2 Chi a cꞌal can yaon oc spenail ebꞌ. Chi swaꞌne a chꞌen plata ebꞌ yin sdiosal, jaxca chi yoche scꞌul, cꞌal jaxca chi yun stit yin snaꞌbꞌal ebꞌ waꞌnem echele. Chi lawi tuꞌ, chi yalon ebꞌ jaxca tiꞌ: Akꞌwej je xaambꞌal tet, ẍi ebꞌ. Jaꞌ ebꞌ ánima tuꞌ, chi stzꞌubꞌel stiꞌ jun echele tuꞌ ebꞌ, jun jaxca wacax yili tuꞌ.

3 Yu jun tuꞌ, yuxan laan oj yun ebꞌ jaxca junoj asun jotan ey yet chi kꞌinibꞌi, jaxca cꞌal pax yal akꞌbꞌal eey yet skꞌinibꞌalil, tol chi pet qꞌueyaoj. Laan cꞌal pax ebꞌ jaxca smatzꞌical tiriw chi ijletoj yu kaꞌeꞌ, ma jaxca mucꞌ chi eltoj yul junoj swentanail na.

4 Jix yalon Jehová jaxca tiꞌ: Jain Jehová je Diosal jin, yet tax cꞌal ey jex ecꞌ bꞌey txꞌotxꞌ Egipto, cꞌam junojxa che yaloc je diosaloj, yutol asanne jin. Asanne jin je Colomal weocoj.

5 Caw watxꞌ jix yun jex jin teynen bꞌey txꞌotxꞌ cusiltaj txꞌotxꞌ, bꞌey caw tajin sat txꞌotxꞌ.

6 Jaꞌ yet caw jix yakꞌ sobra je loꞌbꞌe, jix jex a can je meynen je bꞌa, catuꞌ jix jin too can qꞌueycꞌulal je yu.

7 Yu jun tuꞌ, jaxca junoj noꞌ bꞌalam oj wute oc jin bꞌa je yin, ma jaxca junoj noꞌ icham león chi majwa yul-laj bꞌe.

8 Oj jin eltej jucna je sattaj, jaxca junoj noꞌ xutx oso tol chi qꞌueytoj yuneꞌ, kocꞌ xacꞌal oj jex wute jaxca junoj noꞌ bꞌalam chi ẍiꞌon xacꞌal eytoj chiꞌbꞌe, ma jaxca chi yun skocꞌ tzilnentoj ẍiꞌbꞌe junoj noꞌ chiꞌwawom noꞌ.

9 Oj jex wakꞌ qꞌueyel jaex Israel jex tiꞌ, cꞌam mactxequel oj skeꞌ stenon ecꞌtoj.

10 Jix je kꞌan je rey, cꞌal ebꞌ chex ijbꞌani, ¿tumi jaꞌ ebꞌ chi skeꞌ steynen je conobꞌ tiꞌ?

11 Eytej jin jowal je yin yet jix wakꞌon je reyal tuꞌ, jacꞌalaꞌ ey cꞌal pax tej jin jowal je yin yet jix wiꞌon cꞌal pax ecꞌ ebꞌ je reyal tuꞌ.

12 Txequel yeoc spenail conobꞌ Israel tiꞌ. Tzꞌibꞌebꞌil jix yun can jantaj spenail tuꞌ.

13 Jaꞌ conobꞌ Israel, chi apni oc scꞌual yet chi snaꞌon sbꞌa scꞌul, caw cꞌam snaꞌbꞌal; jaxca junoj unin man watxꞌoj yeoc yin xutx, yuxan cꞌam chi skeꞌ yali el yet chi jul scꞌual yali eloj, queytuꞌ yeoc ebꞌ.

14 ¿Oj mi jin colcan el jin conobꞌ bꞌey cambꞌal? ¿Oj mi jin colcan el ebꞌ yul skꞌabꞌ camich? Jain oj wakꞌ lawoj camich. Jain oj wakꞌ qꞌueyel cambꞌal tuꞌ. Manxa oj jin txꞌox jin camcꞌulal yin conobꞌ Efraín,

15 caxcꞌal chi a can sbꞌisil xol ebꞌ yet Israelal. Tol oj tit jin jowal yin, jaxca chi yun stit kaꞌeꞌ bꞌey chi aol cꞌu, jaxca ton yecꞌ cajxuchum kaꞌeꞌ bꞌey txꞌotxꞌ cusiltaj txꞌotxꞌ, yuxan oj tantoj jaꞌ snukꞌjaꞌlaj. Oj iꞌletoj masanil sbꞌeomal ebꞌ yu scajat.

16 Jaꞌ conobꞌ Samaria oj yiꞌ cꞌal pax syaꞌilal, yutol pit chi yute sbꞌa ey jin. Oj makꞌle cam ebꞌ yu chꞌen espada. Jaꞌ yuninal ebꞌ oj makꞌle ey ebꞌ sat txꞌotxꞌ yet chi cami. Jaꞌ ebꞌ ix mimejalxa, oj tejle cam ebꞌ yetoj chꞌen espada, ẍi Jehová.