Oj Uchle Ey Wan Yet Xaambꞌal Ebꞌ Israel
10
Jaꞌ conobꞌ Israel, laan jaxca junoj bꞌocꞌan teꞌ uva caw ey sat;yet cꞌal oc xꞌojli. Jaꞌ yet watxꞌ chi yun sat yawo ebꞌ, cꞌal yet chi a xacꞌal can sbꞌeomal ebꞌ, caw ecꞌal wan yet xaambꞌal tet ebꞌ comon dios chi swaꞌne a ebꞌ. Yel xacꞌal chi a can swaꞌnen a chꞌen chꞌen ebꞌ tol txꞌojxa wal sakꞌalil yili, jaꞌton sdiosal ebꞌ bꞌey chi oc ebꞌ yin eyilal.
2 Jaꞌ ebꞌ Israel tiꞌ, caabꞌ poꞌoan yeoc snaꞌbꞌal ebꞌ. Jaꞌ tinaniꞌ xin, oj stoolane el spenail ebꞌ tuꞌ. Jaꞌ Jehová oj uchon ey masanil wan yet xaambꞌal ebꞌ, cꞌal yuchle ey chꞌen chꞌen yaꞌ yili yu ebꞌ.
3 Yu jun tuꞌ, oj yal jun conobꞌ tiꞌ jaxca tiꞌ: Cꞌam cu reyal, ilaꞌ tol cꞌam yeloc apnoj Jehová yul cu sat. ¿Tzet to wal chi oc junoj rey tuꞌ ku? ẍi ebꞌ.
4 Asan tol chi kꞌanabꞌ cꞌal ebꞌ, chi yakꞌon stiꞌ ebꞌ yin lekꞌtiꞌal kꞌane bꞌey yakꞌnaj can stiꞌ. Man watxꞌoj chi yun swaꞌne yeoc junoj kꞌane ebꞌ, laan ebꞌ jaxca junoj cꞌultaj tol ey svenenoal chi chꞌibꞌa bꞌey chi oc mulnail.
5 Jaꞌ ebꞌ a Samaria, oj bꞌilwoj a ebꞌ yu xiwcꞌulal. Oj okꞌ ebꞌ, yutol oj iꞌletoj jun yechel chꞌen chꞌen wacax ey bꞌey Bet-avén. Yu jun tuꞌ, yuxan chi cus scꞌul ebꞌ conobꞌ, yetoj cꞌal ebꞌ yakꞌomal xaambꞌal, yutol jaꞌ swatxꞌilal yili tuꞌ, tuxa jix qꞌueyaoj.
6 Tol jaꞌ jun yechel swacax ebꞌ tuꞌ, oj iꞌletoj bꞌey Asiria, yet chi akꞌle tet naj rey Jareb, tol miman yeloc apnoj yin yopiso. Queyton tuꞌ oj yun scancan conobꞌ Israel yin qꞌuixwiltajil. Tuxa cꞌal oj qꞌuixwoj a Israel yu tzet jix yute sbꞌa ebꞌ.
7 Tuxa cꞌal oj qꞌueya conobꞌ Samaria yetoj sreyal, jaxca xacꞌal chi yun stoo can bꞌatxatxoj junoj skꞌail teꞌ yibꞌan jaꞌ.
8 Oj lawoj ey stemplo sdiosal ebꞌ txꞌoj conobꞌal, jaꞌton yin wan tuꞌ jix oc spenail ebꞌ conobꞌ Israel. Jaꞌ yibꞌan yet xaambꞌal ebꞌ tuꞌ, jaꞌ tituꞌ oj chꞌibꞌa teꞌ saj qꞌuix. Oj yalon ebꞌ ánima yu wonanlaj jaxca tiꞌ: Toloj wal chi skeꞌ chi cu muji cantoj yalan wan wonan tuꞌ, ẍi ebꞌ. Oj yalon cꞌal pax ebꞌ yu txꞌotxꞌ tzalquiltaj: Toloj wal chi skeꞌ chi tit wejna wan tzalan tuꞌ kibꞌan, ẍi ebꞌ.
