12
Jaꞌ masanil tzet chi yun conobꞌ Israel, naꞌbꞌacꞌal,tucꞌal chi yetne sbꞌa ebꞌ jaxca junoj kaꞌeꞌ man kotajoj bꞌey chi caꞌ stoocoj. Caw chi a can ebꞌ yetnen yet animail, chi yoche cꞌal ebꞌ chi yakꞌ lekꞌtiꞌal. Chi swaꞌne swa kꞌane yetoj ebꞌ Asiria, catuꞌ chi yaontoj aceite olivo yin montebꞌal bꞌey Egipto, ẍi Dios.
2 Jaꞌ ebꞌ a Judá, jaꞌton ebꞌ yicꞌaal Jacob, ey spenail ebꞌ yul sat Jehová. Yu jun tuꞌ, oj ale oc syaꞌilal yibꞌan ebꞌ yu spena bꞌeybꞌal. Oj ẍaꞌ spaj ebꞌ, jatacꞌalaꞌ tzet chi sbꞌeybꞌalne ebꞌ.
3 Ilaꞌ tax yet cꞌamto chi ali naj Jacob tuꞌ, tol mitxꞌan oc yin ẍop yajan yuẍtaj, jal yet icham winajxa xin, jix steelen sbꞌa yetoj Dios.
4 Jix yakꞌle yip yetoj jun ángel, masantaꞌcꞌal jix eyqꞌuey yu. Jix okꞌi, jix skꞌanon swatxꞌcꞌulal jun ángel tuꞌ yibꞌan. Jaꞌ bꞌey Betel jix xꞌox sbꞌa Dios tet, catuꞌ jix kꞌanabꞌ yetoj tituꞌ.
5 Jaꞌ Jehová, Naj tol Miman Yeloc Apnoj, jaꞌton chi bꞌinale sbꞌi tiꞌ.
6 Jex Israel, meltzaanwej bꞌey cu Diosal. Jijem che yute je bꞌa tet, watxꞌ cꞌal che yute je bꞌeybꞌal. Ey ojabꞌ cꞌal oc Naj yipoj je cꞌul.
7 Jaxca tiꞌ yalon Jehová: Jaꞌ ebꞌ txonwom yet Israel, jaꞌ echbꞌal man tzꞌajanoj chi skꞌan ebꞌ, yutol caw chi ẍaꞌ scꞌul ebꞌ yelkꞌanwi.
8 Chi yalon ebꞌ jaxca tiꞌ: Caxcꞌal mi tuxa chi cu oc bꞌeomal, caxcꞌal bꞌeom jon xa; cꞌam mactxequel chi skeꞌ yakꞌon sowalil ey jon, yet chi yalon ebꞌ tol jix cu oc bꞌeomal yin kakꞌon lekꞌtiꞌal yin tzet chi cu txonoꞌ, caxcꞌal ẍi ebꞌ, ẍi Jehová.
9 Chi yalon Jehová jaxca tiꞌ: Jain Jehová jin, je Diosal jin yet tax cꞌal ey jex ecꞌ bꞌey txꞌotxꞌ Egipto, oj jex wakꞌ caey junelxa bꞌey yul-laj je kꞌap na, jaxca yet wan scꞌual yet yaman jex ecꞌ bꞌey txꞌotxꞌ cusiltaj txꞌotxꞌ.
10 Jain tiꞌ, jix jin kꞌanabꞌ tet ebꞌ jin chejabꞌ. Jix wiꞌon cꞌal a can sbꞌisil tzet jix wakꞌ yil ebꞌ yin weyicheal. Jaꞌ ebꞌ tuꞌ, jix wakꞌ alon el cuybꞌanile yin txꞌoxbꞌanileal.
11 Jaꞌ bꞌey Galaad ey sdiosal ebꞌ txꞌoj conobꞌal tuꞌ, cꞌamxa niꞌoj yeloc apnoj oj yun cantoj ebꞌ. Jaꞌ bꞌey Guilgal chi yakꞌ wacax ebꞌ yin xaambꞌalil; laan xa oj yun can jun yet xaambꞌal ebꞌ jaxca chꞌen chꞌen yambꞌabꞌil a bꞌulan bꞌey chi oc mulnail, ẍi Dios.
12 Jaꞌ Jacob, elnaj aoj, jix apni oc yul-laj yet Aram. Jaꞌ tituꞌ jix oc yin ilo meꞌ, yu yiꞌon yistil. 13 Jaꞌ Jehová, jix yakꞌbꞌalne jun ẍejabꞌ yet jix iꞌle eltej conobꞌ Israel bꞌey Egipto. Jacꞌalaꞌ yetoj jun ẍejabꞌ tuꞌ, jix teynele cꞌal.
14 Jal pax ebꞌ yicꞌaal Israel xin, caw jix xꞌemtej sjowal scꞌul Jehová ebꞌ. Caw jix akꞌle tac scꞌul Dios yu ebꞌ. Yu jun tuꞌ, yuxan oj ale oc syaꞌilal yibꞌan ebꞌ yet chi stoolane el ebꞌ jantaj spenail jix yun ebꞌ, jacꞌal oc yu spenail ebꞌ tuꞌ oj eyqꞌuey yibꞌan.