2
Jex a Nínive, jaꞌ ebꞌ oj jex akꞌon lawoj eyoj, lalan stit ebꞌ je yin.A ojabꞌtoj je teynemal bꞌey naat eyaoj, yin smajon bꞌe. Kꞌalwej oc je yespada yin je nan. Yambꞌawej oc masanil ebꞌ je soldado.
2 Caxcꞌal jix elkꞌanele stzetyetal Israel yu ebꞌ je cajat, yuxan laan xacꞌal jix yun can jaxca an uva cꞌamxa skꞌabꞌlaj. Jaꞌ Jehová oj iꞌon a can smimanbꞌilal ebꞌ yicꞌaal Jacob junelxa, jaxca yet yalantoj.
3 Cajin xacꞌal yili smajbꞌal sat julbꞌal ebꞌ je cajat chi tit je yin, cajin xacꞌal yili spichil ebꞌ soldado eyocoj. Watxꞌ xa yeoc ebꞌ yet chi oc ebꞌ yakꞌon jowal. Tuxa cꞌal chi kopopi yili scarruaje yet jowal ebꞌ, cꞌamxa chi oc tucan sbꞌey noꞌ ẍe ebꞌ.
4 Txꞌojxa stoo scarruaje ebꞌ yul-laj calle, xuyuyi xacꞌal yecꞌ yinlaj txombꞌal; laan yili jaxca junoj tzejtebꞌal tol eyoc skꞌakꞌal, laan xacꞌal yecꞌ ebꞌ jaxca letzꞌlom.
5 Jaꞌ naj sreyal conobꞌ Nínive, chi yawte ebꞌ syaawil ebꞌ soldado; tuxa cꞌal chi telcꞌotoj ebꞌ stita. Chi too lemna ebꞌ bꞌey smuroal conobꞌ. Lalan swaꞌxi a bꞌey chi scol sbꞌa ebꞌ.
6 Oj jajcha wan puertalaj bꞌey stiꞌlaj jaꞌ jaꞌ, oj ey wejna wan spalacio ebꞌ yaaw.
7 Oj iꞌle cantoj ix reina yin jaxca presowomal; jaꞌjun ebꞌ ix yakꞌomal servil ix chi toocan yetoj. Tuxa cꞌal chi okꞌ ebꞌ jaxca noꞌ cuateꞌ, catuꞌ chi smakꞌon xaamscꞌul ebꞌ yu cuscꞌulal.
8 Jaxca chi yun yeltoj jaꞌ jaꞌ bꞌey yaman ecꞌoj, queytuꞌ oj yun yela masanil ebꞌ caan bꞌey conobꞌ Nínive. Oj el aw, oj al-le jaxca tiꞌ: Ocanwej tucanoj, meltzaanwej, ẍi. Cꞌamxa mactxequel chi ẍaꞌ yabꞌe.
9 Oj al-le tet ebꞌ chi jowi oc yin conobꞌ jaxca tiꞌ: Iꞌwejtoj chꞌen plata, iꞌwejtoj chꞌen oro, yutol jaꞌ sbꞌeomal conobꞌ Nínive, cꞌam slawubꞌal, ẍi.
10 Tuxa jix akꞌle lawoj ey conobꞌ Nínive, tzꞌinini xacꞌal jix yun canoj. Caw chi pax yip ebꞌ caan bꞌey jun conobꞌ tuꞌ yu xiwcꞌulal. Tuxa cꞌal chi lujlon yajan masanil ebꞌ. Cꞌamxa mac eyto yip. Saj xacꞌal yili sat ebꞌ yu xiwcꞌulal.
11 ¿Tzet jix iꞌon jun conobꞌ Nínive tiꞌ, tol jaxca wal snachꞌen noꞌ bꞌalam yeocoj, bꞌey eyecꞌ noꞌ yetoj yuneꞌ? Jaꞌ noꞌ bꞌalam tuꞌ, yetoj yuneꞌ, watxꞌ xacꞌal yeoc noꞌ chi yabꞌe; ¿tumi eyto mactxequel chi xibꞌteni?
12 Jaxca chi yun junoj noꞌ bꞌalam chi skocꞌ tzꞌilnetoj ẍiꞌbꞌe, catuꞌ jix spoꞌon ecꞌ noꞌ yin noꞌ txutxe yetoj noꞌ yuneꞌ. Caw nonaj xacꞌal yul snachꞌen noꞌ tuꞌ yu chiꞌbꞌe. Queytuꞌ jix yun ebꞌ Nínive tet wanxa ánima.
Lawinaj Ey Conobꞌ Nínive Yin Junelne
13 Jaꞌcaw Jehová, Naj Yaaw yibꞌan masanil chi alon jaxca tiꞌ: Jain eyoc sjowal jin cꞌul je yin jex a Nínive: Oj wakꞌ tzꞌaꞌ je carruaje yet jowal; mucꞌ xacꞌal oj wute cantoj. Oj jin makꞌ cam masanil ebꞌ je soldado, catuꞌ oj wakꞌon lawoj masanil jantaj elkꞌan eyecꞌ je yu bꞌey je conobꞌ tuꞌ. Cꞌamxa bꞌey jow oj yute kꞌanabꞌ sbꞌa ebꞌ je chejabꞌ, ẍi Dios.