Jix Waꞌxi Can Naj Sicbꞌinaj El Smimanil
2
Jayebꞌ jix too cꞌu tuꞌ,
jix apni pax Jesús junelxa bꞌey conobꞌ Capernaúm.
Catuꞌ jix abꞌchai,
tol eyecꞌ bꞌey sna.
2 Yu jun tuꞌ,
yuxan ecꞌal ánima jix syambꞌa oc sbꞌa bꞌey jun na bꞌey eyecꞌ Naj.
Ma yabꞌ yul na tuꞌ,
yuxan ey ebꞌ jix cancan stiꞌ na.
Catuꞌ jix cꞌoli yalon skꞌane Dios,
Naj Jesús tet ebꞌ.
3 Ey jun winaj sicbꞌinaj el smimanil,
jix iꞌletej yu canwan winaj.
4 Caw ma pax skeꞌ yoctoj ebꞌ bꞌey eyecꞌ Jesús,
yutol caw ey ánima.
Yu jun tuꞌ,
yuxan jix atoj ebꞌ yibꞌan ẍumuc spananil na tuꞌ.a
Jix sjolon jun jolan ebꞌ yetcꞌulal bꞌey eyecꞌ Jesús.
Jix yaon eytoj tꞌununoj jun winaj tuꞌ ebꞌ yul sweyubꞌ.
Catuꞌ jix ey apnoj sat txꞌotxꞌ.
5 Jaꞌ yet jix yilon Jesús,
tol chi yaoc scꞌul ebꞌ yin,
jix yalon tet naj sicbꞌinaj el smimanil tuꞌ jaxca tiꞌ:
—Jaach wuẍtaj,
jix akꞌle mimancꞌulal yin ja penail,
ẍi Jesús tet naj.
6 Ey pax wan ebꞌ cuywam yin sley Moisés* chotan ecꞌ tituꞌ.
Jix snaꞌon ebꞌ jaxca tiꞌ:
7 “¿Tzet yuxan queytuꞌ chi yal jun winaj tiꞌ jaxca tiꞌ?
Bꞌuchwal kꞌane chi yun yin Dios.
Cꞌam junoj ánima chi skeꞌ yakꞌon mimancꞌulal yin cu penail,
asan Dios,”
ẍi ebꞌ.
8 Yotaj xa pax Jesús tzet chi snaꞌ ebꞌ,
yuxan jix yal tet ebꞌ:
—¿Tzet yuxan queytuꞌ che naꞌ jaxca tuꞌ?
9 ¿Bꞌeytet junoj yel subꞌo yal-le che naꞌ?
Ta jin chi jaxca tiꞌ:
“Tol jix akꞌle mimancꞌulal yin ja penail,”
ma jaꞌ,
“aan waanoj,
iꞌa ja weyubꞌ catuꞌ bꞌeyan”.
10 Jaꞌ tinaniꞌ xin,
oj jin txꞌox ey jex an,
tol Jain Akꞌbꞌil Wopiso xol ebꞌ ket animail yu Dios tiꞌ,
* chi cꞌal skeꞌ wu wakꞌon mimancꞌulal yin spenail ebꞌ ánima bꞌey yul yibꞌankꞌinal tiꞌ,
ẍi Jesús tet ebꞌ.
Catuꞌ jix yalon Naj tet naj sicbꞌinaj el smimanil tuꞌ:
11 —Jain chi wal ey jaach an,
aan waanoj.
Iꞌa ja weyubꞌ tiꞌ.
Paxan bꞌey ja na,
ẍi Jesús tet naj.
12 Jix a xacꞌal waan naj yet jun txolan tuꞌ.
Jix yiꞌon a sweyubꞌ naj.
Tꞌanan oc ebꞌ,
catuꞌ jix pax naj.
Tuxa cꞌal jix qꞌueycan a scꞌul ebꞌ masanil.
Jix yalon watxꞌ kꞌane ebꞌ tet Dios:
—Caw cꞌam bꞌey chi kil junoj tzetyetal jaxca tiꞌ,
ẍi xacꞌal ebꞌ.
Jix Awtele Naj Leví Yu Jesús Yu Yoc Scuywomoj
13 Jix lawi jun tuꞌ xin,
jix too Jesús stiꞌ jaꞌ mar Galilea junelxa.
Jix apni pax ebꞌ ánima masanil scꞌatan Naj.
Catuꞌ jix cuywa tet ebꞌ.
14 Jaꞌ yet lalan sbꞌeyi,
catuꞌ jix yilon yin jun naj chi ijon Leví,b
scꞌaal naj Alfeo.
Chotan ey bꞌey chi tejwi el toolabꞌal tet ebꞌ ánima:
—Ocan cꞌal tzajan cuywoj wintaj an,
ẍi Jesús tet naj.
Catuꞌ jix a waanoj,
jix too cꞌal tzajan naj cuywoj yintaj.
15 Jix lawi tuꞌ,
catuꞌ jix too Jesús bꞌey sna naj Leví tuꞌ.
Jix low yetoj ebꞌ scuywom tituꞌ,
ey pax wan ebꞌ tejom el toolabꞌal* jix low yetoj ebꞌ yin meẍa,
cꞌal wanxa ebꞌ pena pax sbꞌeybꞌal.
Yutol ecꞌal mac jix tzajlo yintaj.
16 Jaꞌ yet jix yilon ebꞌ cuywam yin sley Moisés* cꞌal ebꞌ Fariseo,
* tol lalan slow Naj yetoj ebꞌ pena sbꞌeybꞌal tuꞌ,
jix yalon ebꞌ tet ebꞌ scuywom Naj jaxca tiꞌ:
—¿Tzet yuxan chi low Jesús yetoj ebꞌ tejom el toolabꞌal cꞌal yetoj ebꞌ pena sbꞌeybꞌal tiꞌ?
