2 Jaach Jehová, jin Diosal jaach, jaꞌ yet chi wabꞌen masanil tzet jix ja wun yet peyxa cꞌal tinaniꞌ, caw chi qꞌuey xacꞌal a jin cꞌul wabꞌeni. Yun ojabꞌ cꞌal yul cu tiempoal tiꞌ, jaxca tzet jix ja wun yet peyxa tuꞌ. Txꞌox cꞌal ja camcꞌulal kin jon, caxcꞌal ey bꞌey chi tit sjowal ja cꞌul kin, tol ojabꞌ chi okꞌ cꞌal ja cꞌul kin jon.

3 Jaach jin Diosal, asanxane jaach Miman ja Weloc Apnoj bꞌey jun wonan chi yij Parán yul yet Temán. Jix majcha el satcan yu ja tzejejial; cꞌal masanil jantaj tzet ey bꞌey yul yibꞌankꞌinal tiꞌ, jix yal watxꞌ kꞌane ebꞌ ey jaach.

4 Ey jaach oc snan xol ja tzejejial. Chi eltej koplabꞌoj raya yul ja kꞌabꞌ; jaꞌ chi txꞌoxon eloj tol ey ja wipal cꞌuan ecꞌoj.

5 Jaꞌ wan yaꞌbꞌil tol ey smey, jaꞌ bꞌabꞌel ja sattaj; jaꞌ bꞌey chach ecꞌtoj chi oc can camich yu.

6 Jaꞌ yet chach oc tucanoj, chi bꞌilwi a txꞌotxꞌ txꞌotxꞌ tiꞌ. Caw chi xiwa masanil conobꞌlaj yet chach oc tꞌanan yin ebꞌ. Jaꞌ wan mimej wonan ey cꞌaltaꞌ yet peyxa jix poꞌotoj ebꞌ, jix uchchatoj masanil wan wonan tuꞌ, jaꞌton bꞌey jix jaach ecꞌ cꞌal yet tax yichbꞌanil.

7 Jaꞌ ebꞌ ánima caan bꞌey conobꞌ Cusán, jix wil yoc yin bꞌiscꞌulal, catuꞌ jix xiwa ebꞌ caan bꞌey Madián.

8 Jaach jin Diosal, man yin oj jaꞌ miman jaꞌ jix tit ja jowal. Man pax yin oj jaꞌ mar jix tit sjowal ja cꞌul. Jaꞌ yet jix jaach too yin jowal yet cha wakꞌon qꞌueyel ebꞌ chi jowi oc ja win, jaxca tol jix jaach atoj yibꞌan che, cꞌal yul carruaje yet jowal.

9 Jaxca tol jix ja wiꞌatej ja julbꞌal yul stzꞌuumal, yet chach julwa yetoj. Jix ja waon eytej jaꞌ miman jaꞌ bꞌey satcan tuꞌ, jix bꞌeytoj jaꞌ sat txꞌotxꞌ tiꞌ.

10 Caw jix bꞌilwi mimej wonan yet jix ja txꞌoxon ja bꞌa. Jix tit mimej yaxnabꞌ bꞌey satcan, catuꞌ jix a yaw jaꞌ mar yet chi bꞌilwi a sat jaꞌ, eyxa smey yili yet jix ja txꞌoxon ja wipalil tuꞌ.

11 Jix oc tucan cꞌu, yetoj xꞌaaw yet jix eltoj koplabꞌoj skꞌakꞌal ja julbꞌal cꞌal chꞌen ja lanza.

12 Yetoj sjowal ja cꞌul jix ja tecꞌon ey txꞌotxꞌ txꞌotxꞌ tiꞌ. Yetoj ja chichoncꞌulal jix ja tecꞌon ey nacionlaj.

13 Jix jaach eltej colwa yin ja conobꞌ, cꞌal yin naj rey tol sicꞌbꞌil el ja wu. Jix ja makꞌ cam syaawil ebꞌ penawom. Jix ja wakꞌon lawoj ey sconobꞌ ebꞌ, masantaꞌcꞌal jix txeclo a cimientoal yichlaj xeꞌ.

14 Jaꞌ ebꞌ yaaw yeoc xol ebꞌ cu cajat tuꞌ jon, junne cꞌal jix smakꞌle cam sbꞌa ebꞌ yetoj smitxꞌkꞌabꞌ yet jowal, yet jix yochen ebꞌ tol chi cu yakꞌ lawoj ey ebꞌ, yaloni. Jix tzala xacꞌal scꞌul ebꞌ, jaxca junoj chi yoche chi smakꞌ cam junoj yeynajil ánima yin ewantajil.

15 Jaxca tol jix ja tecꞌey jaꞌ mar yetoj noꞌ ja che, yuxan caw jix bꞌilwi a jaꞌ miman jaꞌ tuꞌ.

16 Jaꞌ yet chi wabꞌen masanil wan tiꞌ, caw chin xiwaoj. Chi bꞌilwi a xaj jin tiꞌ. Cꞌamxa yip masanil jin mimanil, tuxa cꞌal chin telcꞌotoj. Caxcꞌal mi jaxca tuꞌ, asan tol tzalacꞌulal chi yun wechbꞌanen sjul jun scꞌual yet oj jul syaꞌilal yibꞌan ebꞌ chi yakꞌ jowal kin jon.

17-18 Caw ey jin tzalacꞌulal yu Dios jin Colomal. Caxcꞌal cꞌam chi yakꞌ xumac teꞌ higo. Caxcꞌal cꞌam chi yakꞌ sat an uva, cꞌal teꞌ olivo; caxcꞌal cꞌam chi yakꞌ sat masanil awo; caxcꞌal chi lawi ey masanil noꞌ meꞌ, cꞌal noꞌ wacax, caxcꞌal cꞌamxa junoj noꞌ chi ilcha yul scolalil, oj jin bꞌitnoj cꞌal tet Jehová.

19 Jaꞌ Jehová, Naj Kaawil chi akꞌon wip. Chi yakꞌ yip wajan, yet chi skeꞌ jin bꞌey jaxca noꞌ scꞌultajil che, catuꞌ chin yiꞌon atoj bꞌey naat eyaoj, yet watxꞌ chin colchai.