2 Jaꞌ Jehová Dios toni, tol chi spajtze yetoj sjowal scꞌul tet ebꞌ chi iꞌon oc jantaj tzetyetal tol smajul Jehová yeocoj. Chi spajtze tet ebꞌ pena chi yute sbꞌa tet, caw chi tit sjowal yin ebꞌ chi jowi oc yin.

3 Jaꞌ Jehová man cꞌuun oj stit sjowal; asan xin, caw ey yipalil, sowalil chi yaoc syaꞌilal yibꞌan ebꞌ ey spenail. Jaꞌ yibꞌan cajxuchum kaꞌeꞌ, jaꞌ tituꞌ chi ecꞌabꞌ Dios; jaꞌ asun, jaxca spojojal yajan yeocoj.

4 Jaꞌ Naj chi aloni, catuꞌ chi tantoj jaꞌ mar. Jacꞌalaꞌ pax Naj chi akꞌon tantoj masanil jaꞌ jaꞌ. Chi etex cantoj yili masanil txꞌotxꞌ txꞌotxꞌ bꞌey Basán, yetoj cꞌal bꞌey wonan Carmelo. Catuꞌ chi etex cꞌal pax toj yili an xumac teꞌ bꞌey Líbano.

5 Caw chi bꞌilwi a wan wonan sattaj Jehová, catuꞌ chi ulitoj txꞌotxꞌ tzalquiltaj yu yipalil. Chi bꞌilwi a masanil txꞌotxꞌ txꞌotxꞌ tiꞌ yet chi oc tꞌanan Jehová yin; chi lujlon pax a masanil ebꞌ ánima bꞌey yul yibꞌankꞌinal sattaj Naj.

6 ¿Mactxequel junoj chi skeꞌ stecꞌbꞌan sbꞌa sattaj sjowal scꞌul Dios? ¿Mactxequel junoj chi skeꞌ stenon oc tucan sjowal scꞌul? Jaꞌ sjowal scꞌul tuꞌ, chi ey kopna jaxca xaj kꞌakꞌ; chi poꞌotoj chꞌen mimej chꞌen yu Naj.

7 Caw watxꞌ scꞌul Jehová; jaꞌ chi colwa yet eyoc cu yaꞌilal. Jaꞌ ebꞌ chi yaoc scꞌul yin, chi col-le ebꞌ yu.

8 Jal pax ebꞌ pena chi yute sbꞌa tet Naj xin, chi akꞌle lawoj ey ebꞌ, jaxca chi yun yijletoj masanil tzetyetal yu jaꞌ elom jaꞌ; jaꞌ kꞌejkꞌinal oj tit can yibꞌan ebꞌ cꞌam chi jijen tzet chi yal Dios.

9 ¿Tzetyetal che naꞌ yin Jehová? Jaꞌ ebꞌ cꞌam chi jijen tzet chi yal Dios, oj qꞌueyle el ebꞌ yin junelne. Cꞌam mac oj skeꞌ stecꞌbꞌan sbꞌa caeloj sattaj Jehová.

10 Caxcꞌal tol laan ebꞌ jaxca teꞌ qꞌuix jelquiẍtaj xacꞌal yeqꞌui, tol oj akꞌle lawoj ey ebꞌ jaxca chi yun stzꞌaꞌey an tajin chꞌim.

11 Jaꞌ bꞌey conobꞌ Nínive, jaꞌ tituꞌ ey mac chi naꞌon spenail yin Jehová, jaꞌton jun pena akꞌomcꞌule.

12 Yu jun tuꞌ, yuxan chi yal Jehová tet sconobꞌ jaxca tiꞌ: Caxcꞌal mi ecꞌal sbꞌisil ebꞌ Asiria, caxcꞌal mi caw ey yip ebꞌ, oj qꞌueyle el ebꞌ. Jain jix waoc syaꞌilal je yibꞌan, asan xin, manxa oj waoc yip jun syaꞌilal tuꞌ je yibꞌan.

13 Oj wakꞌ lawoj ey yopiso ebꞌ Asirio eyoc je yibꞌan, catuꞌ oj jin nicꞌontoj chꞌen cadena pixbꞌil oc je yin, ẍi Dios.

14 Jaꞌcaw Jehová chi alon tet sreyal Asiria jaxca tiꞌ: Cꞌam junoj ja wicꞌaal oj jaach akꞌon can bꞌinaoj. Oj wakꞌ lawoj ey wan ja diosal eyecꞌ yul stemplo. Txequelxa yeoc ja mujbꞌanil bꞌey oj jaach mujleoj, yutol cꞌam ja weloc apnoj, ẍi Jehová.