ẍi ebꞌ.
17 Jaꞌ yet jix yabꞌen Jesús jaxca tuꞌ,
jix yalon tet ebꞌ:
—Kꞌinaloj ta eyecꞌ junoj anwam tinaniꞌ,
¿toj ey yopiso yu ebꞌ watxꞌ scꞌul?
Asan yu ebꞌ yaꞌey,
jaꞌ ebꞌ tuꞌ ey yopiso yu.
Quey jin pax tuꞌ,
man yu oj wawten ebꞌ watxꞌ sbꞌeybꞌal snaꞌoni,
yuxan jix jin jul an,
yu cꞌal wawten ebꞌ chi yotajnen el sbꞌa tol penawom ebꞌ,
ẍi Jesús.
Cꞌam Chi Ẍaꞌle Sbꞌa Icham Bꞌeybꞌale Yetoj Scuybꞌanil Jesús
18 Jaꞌ junel,
lalan yijle nocha sbꞌa ebꞌ scuywom naj Juan yetoj ebꞌ Fariseo,
* Yuxan ey wan mac jix apni scꞌatan Jesús catuꞌ jix skꞌanleni:
—Jaꞌ ebꞌ scuywom naj Juan cꞌal ebꞌ scuywom ebꞌ Fariseo,
chi yijle nocha sbꞌa ebꞌ.
* ¿Tzet yuxan cꞌam chi yun pax ebꞌ ja cuywom jaach tiꞌ?
ẍi ebꞌ tet.
19 Catuꞌ jix yalon Naj tet ebꞌ jaxca tiꞌ:
—Kꞌinaloj ey junoj nupil chi oc tinaniꞌ.
Jaꞌ ebꞌ awtebꞌil,
¿tumi oj skeꞌ man oj low ebꞌ yet eyto ecꞌ naj lalan snupi tuꞌ yetoj ebꞌ?
20 Jato yet oj aapnoj stiempoal yiꞌle el Naj xol ebꞌ,
jaꞌ yet tuꞌ oj yijle nocha sbꞌa ebꞌ.
21 Tol ey junxa cuybꞌanile chi txꞌoxon eloj tol cꞌam chi ẍaꞌle sbꞌa icham cuybꞌanile yetoj wan acꞌ jin cuybꞌanil.
Kꞌinaloj ey junoj an icham pichile chi jolcha tinaniꞌ.
Toj ey mactxequel chi aon oc an acꞌ nip man to txꞌabꞌiloj snipiloj an.
Yutol jaꞌ an acꞌ nip tuꞌ,
chi utzꞌ an,
catuꞌ chi mimanbꞌi snicꞌchanajil an icham tuꞌ.
22 Yetoj pax oj,
cꞌam junoj mactxequel chi aon ey vino tol to chi waꞌxi yul junoj icham tzꞌuum sneetal vino,c
yutol jaꞌ yet chi chꞌibꞌa jun vino tuꞌ,
chi nicꞌchatoj noꞌ neet tzꞌuum tuꞌ yu.
Catuꞌ tucꞌal chi etex el vino tuꞌ yetoj jun neet tzꞌuum tuꞌ.
Yu jun tuꞌ,
yuxan asan yul acꞌ tzꞌuum sneetal vino,
jatuꞌ chi ey vino tol to chi waꞌxi tuꞌ,
ẍi Jesús tet ebꞌ.
Jix Yaltej Jesús Yu Scꞌual Xewilal
23 Jaꞌ yet jun scꞌual xewilal,
jix ecꞌ Jesús yul jun bꞌe snan xol wan ixim tiriw yetoj ebꞌ scuywom.
Jix yiꞌon el jayebꞌ sjolom ixim ebꞌ scuywom tuꞌ,
yu scꞌuxon ebꞌ yet lalan sbꞌey ebꞌ tuꞌ.
24 Yu jun tuꞌ,
yuxan jix yal ebꞌ Fariseo tet Jesús jaxca tiꞌ:
—Ilaꞌla,
¿tzet yuxan chi yun ebꞌ ja cuywom tiꞌ tzet tol ey sleyal kunen yet scꞌual xewilal?
Man sleyal oj chi yute ebꞌ jaxca tuꞌ,
ẍi ebꞌ.
25 Jix yalon pax Jesús tet ebꞌ jaxca tiꞌ:
—¿Tumi cꞌamto bꞌey che yil yul An Juun Tzꞌibꞌebꞌilcanoj,
yu tzet jix yun naj rey David junel,
yet jix tit swail yetoj ebꞌ yaman yetoj?
26 Jix octoj yul snail Dios,
yet eyoc Abiatar yaawil yakꞌomal xaambꞌal ebꞌ tet Dios.
Jix sloꞌon eytoj ixim pan yet Dios yei,
tol asan ebꞌ yakꞌomal xaambꞌal tet Dios ey sleyal sloꞌoni,
jix yakꞌ pax tet ebꞌ yaman yetoj tuꞌ.d
Jaꞌ jun tzet jix yun tuꞌ,
man pena oj yul sat Dios.
27 Jaꞌ Dios jix alon canoj,
yuxan jix el yich scꞌual xewilal,
yet ánima yei.
Man pax yu oj sjijen scꞌual xewilal ebꞌ yuxan jix waꞌnele ebꞌ yu Dios.
28 Jain tiꞌ,
chi skeꞌ walon an,
tzet chi skeꞌ el kunen yet scꞌual xewilal,
yutol Akꞌbꞌil Wopiso xol ebꞌ ket animail tiꞌ yu Dios,
ẍi Naj tet ebꞌ.