3 Jaꞌ jun tzetyetal lalan ja wilon tiꞌ, eyto yaapnoj scꞌual yuneni; asan xin, sowalil oj yunne. Echbꞌane cꞌal, caxcꞌal oj ecꞌ niꞌoj tiempo, tol oj yun cꞌaltaꞌa.

4 Tzꞌibꞌe cꞌal pax canoj, tol jaꞌ ebꞌ penawom chi smeyne sbꞌa ebꞌ; jal pax ebꞌ yeynajil chi yute sbꞌa yul jin sat an xin, oj eecꞌ cꞌal ecꞌ ebꞌ yin tzalacꞌulal, yutol chin yaoc ebꞌ yipoj scꞌul, ẍi Dios.

6 Jal masanil wan nación chi eyqꞌuey tuꞌ, oj bꞌuchwa ebꞌ yin jun mac chi akꞌon eyqꞌuey ebꞌ tuꞌ, catuꞌ oj bꞌuchwa cꞌal ebꞌ jaxca tiꞌ: Okꞌbꞌal jaach chꞌan cꞌul jaach tiꞌ, tol chach oc bꞌeomal yu tzettaj yetal tol man ja wetoj. ¿Bꞌakꞌin oj ja bꞌej ja yambꞌa ecꞌ bꞌulan masanil tzetyetal cha chaꞌ yu smaanbꞌanil ja bꞌeomal tuꞌ? ẍim ebꞌ.

7 Jaꞌ yet man naꞌanoj el ja wu, catuꞌ oj apnoj oc ebꞌ ánima yu sjecon tzetyetal ey jaach, oj a waan ebꞌ jaach stoo yakꞌon xiwaoj, catuꞌ cꞌamxa niꞌoj tzetyetal oj yakꞌ can ebꞌ ey jaach.

8 Jix ja wiꞌ can ecꞌ jantaj tzettaj yetal ebꞌ ánima bꞌey wanojxa conobꞌ, yu jun tuꞌ, yuxan jaꞌ ebꞌ jix too cancanoj, oj yiꞌecꞌ ebꞌ ja tzetyetal. Queytuꞌ oj jaach utele yu ebꞌ, yutol ecꞌal mac jix ja makꞌ camoj, catuꞌ ma okꞌ ja cꞌul yin ebꞌ ja wet animail bꞌey yul yibꞌankꞌinal, yetoj cꞌal sconobꞌ ebꞌ.

9 Okꞌbꞌal jaach cꞌul jaach tiꞌ, yutol jix ja wakꞌ no yul ja na yu masanil elkꞌan, yet oj skeꞌ ja colon ja bꞌa tet tzetyetal ey smey ja waloni.

10 Jaxca tuꞌ jix yun ja wiꞌontej qꞌuixwilal ja wibꞌan yetoj ja conobꞌ. Jaach cꞌal oc jix ja loctej ja wibꞌan, yu jix ja wakꞌ lawoj ecꞌal conobꞌlaj.

11 Jaꞌ ebꞌ jix waꞌnen eytoj ẍꞌenal yichlaj ja na yetoj spatzabꞌil, oj a yaw ebꞌ yin smulnail jix swaꞌne ebꞌ tuꞌ.

12 Okꞌbꞌal jaach cꞌul jaach tiꞌ, tol jix ja wiꞌel yich ja waꞌnen jun conobꞌ yu masanil tzet jix ja wiꞌ yin spenail cha wunne, jix jaach a can yu ja makꞌom cam ja wet animail.

13 Jaꞌ masanil mulnail bꞌey jix cꞌuumbꞌi wan conobꞌ jix ja wakꞌ eyqꞌuey tuꞌ, naꞌbꞌacꞌal. Masanil tzet jix swaꞌne ebꞌ, kꞌakꞌ oj akꞌon lawoj eyoj. Queytuꞌ jix yun snaꞌon Jehová, jaꞌton Naj chi skeꞌ yu masanil.

14 Tzꞌajan oj yun yotajne el ebꞌ ánima jantaj yeoc yipalil Jehová, jaxca chi yun snoel jaꞌ mar yu jaꞌ jaꞌ.

15 Okꞌbꞌal cꞌul mac chi yakꞌ ucꞌwoj an tet yet animail yu yilon sqꞌuixwiltajil ebꞌ. Okꞌbꞌal jaach cꞌul, yutol jaꞌ yetoj sjowal ja cꞌul jix ja wiꞌxacꞌal el sqꞌuixwil wan conobꞌ ey ja cawilal; tuxa cꞌal jix ecꞌ can tzꞌeytzꞌon ebꞌ ja wu jaxca uqꞌuem an.

16 Jaach tiꞌ, manxa oj jaach iꞌle a can; tol oj iꞌle el ja qꞌuixwil. Jaꞌ Jehová oj jaach akꞌon qꞌuixwoj aoj, jaxca ebꞌ uqꞌuem an. Oj ja wabꞌ syaꞌil yu Jehová, jaxca syaꞌilal jix ja waoc yibꞌan wan nación tuꞌ. Yu jun tuꞌ, yuxan jaꞌ ja meynebꞌail tuꞌ, qꞌuixwiltaj xacꞌal oj ja wun can yu.

17 Jaach tiꞌ, jix ja kꞌajey teꞌ mimej teꞌ bꞌey txꞌotxꞌ Líbano; jal tinaniꞌ, chach akꞌle lawoj eyoj, jix ja makꞌ cam noꞌ xol-laj teꞌal noꞌ, yuxan jaꞌ tinaniꞌ jaꞌ noꞌ oj aon oc xiwcꞌulal ja win. Queytuꞌ oj jaach utele yu ebꞌ, yutol ecꞌal mac jix ja makꞌ camoj, catuꞌ ma okꞌ ja cꞌul yin ja wet animail bꞌey yul yibꞌankꞌinal, cꞌal bꞌey junjun conobꞌ.

18 ¿Tzet yopiso junoj comon dios waꞌnebꞌil yu ebꞌ ánima? Asan yin cu yijbꞌan qꞌueytoj. Jaꞌ wan tuꞌ, cꞌam chi skeꞌ skꞌanabꞌi. ¿Tzet yu, yuxan jaꞌ jun mac chi waꞌnen wan echele tuꞌ, chi yaoc yipoj scꞌul jun echele tuꞌ?

19 Caw okꞌbꞌal jex cꞌul, jaex tol che yal tet junoj echele tol teꞌ jaxca tiꞌ: Iꞌel ja weyan, je chi tet wan teꞌ tuꞌ. Aan waanoj, je chi tet chꞌen chꞌen tol cꞌam cꞌaltaꞌ chi skeꞌ skꞌanabꞌi. ¿Tumi chi skeꞌ xꞌoxon wan tuꞌ junoj tzetyetal ey jex che naꞌ? Jaꞌ wan tuꞌ, cꞌam tzet chi skeꞌ yu, yutol cꞌam spixan, caxcꞌal tol chi kopopi xacꞌal yili yu chꞌen oro ma yu chꞌen plata eyoc yinlaj.

20 Jal jin jain Jehová jin tiꞌ ey jin cꞌal ecꞌ bꞌey yul jin templo tol asan jin ey wet jin txꞌojli. Yu jun tuꞌ, masanil jantaj tzet ey sat txꞌotxꞌ txꞌotxꞌ tiꞌ, tzꞌin ojabꞌ ẍi ebꞌ jin sattaj jain Jehová jin tiꞌ, ẍi Dios.