Jaꞌ Skꞌane Dios Jix Stzꞌibꞌe
HABACUC
Jix Yal Naj Habacuc Yu Tzet Man Jichanoj
1
Jain Habacuc jin tiꞌ, ẍejabꞌ jin Jehová,tol jix kꞌanabꞌ ey jin yin weyicheal:
2 Jix walon tet Jehová: Jaach Jehová jin Diosal, ¿bꞌakꞌin oj ja chaꞌ ja wabꞌ tzet chi walaꞌ? Ilaꞌ tol yelcꞌulal chi el waw ey jaach yin jin kꞌanon ja colwal. ¿Tumi man cꞌal oj jaach colwa ketoj jon? ¿Tumi jantajxa chi a waw ey jaach yu jantaj spenail ey cu xol tiꞌ jon?
3 ¿Tzet yu, yuxan cha txꞌox jantaj syaꞌilal cꞌal spenail tiꞌ wilaꞌ? Caw chi wil yetnele ebꞌ wet animail, yetoj cꞌal jantaj spenail. Masanil xacꞌal bꞌey ey jowal cꞌal teelebꞌail.
4 Cꞌamxa chi oc yopiso ley, manxa cꞌal watxꞌoj chi yun snaꞌle oc yin skꞌane ebꞌ ánima, jaꞌ ebꞌ chi unen spenail chi ujten ecꞌ ebꞌ watxꞌ snaꞌbꞌal. Chi sqꞌuextoj sjichanil ebꞌ yin spenail, jin chi.
Spajtzebꞌal Kꞌane Chi Yakꞌ Jehová
5 Jix takꞌwi Jehová jaxca tiꞌ: Chi cam je yilon wan nacionlaj joyanxa oc je yinlaj tiꞌ. Chi cam je yiloni, catuꞌ xiw ojabꞌ a je cꞌul yu. Tuxa jix jin naꞌ tzet oj wun yul je tiempoal tiꞌ, asan xin, man cꞌaltaꞌ oj je yaoc yin je cꞌul yet oj al-le ey jex.
6 Oj wiꞌtej ebꞌ Caldeo, jaꞌton ebꞌ a Babilonia, yin yakꞌon jowal je yin; jaꞌ wan ánima tuꞌ, junelne cꞌam smimancꞌulal ebꞌ. Asan jowal chi yoche ebꞌ, chi ecꞌ joyoyoj ebꞌ bꞌey masanil yul yibꞌankꞌinal tiꞌ, yu yiꞌon can oc txꞌotxꞌ txꞌotxꞌ ebꞌ tol man cꞌaltaꞌ yetoj ebꞌ.
7 Jaꞌ ebꞌ tuꞌ, caw ey smey ebꞌ. Caw oj xiw ebꞌ ánima yu ebꞌ. Caw chi smimanbꞌane sbꞌa ebꞌ, asan sley ebꞌ yul yet chi yakꞌbꞌalne.
8 Yel xacꞌal jelan sbꞌey ẍe ebꞌ yintaj noꞌ tzꞌibꞌin bꞌalam. Yel xacꞌal ecꞌbꞌan sjowal ebꞌ yintaj noꞌ ooj chi ecꞌ yet akꞌbꞌalil. Cꞌamxa chi alcha jantaj sbꞌisil ẍe ebꞌ tuꞌ, naat tacꞌal ey ebꞌ catuꞌ chi too jucna ebꞌ jaxca chi yun stoo lemna noꞌ chii yet chi smitxꞌon junoj ẍiꞌbꞌe.
9 Masanil chi yakꞌ lawoj el ebꞌ bꞌey chi too cꞌal ebꞌ, catuꞌ chi a can xiwcꞌulal yu jantaj tzet chi yun ebꞌ. Yel xacꞌal miman sbꞌisil ebꞌ ánima oj iꞌletoj jaxca presowomal yu ebꞌ, jaxca yarenail stiꞌ jaꞌ mar.
10 Oj bꞌuchwa ebꞌ yin ebꞌ rey, cꞌal yin ebꞌ ánima tol miman yeloc apnoj, yaloni. Tucꞌal oj tzee oc ebꞌ yin wan conobꞌ tol eyoc smuroal. Chi swaꞌne a bꞌulan txꞌotxꞌ ebꞌ yin smuroal conobꞌ tuꞌ, catuꞌ oj eyqꞌuey conobꞌ tuꞌ yu ebꞌ.
11 Chi cꞌal yakꞌ lawoj ey junoj conobꞌ ebꞌ tuꞌ, catuꞌ chi too ebꞌ yin junojxa conobꞌ yu yakꞌon jowal, jaxca wal chi yun yecꞌ junoj miman cajxuchum kaꞌeꞌ. Caw chi oc spenail ebꞌ jin sattaj, yutol jaꞌ yip ebꞌ eyoc sdiosaloj yaloni, ẍi Jehová.
Jix Yalon Pax Naj Habacuc Junelxa
12 Jix walon tet Jehová jaxca tiꞌ: Jaach Jehová jin Diosal, tumi cꞌam jaach ey jaach ecꞌ yin junelne. Jaach jin Diosal, miman ja weloc apnoj. Cꞌam ojabꞌ chi cu cam yin junelne jon. Jaach jix ja wakꞌ yipal ebꞌ Caldeo, jaꞌton ebꞌ Babilonia, yu ja waon oc syaꞌilal kibꞌan jon.
13 Jaach tiꞌ, cꞌam chi ẍaꞌ ja cꞌul spenail, tam wal chi ẍaꞌ ja cꞌul ja wilon oc cu cꞌam watxꞌilal jaon ánima jon tiꞌ jon. ¿Tzet yu, yuxan tucꞌal oj jaach oc tꞌanan yin ebꞌ penawom, yajbꞌan tol jaꞌ ebꞌ watxꞌ to wal snaꞌbꞌal chi akꞌle lawoj yu ebꞌ?
14 ¿Tzet yu, yuxan tol laan xacꞌal oj jon ja wute jaon ánima jon tiꞌ jaxca xacꞌal noꞌ pescado ey bꞌey yul jaꞌ mar, jaxca xacꞌal noꞌ noꞌ cꞌam syaawil?
15 Jaꞌ ebꞌ Caldeo chi yakꞌ yaawil bꞌey yul-laj wanxa conobꞌlaj jaxca chi yun ebꞌ mitxꞌom pescado. Chi smitxꞌon noꞌ ebꞌ yetoj chꞌen anzuelo, cꞌal yetoj txim. Caw chi tzala ebꞌ yet chi aol bꞌulan noꞌ stiꞌ jaꞌ yu ebꞌ.
16 Yu jun tuꞌ, yuxan jaꞌ ebꞌ mitxꞌom pescado tuꞌ, chi oc ebꞌ yin eyilal tet wan txim mitxꞌbꞌal pescado tuꞌ, cꞌal tet yanzuelo ebꞌ. Chi yakꞌon xaambꞌal cꞌal yakꞌon tzꞌaꞌ incienso ebꞌ, yu xꞌoxon el eyilal ebꞌ. Caw chi tzala ebꞌ yu watxꞌ chi low ebꞌ yu wan mitxꞌkꞌabꞌe tuꞌ.
17 ¿Tumi jaxca tuꞌ oj yun cu mitxꞌle yu ebꞌ Caldeo yetoj smitxꞌbꞌal tuꞌ? ¿Tumi oj makꞌle xacꞌal cam wan nación tiꞌ yu ebꞌ, yin tol cꞌamxa cꞌal mimancꞌulal?