2 jun scꞌual kꞌejkꞌinal, jun scꞌual caw ey asun, yet oj oc moyan bꞌey satcan. Ey wan noꞌ kochiꞌ noꞌ oj juloj, laan xacꞌal noꞌ jaxca ebꞌ soldado caw miman sbꞌisil. Laan stoo cꞌananoj noꞌ jaxca stoo cꞌananoj kꞌejkꞌinal, masantaꞌcꞌal chi majchatoj sjolomlaj wonan yu noꞌ. Cꞌam cꞌal bꞌey yunnaj jaxca tiꞌ yet yalantoj, tam wal oj to yun junelojxa.

3 Laan noꞌ jaxca kꞌakꞌ, masanil oj yakꞌ lawoj eloj. Jaꞌ yet cꞌamto chi jul noꞌ, caw watxꞌ yili sat txꞌotxꞌ txꞌotxꞌ tiꞌ, jaxca xacꞌal yili txꞌotxꞌ Edén. Jaꞌ yet oj lawoj yecꞌ can noꞌ xin, laan xa oj yun can jaxca txꞌotxꞌ cusiltaj txꞌotxꞌ. Cꞌamxa niꞌoj tzet oj colcha canoj.

4 Laan yili sat noꞌ jaxca sat noꞌ che. Chi too lemna noꞌ jaxca chi yun stoo noꞌ che yin jowal.

5 Jaxca sbꞌilwi junoj carruaje yet jowal, ma jaxca sbꞌilwi tajin xajlaj teꞌ chi tzꞌaꞌtoj yu kꞌakꞌ, queytuꞌ sbꞌilwi stit noꞌ bꞌey sjolomlaj wonan. Laan noꞌ jaxca junoj miman bꞌulan soldado caw ey yip, tol txololi xacꞌal stoo yin jowal, queytuꞌ wan noꞌ noꞌ tuꞌ.

6 Jaꞌ yet oj yilon ebꞌ ánima, caw oj bꞌilwoj a ebꞌ yu xiwcꞌulal. Saj xacꞌal oj yun yili sat ebꞌ yu xiwcꞌulal.

7 Jaxca ebꞌ winaj tol jelan yakꞌon jowal, caw jelan sbꞌeyi, tol palan cꞌal yecꞌ yibꞌanlaj muro, tol chi yetcꞌulnetoj stoo yin ebꞌ scajat, cꞌam chi ecꞌ kotxcon stoo yul-laj bꞌe, queytuꞌ wan noꞌ tuꞌ.

8 Cꞌam chi stenle ecꞌ sbꞌa ebꞌ, junjun cꞌal, jichan cꞌal chi yun stoo yul sbꞌe. Watxꞌ cꞌal chi yun yecꞌtoj txololoj xol-laj yespada ebꞌ scajat.

9 Jaꞌ yet chi apni oc lemna noꞌ yin junoj conobꞌ, tol tꞌinan cꞌal yecꞌtoj lemna ebꞌ yibꞌanlaj smuroal conobꞌ, tꞌinan cꞌal yoc yul-laj na. Jaxca elkꞌom chi ecꞌ octoj yul-laj swentanail na.

10 Chi bꞌilwi a txꞌotxꞌ txꞌotxꞌ tiꞌ sattaj noꞌ, caw chi oc moyan satcan yu noꞌ. Chi tan yajan cꞌu, cꞌal yajan xꞌaaw yu yenel noꞌ, cꞌamxa yajan weycan chi koplabꞌi.

11 Jaꞌ Jehová bꞌabꞌel stoo sattaj soldado, catuꞌ chi el yaw yul snukꞌ jaxca sbꞌilwi cꞌu. Cꞌamxa chi alcha jantaj sbꞌisil soldado tuꞌ, cꞌamxa chi bꞌischa jantaj ebꞌ chi jijen ẍejbꞌanil. Eyxa smey jun cꞌual yet sjowal scꞌul Jehová tuꞌ. Cꞌam mactxequel oj skeꞌ stecꞌbꞌan sbꞌa sattaj.

13 Cus ojabꞌ je cꞌul yu je penail. Man ojabꞌ che tziltoj je pichil yu je cuscꞌulal, jaꞌ ojabꞌ je pixan che tziltoj. Meltzaanwej bꞌey Jehová cu Diosal, yutol watxꞌ scꞌul Naj kin. Caw chi okꞌ scꞌul, ey smimancꞌulal, ey pax scamcꞌulal. Bꞌejan scꞌul yiꞌon el jun syaꞌilal tiꞌ kibꞌan.

14 Meltzaanwej bꞌey Naj, tala cꞌuxan cꞌam chi yaoc syaꞌilal kibꞌan, jaꞌ jun tiꞌ chi yunne, tol ojabꞌ chi eytej syaaxilal kibꞌan, catuꞌ chi yakꞌon cu tiriw, cꞌal kuva. Yu jun tuꞌ, eyxa tzet chi skeꞌ kakꞌon yin ofrendail tet.

15 Xuꞌle ojabꞌ noꞌ cacho bꞌey wonan Sión, yet chi yijle nocha sbꞌa masanil ebꞌ conobꞌ.

16 Syambꞌa ojabꞌ oc sbꞌa masanil ebꞌ sconobꞌ Dios, sajbꞌane ojabꞌ sbꞌa ebꞌ. Syambꞌa ojabꞌ cꞌal oc sbꞌa ebꞌ icham winaj, yetoj cꞌal ebꞌ unin, yetoj cꞌal pax ebꞌ lalanto xutxwi. Yetoj cꞌal ebꞌ lalanto snupi, el ojabꞌtej ebꞌ yul-laj sna.

