoj ebꞌ ja wuẍtaj.
Jaach abꞌ chach seyle ecꞌ yu ebꞌ,
ẍi ebꞌ.
33 Catuꞌ jix yalon tet ebꞌ: