Yet Oj Naꞌle Oc Yin Masanil Conobꞌlaj
3
Chi yalon pax Jehová jaxca tiꞌ:Jaꞌ yet jun cꞌual tuꞌ oj wiꞌa can Judá cꞌal Jerusalén yin swatxꞌil junelxa.
2 Oj jin yambꞌa oc masanil nacionlaj, catuꞌ oj wiꞌontoj ebꞌ bꞌey spananil txꞌotxꞌ Josafat.a Jaꞌ tituꞌ oj waoc syaꞌilal yibꞌan ebꞌ yu jantaj tzet jix yun ebꞌ yetoj jin conobꞌ Israel, yutol jix sajlemtoj ebꞌ Israel yu ebꞌ bꞌey masanil yul yibꞌankꞌinal tiꞌ. Jix kocꞌ spoꞌonetoj jin txꞌotxꞌ ebꞌ.
3 Jix yakꞌon suerte ebꞌ yin ebꞌ jin conobꞌ; jix txonle el ebꞌ winaj unin, cꞌal ebꞌ ix unin yu ebꞌ, catuꞌ jix sqꞌueyon el chꞌen tumin ebꞌ tuꞌ yin svino, cꞌal yin amulal.
Jaꞌ Syaꞌilal Oj Yakꞌ Jehová Yibꞌan Masanil Nación
4 ¿Jex a Tiro, jex a Sidón, cꞌal jex a Filisteo, tzet che yoche win? ¿Tumi che yoche che pajtze je bꞌa ey jin? Ta che yoche che pajtze je bꞌa, yin eymanil oj wakꞌ spajtzebꞌal ey jex, jaxca wal smooalil. 5 Jaex tiꞌ, jix je yelkꞌane chꞌen plata, cꞌal chꞌen oro ey jin, catuꞌ jix je yiꞌontoj jin bꞌeomal bꞌey je templo. 6 Naat tacꞌal jix je yiꞌ cantoj ebꞌ ánima eyecꞌ bꞌey Judá, yetoj cꞌal pax ebꞌ caan bꞌey Jerusalén; jix je txonontoj ebꞌ tet ebꞌ Griego. 7 Yu jun tuꞌ, jain oj wiꞌeltej ebꞌ bꞌey jix je txontoj ebꞌ tuꞌ, catuꞌ jaex xa oj je yabꞌ syaꞌil wu, jaxca jix yun yabꞌen syaꞌil ebꞌ tuꞌ. 8 Jain caw Jehová jin, chi walaꞌ, tol oj waoc ebꞌ je cꞌaal cꞌal ebꞌ je cutzꞌin yul skꞌabꞌ ebꞌ a Judá. Jaxa ebꞌ tuꞌ oj txonon el ebꞌ tet ebꞌ Sabeo, tol naat tacꞌal bꞌey caan ebꞌ, ẍi Jehová.
9 Alwej wan tiꞌ tet masanil conobꞌlaj: Waꞌnewej je bꞌa yet chex too yin jowal. Awtewej ebꞌ je soldado caw ey yip, catuꞌ chi too ebꞌ yin jowal.
10 Swaꞌne ojabꞌ oc chꞌen azarón ebꞌ yin yespadaoj; jaxa chꞌen jooxbꞌal tiriw, swaꞌne ojabꞌ oc ebꞌ yin slanzaoj; jaꞌ mactxequel tol cꞌam yip, yal ojabꞌi tol caw ey yip ebꞌ tinaniꞌ.
11 Masanil nacionlaj ey yinlaj, tit ojabꞌ ebꞌ yin eymanil, syambꞌa ojabꞌ oc sbꞌa ebꞌ yin yakꞌon jowal. Jaach Jehová jin Diosal, iꞌtej ebꞌ ja soldado caw ey yip, jin chi.
12 Jix yalon pax Jehová jaxca tiꞌ: Yakꞌ ojabꞌ lista sbꞌa masanil conobꞌlaj, catuꞌ chex too bꞌey spananil Josafat, yutol jaꞌ tituꞌ oj naꞌle oc yin masanil conobꞌlaj yu Jehová, cꞌal bꞌey yinlaj conobꞌ tiꞌ.
13 Jaxca chi yun skꞌuple a ixim tiriw tol kꞌanxa, queytuꞌ che yute ebꞌ, yutol jix jul scꞌual snaꞌle oc yin ebꞌ. Tecꞌwej ey ebꞌ, jaxca chi yun stecꞌle el yal an uva watxꞌ xa yeoc yet chi waꞌnele oc yin vinoal, yutol caw penawom ebꞌ.
14 Manxa jantajoj ánima ey bꞌey spananil bꞌey oj naꞌle oc yin ebꞌ. Tuxa wal oj jul scꞌual xꞌoxon sjowal scꞌul Jehová tituꞌ.
15 Jaꞌ cꞌu, cꞌal xꞌaaw manxa oj yakꞌ sajkꞌinalil, yetoj cꞌal pax weycan, manxa oj yakꞌ skopopial.
16 Jaxca sbꞌilwi cꞌu, queytuꞌ oj yun yel yaw yul snukꞌ Jehová bꞌey sjolom wonan Sión bꞌey Jerusalén. Jaꞌ satcan cꞌal txꞌotxꞌ txꞌotxꞌ tiꞌ, oj bꞌilwoj. Jaꞌ Jehová oj colon el sconobꞌ, jaꞌton conobꞌ Israel.
Jaꞌ Stzalacꞌulal Judá Yet Bꞌakꞌin
17 Jix yalon Jehová: Jaex tiꞌ, oj je yotajne eloj, tol jain Jehová je Diosal jin, ey jin ecꞌ bꞌey wonan Sión bꞌey chi oc eyilal ey jin. Jaꞌ conobꞌ Jerusalén tiꞌ, jin conobꞌ xacꞌal oj yun can ocoj. Cꞌamxa bꞌakꞌin oj eyqꞌuey yu ebꞌ txꞌoj conobꞌal junelxa.
18 Jaꞌ yet tuꞌ, caw oj noel bꞌey sjolomlaj wonan yu an uva, cꞌal masanil txꞌotxꞌ tzalquiltaj tol oj no xacꞌal el yu noꞌ wacax. Jaꞌ jaꞌ snukꞌjaꞌlaj bꞌey Judá, caw oj bꞌey yel sne jaꞌ. Jaxa bꞌey jin templo oj aol secna jun snukꞌ jaꞌ, catuꞌ oj maltoj jaꞌ bꞌey sjobꞌeal Sitim.
19 Jal bꞌey Egipto xin, oj etex cantoj; cꞌal Edom, cusiltaj txꞌotxꞌ xacꞌal oj yun cantoj, yutol jix yakꞌ jowal ebꞌ yin Judá. Jaꞌ bꞌey Judá tuꞌ jix malcan ey ẍiqꞌuil ebꞌ cꞌam spenail yu ebꞌ.
20-21 Jain oj jin pajtze scamichal ebꞌ jix smakꞌ cam ebꞌ tuꞌ. Manxa cꞌal oj wakꞌ mimancꞌulal yin spenail ebꞌ. Jal ebꞌ Judá, cꞌal Jerusalén xin, watxꞌ xacꞌal oj yun scaey ecꞌ ebꞌ. Jain Jehová jin tiꞌ, oj jin caey cꞌal ecꞌ bꞌey sjolom wonan Sión, ẍi Dios.