17 Okꞌ ojabꞌ ebꞌ yakꞌomal xaambꞌal, jaꞌton ebꞌ chi akꞌon servil Jehová. Jaꞌ bꞌey snan xol templo yetoj jun yet xaambꞌal, yal ojabꞌ ebꞌ jaxca tiꞌ: Akꞌ mimancꞌulal kibꞌan jaon ja conobꞌ jon tiꞌ, Jaach Jehová jin Diosal. Cꞌam ojabꞌ mactxequel chi cu bꞌuchoni. Cꞌam ojabꞌ chi cu eyqꞌuey yul skꞌabꞌ ebꞌ txꞌoj conobꞌal, cꞌam ojabꞌ chi yal ebꞌ jaxca tiꞌ: ¿Bꞌeytuꞌ eyoc je Diosal tuꞌ? man ojabꞌ ẍi oj ebꞌ, ẍi ojabꞌ ebꞌ yakꞌomal xaambꞌal tuꞌ.

Oj wakꞌ je tiriw, oj wakꞌ je yuva, cꞌal je yaceite olivo, masantaꞌcꞌal oj no je cꞌul. Manxa oj yal jin cꞌul oj bꞌuchwa ebꞌ txꞌoj conobꞌal je yin.

20 Naat oj wiꞌel ebꞌ je cajat oj tit bꞌey norte, catuꞌ oj waon cantoj ebꞌ bꞌey cusiltaj txꞌotxꞌ. Jaꞌ ebꞌ bꞌabꞌel sattaj oj wa cantoj ebꞌ bꞌey yul jaꞌ Camnaj Mar; jal ebꞌ tzajan oc xin, oj wa cantoj ebꞌ bꞌey jaꞌ Mar Mediterráneo, jaꞌ tituꞌ oj kꞌaꞌtoj ebꞌ, catuꞌ oj a sabꞌ ebꞌ, yutol yel xacꞌal pena tzet jix yun ebꞌ je xol, ẍi Jehová.

21 Tzala ojabꞌ ebꞌ ánima caan sat txꞌotxꞌ txꞌotxꞌ tiꞌ. Cꞌam ojabꞌ chi xiw ebꞌ, yutol ey wal tzetyetal tol miman yeloc apnoj oj yun Jehová.

22 Tzala ojabꞌ noꞌ noꞌ ey bꞌey xol-laj teꞌ, cꞌam ojabꞌ chi xiw noꞌ, yutol oj yaaxbꞌoj a an cꞌultaj, oj yakꞌon sat teꞌ teꞌ, caw miman oj yun yakꞌon sat teꞌ higo, cꞌal an uva.

23 Je masanil jex caan jex bꞌey Sión, tzalaanwej. Tzalaanwej yin Jehová cu Diosal, yutol oj yakꞌ nabꞌilkꞌinal ey jon yin stiempoal; jaꞌton bꞌabꞌel nabꞌ cꞌal slawubꞌ nabꞌ, jaxca chi yun cꞌaltaꞌ yet yalantoj.

24 Caw watxꞌ oj yun ixim tiriw, caw miman yal uva, cꞌal aceite olivo oj yakꞌa.

25 Jix yalon Jehová jaxca tiꞌ: Oj wakꞌ sqꞌuexel masanil sat je yawo jix lawi el yu noꞌ kochiꞌ noꞌ jix watoj je xol jaxca ebꞌ soldado.

26 Jaꞌ tinaniꞌ xin, oj jex lowoj masantaꞌcꞌal oj no je cꞌul, catuꞌ oj je yalon je watxꞌ kꞌane ey jin, jain Jehová je Diosal jin, yutol ey tzetyetal tol qꞌueyubꞌtaj xacꞌal jix wun je xol. Cꞌamxa bꞌakꞌin oj je yakꞌ je qꞌuixwiloj.

27 Catuꞌ oj naꞌcha el je yu, jaex Israel jex tiꞌ, tol jain ton Jehová, Dios jin, ey jin cꞌal ecꞌ je xol. Asanne jin, je Diosal jin, cꞌam junojxa. Cꞌamxa bꞌakꞌin oj je yakꞌ je qꞌuixwiloj.

29 Jaꞌ yet jun tiempoal tuꞌ, oj waoc Wespíritu yin ebꞌ naj chin akꞌon servil, cꞌal yin ebꞌ ix chin akꞌon servil.

30 Catuꞌ oj jin txꞌoxon wan tzetyetal tol qꞌueyubꞌtaj xacꞌal yoc bꞌey satcan, cꞌal bꞌey sat txꞌotxꞌ tiꞌ, jaꞌton chicꞌ, kꞌakꞌ, cꞌal jun miman mucꞌ jaxca asun.

31 Oj kꞌejbꞌoj el cꞌu, jaꞌ xꞌaaw, jaxca xacꞌal chicꞌ oj yun can eloj, ẍi Jehová. Jaꞌ wan tiꞌ, oj yun yet cꞌamto chi jul jun scꞌual sjowal jin cꞌul, jain Jehová jin tiꞌ. Jaꞌ yet jun cꞌual tuꞌ, caw miman yeloc apnoj, caw yel xacꞌal ey smey.

32 Jaꞌ masanil mac chi yal sbꞌa ey jin, jain Jehová jin tiꞌ, oj colcha can el ebꞌ. Jaxca wal jix yun walon can eloj, tol jaꞌ ebꞌ caan bꞌey wonan Sión bꞌey Jerusalén, oj colcha can eloj, jaꞌton ebꞌ sicꞌbꞌil el wu, man oj cam ebꞌ.