2 Jaꞌ yet jix wawtentej ebꞌ jin cꞌatan, tol yel xacꞌal naat jix yiꞌel sbꞌa ebꞌ jin cꞌatan. Jaꞌ tet wan dios Baal jix yakꞌ xaambꞌal ebꞌ jin conobꞌ tiꞌ. Jix yakꞌ tzꞌaꞌ incienso ebꞌ tet wan echele tuꞌ.

3 Caxcꞌal mi jaxca tuꞌ, jix jin quetz bꞌey ebꞌ conobꞌ Israel; ma yotajne eloj ta tol jain chin teyne, cꞌam pax weloc apnoj yul sat ebꞌ.

4 Jix jin quetztej ebꞌ Israel yin camcꞌulal, jaxca chi yun squetzle bꞌey junoj wacax. Laan jin jaxca junoj mac chi iꞌon el yugo yin junoj wacax, catuꞌ watxꞌ chi yun yakꞌon lowoj, queytuꞌ chi wute jin bꞌa tet ebꞌ jin conobꞌ.

5 Cꞌam cꞌal chi meltzotej niꞌoj ebꞌ jin cꞌatan. Yuxan tol oj meltzotoj ebꞌ junelxa bꞌey Egipto, jaxa conobꞌ Asiria oj yakꞌ yaawil yibꞌan ebꞌ.

6 Jaꞌ chꞌen espada, oj akꞌon lawoj ey conobꞌlaj cꞌal yaldealaj yul yet Israel; oj lawoj ey jantaj scuartel ebꞌ soldado yu jowal. Oj lawoj ey ebꞌ yetoj jantaj tzet naꞌbꞌil yu ebꞌ yul yet.

7 Jaꞌ ebꞌ jin conobꞌ tiꞌ, naꞌan xacꞌal yu ebꞌ tol chi elcan ebꞌ wintaj an. Caxcꞌal chi yal ebꞌ tol Miman Weloc Apnoj, cꞌam pax chi yiꞌa can jin bꞌi ebꞌ.

8 ¿Tzet wal oj yun jex jin bꞌejon can jex conobꞌ Israel? ¿Tzet wal oj yun jex jin bꞌejon can jex yicꞌaal Israel? ¿Chi skeꞌ jex wakꞌon qꞌueyeloj jaxca jix wute conobꞌ Admá? ¿Chi skeꞌ jex wakꞌon qꞌueyeloj jaxca jix wute conobꞌ Seboím?^a Asan xin, yaꞌ chi wabꞌ je yu, yutol chi cus jin cꞌul je yin.

9 Man oj wun jaxca tzet naꞌbꞌil wu yetoj sjowal jin cꞌul je yin. Jex conobꞌ Israel, man oj jex wakꞌ qꞌueyle eloj, yutol Dios jin, catuꞌ man animaoj jin. Ey jin cꞌal ecꞌ je yetoj; Asanxane jin Miman Weloc Apnoj, yuxan man oj jex jin qꞌueyeloj.

10 Oj oc cꞌal tzajan ebꞌ wuninal wintaj, oj el waw jaxca junoj noꞌ bꞌalam. Jaꞌ yet oj el waw tet ebꞌ, queytuꞌ oj yun stit ebꞌ wuninal bꞌey chi too cꞌu, caw oj bꞌilwoj ebꞌ yu xiwcꞌulal.

11 Jaxca noꞌ tzꞌiquin oj yun stit lemna ebꞌ bꞌey Egipto, oj tit cꞌal pax ebꞌ bꞌey Asiria jaxca noꞌ cuateꞌ. Jain caw Jehová jin chi walaꞌ, tol oj wakꞌ caey junjun ebꞌ bꞌey scalubꞌal junelxa.