2 Jex icham winaj je yeoc yul conobꞌ tiꞌ, yetoj je masanil jex caan bꞌey yul jun nación tiꞌ. Tumi taꞌ eyxa bꞌey jix je yil tzetyetal laan jaxca jun oj jul tiꞌ. Tumi taꞌ ey bꞌey jix il-le junoj jaxca tiꞌ yet jix ecꞌ ebꞌ cu mam icham yet peyxa.

3 Alwej wan tiꞌ tet ebꞌ je yuninal, jaxa ebꞌ oj alon tet yuninal, jaꞌ ebꞌ tuꞌ oj alon pax tet ebꞌ oj aloj yet bꞌakꞌin.

4 Masanil tzet awbꞌil, pilan jix sloꞌeytoj noꞌ kochiꞌ noꞌ.^a Ta eyto wal tzet jix cancan xin, txꞌojxa pax wanxa tujan noꞌ oj jul laon xacꞌal eytoj.

5 Jaꞌ jaex uqꞌuem jex an tiꞌ, iꞌwej el je weyan. Jaex uqꞌuem vino jex tiꞌ, okꞌanwej, yutol cꞌamxa vino oj je yuqꞌueꞌ.

6 Jaxca wal junoj miman bꞌulan soldado caw ey smey, queytuꞌ oj yun sjul noꞌ kochiꞌ noꞌ bꞌey sat cu txꞌotxꞌ. Cꞌamxa chi bꞌischa jantaj sbꞌisil noꞌ. Ey yee noꞌ jaxca yee noꞌ bꞌalam.

7 Tuxa jix yetnetoj an uva noꞌ, pilan jix yakꞌ cꞌal pax lawoj el teꞌ higo noꞌ. Tzꞌinini xacꞌal jix yun can yu noꞌ. Jix yiꞌon cꞌal pax el stzꞌuumal masanil awo noꞌ, saj xacꞌal jix yun can skꞌabꞌlaj teꞌ.

8 Okꞌanwej jaxca junoj ix kꞌopo ix chi okꞌi, catuꞌ chi spichon sbꞌa yetoj an pichile yet cuscꞌulal, yutol jix cam yichamil ix bꞌey jix yakꞌ stiꞌ oj nupoj yetoj.

9 Jaxca ojabꞌ tuꞌ chi yun yokꞌ ebꞌ yakꞌomal xaambꞌal tet Jehová, yutol cꞌamxa loꞌbꞌe cꞌal yal uva bꞌey stemplo Dios, jaꞌton ofrenda chi akꞌle tet Jehová.

10 Tuxa jix etex el yili masanil sat txꞌotxꞌ txꞌotxꞌ. Jaxca tol eyoc txꞌotxꞌ txꞌotxꞌ yin cuscꞌulal. Tuxa jix lawi ey ixim tiriw, tuxa jix tajtoj an uva, catuꞌ jix etex cꞌal pax el teꞌ olivo.

11 Jaex mulnawom jex tiꞌ, okꞌanwej, cusanwej, yutol pilan jix lawi ey je yawo. Cꞌamxa kꞌupo tiriw cꞌal cebada oj ocoj.

12 Tuxa jix tajel an uva, tuxa jix lawi ey teꞌ higo, catuꞌ jix taj cꞌal pax el teꞌ granada, teꞌ palma, cꞌal teꞌ mansan, yetoj masanil teꞌ awbꞌeal teꞌ. ¡Jaxca tuꞌ jix yun slawi ey stzalacꞌulal ebꞌ ánima!

13 Jaꞌ jaex yakꞌomal jex xaambꞌal tiꞌ, jaex tol chex akꞌwi servil bꞌey jun yet xaambꞌal tiꞌ, pichwej je bꞌa yetoj an eel pichile yet cuscꞌulal, ocanwej bꞌey templo yin ilo akꞌbꞌal, catuꞌ okꞌanwej yu syaꞌilal, yutol jaꞌ bꞌey stemplo Dios, cꞌamxa ixim pan yetoj vino chi akꞌle yin ofrendail.

14 Awtewej masanil ebꞌ ánima, catuꞌ che yijle nocha je bꞌa. Yambꞌawej oc je bꞌa bꞌey stemplo Jehová, yetoj masanil ebꞌ icham winaj yeoc yul conobꞌ, cꞌal masanil ebꞌ ánima, catuꞌ chex txali tet Dios.

15 ¡Ay… caw cawilxa chi jul jun scꞌual sjowal scꞌul Jehová! ¡Jun scꞌual tol eyxa smey yet oj cu qꞌueyle el yu Dios, Naj chi cꞌal skeꞌ yu masanil!

16 Cu sattaj wal catuꞌ jix yiꞌon el cu loꞌbꞌe; cꞌamxa tzalacꞌulal bꞌey stemplo Jehová cu Diosal.

17 Jaꞌ ixim jinat, tucꞌal jix kꞌaꞌ eytoj yul txꞌotxꞌ, yu jun tuꞌ, yuxan cꞌamxa tiriw. Cꞌamxa tzet ey yul cu cꞌunaꞌ, pilan jix lawi el masanil.

18 Caw chi el yaw noꞌ jobꞌbꞌeal noꞌ yecꞌ yu wail. Naꞌbꞌa xacꞌal chi ecꞌ noꞌ wacax sey cꞌultaj. Lalanxa scam noꞌ meꞌ yu wail.

19 Jaach Jehová, jin Diosal, chi a waw ey jaach, yutol pilan jix tajtoj masanil; jaxca tol jix ecꞌ kꞌakꞌ xol an cꞌultaj bꞌey chi low noꞌ noꞌ, cꞌal bꞌey masanil xol-laj teꞌ.

20 Yetoj masanil noꞌ noꞌ ey xol-laj teꞌ, chi a yaw noꞌ ey jaach, yutol jix tantoj masanil jaꞌ snukꞌ jaꞌ, jaxca tol jix tzꞌaꞌtoj masanil an cꞌultaj.