Syaꞌilal Ebꞌ Conobꞌ Israel Jix Oc Yu Jehová
9 Jix yalon Jehová jaxca tiꞌ: Jaꞌ ebꞌ conobꞌ Israel tiꞌ, ma cꞌal sbꞌej ebꞌ yaon oc spenail; jatax cꞌal bꞌey conobꞌ Guibeá, jix ẍaꞌel yich yaon oc spenail ebꞌ. Lalan cꞌal yunen spenail ebꞌ tinaniꞌ, yu jun tuꞌ, yuxan tol oj tzajitoj wan penawom tiꞌ yu jowal bꞌey conobꞌ Guibeá tuꞌ.
10 Jaꞌ yet oj tit yin jin cꞌul, oj waoc syaꞌilal yin jun conobꞌ tiꞌ. Oj waoc syaꞌilal ebꞌ yu jantaj spenail ebꞌ, oj oc joyan wan mimej conobꞌlaj yinlaj yu yakꞌon jowal yin ebꞌ.
11 Jaꞌ yet yalantoj, laan conobꞌ Israel jaxca junoj noꞌ wacax tol sucbꞌanebꞌilxa, jijem xacꞌal stecꞌwi tiriw; ma tocꞌal waoc teꞌ yugo yin steel snukꞌ tol sakꞌal yili tuꞌ. Jal pax tinaniꞌ xin, oj waoc teꞌ yugo yin snukꞌ, yet oj oc yin smulnail. Jaꞌ ebꞌ a Judá, jaꞌ yetoj chꞌen kꞌubꞌal txꞌotxꞌ oj wakꞌ mulna ebꞌ, jal pax wanxa ebꞌ yicꞌaal Jacob xin, jaꞌ yetoj chꞌen chꞌen ecꞌal yeoc txolan yee, jaꞌ yin oj mulna ebꞌ.
12 Yu jun tuꞌ, yuxan jix wal tet ebꞌ jaxca tiꞌ: Jaꞌ ojabꞌ sjichanil che bꞌeybꞌalne jaxca chi yun yawle junoj awo tol watxꞌ, yuxan jaꞌ jin camcꞌulal oj je chaꞌ spajtzebꞌaloj. Waꞌnewej oc je bꞌa, bꞌejwej can pit naꞌbꞌale eyoc je yin; smoo xa che yaoc je bꞌa yul jin kꞌabꞌ, masantaꞌcꞌal yet oj jul waon ey colbꞌanile je yibꞌan jaxca xacꞌal nabꞌ, jin chi tet ebꞌ.
13 Asan cꞌal pax spenail chi yun ebꞌ, jix ẍaꞌ spajtzebꞌal spenail ebꞌ tuꞌ. Lalan ẍaꞌon tzetyetal chi yiꞌ ebꞌ yin slekꞌtiꞌal kꞌane tuꞌ.
Yutol jaꞌ wan carruaje yet jowal, cꞌal jantaj sbꞌisil soldado ebꞌ jix yaoc yipoj scꞌul ebꞌ.
14 Yu jun tuꞌ, yuxan oj a uchna masanil ebꞌ soldado, catuꞌ oj lawoj ey scuartel ebꞌ; jaxca jix yun slawi ey conobꞌ Bet-arbel yu naj rey Salmán, yet jix oc jowal, jaꞌton yet jix kocꞌ tzꞌokꞌneletoj ebꞌ ix txutxe, yetoj cꞌal yuneꞌ.
15 Yu cꞌal jantaj spenail ebꞌ tuꞌ, yuxan queytuꞌ oj yun yecꞌtoj masanil yibꞌan ebꞌ caan bꞌey Betel. Yu jun tuꞌ, yuxan jaꞌ naj sreyal Israel oj cam yet skꞌinibꞌalil, ẍi Jehová.