2 Jaꞌ tinaniꞌ, jaꞌ bꞌey yul sconobꞌal ebꞌ chi awi sbꞌilwi smakꞌle noꞌ che. Nilili xacꞌal sbꞌilwi stit wan carruaje yet jowal, txꞌojxa sbꞌilwi yey yajan noꞌ che. Tuxa cꞌal chi a jirlabꞌoj wan carruaje tuꞌ stita.

3 Chi il-le yecꞌ noꞌ che. Tuxa cꞌal chi koplabꞌi yecꞌ chꞌen espada. Tuxa cꞌal chi kopopi yili xaam chꞌen lanza. Yin xa smilal ey sbꞌisil ebꞌ yasinajtoj yu jowal; yin xa sbꞌulanil yeoc ebꞌ camom. Cꞌamxa chi alcha jantaj mimanile, tuxa cꞌal chi telcꞌotoj ebꞌ ánima yin.

4 Queytuꞌ jix yun sjul yibꞌan conobꞌ Nínive, yutol caw jix etnele wanxa conobꞌlaj yu, jaxca junoj ix amul ix chi smonte oc winaj yin, jaxca junoj ix caw ochbꞌetaj xacꞌal yili. Jaꞌ ebꞌ yaaw bꞌey Nínive, caw jelan ebꞌ yin atxum, cꞌal yin smonten wanojxa conobꞌlaj, yet chi can ebꞌ yalan ẍejbꞌanil ebꞌ.

5 Jaꞌ Jehová, Naj Tol Miman Yeloc Apnoj, jaꞌ chi alon jaxca tiꞌ: Jex a conobꞌ Nínive, caw chi tit jin jowal je yin, yuxan oj jin txꞌox wal el je qꞌuixwiltajil bꞌey xol masanil conobꞌ, jaxca chi yun yiꞌle el spichil junoj ix amul ix sattaj conobꞌ, yu xꞌoxle el sqꞌuixwil,

6 catuꞌ chi kꞌojle oc masanil tzetyetal tzꞌiltaj yin, yet chi txꞌoxle eloj tol yaabꞌil eloj. Queytuꞌ oj yun jin txꞌoxon el sqꞌuixwil conobꞌ Nínive.

7 Jaꞌ masanil mactxequel oj ilon ocoj, tuxa cꞌal oj sbꞌosel sbꞌa ebꞌ scꞌatan. Oj yalon ebꞌ jaxca tiꞌ: Jaꞌ conobꞌ Nínive tiꞌ, tuxa jix lawi eyoj. ¿Macto wal oj okꞌ scꞌul yin? ¿Bꞌeyto wal oj titoc mac oj mimancꞌulnenoj? ẍi ebꞌ, oj yalon ebꞌ.

8 Jex a Nínive ¿Tumi yel xacꞌal watxꞌ jex yintaj ebꞌ a conobꞌ Tebas, jaꞌton jun conobꞌ ey bꞌey stiꞌ jaꞌ miman Nilo, tol joyan cꞌal pax oc ecꞌaloj jaꞌ jaꞌ yinlaj? Jaꞌ jaꞌ eyoc jaxca smuroal oj yinlaj.

9 Cꞌamxa chi bꞌischa ebꞌ soldado yet Etiopía cꞌal ebꞌ yet Egipto jix colwa oc yetoj; ebꞌ a conobꞌ Fut cꞌal ebꞌ a Libia eyoc ebꞌ yetoj.

10 Asan xin, jaꞌ ebꞌ a Tebas jix iꞌle cꞌal pax toj yin presowomal. Jal yuninal ebꞌ, jix makꞌle poꞌo ebꞌ bꞌey xiquinlaj scalleal conobꞌ. Jix ale oc suerte yin ebꞌ miman yeloc apnoj, yu yil-le mac oj ionoj, jix oc cꞌal pax chꞌen cadena yin ebꞌ ijbꞌawom yeoc xol ebꞌ.

11 Jacꞌalaꞌ cꞌal pax jex a Nínive tiꞌ, jaxca xacꞌal uqꞌuem an oj je yun canoj. Oj je yakꞌle je yewbꞌan el je bꞌa tet ebꞌ je cajat, naꞌbꞌa xacꞌal; sowalil oj jex qꞌueyle cꞌaltaꞌ eloj.

12 Jaꞌ masanil je cuartel bꞌey che col je bꞌa, laan xacꞌal oj yun jaxca sat teꞌ higo tol ekꞌomxa, chi titqꞌuey kꞌotlabꞌoj; ta ey mactxequel chi tzicon teꞌ, palan xacꞌal sloꞌon sat teꞌ tuꞌ.

13 Jaꞌ ebꞌ je soldado laan xacꞌal yip ebꞌ jaxca ebꞌ ix ix; jaꞌ spuertail je conobꞌ jajan xacꞌal tet ebꞌ ja cajat, tuxa jix tzꞌaꞌtoj masanil smajil yu kꞌakꞌ.

14 Jex a Nínive, yambꞌawej can oc jaꞌ jaꞌ che yuqꞌueꞌ, yet watxꞌ oj techa tajin tiꞌal je yu yet joyan oc ebꞌ je cajat je yinlaj; awej oc yip smuroal je conobꞌ, ocanwej yin tecꞌo stzokꞌom, catuꞌ che yiꞌontej smolteal yet txꞌotxꞌ ladrillo.

15 Caxcꞌal mi che yun masanil wan tuꞌ, oj jex makꞌle cꞌaltaꞌ camoj. Oj jex nusle tzꞌaꞌoj, oj jex tzokꞌle camoj. Oj jex qꞌueyle cꞌaltaꞌ eloj, jaxca junoj awo chi lawi el yu noꞌ kochiꞌ noꞌ. Jix chꞌibꞌ je bꞌisil jaxca noꞌ kochiꞌ noꞌ, ma jaxca noꞌ tzuu.

16 Jaꞌ ebꞌ je txonwom, jix chꞌibꞌ cꞌal sbꞌisil ebꞌ, yel xacꞌal ecꞌbꞌan jix yun ebꞌ yintaj sbꞌisil weycan. Jaxca noꞌ kochiꞌ noꞌ chi akꞌon lawoj ey masanil tzetyetal, catuꞌ chi toi, jaxca tuꞌ ebꞌ.

17 Jaꞌ ebꞌ je soldado sicꞌbꞌil eloj, laan ebꞌ jaxca junoj miman bꞌulan kochiꞌ noꞌ tol chi oc can bꞌulan bꞌey satlaj yich na yet ey siic, jaxa yet chi el yajan cꞌu, chi too jenenoj. Toj eyto mac otajnen bꞌey chi caꞌ stoocoj.

18 Jaach sreyal Asiria, jaꞌ ebꞌ steynemal ja conobꞌ, weynajxa a ebꞌ. Jaꞌ ebꞌ eyoc yin yopiso ja wetoj chi xew ebꞌ, jaꞌ ebꞌ ja soldado sajleminaj ye cantoj bꞌey sjolomlaj wonan, cꞌamxa mactxequel chi skeꞌ syambꞌan oc ebꞌ.

19 Jaꞌ yu jantaj tzet jix yun slawi ey ja conobꞌ tiꞌ, cꞌamxa swaꞌxubꞌal. Jaꞌ ebꞌ oj abꞌen skꞌumal yu tzet jix jaach iꞌon tuꞌ, caw oj stzakꞌoꞌtane skꞌabꞌ ebꞌ yu tzalacꞌulal. ¿Mactxequel tol ma yabꞌ syaꞌil yu ja penail tol cꞌamxa chi alcha jantaj jun yeoc tuꞌ? ẍi Jehová.